Faaalia le Faaaloalo mo a Tatou Faatasiga Paia

“Ou te aumaia i latou lava i loʻu mauga paia, ma aʻu faafiafia iā te i latou i loʻu fale tatalo.”—ISAIA 56:7.

1. O ā ni māfuaaga faale-Tusi Paia, e tatau ai ona faaalia le faaaloalo talafeagai mo a tatou faatasiga?

UA AOAOINA e Ieova lona nuu, o Kerisiano faauuina ma a latou aumea, ina ia tapuaʻi atu iā te ia i lona “mauga paia.” O loo ia faafiafiaina i latou i lona “fale tatalo,” o lona malumalu faaleagaga, lea ua avea ma “fale tatalo mo nuu uma.” (Isaia 56:7; Mareko 11:17) O nei sauniuniga uma e faaalia ai o le tapuaʻiga iā Ieova e paia, e lē ponā, ma e mamalu. Afai la tatou te faaaloalo i a tatou faatasiga mo le suʻesuʻeina o lana Afioga ma le tapuaʻi atu iā te ia, e faamaonia atu ai, o loo iā i tatou le silafaga a Ieova e tusa ai o mea paia.

2. E faamaonia faapefea sa manatu Ieova e paia le nofoaga lea na ia filifilia mo lana tapuaʻiga, ma na faaalia faapefea e Iesu, o lona manatu foʻi lea?

² I Isaraelu anamua, sa tatau ona paia le nofoaga na filifilia e Ieova e fai ai le tapuaʻiga. O le fale fetafaʻi ma mea uma sa faaaogā ai faapea ma ipu, sa tatau ona faauu ma faapaia, “ina ia fai ma mea e sili ona paia.” (Esoto 30:26-29) Sa taʻua vaega e lua o le fale fetafaʻi o ‘le Mea Paia’ ma ‘le Mea e Sili Ona Paia.’ (Eperu 9:2, 3) Mulimuli ane, ona suia ai lea o le fale fetafaʻi, i le malumalu ua iai i Ierusalema. Ma talu ai o Ierusalema lea ua avea ma nofoaga e taulaʻi i ai le tapuaʻiga iā Ieova, na taʻua ai o “le aai paia.” (Neemia 11:1; Mataio 27:53) A o faagasolo lana faiva i le lalolagi, sa faaalia foʻi e Iesu se faaaloalo talafeagai mo lenā malumalu. Sa toʻasā Iesu i tagata ona o faiga lē faaaloalo sa latou faaaogā ai le malumalu e fai ai a latou fefaatauaʻiga faapisinisi, ma fai foʻi ma auala ʻalo.—Mareko 11:15, 16.

3. O le ā ua faataʻitaʻia ai le paia o faatasiga a Isaraelu?

³ Sa lē aunoa ona faapotopoto le nuu o Isaraelu e tapuaʻi iā Ieova ma faalogo i le faitauina o lana Tulafono. Sa iai ni aso patino o a latou tausamiga na taʻua o faapotopotoga paia po o ni tauaofiaga aloaʻia, e faailoa ai le paia o nei faatasiga. (Levitiko 23:2, 3, 36, 37) I se faapotopotoga na faia i aso o Esera ma Neemia, sa tatau ai i le ʻau sā Levī ona ‘faamatala atu le tulafono i le nuu.’ Sa “fetagisi le nuu uma, ina ua latou faalogologo i upu o le tulafono,” o lea na faatonuina ai e le ʻau sā Levī “le nuu uma, ua faapea atu, Fifilemu ia outou; auā o le aso paia lenei.” Ona ‘matuā tele ai lea o le fiafia’ o le nuu o Isaraelu, a o latou faamanatuina le Tausamiga o Fale Apitaga mo le umi e fitu aso. Sa faitauina foʻi “le tusi o le tulafono a le Atua i lea aso ma lea aso, e afua i le aso muamua ua oo i le aso e iʻu ai. O aso e fitu foʻi ua latou fai ai le tausamiga, ua faia foʻi le faapotopotoga i le aso e valu, e tusa ma le tū.” (Neemia 8:7-11, 17, 18) O na faatasiga paia, sa manaʻomia lava ona uaʻi atu i ai ma le faaaloalo le aofia.

O a Tatou Sauniga, o ni Faatasiga Paia

4, 5. O ā vala o a tatou faatasiga e faamaonia ai o ni faatasiga paia?

