Faatalitali iā Ieova ma ia Loto Tele

“Inā faatalitali atu ia iā Ieova, inā loto tele ia, e faamalosia foʻi e ia lou loto; inā faatalitali lava ia iā Ieova.”—SALAMO 27:14.

1. O le ā le tāua o le faamoemoe, ma e faapefea ona faaaogā i le Tusi Paia?

O LE faatalitali po o le faamoemoe moni, e mafai ona faatusaina i se malamalama e pupula malosi. Ua mafai ona fesoasoani e tepa taulaʻi atu ai i le lumanaʻi ma le loto tele ma le olioli, e ui i faigatā o loo fesagaʻia i le taimi nei. Ua na o Ieova e mafai ona aumaia se faamoemoe mautinoa, pei ona ia faia e ala mai i lana Afioga faagaeeina. (2 Timoteo 3:16) E tele taimi o loo aliaʻe mai ai le upu “faamoemoe” po o le “faatalitali” i le Tusi Paia. Ma o loo faasino i le naunau ma le faatalitali mautinoa mo se mea lelei o le a tupu. * O lenei la faamoemoe e sili atu i le na ona moomoo i se mea, lea e ono leai se faavae pe lē mautinoa foʻi lona faataunuuina.

2. O le ā le tāua o le faamoemoe i le soifuaga o Iesu?

² Ina ua fesagaʻi Iesu ma faigatā ma tofotofoga, sa ia tepa taulaʻi i le lumanaʻi ma faamoemoe iā Ieova. “Na onosai i le satauro, na faatauvaa iā te ia le mā, ona o le olioli sa tuu i ona luma, ua nofo foʻi o ia i le itu taumatau o le nofoālii o le Atua.” (Eperu 12:2) Ona sa ia uaʻi ma naunau i le faasilisilia o le pule silisili ese ma le faapaiaina o le suafa o Ieova, o lea sa lē taitai ai ona liliu ese Iesu mai lona ala usitai i le Atua, e tusa lava po o ā āuga na oo iā te ia.

3. O le ā le tāua o le faatalitali po o le faamoemoe i olaga o auauna a le Atua?

³ Na taʻua e le tupu o Tavita le sootaga o le faatalitali po o le faamoemoe ma le loto tele, ina ua faapea mai: “Inā faatalitali [faamoemoe] atu ia iā Ieova, inā loto tele ia, e faamalosia foʻi e ia lou loto; inā faatalitali lava ia iā Ieova.” (Salamo 27:14) Pe afai tatou te mananaʻo e faamalosia o tatou loto, e lē manaʻomia ona nenefu lo tatou faamoemoe, ae ia manino i le mafaufau ma teu loto i taimi uma. O le faia faapea, o le a mafai ai ona tatou faaaʻoaʻo iā Iesu i le loto tele ma le maelega, a o faia so tatou sao i le galuega na ia  faatonuina ona soo e fai. (Mataio 24:14; 28:19, 20) Ioe, o loo taʻua faatasi le faamoemoe ma le faatuatua ma le alofa, ma o ni uiga tāua e iloa ai auauna a le Atua.—1 Korinito 13:13.

Po o ‘Tele lo Outou Faamoemoe’?

4. O lē a o loo faatalitali ma le naunau i ai Kerisiano faauuina ma “isi mamoe”?

⁴ Ua folasia mai e le Atua se lumanaʻi matagofie mo ona tagata. O loo faatalitali ma le naunau Kerisiano faauuina i le taimi o le a latou auauna ai ma Keriso i le lagi. A o “isi mamoe,” o loo faamoemoe e “tuusaunoa ia lava mea na faia ia lē faapologaina e le iʻu vale, a e oo i le saʻolotoga o le fanau [i le lalolagi] a le Atua e manuia ai.” (Ioane 10:16; Roma 8:19-21; Filipi 3:20) O lenā “saʻolotoga,” e aofia ai le laveaʻiga mai le agasala ma ona āuga leaga. Ioe, o Ieova o Lē Foaʻi mai ‘mea lelei uma atoa ma mea alofa uma e atoatoa ona lelei’ e lē taitai ona ia taofia ni mea lelei mai ē faamaoni iā te ia.—Iakopo 1:17; Isaia 25:8.

