Foʻia Toʻatugā i Panama

“PANAMA, le ala laupapa o fesootaʻiga a le lalolagi.” I le 50 tausaga ua teʻa, na taʻua ai lenei faaupuga i se polokalame masani i le leitiō i Panama, o se atunuu i Amerika Tutotonu. I aso nei, ua faaleo e lea faaupuga lagona o le toʻatele e faatatau i lenā atunuu.

Ua pei Panama o se ala laupapa e fesootaʻi ai konetineta o Amerika i Mātū ma Amerika i Saute. Aemaise foʻi e tafe atu vai o le ala laupapa o Amerika i le kanala po o le alāvai taʻutaʻua o Panama. Ona o le mataʻina o lenei faatulagaga, ua oo ai le alāvai i le isi itu o le atunuu ma fesootaʻi ai le Vasa Atalani ma le Vasa Pasefika. O le iʻuga, ua fefolauaʻi solo vaa mai so o se itu o le lalolagi mo ni nai itula, na i lo le faitau aso po o vaiaso foʻi. Ioe, ua avea Panama e pei o se ala laupapa o fesootaʻiga tāua mo le tele o vaega o le lalolagi.

O se Ala Laupapa ma o se Atunuu o Tagata Eseese

Ua avea foʻi Panama o se nofoaga o tagata mai atunuu ma ituaiga eseese. Ua faia e nei  tagata ma le tele o tagatanuu moni, se aofaʻiga o tagata eseese ia ua taape solo i lenei laueleele matagofie. Ae pe mafai ona foʻia toʻatugā ua iai ona o le tuufaatasia o tū, aganuu, lotu, ma gagana eseese, ae autasia i manatu ma fuafuaga e faavae i upu moni tautele o loo i le Afioga a le Atua?

Ioe, e mafai. Ua faaalia i upu a Paulo o loo i le Efeso 2:17, 18 (LT ), na foʻia e Kerisiano o le uluaʻi senituri, o Iutaia ma Nuu Ese, se luʻi faapena e faavae i le taulaga a Keriso lea na toe autasi ai. Na tusi Paulo: “Na maliu mai foʻi o ia [Iesu], e folafola mai le tala lelei o le leleiga iā te outou sa vāvā mamao, atoa ma ē ua latalata. Auā ua faatau . . . i tatou uma ona o ia o le taʻitaʻiga i le Tamā, e le Agaga e toʻatasi.”

I se tulaga faapena i aso nei, o loo folafola atu e Molimau a Ieova le “tala lelei o le leleiga” i Panama i tagata ma vaega, o ē ō mai isi atunuu mamao ma e eseese o latou talitonuga faalotu. O inā ua faamanuiaina ai i le autasi ē ua ‘taʻitaʻiina’ iā Ieova. O le iʻuga, na faavaeina ni faapotopotoga i Panama i gagana eseese e ono; o le faa-Sepania, Cantonese, gagana Panama e faaaogā ai taga, faa-Peretania, ma gagana e lua a tagatanuu moni o Panama, lea e taʻua o le Kuna ma le Ngobere (Guaymí). O se mea e faalaeiauina ai le iloa o le auala na autasia ai tagata o nei gagana eseese i la latou tapuaʻiga iā Ieova.

Foʻia Toʻatugā i le Comarca

O le vaega o le Ngobe e pito i toʻatele ai i vaega e valu o tagatanuu moni o Panama. Ua faia aʻe i nisi pe ā ma le 170,000, ma o le toʻatele o loo nonofo i se nofoaga telē lea e leʻi leva ona taʻua o le comarca, po o se nofoaga faasao. O se vaega pito i telē o lenei nofoaga e iai mauga gaoā seʻiloga e savavali faatoʻā mafai ona oo i ai, ma le talafatai matagofie o  loo i le sami. O le tele o nuu e lata i vaitafe ua pei o ni auala faigofie mo femalagaaʻiga, e iai foʻi nuu i le talafatai. O le toʻatele e nonofo i le comarca, e maua sina mea e ola ai i faatoʻaga kofe e fai i luga o mauga, faifaiva, po o faatoʻaga foʻi. O le toʻatele o ni sui o lotu ua faapea mai o Kerisiano. Ae o loo iai foʻi i le nuu ni tagata o se lotu e taʻua o le Mama Tata. E saʻili atu nisi i sukias po o faipelē mo faamālōlōga, pe a mamaʻi pe manatu foʻi ua faataugā e agaga leaga. E ui e toatele e tautatala i le gagana faa-Sepania, ae e sili atu ona malamalama gofie le gagana Ngobere.

