Talaaga o le Soifuaga

Ua Ou Iloa Ieova Ona o Lana Fesoasoani

FAAMATALAINA E FLORENCE CLARK

Na ou uu le lima o si aʻu tane ua tigāina lava. Ona o aʻu o se tasi o le lotu Egelani, na ou tatalo ai i le Atua ina ia toe malosi laʻu tane. Na ou folafola atu, afai e lē oti o ia, o le a ou saʻili loa i le Atua seʻi maua o ia. Ona ou auauna ai lea iā te ia.

NA OU fanau iā Setema 18, 1937, i se nofoaga o tagata Apoliki (Aboriginal) e taʻua o Oombulgurri, i se vaipanoa maouta lava o Ausetalia i sisifo o le Kimberly Plateau ma o loʻu igoa o Florence Chulung.

Ou te manatua taimi saʻoloto ma le fiafia a o oʻu laʻitiiti. Na ou aʻoaʻoina nai mea mai le lotu e uiga i le Atua ma le Tusi Paia, peitaʻi o loʻu tinā na ia aʻoaʻoina aʻu i taʻiala faa-Kerisiano. Sa ia faitau e lē aunoa iā te aʻu le Tusi Paia, ma mai i loʻu talavou na tupu aʻe ai iā te aʻu le naunau mo mea faaleagaga. Na ou fiafia i se tasi o uso o loʻu tinā, auā sa avea ma misionare i lana lotu. I loʻu loto na ou manaʻo ou te faataʻitaʻi i ona ala.

O lo matou nuu lea na taʻua muamua, o le misiona o le Forest River, sa saunia aʻoga mai le vasega tasi e oo i le lima. E na o le lua itula ou te alu ai i le aʻoga i taeao uma. O lona uiga, e leʻi lava aʻu aʻoaʻoga, ma o se mea lea na popole tele ai loʻu tamā. Na manaʻo o ia ina ia lelei aʻoga a lana fanau, o lea na ia manatu ai e tuua Oombulgurri ae siitia atu le aiga i le aai o Wyndham. O le aso na matou ō ai, o se aso faanoanoa lea iā te aʻu, ae peitaʻi i Wyndham, sa ou alu ai i le  aʻoga mo le isi fā tausaga, mai le 1949 e oo i le 1952. Ou te matuā lotofaafetai i loʻu tamā ona ua mafai ona ou maua ia aʻoaʻoga.

Na faigaluega loʻu tinā i se fomaʻi, ma ina ua uma le aʻoga i le 15 o oʻu tausaga, na ofo mai e le fomaʻi lenei se galuega o se teine tausimaʻi i le falemaʻi i Wyndham. Na ou talia fiafia ona i lenā taimi sa matuā faigatā lava ona maua ni galuega.

I ni nai tausaga mulimuli ane, na ou fetaui ai iā Alec o se palagi tausi lafumanu. Na ma faaipoipo i le 1964 i le aai o Derby, o i inā lea sa ou auai e lē aunoa i le lotu Egelani. I se tasi o aso, na ō mai ai Molimau a Ieova i loʻu fale. Na ou fai i ai ou te lē fiafia i la latou lotu ma ia aua neʻi toe ō mai. Peitaʻi, na iai se mea na latou faamatala mai na ou matuā naunau ai lava, e faapea e iai le suafa o le Atua, o Ieova.

“E Lē Mafai Ona Fai Au Tatalo?”

I le 1965, na amata ai ona faigatā le olaga. E faatolu ona tupu faalavelave i laʻu tane, e faalua i lana solofanua ma le isi o le faalavelave tau taavale. O le mea e lelei ai, na toe malosi o ia ma toe faigaluega ai. Peitaʻi, e leʻi umi, ae toe tupu foʻi se isi faalavelave iā te ia i lana solofanua. O le taimi lea, na matuā mafatia o ia i se manuʻa tugā i le ulu. Ina ua ou taunuu i le falemaʻi, na taʻu mai e le fomaʻi o le a oti laʻu tane. Na segia loʻu mauli. Na taʻu atu e se teine fomaʻi i le faifeʻau o lo matou nuu ina ia asiasi mai iā te aʻu, peitaʻi na ia faapea mai: “E leai, seʻi aulia taeao!”