5. E faapefea ona faateleina lo tatou faamoemoe?

⁵ O le ā le telē o aafia ai o tatou olaga i le faamoemoe faa-Kerisiano? Ua faitauina faapea le Roma 15:13: “O le Atua foʻi e tupu mai ai le faamoemoe, ia faatutumuina outou e ia i le olioli uma atoa ma le filemu, ina ua faatuatua; ina ia tele lava lo outou faamoemoe ona o le mana o le Agaga Paia.” Ioe, o le faamoemoe e mafai ona faatusaina, atonu e lē i se moli gaʻo i le mea pogisa, ae i le pupula o ave o le lā i le taeao, o loo faatumulia ai le olaga o se tagata i le filemu, fiafia, fuafuaga aogā, ma le loto tele. Seʻi mātau, e faateleina lo tatou faamoemoe pe a tatou talitonu i le Afioga tusia a le Atua ma maua lona agaga paia. Ua taʻua e le Roma 15:4: “O mea uma foʻi na tusia anamua, na tusia ia e aʻoaʻo mai ai iā te i tatou; ina ia tatou maua le faamoemoe e tupu mai i le onosai, ma le faamāfanafana mai o Tusi.” O lea la, seʻi fesili ifo iā te oe: ‘Po o oʻu taumafai e tausia pea le pupula o loʻu faamoemoe, e ala i le avea ma tagata suʻesuʻe maelega o le Tusi Paia, ma faitauina i aso uma? Po o masani ona ou tatalo mo le agaga paia o le Atua?’—Luka 11:13.

6. Ina ia malosi pea le pupula o lo tatou faamoemoe, o le ā e ao ona tatou faaeteete ai?

⁶ Na matuā faamalosia lo tatou Faaaʻoaʻo o Iesu i le Afioga a le Atua. O le manatunatu loloto iā te ia, e lē ‘faavaivai ai o tatou loto ma tatou lē lavatia.’ (Eperu 12:3) O le mea moni lava, a faasolo ina lē olaola le faamoemoe ua tuuina mai e le Atua i o tatou mafaufau ma loto pe taulaʻi atu foʻi i isi mea, atonu o mea faitino po o sini faalelalolagi, e mautinoa lava o le a tatou vaivai faaleagaga, ma oo ina mou atu ai le malosi tau amioga tatau ma le loto tele. O le aafia i na tulaga, e oo ina ‘faavaatuʻia ai i tatou i la le faatuatua.’ (1 Timoteo 1:19) Ae i le isi itu, o le faamoemoe moni e faamalosia ai lo tatou faatuatua.

E Tāua le Faamoemoe Ina ia Faatuatua Ai

7. O le ā le auala e manaʻomia ai le faamoemoe e le faatuatua?

⁷ Ua faapea mai le Tusi Paia: “O le faatuatua, o le faalagolago lea i mea ua faamoemoe i ai, o le mautinoa lea o mea e lē o vaaia.” (Eperu 11:1) O lea la, o le faamoemoe ua lē na o se uiga e ō faatasi ma le faatuatua, o se vaega e manaʻomia ma tāua o le faatuatua. Seʻi manatu iā Aperaamo. I le vaaiga faaletagata, na matuā teʻa mamao tausaga o Aperaamo ma lana avā o Sara, mai tausaga e ono mafai ai ona fai sa la fanau, i le taimi na folafola i ai e Ieova o le a maua sa la tama. (Kenese 17:15-17) Na faapefea ona tali atu Aperaamo? E ui lava ‘ua leai se faamoemoe, ae na ia faatuatua ma faamoemoe, ina ia avea o ia ma tamā o nuu e tele.’ (Roma 4:18) Ioe, o le faamoemoe o Aperaamo na tuuina i ai e le Atua, na faamalosia ai lona faatuatua ma talitonu o le a ia maua ni fanau, ma o se faamoemoe mautū. O lea, o lona faatuatua na olaola ma faamalosia atili e lona faamoemoe. O le mea lea na tuua ai lava ma le loto tele e Aperaamo ma Sara lo la fale ma tauaiga, ae mau i fale ie i se nuu ese i taimi na totoe o o la olaga.

