Savavali i le Ala o Loo Tupu Pea le Malamalama
Savavali i le Ala o Loo Tupu Pea le Malamalama
“O le ala o ē amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.”—FAATAOTO 4:18.
1, 2. O ā ni iʻuga lelei ua oo i tagata o le Atua ona o le tupu pea o le malamalama faaleagaga mai iā Ieova?
O IEOVA le Atua o le Puna o le malamalama, o lea la e pito i tele lona silafia i aafiaga o le oso aʻe o le lā i se pō pogisa. (Salamo 36:9) Na fetalai le Atua, ‘pe a tago atu le malamalama o le taeao i tuluʻiga o le lalolagi, e liua le lalolagi e pei o le omea i le faamaufaailoga, ona latou tutū mai lea e pei se ofu.’ (Iopu 38:12-14) E pei ona suia foliga o le omea vaivai pe a faamaufaailoga i se mea, e faapena foʻi ona faifai mālie ona iloa atu foliga o le lalolagi, a o faasolosolo ina susulu mai le la.
2 O Ieova o le Puna o le malamalama faaleagaga. (Salamo 43:3) O loo faasusulu mai pea e Ieova le malamalama i ona tagata, ae o loo pogisa pea tagata o le lalolagi. O le ā le iʻuga? Ua faapea mai le Tusi Paia: “O le ala o ē amiotonu, e tusa ia ma le malamalama o le ao, o loo tupu pea lona malamalama e oo i le tutonu o le la.” (Faataoto 4:18) O le malamalama o loo tupu pea mai iā Ieova, ua faaauau ona faamalamalama ai le ala o ona tagata. Ua faaleleia ai la latou faalapotopotoga, aʻoaʻoga ma amioga.
Faaleleia le Faalapotopotoga Ona o le Tupu Pea o le Malamalama
3. O le ā le folafolaga o loo taʻua i le Isaia 60:17?
3 Na vavalo mai Ieova e ala i le perofeta o Isaia: “Ou te aumaia le auro e sui aʻi le ʻapa memea; ou te aumaia foʻi le ario e sui aʻi le uʻamea, ma le ʻapa memea e sui aʻi laau, ma uʻamea e sui aʻi maa.” (Isaia 60:17) E faaleleia mea pe a suia se mea faatauvaa i se mea sili ona malosi. Ua faapena foʻi ona faaleleia faatulagaga a le faalapotopotoga o Molimau a Ieova, i le “gataaga o le lalolagi” po o “aso e gata ai.”—Mataio 24:3; 2 Timoteo 3:1.
4. O le ā le faatulagaga na faia i le 1919, ma o ā aogā na maua mai ai?
4 I le amataga o aso e gata ai a o taʻua Molimau a Ieova o Tagata Aʻoga o le Tusi Paia, sa faapalota le filifilia o o latou toeaina ma tiakono. Peitaʻi, na iai toeaina e leʻi naunau i le galuega talaʻi. O nisi o i latou na mumusu e talaʻi, ma taumafai foʻi e vaoia tagata e aua le talaʻi. O lea la, na iai se tofiga fou na amata i faapotopotoga taʻitasi i le 1919, o le tofia lea o se faatonu o le auaunaga. O lenei uso na tofia e le ofisa o le lālā o tagata o le Atua e tusa ai ma agavaa faaleagaga o le uso, ae e leʻi filifilia faapalota e le faapotopotoga. O tiutefai o le faatonu o le auaunaga, o le faamaopoopoina lea o le galuega talaʻi, tofia oganuu, ma faalaeiau tagata ia auai i le galuega talaʻi. Ona o lea, na matuā ola ai le galuega talaʻi o le Malo i le gasologa mai o tausaga.
5. O ā mea na faaleleia i le 1920 e oo i le 1929?
5 Na faagaee atili tagata o le faapotopotoga i le timaʻiga lenei, “Ia faalauiloa, faalauiloa, faalauiloa le Tupu ma lona Malo,” lea na faia i le 1922 i le tauaofiaga a Tagata Aʻoga o le Tusi Paia i Cedar Point i Ohio i Amerika. E oo ane i le 1927, ua faataatia ese le Aso Sa mo le auaunaga i le fanua, ona na manatu o le aso aupito i talafeagai lenā, e auai ai i le galuega talaʻi mai lea fale i lea fale. Aiseā na filifilia ai le Aso Sa? Auā foʻi o le aso lenā na mālōlō ai le toʻatele o tagata mai a latou galuega. O loo faapena foʻi ona asiasi atu Molimau a Ieova i aso nei, i taimi lelei e maua ai tagata i fale, e pei o faaiʻuga o vaiaso ma afiafi.
