Se Sauniuniga i le Faia o le Finagalo o le Atua

“Ua matuā galue [le Atua] i mea uma lava, e tusa ma le pule a lona finagalo.”—EFESO 1:11.

1. Aiseā o le a potopoto ai faapotopotoga uma o Molimau a Ieova iā Aperila 12, 2006?

PE TUSA e 16 miliona tagata o le a potopoto e faamanatu le Talisuaga a le Alii, i le afiafipō o Aperila 12, 2006, lea e paʻū i le Aso Lulu. I maota taʻitasi e fai ai sauniga, o le a iai se laulau e tuu ai areto lē faafefeteina ua fai ma faatusa o le tino o Keriso, atoa foʻi ma le uaina mūmū ua fai ma faatusa o lona toto na maligi. O le a muamua ona tufatufaina atu le areto, ona sosoo lea ma le uaina i ē uma ua aofaga potopoto, a o lata ina faaiʻu le lauga o le Faamanatuga o le maliu o Iesu. E toʻatasi pe sili atu foʻi tagata o le a taumafaina le areto ma le uaina i nisi o faapotopotoga o Molimau a Ieova. Peitaʻi ane, e leai nisi e taumamafa i le tele lava o faapotopotoga. Aiseā e toʻaitiiti ai Kerisiano e taumafaina le areto ma le uaina o ē faamoemoe e ola i le lagi, ae e lē taumamafa le toʻatele o Kerisiano o ē faamoemoe e ola e faavavau i le lalolagi?

2, 3. (a) O ā mea na faia e Ieova e tusa ai ma lona finagalo? (e) O ā māfuaaga na faia ai e Ieova le lalolagi ma tagata?

² E iai le finagalo o le Atua, ma ina ia faataunuuina e “matuā galue [o ia] i mea uma lava, e tusa ma le pule a lona finagalo.” (Efeso 1:11) Na muamua lava ona ia faia lona Alo pele e toʻatasi. (Ioane 1:1, 14; Faaaliga 3:14) Ona faia lea e Ieova o ona atalii agaga o agelu, e ala i lona Alo. Mulimuli ane na faia le vanimonimo, le lalolagi ma tagata.—Iopu 38:4, 7; Salamo 103:19-21; Ioane 1:2, 3; Kolose 1:15, 16.

³ E leʻi faia e Ieova le lalolagi ina ia tofotofo ai tagata pe e agavaa e avea ma agelu i le lagi, e pei ona aʻoaʻoina e le tele o lotu ua taʻua o Kerisiano. Na ia faia le lalolagi “ina ia āina.” (Isaia 45:18) Na faia e Ieova le lalolagi mo le fanau a tagata. (Salamo 115:16) Na finagalo Ieova ina ia avea le lalolagi aoao ma parataiso e mau ai tagata amiotonu, latou te galueaʻiina ma tausi i ai. E leai se folafolaga na fai atu iā Atamu ma Eva e la te ō i le lagi pe a feoti.—Kenese 1:26-28; 2:7, 8, 15.

Luʻia le Finagalo o Ieova

4. Na faapefea ona luʻia i le amataga le auala e faatino ai e Ieova lana pule silisili ese?

⁴ Na fouvale se atalii agaga o le Atua ma taumafai e seua le finagalo o Ieova, ma tafili saunoa i lona saʻolotoga e filifili ai. Na ia saveʻuina le filemu o i latou uma na alolofa iā Ieova, ma gauaʻi i lana pule silisili ese. Na uunaʻia e Satani Atamu ma Eva ina ia lē toe ola faalagolago i le Atua. (Kenese 3:1-6) E leʻi  fesiligia e Satani le mana o Ieova. Peitaʻi, na ia luʻia le auala e faatino ai e Ieova lana pule silisili ese, atoa ma Lana aiā e pule ai. O lea la, i le amataga lava o le talaaga o tagata, na lāgā ai i le lalolagi le finauga e uiga i le pule silisili ese a Ieova.

5. O le ā le finauga lona lua na lāgā, ma o ai isi na aafia ai?

⁵ E iai se finauga lona lua na lāgā e Satani i ona pō o Iopu, lea e fesootaʻi atu i le finauga autū o le pule silisili ese. Na fesiligia e Satani le māfuaaga e auauna ma gauaʻi ai tagata iā Ieova. Na finau mai Satani e ala ona auauna tagata i le Atua ona o mea latou te maua mai le Atua, ae latou te fulitua iā te ia pe a tofotofoina i latou. (Iopu 1:7-11; 2:4, 5) E ui lava na taulaʻi atu le finauga i se tagata na auauna iā Ieova, peitaʻi na aafia ai foʻi ma atalii agaga o le Atua ma lona Alo pele e toʻatasi.

