Ua Agavaa mo le Papatisoga Faa-Kerisiano
Ua Agavaa mo le Papatisoga Faa-Kerisiano
“Se ā ea se mea e vaoia ai aʻu e aua le papatisoina o aʻu?”—GALUEGA 8:36.
1, 2. Na faapefea ona amata e Filipo se talanoaga ma se auauna sili o le malo o Aitiope, ma e faamaonia faapefea le naunau o lenei tamāloa i mea faaleagaga?
PE Ā o le tasi i le lua tausaga talu ona maliu Iesu, na faimalaga atu ai i le itu i toga (saute) i le ala mai Ierusalema e agaʻi i Kasa, se tasi o auauna sili o le malo o Aitiope. Sa ia agaʻi atu i se nofoa faataavalevale (kariota) ma o se malaga fitā tele, pe ā ma le afe maila le mamao. Na malaga mamao mai lenei tamāloa i Aitiope e agaʻi atu i Ierusalema ina ia tapuaʻi iā Ieova. Ina ua toe taliu, sa ia faaaogā le taimi umi lea e faitau ai le Afioga a le Atua—o se faamaoniga o lona faatuatua. Na silafia mai e Ieova le naunau moni o lenei tamāloa, ona Ia auina mai lea o se agelu e faasino Filipo e talaʻi i lenei tamāloa.—Galuega 8:26-28.
2 Na faigofie ona amata e Filipo se talanoaga, auā sa leotele le faitau a le Aitiope e pei o le masani a tagata i na aso. Na lagona mai e Filipo le faitauina e le tamāloa o le tusi tāʻai a Isaia. E faigofie lava si fesili a Filipo na gaee ai le naunau o le tamāloa: “Po ua e lagona ea [pe iloa] i mea ua e faitauina?” Na faapogaia ai le talanoaina o le Isaia 53:7, 8. O le iʻuga, na ‘folafola ai e Filipo iā te ia le tala lelei iā Iesu.’—Galuega 8:29-35.
3, 4. (a) Aiseā e leʻi faatalatū ai Filipo e papatisoina loa le Aitiope? (e) O ā fesili o le a tatou talanoaina nei?
3 E leʻi umi ae malamalama le Aitiope i le matafaioi a Iesu i fuafuaga a le Atua, ma le manaʻoga ia avea ma soo papatiso o Keriso. Ma ina ua ia vaaia se vai, sa ia fesili atu iā Filipo: “Se ā ea se mea e vaoia ai aʻu e aua le papatisoina o aʻu?” E mautinoa e tulaga ese lea mea na tupu. O se tamāloa faatuatua le tagata lenei ua uma ona avea ma tagata tapuaʻi iā Ieova, o sē ua liliu i le lotu Iutaia. Atonu o le a umi se taimi e faatali ai mo se avanoa ina ia papatisoina o ia. O le itu e sili ona tāua, sa manino le Aitiope i le mea na faafinagaloina e le Atua mai iā te ia, ma sa manaʻo e tali atu loa i ai. Na talia fiafia e Filipo lona manaʻoga, ma ina ua uma ona papatiso, ona ‘alu ai lea o ia i lana malaga ma le olioli.’ E lē taumatea sa ia talaʻia ma le maelega le tala lelei i lona atunuu.—Galuega 8:36-39.
4 E lē tatau ona manatu māmā pe faatopelau laasaga e taʻitaʻia ai i le tuuina atu ma le papatisoga. Peitaʻi i le faaaʻoaʻoga a le tamāloa Aitiope e taʻu mai ai, e iai taimi e ono lē umi lava ona suʻesuʻeina e nisi le Afioga a le Atua, ae papatiso loa. * Ua talafeagai ai la ona manatunatu i fesili nei: O ā sauniuniga e tatau ona muaʻi fai e se tasi a o leʻi papatiso? O le ā le matua e tatau ona papatiso ai se tasi? O le ā le telē e tatau ona mātaulia ai le taʻumatuaina faaleagaga o se tasi a o leʻi papatisoina? Ma le fesili e sili ona tāua, aiseā e finagalo ai Ieova ia papatiso ana auauna?
Se Maliega Aloaʻia
5, 6. (a) Na faapefea i tagata anamua o le Atua ona tali atu i le alofa o Ieova? (e) O le ā le faiā māfana ma le Atua tatou te maua pe a tatou papatiso?