8. E faapefea ona faamalosia le faamoemoe i le onosaʻi ma le faamaoni?

⁸ Na faamalosia pea le faamoemoe o Aperaamo e ala i le usiusitai atoatoa iā Ieova, e tusa lava pe na faigatā. (Kenese 22:2, 12) I se tulaga  tutusa, o le usiusitai ma onosaʻi i le auaunaga iā Ieova, o le a tatou mautinoa ai lo tatou taui. Na tusi Paulo: “O le onosaʻi e tupu ai le mautinoa,” o le mautinoa e tupu ai le faamoemoe, “o le faamoemoe foʻi e lē mā ai.” (Roma 5:4, 5) O le mea lenā na toe faapea mai ai Paulo: “Ua matou mananaʻo tele ina ia outou taʻitasi ma faaali mai lea lava filigā, ina ia mautinoa le faamoemoe e oo i le gataaga.” (Eperu 6:11) O lenei vaaiga mautinoa e faavae i se faiā vavalalata ma Ieova, ma o le a fesoasoani iā i tatou e fesagaʻia ai so o se faigatā ma le loto tele faapea ma le olioli.

“Olioli i le Faamoemoe”

9. O le ā se mea e fesoasoani iā i tatou ina ia “olioli i le faamoemoe”?

⁹ O lo tatou faamoemoe ua tuuina mai e le Atua, e sili atu na i lo so o se mea lava e ofoina mai e le lalolagi. Ua faapea mai le Salamo 37:34: “Ia e faatalitali iā Ieova, ma e tausi i lona ala; ona faaeaina lea o oe e ia ina ia fai mou le nuu; e te iloa atu le fanoga o ē amio leaga.” Ioe, ua ono ma tatau ona tatou “olioli i le faamoemoe.” (Roma 12:12) Ae ina ia faia faapea, e manaʻomia ona tatou manatunatu i ai i taimi uma. Pe e masani ona e tomānatu i lou faamoemoe ua tuuina mai e le Atua? Po o mafai ona e iloa atu oe i le Parataiso, ma ua malaulau lou soifua mālōlōina, saʻoloto mai popolega, siʻomia oe i tagata alolofa, ma e auai i ni galuega faamalieloto? Pe e te manatunatu loloto i ata o le Parataiso o loo i a tatou lomiga? E mafai ona faatusa lenei mea i le faamamāina o se faamalama tioata, ina ia e iloa lelei atu se mea matagofie. Pe afai tatou te faatalalē i le fufuluina o le tioata, e vave lava ona punitia pe faanenefu e le pefu le manino manaia o se mea matagofie ona tatou uaʻi atu loa lea i nisi mea. Ia aua lava neʻi faatagaina lenā mea e tupu!

10. Aiseā e aogā ai i la tatou faiā ma Ieova le taulaʻi ma le naunau i le taui?

¹⁰ Ioe, o le māfuaaga autū tatou te auauna ai iā Ieova o lo tatou alofa mo ia. (Mareko 12:30) Peitaʻi, e tatau ona tatou taulaʻi ma le naunau i le taui. O loo faatalitalia i tatou e Ieova e faia faapea. Ua taʻua i le Eperu 11:6: “A leai foʻi se faatuatua e lē mafai ona fiafia mai o ia; auā e tatau i lē alu atu i le Atua ona talitonu o loo soifua o ia, o ia foʻi na te tauia mai o ē matuā saʻili iā te ia.” Aiseā e finagalo ai Ieova tatou te vaai iā te ia o Lē na te Tauia mai i tatou? Auā pe a tatou faia faapea, e faaalia ai lo tatou iloa lelei o lo tatou Tamā i le lagi. E agalelei ma e alofa i lana fanau. Seʻi manatu i lo tatou faanoanoa ma le loto vaivai pe ana leai so tatou “faamoemoe.”—Ieremia 29:11.

