“Aiseā ua Tatou Iai i Inei?”

NA FAAPEA mai Elie Wiesel, o lē na manumalo i le faailoga o le Noble Prize ma o lē na sao mai faasalaga a le ʻau Nasi e uiga i lenei fesili, “o se fesili e sili ona tāua e tatau ona mafaufau i ai se tagata.” O le fesili lea, “Aiseā ua tatou iai i inei?”

Pe sa e tomānatu i lenā fesili? E toʻatele nisi ua tomānatu i ai peitaʻi, e latou te leʻi mauaina le tali sao. I ana taumafaiga ina ia mauaina le uiga o le olaga, na faapea mai ai le tusitala o tala faasolopito Peretania o Arnold Toynbee: “O le sini o le tagata o le vivii i le Atua ma maua ai le fiafia e faavavau.”

O se mea e mataʻina ai, i le silia ma le tolu afe tausaga talu ai, sa iai se isi tagata na lauiloa i le mātauina o vala o le olaga, na mauaina le tali o lenā fesili po o le māfuaaga autū o le olaga. Sa faapea mai le tupu poto o Solomona: “Seʻi tatou faalogo ia i le iʻuga o ia mea uma, Ia e mataʻu i le Atua, ma e anaana i ana poloaʻiga; auā o mea ia e tatau i tagata uma.”—Failauga 12:13.

Sa lagolagoina e le alo o le Atua o Iesu Keriso lenei manatu tāua. A o i ai Iesu i le lalolagi, sa ia faia taumafaiga uma ina ia viia ai lona Tamā i le lagi. O le auauna atu o Iesu i Lē na faia o ia, sa faatamaoaiga ai lona olaga. Sa tausia ma faamalosia ai o ia, ma mafai ai ona faapea mai: “O laʻu mea e ʻai, ia ou faia le finagalo o lē na auina mai aʻu.”—Ioane 4:34.

Aiseā la ua tatou iai i inei? I le pei o Iesu, Solomona ma isi auauna a le Atua, e mafai ona tatou maua se olaga uigā ma fiafia pe a tatou faia le finagalo o le Atua. Pe e te fia iloa atili le auala e tapuaʻi ai i le Atua “i le agaga ma le faamaoni”? (Ioane 4:24) E fiafia Molimau a Ieova i lou vaipanoa e fesoasoani atu iā te oe ina ia tali lenei fesili “Aiseā ua tatou iai i inei?”