Na ou manaʻo i le faifeʻau e ma te tatalo faatasi ma na ou taʻu atu i le taupousa lea mea. Na ia faapea mai iā te aʻu: “E te valea? E lē mafai ona fai au tatalo?” O lea na amata ai ona ou tatalo i faatusa a le lotu mo se fesoasoani, ae sa siliga tali i seu. Na foliga mai ua matuā vaivai lava laʻu tane ma ua toetoe a oti. Na ou tomānatu, ‘O le a faapefea nei ona ou fesagaʻia le oti o laʻu tane?’ Na ou popole foʻi i laʻu fanau e toʻatolu, o Christine, Nanette ma Geoffrey. O le a faapefea ona ola e aunoa ma se tamā? O se mea e fiafia ai, ina ua mavae aso e tolu, na toe malamalama laʻu tane ma teʻa ai i tua iā Tesema 6, 1966.

E ui ua toe malosi o ia, ae na maua se aafiaga i lona faiʻai. Na galogalo mea iā te ia, ua maitaita ma sauā. Na faigatā iā te ia uiga o tamaiti, ma e ita tele pe a lē tali mai tamaiti e pei o ni tagata matutua. Na matuā faigatā le tausia o ia. Na ou faia uma le tele o mea mo ia. Na ou aʻoaʻoina foʻi ina ia toe iloa faitau ma tusitusi. O le faigatā o le tausia o ia ma le tele o mau galuega i le aiga, na ou maʻi ai i loʻu mafaufau ma ua lē toe mafai ona fai se mea. E fitu tausaga talu ona uma le faalavelave i laʻu tane, ae ma malilie loa ma te nofo valavala mo se taimi ina ia toe faaleleia loʻu ola mālōlōina.

Na matou ō ma tamaiti i le aai o Perth. A o matou leʻi siitia atu, ae ua amata ona suʻesuʻe loʻu uso ma Molimau a Ieova i Kununurra, o se aai laʻitiiti i Ausetalia i Sisifo. Na ia faaali mai iā te aʻu se ata e faatatau i le folafolaga a le Tusi Paia i se parataiso i le lalolagi, mai le tusi O Le Upu Moni E Taʻitaʻia Ai I Le Ola Faavavau. * Na ia faasino mai foʻi iā te aʻu le suafa o le Atua, o Ieova ma na ou fiafia ai. Talu ai e leʻi aʻoaʻoina lava aʻu i nei mea i laʻu lotu, na ou filifili ai e telefoni atu i Molimau a Ieova pe a matou mautū lelei i Perth.

Peitaʻi, na ou faatalatū e faafesootaʻi i latou. I se tasi afiafi, na oomi mai ai le logo o le faitotoʻa. Na alu atu laʻu tama tama i le faitotoʻa, na toe faavave ma faapea mai, “Mama, o lea ua i inei tagata ia na e fai mai e te telefoni i ai.” Na ou teʻi ma fai atu, “Fai i ai ou te lē o i inei!” Ae na ia faapea mai, “Mama, e lē tatau ona ou pepelo.” Na ou lagona le saʻo o si aʻu tama ma alu atu loa i le  faitotoʻa. A o oʻu faafeiloaʻia i laʻua, na ou mātauina le faanunumi o o la foliga. Na la asiasi mai i le isi tagata lea ua siitia ese ma le fale. Na ou valaaulia i laʻua i totonu ma tuʻi fesili, ma na ou maua ni tali faamalieloto mai le Tusi Paia.

I le vaiaso na sosoo ai, na amata ai ona ou suʻesuʻe e lē aunoa le Tusi Paia ma Molimau a Ieova, i le tusi O Le Upu Moni E Taʻitaʻia Ai i Le Ola Faavavau. Na toe fafagu e le suʻesuʻega loʻu naunau mo mea faaleagaga. E lua vaiaso mulimuli ane ai, ae ou auai i le Faamanatuga o le maliu o Iesu Keriso. Na amata ona ou auaʻi i sauniga i Aso Sa, ae e leʻi umi ae ou auai i isi sauniga o le vaiaso. Na amata foʻi ona ou talaʻi atu i isi mea ua ou aʻoaʻoina. Na ou iloa o le fesoasoani i isi e iloa le upu moni na faaleleia ai loʻu mafaufau ma loʻu tulaga tau i faalogona. I le ono masina mulimuli ane ai, na ou papatiso ai i se tauaofiaga itumalo i Perth.

A o oʻu agaʻigaʻi i luma faaleagaga, na ou talisapaia ai le silafaga a Ieova i le paia o le faaipoipoga, e aofia ai le taʻiala a le Tusi Paia o loo i le 1 Korinito 7:13: “O se fafine foʻi o i ai le tane lē faatuatua ua loto ina la nonofo ma ia, aua le faateʻa iā te ia.” Na uunaʻia aʻu e le mau lenei ou te toe foʻi iā Alec.