11. Na faapefea ona fesoasoani le faamoemoe na tuuina atu e le Atua iā Mose e na te faia ai ni filifiliga atamai?

¹¹ O se faaaʻoaʻoga mataʻina o sē na taulaʻi i lona faamoemoe na tuuina atu i ai e le Atua, o Mose. I le avea o ia ma “tama a le afafine o Farao,” sa iā te ia le pule, tulaga taualoa, ma le tamaoaiga uma o Aikupito. Pe faamata o le a ia  tulimataʻia nei mea po o le a ia auauna iā Ieova? Na filifili ma le loto tele Mose e auauna i le Atua. Aiseā? “Auā sa faanaunau o ia i le taui.” (Eperu 11:24-26) Ioe, e leʻi faapea na lē ano Mose i le faamoemoe na folasia e Ieova i ona luma.

12. Aiseā ua faatusaina ai le faamoemoe o Kerisiano i se pulou?

¹² Na faatusaina e le aposetolo o Paulo le faamoemoe i se pulou. O lo tatou pulou faafaatusa, e leoleoina ai o tatou mafaufau, ma faia ai ni filifiliga atamai, faatulaga saʻo mea e ao ona faamuamua, ma tausisia ai le faamaoni. (1 Tesalonia 5:8) Po o faia i taimi uma lou puloutau faafaatusa? Pe afai o lea, o le a pei o Mose ma Paulo, e te “lē faamoemoe i le oloa e faalētumau, a o le Atua soifua, o loo foaʻi tele mai iā te i tatou mea uma lava e faafiafia ai.” O le mea moni, o lou teena o āʻega ua iai nei, i lou lē tuliloaina o mea e te manaʻo oe lava e fai, e manaʻomia ai ona loto tele, ae o se mea e matuā aogā lava! Auā, o le ā le aogā o le talia o se olaga e lē tāua na i lo o le “ola moni,” lea o loo nofo faatalitali i ai i latou e faamoemoe ma alolofa iā Ieova?—1 Timoteo 6:17, 19.

“Ou te Lē Tuua Lava Oe”

13. O le ā le faamautinoaga na saunia e Ieova mo ana auauna faamaoni?

¹³ O tagata o loo tuu o latou faamoemoega i lenei lalolagi, e ao ona mafaufau loloto i mea mataʻutia o loo fotuaʻi mai a o faasolo ina faatupulaʻia “puapuaga” o le lalolagi. (Mataio 24:8) A o i latou e faamoemoe iā Ieova e lē matataʻu. O le a faaauau ona latou ‘nonofo ma le fifilemu, e lē fefefe i se mea leaga.’ (Faataoto 1:33) Talu ai e latou te lē faamoemoe i lenei lalolagi, ua latou fiafia e utagia le fautuaga a Paulo: “Ia aunoa a outou amio ma le matapeʻapeʻa; ia gata ia o outou manaʻo i mea ua iā te outou; auā ua fetalai mai o ia, Ou te lē tuua lava oe, ou te lē tuulafoaʻi lava iā te oe.”—Eperu 13:5.