Tauasa Ina ia Oo i Tagata

Ua iloa e Molimau a Ieova e tāua le fesoasoani i tagata e aʻoaʻo le upu moni i se auala e malamalama ai, ma ia pāʻia ai o latou loto. Pe a pāʻia o latou loto, o le a uunaʻia loa e faia ni suiga talafeagai i o latou olaga ina ia ōgatusa ma taʻiala o le Tusi Paia. O lea, na aʻoaʻoina e ni paeonia faapito na tofia i vaega eseese e valu o le vaipanoa le gagana Ngobere, ona sa fesoasoani i ai ni Molimau agavaa o le nuu e tautatala i le gagana lava lea.

O faapotopotoga e 14 ua faatū i le vaipanoa, ua faaalia ai le ono mafai ona iai o ni faatelega mataʻina. O se faaaʻoaʻoga i nai tausaga ua mavae, na tofia ai Dimas ma Gisela o se ulugalii paeonia faapito, i se faapotopotoga toʻaitiiti pe tusa e 40 tagata talaʻi i le talafatai o Tobobe. Sa lē faigofie iā i laʻua le ō atu soo i se vaa alo e talaʻi i ē o loo nonofo i le talafatai o le Atalani. Na iloa e Dimas ma Gisela, o le malū o le sami e vave lava ona suia i galu malolosi mataʻutia. Na masani ona gāoi o la lima ma pā tua pe a uma ona ālo lo la vaa mai lea nuu i le isi nuu. O le isi luʻi o le aʻoaʻoina o le gagana. Ae i le 2001, na tauia lo la maumauaʻi ma faataulaga na la faia, ina ua auai le toʻa 552 i le Faamanatuga o le maliu o Keriso.

O loo i le isi itu o le vaifagaloa o Tobobe le nuu o Punta Escondida. I nisi taimi, e masani ona tauālo mai i le isi itu o le vaifagaloa se vaega itiiti o tagata talaʻi pe a lelei le tau, e auai i sauniga i Tobobe, ma na faaalia i lipoti sa iai avanoa lelei e faatū ai se faapotopotoga fou i lenei vaipanoa. I lenā tulaga, na talosagaina ai Dimas ma Gisela e siitia atu i Punta Escondida. E leʻi atoa se lua tausaga, ae avea le vaega i Punta Escondida o se faapotopotoga e 28 tagata talaʻi, ma o se faatatauga o ē auai i sauniga mo le lauga lautele i vaiaso taʻitasi e 114. I le 2004, na fiafia le faapotopotoga fou ina ua auai le 458 i le Faamanatuga o le maliu o Keriso.

Foʻia le Luʻi o le Lē Iloa Faitau ma Tusitusi

Sa fesoasoani le foʻia o le lē iloa faitau ma tusitusi i le tele o ē lotofaamaoni, e ati aʻe ai sa latou faiā vavalalata ma Ieova. O le tulaga lenā o Fermina, o se tinā talavou mai le vaipanoa maugā o le comarca. Na iloa e ni tuafāfine Molimau misionare na galulue i le nuu maotua lea na ia nofo ai, lona naunau tele i le feʻau o le Malo. Ina ua fesiligia pe  manaʻo i se suʻesuʻega faale-Tusi Paia, sa ia tali mai e fia aʻoaʻo atili nisi mea. Ae sa iai se faafitauli. Sa ia tautala i le gagana faa-Sepania ma le faa-Ngobere, ae e lē iloa faitau pe tusitusi i gagana uma ia. Sa ofo atu se tuafafine misionare e na te aʻoaʻoina o ia, e faaaogā ai le polosiua faa-Peretania, Apply Yourself to Reading and Writing. *