6. O le ā le iʻugāfono na talia i le 1931, ma na faapefea ona aafia ai le galuega talaʻi o le Malo?
6 Na maua se isi faamalosiauga i le galuega talaʻi o le Malo i le aoauli o le Aso Sa o Iulai 26, 1931, ina ua talia e le ʻauusufono se iʻugāfono i se tauaofiaga na faia muamua i Columbus i Ohio i Amerika, ona sosoo ai lea ma isi atunuu o le lalolagi. O se vaega lenei o le iʻugāfono: “O i tatou o auauna a Ieova le Atua ua tofia e faia se galuega mo lona suafa, ma ona o le usiusitai i lana faatonuga ia momoli le mau iā Iesu Keriso, ma faalauiloa atu i tagata o Ieova o le Atua moni o Lē e ou le malosi uma lava; o lea la ua tatou fiafia ai e talia le igoa na fofogaina e le Alii le Atua, ma tatou te naunau e faaigoa i tatou o molimau a Ieova.” (Isaia 43:10) Na matuā manino mai i lenā igoa le galuega autū a ē e taʻua i lenā suafa! Ioe, e iai le galuega a Ieova mo ana auauna uma. Na tele ina talia fiafia e le ʻauusufono lenā iʻugāfono!
7. O le ā le suiga na faia i le 1932, ma aiseā?
7 Na toʻaʻaga le toʻatele o toeaina e auai ma le lotomaulalo i le galuega talaʻi. Peitaʻi ane, na iai toeaina i nisi vaipanoa ia sa tofia e ala i le palota na matuā tetee i le manatu e faapea, e tatau ona auai tagata uma o le faapotopotoga i le galuega talaʻi. Peitaʻi e leʻi umi ae fai loa nisi faaleleiga. E ala mai i se Olomatamata i le 1932, na faatonuina ai faapotopotoga ia taofi le filifilia e ala i le palota o toeaina ma tiakono. Na i lo lea, e tatau ona latou filifilia faapalota se komiti o le auaunaga o ni tane faaleagaga, o ē e auai i le galuega talaʻi. O lea la, na tuu atu i tane e toʻaʻaga e talaʻi, le vaavaaiga o faapotopotoga ma faapena ona olaola ai le galuega.
Saga Faaleleia Ona o le Tupu Pea o le Malamalama
8. O le ā le mea na faaleleia i le 1938?
8 Na “tupu pea [le] malamalama.” Na muta le filifilia faapalota o uso i le 1938. O auauna uma o le faapotopotoga, na tofia i latou e le ofisa ulu e tusa ai ma agavaa o i le Tusi Paia, i le vaavaaiga a “le auauna faamaoni ma le mafaufau.” (Mataio 24:45-47) Na toetoe o faapotopotoga uma o Molimau a Ieova na talia ma le fiafia lenei suiga, ma faaauau ai ona fua mai le galuega talaʻi.
9. O le ā le faatulagaga na faia i le 1972, ma aiseā ua faaleleia ai mea ona o lenā faatulagaga?
9 Na iai se isi suiga na faia i uso na vaavaaia le faapotopotoga, e amata mai iā Oketopa 1, 1972. Na amata mai i le taimi lenā ona iai le ʻautoeaina e vaavaaia faapotopotoga o Molimau a Ieova i le lalolagi aoao, ae e lē toe vaaia e se auauna po o se toeaina e toʻatasi o le faapotopotoga. O lenei faatulagaga fou na matuā faalaeiau ai uso taʻumatuaina, ina ia ausia agavaa e taʻimua ai i le faapotopotoga. (1 Timoteo 3:1-7) Ona o lea, ua lava ta oso ai le toʻatele o uso i le faatinoina o tiutefai a le faapotopotoga. Ua telē so latou sao i le leoleoina o le toʻatele o tagata fou o ē ua taliaina upu moni o le Tusi Paia!