14. Aiseā e lē tatau ai i Kerisiano ona soona popole i o latou manaʻoga faaletino?

¹⁴ Ua faaalia manino mai e faaupuga o loo i le mau o le “lē tuua,” ma le “lē tuulafoaʻi,” faapea, o le a mautinoa le tausia o i tatou e le Atua. Na faamautinoa mai foʻi e Iesu le manatu alofa mai o le Atua, ina ua ia fetalai: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou. O lenei, aua tou te popole i le aso a taeao; auā e popole le aso a taeao i ana lava mea.” (Mataio 6:33, 34) Ua silafia e Ieova o se luʻi faigatā mo tatou le maelega mo lona Malo ae i le taimi foʻi e tasi, o loo tauave le matafaioi o le tausia o o tatou manaʻoga faaletino. Seʻi o tatou tuu atu atoatoa lo tatou mautinoa iā Ieova, ua iai lona tomai, ma o loo naunau e tausia o tatou manaʻoga.—Mataio 6:25-32; 11:28-30.

15. E faapefea ona tausisia e Kerisiano le ‘lelei o mata’ po o le saʻo o le vaai?

¹⁵ E faaalia lo tatou faalagolago iā Ieova e ala i le ‘lelei o mata,’ po o le saʻo o la tatou vaai. (Mataio 6:22, 23) O le saʻo o le vaai, e faamaoni ma e lelei le uunaʻiga, e aunoa ma se matapeʻapeʻa pe manatu faapito. O le saʻo o le vaai e lē faapea ai la o le a ola i se tulaga matuā mativa lava, pe faatalalē ai i le tausia o a tatou matafaioi faa-Kerisiano. Na i lo lea, o loo uiga i le “mafaufau tonu” a o tatou faamuamua le auaunaga iā Ieova.—2 Timoteo 1:7, LT.

16. Aiseā e manaʻomia ai le faatuatua ma le loto tele ina ia saʻo ai le vaai?

¹⁶ O le lelei o mata po o le saʻo o le vaai, e manaʻomia ai le faatuatua ma le loto tele. O se faaaʻoaʻoga, afai e masani ona fesiligia oe e lou pule i le galuega e te galue i taimi ua faatulaga mo sauniga, faamata o le a e loto tele e faamuamua pea mea faaleagaga? Pe afai e masalosalo se tagata i le faataunuuina e Ieova o Lana folafolaga na te tausia Ana auauna, e na o le pau la le mea a Satani e fai, o le tuʻi pea o lenā tagata i ni omiga ona vave lava lea ona lē toe auai i ni sauniga. Ioe, pe a tatou lē faatuatua, e maua e Satani le avanoa na te pulea uma ai mea e ao ona tatou faamuamua ae lē o Ieova. Pagā se malaia o le a oo i ai!—2 Korinito 13:5.

“Faatalitali iā Ieova”

17. O ā faamanuiaga o i latou e faamoemoe iā Ieova, e oo lava i le taimi nei?

¹⁷ O loo faaalia pea e le Tusi Paia, o i latou e faatalitali ma faamoemoe iā Ieova e lē taitai iʻu vale. (Faataoto 3:5, 6; Ieremia 17:7) E moni, i  nisi taimi e manaʻomia ai ona latou lotomalilie i ni nai mea faitino ua maua, ae latou te vaai i ai o se mea itiiti pe a faatusatusa i le taui e maua mulimuli. O le auala lea ua faaalia ai foʻi lo latou “faatalitali iā Ieova” ma latou mautinoa, o le a ia faamalieina faanaunauga saʻo uma o loo i loto, o ē faamaoni. (Salamo 37:4, 34) O lea la, ua latou fiafia moni ai e oo lava i le taimi nei. “O le faamoemoe o ē amiotonu o le olioli lea; a o le faatuatuaga o ē amio leaga, e iʻu vale lea.”—Faataoto 10:28.

18, 19. (a) O le ā le faamautinoaga alofa ua tuuina mai e Ieova iā i tatou? (e) E faapefea ona tuuina Ieova i lo tatou “itu taumatau”?