5 Ina ua laveaʻi e Ieova le fanauga a Isaraelu mai Aikupito, sa finagalo malie o ia e talia i latou e fai ma ana “oloa tāua,” e alofa ma puipui i ai, ma faatulaga e avea “ma nuu paia.” Ae ina ia maua lenā tausiga faapitoa, sa tatau iā Isaraelu ona faamaʻoti pe faamautinoa lelei la latou tali atu i le alofa o le Atua. Na latou tali atu e ala i le malilie e faia ‘mea uma na fetalai mai ai Ieova’ ma osia ai se feagaiga ma ia. (Esoto 19:4-9) I le uluaʻi senituri, na poloaʻi Iesu i ona soo ina ia ō atu e fai foʻi isi tagata o nuu uma ma soo, ma papatiso i latou o ē taliaina ana aʻoaʻoga. O le iai o se faiā lelei ma le Atua sa faalagolago i le faatuatua iā Iesu Keriso ma sosoo ai ma le papatisoina.—Mataio 28:19, 20; Galuega 2:38, 41.
6 Ua iloa mai i nei tala a le Tusi Paia le faamanuia e Ieova o i latou e osia ma tausia se maliega lē maluelue ina ia auauna iā te ia. Ua iloa e Kerisiano o le tuuina atu ma le papatisoga, o ni laasaga talafeagai mo le mauaina o faamanuiaga a Ieova. Ua tatou filifili e savavali i ona ala ma saʻili ana taʻiala. (Salamo 48:14) O le iʻuga, o le a peiseaʻī o loo uu e Ieova o tatou lima ma taʻitaʻi i le ala e ao ona tatou savavali ai.—Salamo 73:23; Isaia 30:21; 41:10, 13.
7. Aiseā e tatau ai ona avea lo tatou tuuina atu ma le papatisoga o se mataupu e fitoitonu iā i tatou lava?
7 O le uia o nei laasaga e tatau ona māfua mai i lo tatou alofa mo Ieova ma se faanaunauga e auauna iā te ia. E lē tatau ona papatiso se tasi ona ua taʻu atu i ai e le isi tagata faapea ua lava le umi na suʻesuʻe ai, pe ona o lea foʻi ua papatiso uma isi ana uō. O le masani a mātua ma isi Kerisiano taʻumatuaina, lo latou faalaeiau i se tasi ina ia mafaufau i le tuuina atu ma le papatisoga. Na timaʻi le aposetolo o Peteru iā i latou na faalogologo iā te ia i le Penetekoso ina ‘ia papatiso.’ (Galuega 2:38) E ui lava i lea, o lo tatou tuuina atu o se mataupu e fitoitonu iā i tatou lava, e lē faia mai fua e se isi. O i tatou lava e ana le filifiliga ina ia faia le finagalo o le Atua.—Salamo 40:8.
Sauniuniga Talafeagai mo le Papatisoina
8, 9. (a) Aiseā e lē faale-Tusi Paia ai le papatisoina o pepe? (e) O ā vala o le agaʻigaʻi i luma faaleagaga o se talavou e tatau ona ia faatino a o leʻi papatisoina?
8 Pe mafai e tamaiti laiti ona fai se tuuina atu ua lelei ona mafaufauina? E lē o taʻua i le Tusi Paia ni tausaga faatapulaa e papatiso ai. Ae mautinoa e lē mafai e pepe ona avea o ni tagata talitonu, e faia ni filifiliga e faavae i le faatuatua, ma faia se tuuina atu i le Atua. (Galuega 8:12) O le faamatalaga a se tusitala o talafaasolopito o Augustus Neander e uiga i Kerisiano o le uluaʻi senituri, na ia taʻua ai i lana tusi General History of the Christian Religion and Church: “I taimi muamua, sa na o tagata matutua na mafai ona papatiso, auā na malamalama lelei na tagata i le uiga o le papatisoga ma lona sootaga vavalalata i le faatuatua.”
9 O nisi talavou e ui ina laiti tausaga, ae mafai ona latou malamalama i mataupu faavae e uiga i le Atua ma ana fuafuaga, ma gaoioi e tusa ai ma na mataupu, a o isi seʻiloga e matutua faatoʻā mafai ona fai. Peitaʻi a o leʻi papatiso se talavou, e tatau ona iai se la faiā vavalalata ma Ieova, ia mautū lona malamalamaga i mataupu faavae o le Tusi Paia, ma ia manino lelei i vala uma e aofia i le tuuina atu, e pei foʻi ona tatau i tagata matutua.