10. O le ā le faatulagaga na amata i le 1976?
10 Na tofia uso o le Vaega Pule i ni komiti se ono, ma na amata mai iā Ianuari 1, 1976, ona vaavaaia e nei komiti meafai a le faalapotopotoga ma faapotopotoga uma i le lalolagi aoao. O se faamanuiaga le faatonutonuina e “le toʻatele o faipule” po o faufautua, ia vala eseese o le galuega o le Malo!—Faataoto 15:22; 24:6.
11. O le ā se mea na faaleleia i le 1992, ma aiseā?
11 Na iai se isi mea na toe faaleleia i le 1992, lea e pei o le mea na tupu ina ua toe foʻi tagata Isaraelu ma isi o ē na faaaunuua i Papelonia. O le taimi lenā, na lē lava ai tagata sa Levī e vaaia le auaunaga i le malumalu. O lea la, na tuu atu isi tiutefai i tagata Netini e lē o ni Isaraelu, ina ia fesoasoani ai i le ʻau sa Levī. Na faapena foʻi ona tuuina atu isi tiute tauave i nisi o “isi mamoe” i le 1992, ina ia fesoasoani ai i le vasega o le auauna faamaoni ma le mafaufau, a o latou tausia le tele o tiute tauave i le galuega i le lalolagi. Na tofia nei uso mai isi mamoe e fesoasoani i komiti o le Vaega Pule.—Ioane 10:16.
12. Ua faapefea ona avea e Ieova le filemu e fai ma o tatou alii po o taʻimua?
12 O ā iʻuga o nei suiga? Na fetalai Ieova: “E avea foʻi e aʻu ou alii [po o taʻimua] ia filemu, ma ou faipule ia amiotonu.” (Isaia 60:17) Ua “filemu” auauna a Ieova i aso nei, ma ua fai le “amiotonu” ma pule iā i latou, lea e uunaʻia ai i latou e auauna i le Atua. Ua lelei ona faamaopoopoina i latou e faatino le galuega, o le talaʻia o le Malo ma fai tagata ma soo.—Mataio 24:14; 28:19, 20.
Ua Faamalamalama e Ieova Aʻoaʻoga a Ona Tagata
13. Na faapefea ona faamalamalama e Ieova aʻoaʻoga a ona tagata i le 1920 e oo i le 1929?
13 O loo faasolosolo foʻi ona faamalamalama e Ieova aʻoaʻoga a ona tagata. O se faaaʻoaʻoga, o loo taʻua i le Faaaliga 12:1-9 ni mea faafaatusa se tolu—o se “fafine” ua tō ma fanau mai, o se “tarako” ma se “tama tane.” Pe e te silafia o ā mea o loo faasino i ai nei mea taʻitasi? E maua le tali i Le Olomatamata faa-Peretania o Mati 1, 1925, i le mataupu “Ua Fanau Mai le Nuu.” O lenei mataupu, na malamalama atili ai tagata o le Atua i valoaga i le fanau mai o le Malo, lea na iloa ai e lua ni faalapotopotoga o loo iai, o le faalapotopotoga a Ieova ma le faalapotopotoga a Satani. I le 1927/1928, na iloa ai e tagata o le Atua, e lē ōgatusa ma le Tusi Paia le faamanatuina o le Kerisimasi ma aso fanau, ma na latou lē toe faamanatuina ai loa na aso.