6. Na faapefea ona faamaoni Ieova i lona finagalo ma lona suafa?

⁶ Na gaoioi Ieova o se Perofeta ma se Faaola, ona o lona faamaoni i lona finagalo ma le uiga o lona suafa. * Na ia fetalai atu iā Satani: “Ou te faatupuina le feitagaʻi iā te oulua ma le fafine, o lau fanau foʻi ma lana fanau; na te tuʻimomomoina lou ulu, a o oe e te tuʻimomomoina lona mulivae.” (Kenese 3:15) O le a tali atu Ieova i le luʻi a Satani e ala i le Fanau a le “fafine” po o le faalapotopotoga a Ieova i le lagi, ma saunia ai foʻi se auala e mafai ai ona faaolaina tagata na tupuga mai iā Atamu.—Roma 5:21; Kalatia 4:26, 31.

“Le Mea Lilo sa i Lona Finagalo”

7. O le ā le finagalo o Ieova na ia faailoa mai e ala iā Paulo?

⁷ A o tusi atu i Kerisiano i Efeso, na faamatala manino e Paulo le sauniuniga a Ieova mo le faataunuuina o lona finagalo. Na tusi Paulo: “Ua faailoa mai iā te i tatou le mea lilo sa i lona finagalo, e tusa ma lana lava pule tunoa, na ia tuu ai i lona lava finagalo; ina ia na faaopoopoina iā Keriso i le sauniuniga i le faaatoaga o tausaga, o mea uma lava o i le lagi, atoa ma mea o i le lalolagi.” (Efeso 1:9, 10) O le finagalo o Ieova, ina ia autasia ē i le lagi ma ē i le lalolagi, i le gauaʻi ma le alofa i Lana pule silisili ese. (Faaaliga 4:11) O le faia faapea, o le a faapaia ai lona suafa ma faamaonia e pepelo Satani, ma faia ai le finagalo o Ieova i “le lalolagi e pei ona faia i le lagi.”—Mataio 6:10.

8. O le ā le uiga o le upu ua faaliliuina “sauniuniga”?

⁸ O le “pule tunoa” a Ieova po o lona finagalo, o le a faataunuu e ala i se “sauniuniga.” Na taʻua e Paulo se upu o lona uiga o le “faafoeina o se aiga.” E lē o faasino atu i se malo e pei o le Malo o le Mesia, ae e faasino atu i le  auala e faafoe ai mea. * O le auala matagofie o le a faafoe ai e Ieova mea ina ia faataunuu lona finagalo, e aofia ai se “mea lilo” lea e faasolosolo ona faailoa mai a o faagasolo tausaga.—Efeso 1:10; 3:9.

9. Na faapefea ona faasolosolo ona faailoa mai e Ieova le mea lilo o lona finagalo?

⁹ Na faasolosolo ona faailoa mai e Ieova le auala o le a faataunuu ai lona finagalo, e uiga i le Fanau na folafolaina i Etena, e ala i ni feagaiga eseese. O lana feagaiga ma Aperaamo, na faaalia ai o le a fanau mai le Fanau folafolaina i le gafa o Aperaamo, ma ona o ia e mafai ai e “atu nuu uma lava o le lalolagi” ona maua faamanuiaga. Ua faailoa mai foʻi e lenā feagaiga, e iai isi o le a faatasi ma lē e autū i ai le fanau. (Kenese 22:17, 18) Na faailoa mai e le feagaiga o le Tulafono na osia ma le nuu o Isaraelu, na finagalo Ieova i se “malo o ositaulaga.” (Esoto 19:5, 6) Na faaalia i le feagaiga ma Tavita, o le a avea le Fanau ma Ao o se Malo e faavavau. (2 Samuelu 7:12, 13; Salamo 89:3, 4) Ina ua taʻitaʻia e le feagaiga o le Tulafono tagata Iutaia i le Mesia, ona toe faaali mai lea e Ieova o isi vala o le faataunuuga o lona finagalo. (Kalatia 3:19, 24) O tagata o le a faatasi ma lē e autū i ai le fanau, o le a fai i latou ma “malo o ositaulaga” e pei ona valoia mai, ma o le a osia “se feagaiga fou” ma i latou e avea ai i latou ma “Isaraelu” fou, o le Isaraelu faaleagaga.—Ieremia 31:31-34; Eperu 8:7-9. *

10, 11. (a) Na faapefea ona faailoa mai e Ieova le Fanau folafolaina? (e) Aiseā na afio mai ai i le lalolagi le Alo pele e toʻatasi o le Atua?