10. O ā laasaga e tatau ona faatino muamua a o leʻi tuuina atu ma papatisoina?
10 Na faatonu e Iesu ona soo ina ia aʻoaʻo i tagata fou mea uma na ia fetalai atu ai. (Mataio 28:20) Lona uiga, o le manaʻoga muamua lava mo ē fou, ia iā i latou le poto saʻo o le upu moni, lea e mafai ai ona ati aʻe se faatuatua iā Ieova ma lana Afioga. (Roma 10:17; 1 Timoteo 2:4; Eperu 11:6) Ma pe a pāʻia le loto o le tagata i le upu moni o le Tusi Paia, e uunaʻia ai o ia e salamō ma liliu ese mai lona olaga tuai sa iai. (Galuega 3:19) Ma le laasaga mulimuli, ua oo ina iai i le tagata se faanaunauga e tuuina atu ia lava iā Ieova, ma papatisoina loa e pei ona poloaʻia e Iesu.
11. Aiseā e tāua ai lo tatou auai e lē aunoa i le galuega talaʻi a o leʻi papatiso?
11 O le isi laasaga tāua a o tapenapena mo le papatisoga, o le auai i le talaʻia o le tala lelei o le Malo. O le galuega autū lenei ua tofia mai e Ieova i ana auauna i nei aso e gata ai. (Mataio 24:14) O le faia faapea, e maua ai e tagata talaʻi e leʻi papatisoina le olioli a o latou tufa atu le upu moni i isi. O le auai i lenei galuega e lava tāpena ai foʻi i latou mo le faia e lē aunoa ma le maelega o se sao i le faiva i le fanua pe a uma ona papatiso.—Roma 10:9, 10, 14, 15.
O le ā o Taofia Oe Mai le Papatisoina?
12. O le ā e ono taofia ai nisi mai le papatisoina?
12 E iai nisi e faatalatū e papatiso ona e lē o naunau tele e talia le tiute tauave e aofia ai. Latou te iloa, o le usitaia o tapulaa a Ieova e tatau ai ona faia ni suiga tetele i o latou olaga. Pe fefefe foʻi ina neʻi faigatā ona latou tausisia mea o finagalo ai le Atua pe a uma ona papatiso. Ua oo lava ina manatu nisi, “Ina neʻi oʻu faia se mea leaga i se aso, ma faateʻaese ai aʻu mai le faapotopotoga.”
13. A o iai Iesu i le lalolagi, o le ā na taofia ai nisi mai le avea ma ona soo?
13 A o iai Iesu i le lalolagi, e iai nisi na avea o latou lava faanaunauga, faapea ma piitaga faaleaiga, ma itu e taofia ai i latou mai le avea ma soo. O se tasi tusiupu na folafola mai o le a mulimuli iā Iesu i so o se mea e maliu atu i ai o Ia. Peitaʻi na taʻua e Iesu o le tele o taimi sa leʻi iai se mea e moe ai o ia i le pō. Ina ua valaaulia e Iesu le tasi tagata ia avea ma ona soo, na tali ane lenei tagata seʻi alu muamua e “tanu” i lona tamā. E foliga mai sa sili i lenei tagata le nofo pea i lona aiga ma faatali seʻi maliu lona tamā, na i lo le mulimuli iā Iesu ma tausia lenā tiute tauave faaleaiga pe a oo i le taimi e manaʻomia ai. Ma le tagata mulimuli lea na faapea mai o le a mulimuli iā Iesu, ae seʻi muaʻi “faamavae” i lona aiga. Na faatusa e Iesu lenā uiga faatuutuu e peiseaʻī o loo “tepa i tua.” E foliga mai la o i latou e mananaʻo e tolopō, o le a masani lava i le fai faamolemolega e sola ese ai mai o latou tiute tauave faa-Kerisiano.—Luka 9:57-62.
14. (a) Na faapeʻī le tali atu a Peteru, Aneterea, Iakopo ma Ioane i le valaau a Iesu ina ia avea ma fai faiva i tagata? (e) Aiseā e lē tatau ai ona tatou faatalatū e talia le amo a Iesu?
14 E telē le eseesega ma le tulaga sa iai Peteru, Aneterea, Iakopo ma Ioane. Ina ua valaauina i latou e Iesu ia mulimuli iā te ia ma avea ma fai faiva i tagata, ua faapea mai le Tusi Paia: “Ona [latou] tuua loa lea o [a latou] upega, a e mulimuli atu iā te ia.” (Mataio 4:19-22) Ona o le vave o lo latou faia o lenā filifiliga, na latou matuā faamaonia ai lava le moni o fetalaiga a Iesu e faapea: “Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga. Auā e avegofie laʻu amo, o laʻu avega foʻi e māmā ia.” (Mataio 11:29, 30) O le mea moni e iai le amo o tiute tauave e aumai e le papatisoga; ae ua faamautinoa mai e Iesu, o se amo e agalelei ma o se avega e māmā, lea o le a matuā faafouina ai i tatou.