⁴ I aso nei, e lē o toe iai i le lalolagi se aai paia moni o Ieova, ma se malumalu faapitoa ua faapaiaina mo lana tapuaʻiga. Ae aua neʻi galo, o a tatou sauniga o loo tatou tapuaʻia ai Ieova, o ni faatasiga e paia. E faatolu i le vaiaso ona tatou faatasitasi ina ia faitau ma suʻesuʻeina le Tusi Paia. Ua ‘faitauina’ le Afioga a Ieova, ma i aso o Neemia, sa “folafola atu le uiga” o mea na faitauina. (Neemia 8:8) O a  tatou sauniga uma lava e amata ma toe faaiʻu i le tatalo, ma o le tele o na sauniga tatou te peseina ai viiga iā Ieova. (Salamo 26:12) O sauniga faalefaapotopotoga, o se vaega moni o la tatou tapuaʻiga, ma e tatau ai ona faaalia lo tatou faaaloalo i ai.

⁵ E faamanuia e Ieova ona tagata pe a latou faatasitasi e tapuaʻi iā te ia, suʻesuʻeina lana Afioga, ma auaufaatasi ma isi uso ma tuafāfine Kerisiano. O le isi la taimi e auai atu ai i se sauniga, ia tatou mautinoa, o inā o loo “poloaʻi Ieova ia oo i ai lana faamanuia.” (Salamo 133:1, 3) Tatou te maua lenā faamanuiaga pe a auai ma uaʻi totoʻa atu i le polokalame faaleagaga o faagasolo. Na fetalai foʻi Iesu: “O le mea ua faapotopoto ai se toʻalua, po o se toʻatolu i loʻu igoa, ou te i ai faatasi ma i latou.” I le aotelega o lenei fetalaiga e iloa ai, e faatatau atu i toeaina Kerisiano o loo faatasitasi ina ia taulima ni faafitauli matuiā i le va o ni tagata. Ae mafai foʻi ona faatatauina mai i a tatou faatasiga. (Mataio 18:20) Afai e faatasi mai Keriso e ala i le agaga paia, pe a faatasitasi Kerisiano i lona suafa, po ua lē talafeagai ea la ona manatu i na faatasiga e paia?

6. O le ā le tulaga e tatau ona iai nofoaga o loo fai ai a tatou faatasiga tetele ma faatasiga laiti?

⁶ O le mea moni, e lē afio Ieova i ni malumalu e faia e tagata. Peitaʻi, o o tatou Maota mo Sauniga o ni nofoaga mo le tapuaʻiga moni. (Galuega 7:48; 17:24) O inā o loo tatou feiloaʻi ai e suʻesuʻeina le Afioga a Ieova, tatalo atu iā te ia, ma usuina ona viiga. E faapena foʻi i o tatou Maota o Fonotaga. Tatou te togipauina ni nofoaga tetele e fai ai a tatou tauaofiaga, e pei o fale tetele na e faaaogā mo faafiafiaga, o faaaliga, po o taaloga. Ma e mafai ona taʻua o nofoaga o le tapuaʻiga, i le taimi o loo faaaogā ai mo a tatou faatasiga paia. Ma o nei faatasiga mo le tapuaʻiga, pe tetele  pe laiti, ae tatau ona tatou faaaloalogia, ma ia atagia atu i o tatou uiga ma amioga.

O Auala e Faaalia ai le Faaaloalo mo a Tatou Faatasiga

7. O le ā se auala manino e mafai ona tatou faaalia ai le faaaloalo mo a tatou faatasiga?

⁷ E iai auala e mafai ona tatou faaalia ai le faaaloalo mo a tatou faatasiga. E pei o le auai i le usuina o pese o le Malo. O le tele o nei pese o loo faaupuina i ni tatalo ma e tatau ai ona tatou peseina i se tulaga faaaloalo. Na faatatau atu e Paulo upu o le Salamo 22 e tai pei o Iesu lea o loo fetalaia e faapea: “Ou te taʻu atu lou suafa i oʻu uso; ou te pese atu viiga iā te oe i totonu o le faapotopotoga.” (Eperu 2:12) E tatau la ona fai ma a tatou masani le vave i o tatou nofoa a o leʻi faailoa mai e le taʻitaʻifono le pese, ona pepese ai lea ma mafaufau loloto i upu o le pese. Talosia ia atagia atu i a tatou pese lagona o le faisalamo: “Ou te vivii atu iā Ieova ma le loto atoa i le saofaʻiga a ē amiotonu, atoa ma le faapotopotoga.” (Salamo 111:1) O le tasi la lenei o māfuaaga lelei tele e tatau ai ona tatou vave taunuu i a tatou faatasiga ma nonofo ai pea seʻia māeʻa, auā o loo tatou peseina ai viiga iā Ieova.