O Fermina o se tagata aʻoga sili ona lelei, e naunau e sauni ana lesona, fai meaaʻoga, ma toʻaga e faataʻitaʻi le sipelaina o upu. E leʻi atoa se tausaga, ae ua agavaa e suʻesuʻe le polosiua, E Mafai Ona Avea Oe ma Uō a le Atua!* Sa auai Fermina ina ua faatulaga sauniga. Ae ona o le matitiva o lona aiga, sa faigatā tele ai ona ia totogia o latou pasese ma lana fanau e ō ai i sauniga. Na iloa e se tuafafine paeonia le tulaga o Fermina, ma ia faatū se manatu e faia ma faatau atu e Fermina ni ofu faaleaganuu o fafine Ngobe. Sa faia e Fermina, ma e ui sa manaʻomia isi mea faaletino, ae sa ia faamautinoa ua faaaogā le tupe lea na maua mai i le faatauina atu o ofu, e ō ai i sauniga faa-Kerisiano. Ua siitia o ia ma lona aiga i se isi nofoaga, ma o loo faaauau ona agaʻigaʻi i luma faaleagaga. Ua latou fiafia ona e lē gata ua iloa faitau ma tusitusi, ae e sili atu ona tāua ua latou iloa Ieova.

Foʻia le Luʻi o le Talaʻi Atu i Ē Logonoa

I Panama, e matamumuli le tele o aiga e iai o latou tagata e logonoa. I nisi taimi, e lē mafai e i latou ona auai i so o se aʻoga. E lagona e le tele o ē logonoa le faaesea ma le lē amanaʻia, ona e faigatā tele ona fesootaʻi ma i latou.

O lea, sa tatau ona faia se gaoioiga ina ia oo ai le tala lelei i ē logonoa. O le faamalosiau a se ovasia femalagaaʻi, sa aʻoaʻoina ai e se vaega o ni paeonia filigā ma isi le gagana Panama e faaaogā ai taga. Sa tauia lo latou tōfā mamao.

I le faaiʻuga o le 2001, na faatū ai se vaega e tautatala i le gagana Panama e faaaogā ai taga i le aai o Panama. Pe tusa e 20 na auai i le sauniga. A o faaleleia le malamalama o uso ma tuafāfine i le gagana, sa latou molimau atu i le toatele o ē faatoʻā “faalogo” i upu moni o le Tusi Paia i la latou gagana. Na auai i sauniga le tele o Molimau e iai a latou fanau e logonoa, ma na latou iloa sa sili atu ona malamalama gofie le fanau i aʻoaʻoga a le Tusi Paia, ma sili atu foʻi ona maelega i le upu moni. Sa masani ona aʻoaʻo e mātua le gagana e faaaogā ai taga, ona faatoʻā mafai lea ona fesootaʻi lelei ma a latou fanau. Na fesoasoani mātua i a latou fanau i le itu faaleagaga, ma iloa ai ua faamalosia o latou aiga. Ua faataʻitaʻia mai e le tala e uiga iā Elsa ma lana tama teine o Iraida lenei tulaga.

 Na faalogo se tuafafine Molimau e galulue faatasi ma le vaega e faaaogā ai taga, i se tala iā Iraida, ona ia asiasi lea iā te ia ma tuu ai le polosiua, Olioli i Le Ola i Le Lalolagi e Faavavau! * Sa fiafia tele Iraida i mea sa ia aʻoaʻoina mai i ata e uiga i le lalolagi fou. Sa faia loa se suʻesuʻega faale-Tusi Paia i le polosiua. Ina ua māeʻa lenā lomiga, sa la faaaogā le polosiua O le ā e Manaomia e le Atua Mai ia i Tatou?* Ina ua suʻesuʻe lenā lomiga, sa talosaga Iraida i lona tinā e fesoasoani iā te ia e sauni ma faamatala atu faamatalaga o loo i le tusi.