15. E faaalia faapefea i le tulaga o Mose ma Ieremia, e mafai ona tatou faatuatua e lagolagoina i tatou e Ieova?
15 O le tulaga masani lava, e oo ane ni lagona o le lē agavaa e fai se faaeaga. O lagona foʻi na sa muaʻi iai iā Mose ma Ieremia, faapea e lē agavaa e tauave o la tofiga mai iā Ieova. (Esoto 3:11; Ieremia 1:6) Na faapefea ona faalototele i laʻua e Ieova? O lana fetalaiga iā Mose: “Ou te iā te oe lava.” O lana folafolaga iā Ieremia: “Ou te iā te oe e laveaʻi iā te oe.” (Esoto 3:12; Ieremia 1:8) E mafai foʻi ona tatou mautinoa e lagolagoina i tatou e le Atua. O lo tatou alofa i le Atua ma faatuatua iā te ia, e mafai ai ona aveesea ni o tatou masalosaloga e tuputupu pea pe faamata e mafai ona tausisia lo tatou tuuina atu. Na tusi le aposetolo o Ioane: “E leai se fefe i le alofa, a o le alofa atoatoa e faateʻaeseina ai le fefe.” (1 Ioane 4:18) E ono fefe se tamaitiiti pe a savali na o ia, ae loto tele pe a la uulima ma savavali faatasi ma lona tamā. E faapena foʻi, pe a tatou faatuatua ma le lotoatoa iā Ieova, ua ia folafola mai lona ‘faatonuina o o tatou ala,’ a o savavali faatasi ma ia.—Faataoto 3:5, 6.
Se Sauniga Mamalu
16. Aiseā ua aofia ai i le papatisoga le faatofuina atoatoa i le vai?
16 I le taimi o le papatisoga e masani ona tomua i se lauga faale-Tusi Paia e faamatala ai le uiga tāua o le papatisoga faa-Kerisiano. Ae i lona vaega faaiʻu e tāpā ai sui papatiso ina ia faalauiloa atu i le lautele lo tatou faatuatua, e ala i le taliina o ni fesili se lua. (Roma 10:10; tagaʻi i le pusa i le itulau 22.) Ona sosoo loa lea ma le faatofuina o sui papatiso i le vai, e pei o le faaaʻoaʻoga na faataatia e Iesu. Ua taʻua e le Tusi Paia, ina ua māeʻa ona papatiso Iesu, ona “maliu aʻe loa lea o ia nai le vai.” (Mataio 3:16; Mareko 1:10) Sa lilo atoa le tino o Iesu ina ua faatofu i lalo e Ioane le Papatiso. * O le faatofuina atoatoa i le vai ua talafeagai ona faaata mai ai suiga tetele ua faia i o tatou olaga, e peiseaʻī ua tatou feoti mai le uluaʻi olaga sa iai ae amata se olaga fou i le auaunaga i le Atua.
17. E faapefea i sui papatiso ma le ʻaumaimoa ona lagolago atu i le tulaga mamalu o le sauniga?
17 O le papatisoga o se sauniga e mamalu ma fiafia ai. O loo taʻua i le Tusi Paia sa tatalo Iesu ina ua faatofuina o ia e Ioane le Papatiso i le vaitafe o Ioritana. (Luka 3:21, 22) Ina ia ōgatusa ma lenā faaaʻoaʻoga, e tatau foʻi i sui papatiso i aso nei ona faaalia uiga faaaloalo talafeagai. Ua timaʻia i tatou e le Tusi Paia ina ia onomea o tatou laʻei i aso taʻitasi; ua sili ai la ona talafeagai lo tatou utagia o lenā fautuaga i le aso o lo tatou papatisoga! (1 Timoteo 2:9) E faaalia foʻi e le ʻaumaimoa le faaaloalo i lo latou uaʻi totoʻa atu i le lauga o le papatisoga, ma ia maimoa ma le faaaloalo i le taimi o loo faatino ai le papatisoga.—1 Korinito 14:40.