8. O le ā le faaaʻoaʻoga o loo taʻua i le Tusi Paia e faaalia ai le ono ma tatau ona tatou uaʻi faaaloalo atu i tatalo o loo faia i a tatou faatasiga?

⁸ O le isi vala e atili faateleina ai le tāua faaleagaga o a tatou sauniga uma, o tatalo mai le loto o loo ofoina e se tasi e fai ai ma sui o i latou uma o loo aofia. I se tasi taimi, na potopoto ai Kerisiano o le uluaʻi senituri i Ierusalema, ma “latou alalaga i le Atua ma le loto gatasi” i a latou tatalo faatauanau. O le iʻuga, sa latou “tautala atu i le afioga a le Atua ma le loto tele” e ui ina fesagaʻi ma sauāga. (Galuega 4:24-31) Faamata na iai se isi o i latou na auai i lenā taimi e ono tafaofao solo lona mafaufau a o faia se tatalo faapena? E leai, sa latou tatalo “ma le loto gatasi.” O tatalo e faia i a tatou faatasiga e atagia atu ai lagona o i latou uma o i le aofia. Ua ono ma tatau lo tatou matuā uaʻi atu i nei tatalo.

9. E faapefea ona tatou faaalia le faaaloalo mo faatasiga paia e ala i o tatou laʻei ma amioga?

⁹ E lē gata i lea, e faaalia lo tatou faaaloalo loloto i le tulaga paia o a tatou faatasiga, e ala i le auala tatou te laʻei ai. O o tatou foliga vaaia i o tatou lavalava ma le teuga o o tatou lauulu, e telē lava se sao i le faamamaluina o a tatou faatasiga. Na fautua mai le aposetolo o Paulo: “O loʻu manaʻo ia tatalo o tane i mea uma lava, o loo sisii i luga o lima lē agasala, ma ia lē ita, ma ia lē femisaʻi. Ia faapea foʻi fafine, ia latou teuteu iā i latou i ofu e onomea, ma ia lē teuanoaʻi, a ia faamatuāfafine; aua neʻi teteu ma le lauulu fili, po o auro, po o penina, po o ofu tau tele, a o galuega lelei, o le mea lea e tatau i fafine ua taʻua latou e i latou o ē amio Atua.” (1 Timoteo 2:8-10) Pe a tatou auai i tauaofiaga tetele e faia i fafo i malae taalo, e tatau foʻi la ona tatou laʻei ia fetaui ma le tulaga o le tau. Peitaʻi i le taimi e tasi, ia tumau pea le mamalu o o tatou laʻei. O lo tatou faaaloalo foʻi mo le faatasiga o le a tatou lē aai ai pe lamupulu a o faagasolo le polokalame. Pe a onomea o tatou laʻei ma lelei a tatou amioga i nei faatasiga, o le a faamamaluina ma viia ai Ieova le Atua, o lana tapuaʻiga, ma taʻuleleia ai foʻi o tatou uso tapuaʻi.

O Amio e Talafeagai mo le ʻAuaiga o le Atua

10. Na faaalia faapefea e Paulo le maualuga o tapulaa tau amio e manaʻomia i a tatou sauniga faa-Kerisiano?

¹⁰ I le 1 Korinito, mataupu e 14, tatou te faitau ai i le fautuaga atamai a Paulo i le auala e tatau ona faafoe ai sauniga faa-Kerisiano. Ona faaiʻu mai lea o lana fautuaga: “Ia faia mea uma lava ma le matagofie ma le sauni lelei.” (1 Korinito 14:40) O a tatou sauniga o se vaega tāua o meafai a le faapotopotoga Kerisiano, e manaʻomia ai la le ituaiga o amio lea e talafeagai mo le ʻauaiga o Ieova.

11, 12. (a) O le ā e tatau ona faamausalī i mafaufau o a tatou fanau a o auai i a tatou sauniga? (e) O le ā le auala talafeagai e mafai e tamaiti ona faaalia ai lo latou faatuatua i taimi o a tatou sauniga?