Toe Foʻi i Derby

Na ou taunuu i Derby iā Iuni 21, 1979, ina ua mavae le silia i le lima tausaga o ma valavala ma laʻu tane. Na fai si faalētonu o oʻu manatu po o le a faapefea nei ona ia tali mai i loʻu toe foʻi atu. Na faateʻia aʻu i lona fiafia i loʻu toe foʻi atu, e ui sa lē fiafia i loʻu avea ma Molimau a Ieova. Na ia manatu e tatau ona ou alu i lana lotu, le lotu lea sa ou iai a o oʻu leʻi alu i Perth. Na ou faamatala atu iā te ia e lē mafai ona faia o lenā mea. Na ou taumafai malosi e faaaloalo i lona tulaga ulu ma fai le mea sili o se avā Kerisiano. Na ou taumafai e talanoa atu iā te ia e uiga iā Ieova, o lana folafolaga mo le lumanaʻi, peitaʻi e leʻi fiafia o ia.

Peitaʻi mulimuli ane, na talia e Alec loʻu olaga fou, ma sa amata ona ia fesoasoani iā te aʻu i tulaga tautupe ina ia ou auai i tauaofiaga ma fonotaga aemaise foʻi sauniga o le vaiaso. Na ou matuā lotofaafetai ina ua ia faatauina se taavale, o se mea aogā tele i nei nofoaga maouta i Ausetalia, ina ia ou faaaogāina i le talaʻiga. Sa masani ona nonofo uso ma tuafāfine e aofia ai le ovasia matagaluega mo ni nai aso i lo matou fale. O le auala lenā na masani ai Alec i nisi o Molimau a Ieova ma na fiafia o ia iā i latou.

Na Ou Lagona e Pei Aʻu o Esekielu

Na ou olioli i asiasiga a uso ma tuafāfine peitaʻi, na ou fesagaʻi ma se luʻi. E na o aʻu lava le Molimau a Ieova i le aai o Derby. O le faapotopotoga e latalata mai o Broome, ma e 135 maila (220 kilomita) le mamao. O lea, na ou manatu ai e faia le mea sili e talaʻi atu ai le tala lelei. O le fesoasoani a Ieova na ou sauni ai ma amata ona talaʻi mai lea fale i lea fale. Na faigatā lenei galuega, ae na ou taumafai e manatua pea upu a Paulo: “Ou te mafaia mea uma lava ona o ia ua faamalosi mai iā te aʻu.”—Filipi 4:13.

E leʻi fiafia faifeʻau o le aai i laʻu galuega, aemaise lava loʻu talaʻi atu i le ʻau Apoliki. Na latou taumafai e faamataʻu ma taofia aʻu e aua neʻi toe talaʻi. O a latou teteega na atili ai ona ou maumauaʻi e talaʻi pea, ma na ou tatalo e lē aunoa iā Ieova e fesoasoani mai iā te aʻu. Sa masani ona ou manatua upu faalaeiau  na avatu iā Esekielu: “Faauta, ua ou faia ou mata ia malosi, ina ia fesagaʻi ma o latou mata, ma lou muaulu ia malō, ina ia fesagaʻi ma o latou muaulu. Ua ou faia lou muaulu ia pei o le samira ua sili le malō i le papa; aua e te fefe iā te i latou, aua foʻi e te mataʻu i o latou mata.”—Esekielu 3:8, 9.

I se tasi o tulaga, na ō mai ai ni tamāloloa se toʻalua iā te aʻu a o fai laʻu faatau. Na la tauemu mai ma le leotetele ma taumafai e faauaʻi mai isi tagata faatau. Na ou lē amanaʻia i laʻua. A o oʻu toe asia se tagata fiafia, na sau ai se tasi faifeʻau o le aai ma tuuaʻia aʻu i le lē talitonu iā Iesu. Na ia seʻi atu le Tusi Paia i loʻu lima, ma lūlū i luma o oʻu foliga ma toetoe a togi mai iā te aʻu. Na ou pulatoʻa i ona mata, ma sii atu ma le agamalu ae maumauaʻi le Ioane 3:16 ma faamautinoa iā te ia ou te faatuatua iā Iesu. Na ia lē mautonu i laʻu tali maumauaʻi atu ma ia savali ese e aunoa ma se tala.

Na ou fiafia e talaʻi atu i le ʻau Apoliki i le aai o Derby. Na taumafai se faifeʻau o le aai e taofi aʻu mai le oo atu i tagata, peitaʻi na toe siitia atu o ia i se isi nofoaga. O lea, na mafai ai ona ou talaʻi atu le feʻau o le Tusi Paia iā i latou. Ua leva ona fia avea aʻu o se misionare e pei o le uso o loʻu tinā, ae o lea ua ou faia le galuega faamisionare, o le fesoasoani lea i isi e malamalama le Afioga a le Atua. E toʻatele le ʻau Apoliki na tali lelei mai i laʻu talaʻiga ma na ou amataina ni suʻesuʻega faale-Tusi Paia ma nisi o i latou.

