Se Meaalofa Tumau Mai Lē Na Foafoaina Mea Uma

PE E TE lē maofa ea ona o mea ia e talitonu saienitisi e manaʻomia ona iai i se paneta ina ia faatumauina ai le ola, o loo taʻua po o loo faamatalaina i le uluaʻi tusi o le Tusi Paia? O ā nei mea?

Ina ia faatumauina le ola e tatau ona lava le vai e pei ona taʻua i le Kenese 1:2. E tatau ona paleni le vevela i se paneta ina ia lē liu aisa uma ai le vai. Ina ia mafai lenei mea e tatau ona fetaui lelei le va o le paneta ma le lā. E tele taimi o loo faauaʻi atu ai e le tusi o Kenese manatu i aafiaga o le lā i le lalolagi.

Ina ia mafai ona nonofo tagata i se paneta, e tatau ona paleni le tuufaatasiga o kasa i le atimosifia. O loo taʻua nei vala tāua i le Kenese 1:6-8. E pei ona faamatalaina i le Kenese 1:11, 12, e manaʻomia laau ina ia lava ai le okesene. Ae o loo faamatalaina i le Kenese 1:9-12 e tatau ona iai se konitineta e lē lofia uma i le vai ina ia faaauau ona tele ituaiga o meaola e maua ai. O le manatu mulimuli, ina ia iai se tau talafeagai, e tatau ona sipa le paneta i le tulaga fetaui ma ia tumau ai—a o le lalolagi o loo fesoasoani le malosi o le kalave o le masina ina ia tumau i lona tulaga. O lenei malamalamaga ma ona aogā o loo faamatilatila mai i le Kenese 1:14, 16.

Na faapefea i se tusitala anamua e pei o Mose ona ia iloaina nei vala a o leʻi iai le atamai faasaienisi e pei ona iai nei? Pe sa iloa ea e Mose nei mea ona e sili atu lona atamai na i lo isi tagata na latou ola faatasi? Sa mafai ona ia faamatalaina nei vala talu ai, sa faagaeeina e Lē na Foafoaina le lagi ma le lalolagi. E mataʻina lenei mea pe a manatu i le saʻo faasaienisi o faamatalaga o i le tusi o Kenese.

O loo faamautinoa mai e le Tusi Paia e iai se fuaufaga o mea matagofie o loo tatou mātauina i le vateatea o loo siʻomia ai i tatou. Ua faapea mai le Salamo 115:16: “O le lagi, o le lagi lava, e iā Ieova lea; a ua tuuina mai e ia le lalolagi mo le fanau a tagata.” Ua taʻua atili i le isi Salamo: “O lē na faavaeina le lalolagi i luga o ona lava faavae, ina ia lē gaee e faavavau faavavau lava.” (Salamo 104:5) Afai na fuafuaina ma saunia le vateatea ma lo tatou paneta matagofie e Lē na foafoaina mea uma, ma le mautinoa la e faigofie ona ia faatumauina mea uma i ona tulaga talafeagai. E mafai la ona tatou taulaʻi atu ma le mautinoa i le faataunuuina i le lumanaʻi o le folafolaga: “E fai lava le nuu mo tagata amiotonu, e nonofo ai pea i latou.” (Salamo 37:29) Ma le mautinoa lava, e leʻi “faia fua” e le Atua [le lalolagi] ae “na ia faia ina ia ʻainā” e faavavau e i latou e faaalia le loto faafetai i ana foafoaga.—Isaia 45:18.

E tusa ai ma le Tusi Paia, na afio mai Iesu i le lalolagi ina ia aʻoaʻo i tatou e faatatau i le Atua ma Lona finagalo ia mafai ona maua e tagata usiusitai le ola e faavavau. (Ioane 3:16) Ua faamautinoa mai iā i tatou ua toeitiiti ona aumaia loa lea e le Atua le iʻuga e “fano ai foʻi i latou o ē na fano ai le lalolagi,” ae faasaoina ē e faatupuina le filemu i le lalolagi aoao ma talia sauniuniga o le faaolataga. (Faaaliga 7:9, 14; 11:18) Maʻeu le matagofie o le a iai le olaga a o faaauau ona aʻoaʻoina ma faafiafiaina ai e faavavau i foafoaga a le Atua!—Failauga 3:11; Roma 8:21.

[Faamatalaga i Ata i le itulau 8]

Ata a NASA