Fesili Mai le ʻAufaitau

Afai ua faataugā se tasi e temoni, o le ā se mea e ao ona ia fai e mapu ai?

Ua faailoa mai i le Afioga a le Atua, e mafai ona maua le mapusaga e i latou o loo mafatia i osofaʻiga a temoni. E tāua le tatalo ina ia saʻoloto ai. (Mareko 9:25-29) Ae e manaʻomia e se tasi o loo faataugā e temoni ona faia nisi o gaoioiga. O mea na tutupu i Kerisiano i le uluaʻi senituri, e faataʻitaʻia ai se isi mea e manaʻomia ona fai.

Sa auai nisi i Efeso anamua i faiga faatemoni, a o leʻi avea ma soo o Keriso. Peitaʻi ina ua latou filifili e auauna i le Atua, “o ē na fai togafiti faataulāitu, na faapotopoto e i latou a latou tusi, ma susunu ai i luma o tagata uma.” (Galuega 19:19) E ala i le susunu o a latou tusi o faiga faataulāitu, ua faataatia ai e na tagata talitonu fou i Efeso se faaaʻoaʻoga, mo so o se tasi e fia saʻoloto mai osofaʻiga a temoni i aso nei. E matuā talafeagai mo i latou na ona lafoaʻia mea uma e fesootaʻi atu i faiga faaagaga. E aofia ai tusi, mekasini, ata tifaga, faamatalaga mai le Initineti, pese e iai fesootaʻiga i faiga faaagaga, aemaise tapui po o isi mea sa faaaogā e fai ma “puipuiga” pe sa fesootaʻi atu i faiga faataulāitu.—Teuteronome 7:25, 26; 1 Korinito 10:21.

Ina ua mavae ni nai tausaga talu ona susunu e Kerisiano i Efeso a latou tusi o faiga faataulāitu, ona tusi lea o Paulo: ‘Auā tatou te tau ma agaga leaga.’ (Efeso 6:12) Na timaʻi Paulo i Kerisiano: “Ia oofu outou i ofutau atoatoa mai le Atua, ina ia outou mafaia ona tetee atu i togafiti a le tiapolo.” (Efeso 6:11) O loo aogā pea lenā fautuaga. E tatau ona faamalosia e Kerisiano lo latou itu faaleagaga, ina ia puipuia ai i latou mai agaga leaga. Na faamamafa e Paulo faapea: “Ia faaopoopo i na mea uma ona tago atu i le talipupuni o le faatuatua, tou te mafai ai ona tinei o ū fanafana mū uma lava a lē o loo leaga.” (Efeso 6:16) E faamalosia e se tasi lona faatuatua e ala i le suʻesuʻe o le Tusi Paia. (Roma 10:17; Kolose 2:6, 7) O lea, e fesoasoani iā i tatou le suʻesuʻe e lē aunoa o le Tusi Paia, e ati aʻe ai le faatuatua lea e avea o se puipuiga i aafiaga a agaga leaga.—Salamo 91:4; 1 Ioane 5:5.

Sa manaʻomia ona faia e na Kerisiano i Efeso se isi foʻi gaoioiga tāua. Na taʻu atu e Paulo iā i latou: “Ia . . . tatalo i le Agaga i aso uma lava i talotaloga ma faatoga uma.” (Efeso 6:18) Ioe, e tāua tele mo ē o loo fia saʻoloto mai i osofaʻiga a temoni i aso nei, ona tatalo faatauanau mo le puipuiga a Ieova. (Faataoto 18:10; Mataio 6:13; 1 Ioane 5:18, 19) Ua talafeagai ai la le faapea mai o le Tusi Paia: “O le mea lea ia outou gauaʻi ai i le Atua; ia outou tetee atu i le tiapolo, ona sola ese ai lea o ia iā te outou.”—Iakopo 4:7.

A o finafinau i le tatalo lē o loo osofaʻia e temoni mo se mapusaga, e ao foʻi i isi Kerisiano moni ona tatalo mo lenei tagata, o loo matuā faanaunau e auauna iā Ieova, ma o loo taumafai malosi e tetee atu i agaga leaga. E latou te talosaga i le Atua ina ia maua e lē o loo aafia le malosi faaleagaga, e tetee atu ai i osofaʻiga a temoni. O loo taʻua i le Afioga a le Atua e “aogā tele le tatalo faatauanau a le tagata amiotonu.” O tatalo uma la e faia e auauna a le Atua, e mautinoa o le a aogā i ē o loo faataugā e temoni, o ē o loo faia le mea sili e ‘tetee atu ai i le tiapolo.’—Iakopo 5:16.

[Ata i le itulau 31]

Na susunu e Kerisiano i Efeso a latou tusi o faiga faataulāitu