Manatu Mamafa i Oʻu Manaʻoga Faaleagaga

I le lima tausaga, sa na o aʻu lava le Molimau a Ieova i Derby. Sa fai sina faigatā ona ou malosi faaleagaga e aunoa ma faalaeiauga  mai sauniga faatasi ma uso tapuaʻi. I se tasi o mea, na ou matuā faavaivai lava ma sa ou alu ai loa ou te tiʻetiʻe. Ina ua ou toe foʻi mai i le fale i lenā aoauli, o loo faatali atu se tuafafine ma lana fanau e toʻafitu i lo matou fale. Na latou ō mai ma aumai lomiga mo aʻu mai le faapotopotoga i Broome. Na amata mai i lenā taimi ona faatasi ona sau i le masina le tuafafine o Betty Butterfield, ma matou nonofo i se faaiʻuga o le vaiaso. Na ma ō e talaʻi ma na ma suʻesuʻe faatasi Le Olomatamata i loʻu fale. E faatasi i le masina ona ou alu i Broome mo sauniga ma le talaʻiga.

Na matuā lotofesoasoani le ʻauuso i Broome ma mafai ona latou malaga mamao mai i Derby e fesoasoani iā te aʻu i le talaʻiga. Na latou faalaeiauina uso ma tuafāfine mai isi aai, so o se taimi lava e pasia ai Derby ia asiasi mai iā te aʻu ma talaʻi faatasi. Na latou aumaia foʻi ni lipine ua uma ona puʻe o lauga lautele. O nisi latou te auai faatasi ma aʻu i le suʻesuʻeina o Le Olomatamata. O nei asiasiga pupuu sa matuā faalaeiauina ai lava aʻu.

Na Ō Mai Nisi e Fesoasoani

I nisi tausaga na faalaeiauina atili aʻu, ina ua ō mai Arthur ma Mary Willis, o se ulugalii ua litaea mai le vaega i saute o Ausetalia i Sisifo, e fesoasoani iā te aʻu mo le tolu masina. Na taʻitaʻia e le uso o Willis a matou sauniga ma taʻimua i le talaʻiga. Na matou malaga atu i nuu maouta i le Kimberley Plateau, ma asiasi atu i nofoaga o iai pa povi. O taimi uma e toe foʻi ai le uso ma le tuafafine o Willis, o taimi faanoanoa na o loʻu olaga.

I le faaiʻuga o le 1983 na ou maua ai se tala fiafia, o le a ō mai Danny ma Denise Sturgeon ma la laʻua fanau tama e toʻafā, e nonofo i Derby. Ina ua ō mai, na mafai loa ona faia e lē aunoa a matou sauniga faalevaiaso ma auai faatasi i le talaʻiga. Na faavaeina se faapotopotoga i le 2001. I aso nei, ua iai se faapotopotoga malosi e 24 tagata talaʻi i Derby, e lua toeaina ma se auauna o le faiva o loo latou tausia lelei i matou i le itu faaleagaga. I nisi taimi e oo ai a matou sauniga i le 30.

Pe a ou toe manatu i tausaga ua teʻa, e matuā faamāfanafanaina aʻu e iloa le fesoasoani a Ieova ina ia ou auauna iā te ia. E ui lava ma te lē o tapuaʻi faatasi ma laʻu tane, ae o loo faaauau pea ona ia lagolagoina aʻu i le tele o auala. E toʻalima tagata o loʻu aiga ua avea ma Molimau papatisoina, o laʻu fanau teine e toʻalua, o fanau teine e toʻalua a laʻu fanau, ma le tama teine a loʻu uso. E lē gata i lea, o loo iai foʻi nisi o oʻu tauaiga o loo suʻesuʻe le Tusi Paia ma tagata o Ieova.

Ou te matuā lotofaafetai ua ou iloa Ieova ona o lana fesoasoani. Ua ou maumauaʻi e auauna iā te Ia e faavavau.—Salamo 65:2.

[Faamatalaga pito i lalo]

[Faafanua/Ata i le itulau 15]

(Tagaʻi i le lomiga mo le ata atoa)

AUSETALIA

Wyndham

Kimberley Plateau

Derby

Broome

Perth

[Faamatalaga i Ata]

Kangaroo and lyrebird: Lydekker; koala: Meyers

[Ata i le itulau 14]

Galue o se teine tausimaʻi i le falemaʻi i Wyndham, i le 1953

[Ata i le itulau 15]

O le faapotopotoga i Derby, i le 2005