14. O ā aʻoaʻoga a le upu moni na faamanino mai i le 1930 e oo i le 1939?
14 Na susulu mai pea le malamalama i aʻoaʻoga se tolu a le upu moni i le 1930 e oo i le 1939. Ua leva ona iloa e Tagata Aʻoga o le Tusi Paia, o “le motu o tagata e toʻatele” i le Faaaliga 7:9-17, e ese mai i le 144,000 o ē o le a pule faatasi ma Keriso o ni tupu ma ositaulaga. (Faaaliga 5:9, 10; 14:1-5) Peitaʻi, e leʻi manino lelei po o ai tonu e faasino i ai le motu o tagata e toʻatele. E pei lava ona iloa lelei foliga o mea i le malamalama o le taeao, na faapena foʻi ona iloa ē ua faasino i ai le motu o tagata e toʻatele i le 1935, o tagata ia o le a faasaoina mai “le puapuaga tele” ma faamoemoe e ola e faavavau i le lalolagi. I le faaiʻuga o le 1935, na faamanino mai ai se manatu na aafia ai fanau aʻoʻoga a Molimau a Ieova i le tele o atunuu. E ui lava ina sasao le lotonuu i le lalolagi aoao, ae na iloa e Molimau a Ieova, o le fāʻalo i le fuʻa o se gaoioiga tau tapuaʻiga. I le tausaga na sosoo ai, na faamalamalama ai se isi aʻoaʻoga moni e faapea na maliu Keriso i se laau, ae lē o se koluse.—Galuega 10:39.
15. O anafea ma na faapefea ona faamatilatila o le toto o se mea paia?
15 A o vevesi le Taua Lona Lua a le Lalolagi, na masani ona tui le toto e togafiti ai fitafita na manunuʻa. Ae ina ua uma le taua, na tupu pea le malamalama e faatatau i le toto, o se mea e paia. Na faalaeiau mai Le Olomatamata faa-Peretania o Iulai 1, 1945 “i tagata tapuaʻi uma o Ieova o ē fia ola e faavavau i le lalolagi fou amiotonu, ia latou iloa o le toto o se mea e paia, ma ia usiusitai i tulafono amiotonu a Ieova e faatatau i lenei mataupu tāua.”
16. O anafea na tatalaina ai le Tusi Paia atoa o le New World Translation of the Holy Scriptures, ma o ā ni mea se lua e mataʻina ai?
16 I le 1946, na tulaʻi ai se manaʻoga ina ia fai se faaliliuga fou o le Tusi Paia e faaaogā ai suʻesuʻega fou, ma ia lē filogia i talitonuga a lotu ua taʻua o Kerisiano. Na amata lenā faaliliuga iā Tesema 1947. Na tatalaina i le 1950 tusi o le Mataio e oo i le Faaaliga i le faa-Peretania, lea e taʻua o le New World Translation of the Christian Greek Scriptures. Na auauaʻi ona tatalaina tusi o le Kenese e oo i le Malaki i le faa-Peretania, i ni tusi se lima e amata mai i le 1953. Na tatalaina le tusi mulimuli i le 1960, ma ua silia i le 12 tausaga talu ona amata le galuega faaliliu. O le 1961 na tatalaina ai le Tusi Paia atoa o le New World Translation of the Holy Scriptures. E tele gagana ua faaliliuina ai lenei Tusi Paia, ma e iai ni mea e mataʻina ai. O loo taʻua ai le suafa o le Atua, o Ieova. E lē gata i lea, ua tuputupu pea le malamalama i le Afioga a le Atua ona o lenei faaliliuga saʻo o uluaʻi tusitusiga.
17. O le ā se isi manatu na faamalamalama mai i le 1962?
17 Na faamanino atili mai i le 1962 ē ua taʻua o “faipule silisili” i le Roma 13:1, ma le tele e usiusitai ai Kerisiano iā i latou na. O se iloiloga totoʻa o le Roma mataupu e 13, Tito 3:1, 2 ma le 1 Peteru 2:13, 17 na manino mai ai o le faaupuga “faipule silisili” e lē o faasino atu iā Ieova le Atua ma Iesu Keriso, ae e faasino atu i taʻitaʻi o malo i le lalolagi.
18. O ā ni upu moni na faamanino mai i le 1980 e oo i le 1989?
18 Na tupu pea le malamalama o le ala o ē amiotonu i tausaga na sosoo atu ai. Na faamalamalama mai i le 1985 le uiga o le taʻuamiotonuina i le “ola,” ma le avea o se uō amiotonu a le Atua. (Roma 5:18; Iakopo 2:23) Na faamalamalama lelei i le 1987 le uiga o le Iupeli Faa-Kerisiano.