 ¹⁰ Na taunuu i le taimi e afio mai ai le Fanau folafolaina i le lalolagi, e tusa ai ma le sauniuniga i le faataunuuga o le finagalo o Ieova. Na auina mai e Ieova le agelu o Kaperielu e taʻu iā Maria o le a na fanaua se tama tane, e faaigoa iā Iesu. Na fai atu le agelu iā Maria: “E sili o ia, e taʻua foʻi o le Alo o le Silisili ese; e foaʻi atu e le Alii le Atua iā te ia le nofoaiga a Tavita lona tamā, e fai o ia ma tupu i le aiga o Iakopo e faavavau; o lona malo foʻi e leai sona gataaga.” (Luka 1:32, 33) Ua manino le mata o le vai i le Fanau folafolaina.—Kalatia 3:16; 4:4.

¹¹ Na afio mai i le lalolagi le Alo pele e toʻatasi o Ieova, ina ia tofotofoina e oo i le oti. O le soifuaga o Iesu, o le tali aupito i lelei lenā i le finauga a Satani. Po o le a tumau faamaoni ea Iesu i lona Tamā? Na aofia ai se mea lilo. Na faamalamalama mulimuli ane e Paulo le matafaioi a Iesu: “Ua leai foʻi se taofi ese, e sili lava lenei mea lilo i la [“le amio Atua,” LT]: Ua faaali mai o ia i le tino tagata, Ua faaalia lana amiotonu e le Agaga, ua vaaia e agelu, ua talaʻiina atu i nuu ese, ua faatuatua i ai o ē o i le lalolagi, ua aveina aʻe i le mamalu.” (1 Timoteo 3:16) Ioe, o lona faamaoni e oo i le oti, na saunia ai e Iesu se tali maumauaʻi i le finauga a Satani. Ae e leʻi faailoa mai isi vala o le mea lilo.

“Le Mea Lilo o le Malo o le Atua”

12, 13. (a) O le ā se tasi o vala o “le mea lilo o le malo o le Atua”? (e) O le ā se mea ua aofia ai i le filifilia e Ieova o se aofaʻiga maʻoti o tagata e ō i le lagi?

¹² A o talaʻi i Kalilaia, na faaalia e Iesu e fesootaʻi atu le mea lilo i le Malo o le Mesia. Na ia fetalai atu i ona soo: “Ua foaʻiina atu iā te outou ia outou iloa mea lilo o le malo o le lagi [“malo o le Atua,” Mareko 4:11].” (Mataio 13:11) O se tasi o vala o lenā mea lilo, e aofia ai le filifilia e Ieova o se “lafu mamoe itiiti” o tagata e 144,000, o ē o le a pule faatasi ma lona Alo i le lagi, o se vaega o le fanau.—Luka 12:32; Faaaliga 14:1, 4.

¹³ Talu ai na faia tagata ina ia nonofo i le lalolagi, o lona uiga la o tagata e ō i le lagi, na tatau ona faia i latou e Ieova ma “tagata fou.” (2 Korinito 5:17) A o talanoa mai Peteru o sē e iai lenei faamoemoe lē laumaua e ola i le lagi, na tusi o ia: “Ia faafetaia le Atua, le Tamā o lo tatou Alii o Iesu Keriso, o lē na fanaufouina i tatou ona o lona alofa tele, ina ia iʻu i le faamoemoe ua ola, i le toe tū mai o Iesu Keriso nai ē ua oti, ia iʻu i le tofi e lē pala, e leai se leaga o i ai, e lē mamae lava, o loo teu i le lagi mo outou.”—1 Peteru 1:3, 4.

14. (a) Na faapefea ona aafia tagata e lē o ni Iutaia i “le mea lilo o le malo o le Atua”? (e) Aiseā ua tatou malamalama ai i nei “mea loloto . . . a le Atua”?

¹⁴ O se isi vala o le mea lilo o le Malo, o le finagalo lea o le Atua e faaaofia ni tagata e lē o ni Iutaia, i le aofaʻiga itiiti o ē e valaauina e pule faatasi ma Keriso i le lagi. Na faamatala e Paulo lenei vala o le “sauniuniga” a Ieova po o le auala e faafoe ai mea, ina ia faataunuu lona finagalo: “Sa lē faailoa atu i nisi tupulaga o le fanauga a tagata, faapei ona faaali mai nei e le Agaga, i ana aposetolo paia, ma ana perofeta; ia avea nuu ese ma suli faatasi ma tino e tasi, ma ia tofusia faatasi i lana sa folafola mai ona o Keriso Iesu i le tala lelei.” (Efeso 3:5, 6) Na faailoa atu i “aposetolo paia” le malamalamaga e uiga i lenei vala o le mea lilo. Ana lē seanoa foʻi le fesoasoani a le agaga paia i aso nei, semanū tatou te lē malamalama foʻi i “mea loloto . . . a le Atua.”—1 Korinito 2:10, LT; 4:1; Kolose 1:26, 27.

15, 16. Aiseā na filifilia ai e Ieova tagata e pule faatasi ma Keriso?