E lua ni faafitauli o Elsa: Ona e lē o ia o se Molimau, sa ia lē iloa upu moni o le Tusi Paia, ma lē malamalama foʻi i le gagana e faaaogā ai taga. Na taʻu atu e nisi iā te ia e lē tatau ona faaaogā taga e fesootai ai i lana tama, ae e ao ona aʻoaʻo lana tama ia iloa tautala. O lea, sa lē lelei fesootaʻiga a le tinā ma lana tama. O le talosaga a Iraida mo se fesoasoani, na uunaia ai Elsa e talosaga i se tuafafine Molimau i le faapotopotoga e suʻesuʻe ma Iraida. Na ia faapea mai: “Sa ou talosaga mo le lelei o laʻu tama, auā ou te leʻi vaai muamua iā te ia o matuā fiafia i se mea e pei ona iai nei.” Sa auai Elsa i le suʻesuʻega a lana tama ma aʻoaʻo le gagana e faaaogā ai taga. A o tele le taimi o Elsa e faifaimea faatasi ai ma lana tama, sa faaleleia a la fesootaʻiga i le aiga. Na filifili lelei e Iraida ana uō ma aufaatasi ma le faapotopotoga. I le taimi nei, ua auai uma e lē aunoa le tinā ma lana tama i sauniga faa-Kerisiano. E leʻi leva atu nei ona papatiso Elsa, ma o loo agaʻi foʻi Iraida i lenā sini. Na taʻua e Elsa, o le uluaʻi taimi lenei ua ia malamalama ai i lana tama, ma ua mafai nei ona la talanoa i le tele o mea e tāua iā i laʻua.

O le vaega e tautatala i le gagana e faaaogā ai taga lea na avea ma faapotopotoga iā Aperila 2003, ua faatupulaʻia nei i le pe tusa ma le 50 tagata talaʻi o le Malo, ma e sili atu i lenā aofaʻi o loo auai i sauniga. O le silia i le tasi vae tolu e logonoa. Ua faatū isi vaega e tautatala i gagana e faaaogā ai taga, i taulaga e tolu i fafo atu o le vaipanoa autū o le aai o Panama. E ui o loo tele se galuega e fai i lenei oganuu, ae e mautinoa na uia se laasaga tele e foʻia ai le sootaga i le va o ē logonoa lotofaamaoni, ma lo latou Atua alofa o Ieova.

O iʻuga masani nei o mea o loo tutupu i Panama. E ui latou te ō mai i aganuu, gagana, ma talaaga eseese, ae ua autasia le toʻatele i le tapuaʻiga i le Atua moni. Ua foʻia ma le manuia e le upu moni o le Afioga a Ieova toʻatugā tau fesootaʻiga i lenei atunuu, lea e manatu i ai le toʻatele o le “ala laupapa o fesootaʻiga a le lalolagi.”—Efeso 4:4.

[Faamatalaga pito i lalo]

[Faafanua i le itulau 8]

(Tagaʻi i le lomiga mo le ata atoa)

VASA KARIPIANE

PANAMA

Tobobe

VASA PASEFIKA

Kanala o Panama

[Ata i le itulau 8]

O fafine Kuna o loo faaali mai ʻie tolose

[Ata i le itulau 9]

O se misionare o loo talaʻi i se fafine Ngobe

[Ata i le itulau 10]

Ua tuuvaa atu Molimau mai Ngobe i se vaa alo e auai i se polokalame o le aso faapitoa o fonotaga

[Ata i le itulau 11]

Ua foʻia e upu moni o le Tusi Paia luʻi o le eseese o aganuu ma gagana i Panama

[Ata i le itulau 12]

Suʻesuʻega o le “Olomatamata” i le gagana e faaaogā ai taga

[Ata i le itulau 12]

Ua olioli Elsa ma lana tama teine o Iraida ona ua uigā a la fesootaʻiga

[Faamatalaga i Ata i le itulau 8]

O le vaa ma fafine Kuna: © William Floyd Holdman/Index Stock Imagery; nuu: © Timothy O’Keefe/Index Stock Imagery