 ¹¹ E manaʻomia patino lava ona aʻoaʻoina tamaiti i le auala e amioaʻi ai i a tatou faatasiga. E tatau i mātua Kerisiano ona faamatala lelei i a latou fanau, o le Maota mo sauniga ma le nofoaga o loo faia ai le Suʻesuʻega Tautusi a le Faapotopotoga, e lē o ni nofoaga e taaalo ai. O nofoaga na o loo tatou tapuaʻi atu ai iā Ieova ma suʻesuʻeina ai lana Afioga. Na tusi le tupu poto o Solomona: “Ia e faaeteete i ou vae pe a e alu i le fale o le Atua; ia e faalatalata atu foʻi e faalogologo.” (Failauga 5:1) Sa faatonuina e Mose le nuu o Isaraelu ina ia faapotopoto, o tagata matutua ma “tama iti.” Na ia faapea atu: “Ia e faapotopotoina le nuu, . . . ina ia latou faalogologo ai, ma ia aʻoaʻoina i latou, ma ia latou matataʻu iā Ieova lo outou Atua, ma latou anaana e fai o upu uma lava o lenei tulafono. O a latou fanau foʻi, ē na lē iloa, ia latou faalogologo, ma ia aʻoaʻoina i latou ia matataʻu iā Ieova.”—Teuteronome 31:12, 13.

¹² E faapena foʻi aso nei, o loo ō atu faatasi a tatou fanau ma o latou mātua i sauniga, ina ia faalogologo ma aʻoaʻoina. O le taimi lava e mafai ai e fanau ona uaʻi atu ma malamalama i upu moni faavae o le Tusi Paia, ua mafai foʻi la ona latou taʻutino atu i le lautele lo latou faatuatua e ala i le faia o so latou sao i ni a latou tali pupuu. (Roma 10:10) Mo se tamaitiiti laʻitiiti, e mafai ona amata i ni nai upu laiti e tali ai se fesili o loo ia malamalama ai. Muamua atonu o le a faitau lana tali, peitaʻi a o faagasolo taimi, o le a ia taumafai e fai mai le tali i ana lava upu. E aogā lenei faiga ma e fiafia ai foʻi le tamaitiiti, ma o lenā ituaiga o faailoaga o le faatuatua e fiafia ai tagata matutua o loo auai. O le mea masani, e tatau ona fai mātua ma faaaʻoaʻoga lelei e ala i le fai foʻi o ni o latou sao i tali. O se mea lelei foʻi pe afai e mafai, ia tofu lava le tamaitiiti ia ma lana Tusi Paia, se tusi pese, ma se kopi o le lomiga lea e suʻesuʻeina. Ia aʻoaʻoina i latou ina ia tausia lelei ma le faaaloalo na lomiga. O nei aʻoaʻoga uma e faamausalī ai i mafaufau o tamaiti, o a tatou sauniga o ni faatasiga e paia.

13. O le ā lo tatou faamoemoega mo i latou e auai mai i a tatou sauniga mo le uluaʻi taimi?

¹³ E tatou te lē mananaʻo e tutusa a tatou sauniga ma le faiga o lotu a Kerisiano faatagāfai. O a latou lotu a lē pei o ni sauniga faanoanoa ma soona faamamalu, ia po o le pisapisaō ua pei o ni koneseti malomaloā. Tatou te mananaʻo i a tatou sauniga ia maua ai lagona māfana ma uiga faaleuō, ae lē o le pei o se kalapu o faafiafiaga. E māfua ona tatou faatasitasi ina ia avatu le tapuaʻiga iā Ieova, lona uiga la, e tatau lava ona faia a tatou sauniga i se tulaga mamalu. O lo tatou faanaunauga, pe a uma ona tatou faalogologo i se mataupu na tauaaoina ma mātauina foʻi uiga o a tatou fanau, e talosia ia faapea mai i latou o le taimi muamua lea ua auai i se sauniga: “O iā te outou le Atua.”—1 Korinito 14:25.

Se Vala Tumau o la Tatou Tapuaʻiga

14, 15. (a) E faapefea ona tatou ʻalofia le ‘tuua o le fale o le Atua’? (e) Ua faapefea ona faataunuuina le Isaia 66:23?