19. Ua faapefea ona faasusulu mai pea e Ieova le malamalama i ona tagata i tausaga e leʻi leva atu?
19 Na faamalamalama atili le tuueseeseina o “mamoe” ma “oti” i le 1995. Na iloilo totoʻa i le 1998 le faaaliga a Esekielu i le malumalu, lea o loo faataunuu i ona pō nei. Na faamanino mai i le 1999 le taimi ma le auala e ‘tū ai le mea e inosia i le mea paia.’ (Mataio 24:15, 16; 25:32) Na faamalamalama atili i le 2002 le uiga o le tapuaʻi i le Atua “i le agaga ma le faamaoni.”—Ioane 4:24.
20. O ā isi vala o olaga o tagata o le Atua ua faaleleia?
20 E lē gata ua faaleleia le faalapotopotoga ma aʻoaʻoga, ae ua faaleleia foʻi amioga a Kerisiano. O se faaaʻoaʻoga, i le 1973 na malamalama ai faapea o le taumafa tapaa e “leaga ai le tino” ma o se agasala matuiā. (2 Korinito 7:1) I le sefulu tausaga mulimuli ane ai, na faamatala ai e Le Olomatamata faa-Peretania o Iulai 15, 1983, lo tatou talitonuga i le faaaogāina o laau malosi. O nisi nei o faaaʻoaʻoga o le tupu pea o le malamalama i o tatou aso.
Ia Savavali Pea i le Ala e Tupu Pea le Malamalama
21. O le ā se mea e fesoasoani iā i tatou ia savavali i le ala e tupu pea le malamalama?
21 Na taʻutino mai se uso ua leva ona avea ma toeaina: “E faigatā ona talia se suiga fou, aemaise o le fetuutuunaʻi i ai.” O le ā se mea na fesoasoani iā te ia e talia le tele o mea ua faaleleia, a o avea ma tagata talaʻi o le Malo mo le 48 tausaga? O lana tali lenei: “E tāua le saʻo o la tatou vaai. A tatou lē taliaina mea ua faaleleia, o lona uiga e alu i luma le faalapotopotoga a Ieova ae tuu i tatou i tua. Afai e faigatā ona ou talia ni suiga fou, ona ou manatunatu lea i upu a Peteru iā Iesu: ‘Le Alii e, a matou ō ea iā te ai? O iā te oe upu o le ola faavavau.’ Ona ou fesili ifo lea iā te aʻu, ‘O fea ou te alu i ai—po o le lalolagi pogisa?’ O le mea lenā e fesoasoani iā te aʻu e piiama atu ai pea i le faalapotopotoga a le Atua.”—Ioane 6:68.
22. E faapefea ona aogā iā i tatou le savavali i le malamalama?
22 O loo pogisa faasoloatoa tagata o le lalolagi. Ua matuā eseese tagata o Ieova ma tagata o le lalolagi, a o faasusulu mai pea e Ieova le malamalama i ona tagata. E faapefea ona aogā iā tatou lenei malamalama? E lē aveesea se omo i se auala pogisa pe a faasusulu i ai se molī. E faapena foʻi ona lē aveesea ni mailei, tusa lava pe faasusulu mai le malamalama o le Afioga a le Atua. Peitaʻi ane, e fesoasoani le malamalama mai le Atua, ina ia tatou faamamao mai na mailei, ma savavali i le ala e tupu pea le malamalama. O lea la, seʻi o tatou uaʻi atu pea i valoaga o le Afioga a Ieova, “e pei o se molī e mumū i le mea pogisa.”—2 Peteru 1:19.
Pe E te Manatua?
• O ā vala o le faalapotopotoga na faaleleia e Ieova mo ona tagata?
• O ā aʻoaʻoga na faaleleia a o tupu pea le malamalama?
• O ā ni suiga ua e vaaitino i ai, ma o le ā se mea ua fesoasoani iā te oe e talia ai na suiga?
• Aiseā e te naunau ai e savali i le ala e tupu pea le malamalama?
[Fesili mo le Suʻesuʻega]
[Ata i le itulau 27]
Na faamalosia Tagata Aʻoga o le Tusi Paia i le tauaofiaga i Cedar Point, i Ohio i le 1922 e fai le galuega a le Atua
[Ata i le itulau 29]
Na tatalaina e N. H. Knorr le Tusi Paia “New World Translation of the Christian Greek Scriptures” i le 1950
[Faamatalaga i Ata i le itulau 26]
© 2003 BiblePlaces.com