Faamanuiaga o Loo Olioli ai Soo Papatiso
18, 19. O ā faaeaga ma faamanuiaga e aumai e le papatisoga?
18 O le taimi lava e tuuina atu ai i tatou i le Atua ma papatisoina, ua avea i tatou ma vaega o se aiga faapitoa. Muamua lava, ua fai Ieova ma o tatou Tamā ma Uō. Sa faaesea i tatou mai le Atua a o leʻi papatiso; ae o lenei ua iai se leleiga ma ia. (2 Korinito 5:19; Kolose 1:20) O le taulaga a Keriso lea ua mafai ai ona tatou maua se faiā vavalalata ma le Atua. (Iakopo 4:8) O loo faamatala e le perofeta o Malaki le auala o loo liliu mai ai fofoga o Ieova ma faafofoga mai iā i latou o faaaogā ma tauaveina lona suafa, ma tusia o latou igoa i le tusi e faamanatu ai i ona luma. Ua fetalai le Atua: “E fai foʻi i latou maʻu, . . . ou te alofa foʻi iā te i latou, e pei ona alofa o le tagata i lona atalii ua auauna iā te ia.”—Malaki 3:16-18.
19 O le papatisoga foʻi ua mafai ai ona avea i tatou ma vaega o se ʻauuso i le lalolagi aoao. Ina ua fesili le aposetolo o Peteru po o ā faamanuiaga o le a maua e soo o Keriso ona o faataulaga ua latou faia, o le folafolaga lenei a Iesu: “Ai se tasi ua ia tuua o fale, po o uso, po o tuafāfine, po o le tamā, po o le tinā, po o le fanau, po o fanua ona o loʻu igoa, e maua e ia e taʻisautuaselau, e fai foʻi mona tofi le ola faavavau.” (Mataio 19:29) I ni tausaga mulimuli ane, na tusi ai Peteru ma ia taʻua “le ʻau uso” lea e iai “i le lalolagi.” Na tofo moni Peteru i le lagolagosua ma faamanuiaga o le iai o se ʻauuso alolofa faapena, ma e mafai foʻi ona tatou tofo i ai.—1 Peteru 2:17; 5:9.
20. O le ā le faamoemoe matagofie ua maua ona o le papatisoga?
20 Na taʻua foʻi e Iesu faapea o i latou e mulimuli atu iā te ia ‘o le a fai mo latou tofi le ola e faavavau.’ E mautinoa le maua o le faamoemoe ina ia “fetagofi atu i le ola moni”—le ola e faavavau i le lalolagi fou a le Atua, ona o le tuuina atu ma le papatisoga. (1 Timoteo 6:19) O le ā ea la se isi faavae e sili atu ona lelei mo se lumanaʻi o i tatou ma o tatou aiga, na i lo lenei faavae? O lenei faamoemoe matagofie o le a mafai ai ona tatou “savavali i le suafa o Ieova lo tatou Atua e faavavau faavavau lava.”—Mika 4:5.
[Faamatalaga pito i lalo]
^ pala. 4 E faapena foʻi i le toluafe o tagata Iutaia ma ē liulotu sa faalogologo i le lauga a Peteru i le aso Penetekoso, na papatisoina i latou i lenā lava aso. E tutusa lava latou ma le eunuka Aitiope, e lē o se taimi muamua lea faatoʻā masani ai i aʻoaʻoga faavae ma mataupu silisili o le Afioga a le Atua.—Galuega 2:37-41.
^ pala. 16 O loo taʻua i le Expository Dictionary of New Testament Words a Vine e faapea, o le upu Eleni baʹpti·sma (papatiso) e faasino atu i “le faatinoga o le faatofu, matuā lolō atoa i lalo, ma toe faaea aʻe i luga.”
Pe Mafai Ona E Faamatala?
• E faapefea ma aiseā e tatau ai ona tatou tali atu i le alofa o Ieova?
• O ā vala o le agaʻigaʻi i luma faaleagaga e tatau ona faatino a o leʻi papatiso?
• Aiseā e lē tatau ai ona taofia i tatou mai le papatiso ona o le fefefe ina neʻi lē taulau, pe faatalatū foʻi e talia tiute tauave?
• O ā faamanuiaga faapitoa e mafai ona maua e soo papatiso o Iesu Keriso?
[Fesili mo le Suʻesuʻega]
[Ata i le itulau 26]
“Se ā ea se mea e vaoia ai aʻu e aua le papatisoina o aʻu?”
[Ata i le itulau 29]
O le papatisoga o se sauniga e mamalu ma fiafia ai