¹⁴ E pei ona taʻua muamua, o loo aoaoina e Ieova lona nuu ma faafiafiaina i latou i lona “fale tatalo,” o lona malumalu faaleagaga.  (Isaia 56:7) Sa faamanatu e Neemia i ona uso Iutaia ina ia faaali lo latou faaaloalo tatau mo le malumalu e ala i le lagolagoina i mea faaletino. Na ia faapea atu: “Tatou te lē tuua lava le fale o lo tatou Atua.” (Neemia 10:39) Aua foʻi tatou te tuua pe faatalalē i le valaaulia a Ieova ina ia tapuaʻia o ia i totonu o lona “fale tatalo.”

¹⁵ E manaʻomia foʻi ona faatasitasi e lē aunoa mo le tapuaʻiga, e pei ona valoia e Isaia: “O lea masina faatoʻā vaaia, ma lea masina faatoʻā vaaia, o lea sapati ma lea sapati e ō mai ai tagata uma lava e ifo mai i oʻu luma, ua fetalai mai ai Ieova.” (Isaia 66:23) O le mea lenā o loo tupu i aso nei. I vaiaso taʻitasi o masina taʻitasi, ua fai ma masani a Kerisiano faamaoni lo latou faapotopoto e tapuaʻi iā Ieova. E tele auala e faia ai, e pei o le auai i sauniga faa-Kerisiano ma auai i le galuega talaʻi. Po o e iai faatasi ma i latou o loo lē aunoa ona ‘ō mai e ifo atu i luma o Ieova’?

16. Aiseā e tatau ai ona avea le auai e lē aunoa i sauniga o se vala tumau o o tatou olaga i aso nei?

¹⁶ O le a atoatoa le faataunuuga o le Isaia 66:23 i le olaga i le lalolagi fou ua folafola mai e Ieova. I lenā taimi, o le a “ō mai ai tagata uma lava” i lea vaiaso ma lea vaiaso, ma lea masina ma lea masina, ina ia ‘ifo atu i luma,’ pe tapuaʻi atu iā Ieova e faavavau. O le a avea le faatasitasi e tapuaʻi iā Ieova o se vala tumau o o tatou olaga faaleagaga i le lalolagi fou. Po ua lē tatau foʻi la ona avea le auai e lē aunoa i a tatou faatasiga paia, o se vala tumau o o tatou olaga i aso nei?

17. Aiseā ua manaʻomia ai a tatou sauniga aemaise lava “ina ua [tatou] iloa o le Aso o loo tāulata mai”?

¹⁷ A o lalata mai le iʻuga, ua tatau nei ona tatou matuā maumauaʻi e auai i a tatou faatasiga uma faa-Kerisiano mo le tapuaʻiga. Afai tatou te faaaloalo i le tulaga paia o a tatou faatasiga, o le a tatou lē faatagaina ai a tatou galuega totogi, o meaaʻoga, po o nisi aʻoga faaopoopo i afiafi, e avea ma pogai o le misia o lo tatou faatasitasi ma isi o tatou uso tapuaʻi. Tatou te manaʻomia le malosi e maua mai na aufaatasiga. O a tatou sauniga a le faapotopotoga e maua ai le avanoa e masani ai ma isi, e fefaasoaaʻi ai faalaeiauga, ma faatupu ai le “alofa ma galuega lelei.” Ua matuā talafeagai lelei le faia faapea aemaise lava “ina ua [tatou] iloa o le Aso o loo tāulata mai.” (Eperu 10:24, 25) O lea la, seʻi o tatou faaalia i taimi uma le faaaloalo talafeagai mo a tatou faatasiga paia, e ala i le auai e lē aunoa, ia talafeagai o tatou laʻei, faapea a tatou amio. O le faia faapea, e taʻu atu ai o loo tutusa o tatou manatu ma le silafaga a Ieova i mea paia.

O se Autaluga

• O le ā e faaalia ai, e tatau ona paia faatasiga a tagata o Ieova?

• O ā vala o a tatou sauniga e faamaonia ai o ni faatasiga paia?

• E faaalia faapefea e tamaiti o loo latou faaaloalo i le paia o a tatou faatasiga?

• Aiseā e tatau ai ona avea le auai e lē aunoa i sauniga o se vala tumau i o tatou olaga?

[Fesili mo le Suʻesuʻega]

[Ata i le itulau 28]

O sauniga e tapuaʻi atu ai iā Ieova, o ni faatasiga paia, e tusa lava po o fea le nofoaga o loo faia ai

[Ata i le itulau 31]

E auai a tatou fanau i sauniga ina ia faalogologo ma aʻoaʻoina