 ¹⁵ O “tagata e selau afe ma afe e fā sefulu ma le fā o afe” ua vaaia o loo tutū ma “le Tamaʻi Mamoe” i le mauga o Siona i le lagi, ua “faatauina nai le lalolagi,” “ua faatauina nai tagata, o ē ua faapolopoloina mo le Atua ma le Tamaʻi Mamoe” o Keriso Iesu. (Faaaliga 14:1-4) Na filifilia e Ieova lona atalii agaga ulumatua e fai ma lē e autū i ai le fanau lea na folafolaina i Etena. Ae aiseā na ia filifilia ai tagata e pule faatasi ma Keriso? Na taʻua e Paulo e faapea, o lenei aofaʻiga maʻoti na “valaauina” “e tusa ma le pule tunoa a lona [Ieova] finagalo.”—Roma 8:17, 28-30; Efeso 1:5, 11; 2 Timoteo 1:9.

¹⁶ O le finagalo o Ieova, ina ia faapaia lona suafa ma faamaonia le tonu o lana pule silisili ese. Ona o le poto o lana “sauniuniga” po o lana auala e faafoe ai mea, na auina mai ai e Ieova lona Alo ulumatua i le lalolagi ina ia tofotofoina e oo i le oti. E lē gata i lea, na filifili Ieova e tofia i le Malo o lona Alo, ni tagata na latou sapasapaia foʻi Lana pule silisili ese e oo i le oti.—Efeso 1:8-12; Faaaliga 2:10, 11.

17. Aiseā tatou te lotofaafetai ai ona na soifua muamua o ni tagata ia Keriso ma ē pule faatasi ma ia?

¹⁷ O le alofa tele o Ieova mo le fanau a Atamu, na ala ai ona ia auina mai lona Alo i le lalolagi, ma filifilia tagata e pule faatasi ma lona Alo i le Malo. E faapefea ona aogā lenā mea i tagata e faamaoni iā Ieova, e amata mai iā Apelu seʻia oo mai i le asō? Auā foʻi ua fananau mai tagata i le agasala ma le oti, e tatau la ona faamālōlōina i latou i le itu faaleagaga ma le faaletino ma ia lelei atoatoa i latou, e tusa ai ma le finagalo o Ieova i le amataga. (Roma 5:12) O se faamāfanafanaga mo ē e fia ola e faavavau i le lalolagi, lo latou iloa o le a alofa ma malamalama lelei lo latou Tupu iā i latou, e pei foʻi ona sa ia faia i ona soo a o talaʻi i le lalolagi! (Mataio 11:28, 29; Eperu 2:17, 18; 4:15; 7:25, 26) O se faamāfanafanaga foʻi le iloa, o tane ma fafine faatuatua o ē o le a pule faatasi ma Iesu o ni tupu ma ositaulaga i le lagi, na tauivi foʻi i latou ma vaivaiga o le tino ma na tofo i faafitauli o le olaga e pei lava o i tatou!—Roma 7:21-25.

E Lē Maseua le Finagalo o Ieova

18, 19. Aiseā ua tatou malamalama atili ai i upu a Paulo i le Efeso 1:8-11, ma o ā manatu o le a iloiloina i le mataupu o sosoo mai?

¹⁸ Ua mafai nei ona tatou malamalama atili i le uiga o upu a Paulo i Kerisiano faauuina i le Efeso 1:8-11. Na taʻua e Paulo na faailoa atu e Ieova iā te i latou “le mea lilo sa i lona finagalo,” ma ua latou maua le “tofi” e pule faatasi ma Keriso. Na “tofia” i latou “e tusa ma le finagalo o lē ua matuā galue i mea uma lava, e tusa ma le pule a lona finagalo.” Tatou te iloa e talafeagai lenei mea ma le “sauniuniga” matagofie a Ieova mo le faataunuuina o lona finagalo. Ua tatou malamalama ai foʻi i le māfuaaga ua toʻaitiiti ai Kerisiano, e taumafaina le areto ma le uaina i le Talisuaga a le Alii.

¹⁹ I le mataupu o sosoo mai, o le a tatou iloiloina ai le uiga o le Faamanatuga o le maliu o Keriso mo Kerisiano e faamoemoe i le lagi. O le a tatou iloa ai foʻi le māfuaaga e tatau ai i le faitau miliona o tagata e fia ola e faavavau i le lalolagi, ona matuā naunau atu i le uiga o le Faamanatuga.

[Faamatalaga pito i lalo]

Ia Toe Autalu

• Aiseā na faia ai e Ieova le lalolagi ma tuu i ai tagata?

• Aiseā na tatau ai ona tofotofoina i le lalolagi le Alo pele e toʻatasi o Ieova?

• Aiseā na filifili ai e Ieova tagata ina ia pule faatasi ma Keriso?

[Fesili mo le Suʻesuʻega]