¹⁸ Pe a savali se tamaitiiti ma uu le lima o lona tamā, na te lagonaina le saogalemu. E faapena foʻi i tatou a o savavali faatasi ma lo tatou Tamā o i le lagi. Na fetalai Ieova iā Isaraelu: “Aua e te fefe, auā ou te iā te oe . . . ou te fesoasoani iā te oe . . . Auā o aʻu o Ieova lou Atua, o lē ua taofi lou lima taumatau; o lē ua fai atu iā te oe, Aua e te fefe, o aʻu, ou te fesoasoani iā te oe.”—Isaia 41:10, 13.

¹⁹ Maʻeu se ata māfana o le taofi e Ieova o le lima o se tasi! Na tusi Tavita: “Ou te tuu Ieova i oʻu luma e lē aunoa; auā o i loʻu itu taumatau o ia, e lē faagaeetia ai lava aʻu.” (Salamo 16:8) E faapefea ona tatou tuuina Ieova i lo tatou “itu taumatau”? A itiiti mai e lua ni auala e faia ai faapea. Muamua, ia taʻitaʻia e lana Afioga vala uma o o tatou olaga; ma lona lua, e tatou te taulaʻi atu i le taui matagofie ua tuuina e Ieova i o tatou luma. Na pese le faisalamo o Asafo: “O aʻu, e lē aunoa ona ta faatasi ma oe; na e taofiina loʻu lima taumatau. E te taʻitaʻi iā te aʻu i lau pule, a e mulimuli ane e te talia mai aʻu i le manuia.” (Salamo 73:23, 24) O lenei faamautinoaga ua mafai ai ona tatou fesagaʻia ma le mautinoa le lumanaʻi.

Ua “Latalata Ina Faaolaina Outou”

20, 21. O le ā le lumanaʻi o i latou e faamoemoe iā Ieova?

²⁰ A o faagasolo aso taʻitasi, ua sili ona manaʻomia le faanatinati ona tuuina Ieova i lo tatou itu taumatau. Ua toeitiiti nei ona fetaiaʻi lea o le lalolagi a Satani ma se puapuaga e leʻi i ai muamua, e amata lava i le faaumatiaga o lotu sesē. (Mataio 24:21) O le a matuā fefefe tagata e lē faatuatua. Peitaʻi, a o faagasolo lenā taimi, o le a olioli auauna lototetele a Ieova ona o lo latou faamoemoe. Na fetalai Iesu: “A afua ona faia o ia mea, ia tepa aʻe outou, ma ia ea i luga o outou ulu; auā e latalata ina faaolaina outou.”—Luka 21:28.

²¹ O lea, ia tatou olioli i lo tatou faamoemoe ua tuuina mai e le Atua, ma ia aua neʻi faasesēina pe faaosoosoina i mea faatosina a Satani. I le taimi e tasi, seʻi o tatou galulue malosi e ati aʻe lo tatou faatuatua, alofa ma le mataʻu i le Atua. O le faia faapea, o le a tatou lototetele ai e usiusitai iā Ieova po o ā lava tulaga, ae tetee atu i le Tiapolo. (Iakopo 4:7, 8) Ioe, “o outou na uma lava, o ē faamoemoe iā Ieova, inā faalototetele ia; e faamalolosia foʻi e ia o outou loto.”—Salamo 31:24.

[Faamatalaga pito i lalo]

Pe Mafai Ona E Tali?

• O le ā le auala na saosaolaumea ai le faamoemoe o Iesu i lona loto tele?

• O le ā sootaga o le faatuatua ma le faamoemoe?

• E faapefea ona fesoasoani le faamoemoe ma le faatuatua i se Kerisiano e loto tele ai e faatulaga mea e ao ona faamuamua i le olaga?

• Aiseā e mafai ai ona vaavaai atu ma le mautinoa i le lumanaʻi i latou e “faamoemoe iā Ieova”?

[Fesili mo le Suʻesuʻega]

[Ata i le itulau 28]

Pe e te talavou pe matua, po o mafai ona e iloa atu oe i le Parataiso?