Fesili Mai le ʻAufaitau

O afea e muta ai le valaauina o Kerisiano e iai le faamoemoe mo le lagi?

E lē o maʻoti se tali o lenā fesili i le Tusi Paia. O loo tatou iloa le taimi na amata ai le faauuina o soo o Iesu ma le faamoemoe i le tofi mo le lagi, lea na amata i le 33 T.A. (Galuega 2:1-4) Ua tatou iloa foʻi ina ua maliliu uma le ʻauaposetolo, ona ‘ola lua pea lea o saito’ po o Kerisiano faauuina faamaoni, ma “titania” po o Kerisiano pepelo. (Mataio 13:24-30) Ona amata mai lea i tausaga faaiʻuiʻu na amata mai i le 1800, na toe amataina ai gaoioiga mataʻina a Kerisiano faauuina. O “saito o le lalolagi,” lea e aofia ai le aoaoina o le vaega faaiʻu o le ʻaufaauuina sa amata ona seleseleina i le 1919.—Faaaliga 14:15, 16.

Mai tausaga faaiʻuiʻu na amata i le 1800 e oo mai i le 1931, o le fuafuaga autū o le talaʻiga o le aoaoina lea o le vaega totoe o le tino o Keriso. I le 1931 na faaaogā ai loa e Tagata Aʻoga o le Tusi Paia le igoa faale-Tusi Paia o Molimau a Ieova, ma i le Watchtower o Novema 15, 1933, sa faamalamalama ai o lenei igoa tāua o le “tenari” lea o loo taʻua i le faataoto a Iesu i le Mataio 20:1-16. O le 12 itula o loo taʻua i le faataoto sa manatu e fesootaʻi i le 12 tausaga mai le 1919 e oo mai i le 1931. Ina ua mavae le tele o tausaga, sa iai le talitonuga ua muta le valaauina mo le Malo o le lagi i le 1931, ma o i latou na valaauina e avea ma suli faatasi ma Keriso i le 1930 ma le 1931 o le vaega “mulimuli” lenā na valaauina. (Mataio 20:6-8) Ae i le 1966 na iai se faamalamalamaga atili o lenā faataoto, ma manino mai ai e lē fesootaʻi atu i le mutaaga o le valaauina o le ʻaufaauuina.

I le 1935 na iloa ai o le “motu o tagata e toʻatele” i le Faaaliga 7:9-15 o loo faia aʻe e “isi mamoe,” o Kerisiano e iai le faamoemoe mo le lalolagi, o le a faamaopoopoina i “aso e gata ai” ma faasaoina mai iā Amaketo. (Ioane 10:16; 2 Timoteo 3:1; Faaaliga 21:3, 4) Ina ua māeʻa lenā tausaga, na patino atu loa le galuega o le faia o soo i le aoaoina o le motu o tagata e toʻatele. O lea la, aemaise ina ua mavae le 1966, na talitonu ai ua muta le valaauina o i latou mo le lagi i le 1935. Na faamautinoa atili lea manatu i le toeitiiti o i latou uma na papatiso talu mai le 1935, na talitonu o lo latou faamoemoe e  mo le lalolagi. O so o se tasi la na toe valaauina mo le faamoemoe i le lagi, e iai le talitonuga, o sē e suitulaga i se Kerisiano faauuina ua lē faamaoni.

Ma le mautinoa, afai e toe alu ese mai le upu moni ma le lē salamō se tasi o le ʻaufaauuina, o le a toe valaauina e Ieova se isi e sui tulaga ai. (Roma 11:17-22) Peitaʻi, e toʻaitiiti lava le fuainumera o le ʻaufaauuina ua lē faaauau ona faamaoni. I le isi itu, a o faagasolo taimi, o nisi Kerisiano na papatiso ina ua mavae le 1935, na molimau i ai le agaga iā te i latou e latou te maua le faamoemoe mo le lagi. (Roma 8:16, 17) O lea la, e foliga mai e lē mafai ona tatou taʻua se vaitaimi patino e faamutaina ai le valaauina o Kerisiano mo le faamoemoe i le lagi.

O le ā le vaaiga e tatau ona iai i se tagata ua tagofia le areto ma le uaina ona ua ia mautinoa i lona loto e faauuina o ia? E lē tatau ona faamasinoina o ia. E patino atu lava lenā mataupu i le tagata lava ia ma Ieova. (Roma 14:12) Peitaʻi, o Kerisiano faauuina faamaoni e lē mananaʻo i ni tofiga faapitoa. E latou te lē talitonu, faapea a faauuina i latou o le a tele atu ai lo latou “malamalama” na i lo isi o le motu o tagata e toʻatele lea e iai le tofā ma le utaga mamao. E latou te lē talitonu foʻi e tele atu le fesoasoani a le agaga paia iā te i latou na i lo isi mamoe; e latou te lē faatalitalia e auauna atu isi iā i latou, pe manatu e sili atu i latou i toeaina tofia o le faapotopotoga ona latou te tagofia le uaina ma le areto. E latou te manatua o isi tane faauuina i le uluaʻi senituri e leʻi agavaa e avea ma toeaina po o se auauna o le faiva. (1 Timoteo 3:1-10, 12, 13; Tito 1:5-9; Iakopo 3:1) Sa vaivai faaleagaga foʻi nisi o Kerisiano faauuina. (1 Tesalonia 5:14) E ui na faauuina tuafāfine, ae latou te leʻi aʻoaʻo atu i totonu o le faapotopotoga.—1 Timoteo 2:11, 12.

O lona uiga la, o Kerisiano faauuina ma isi mamoe e galulue soosoo tauʻau ina ia malolosi faaleagaga, ma ati aʻe fua o le agaga lea e faatumauina ai le filemu o le faapotopotoga. O Kerisiano uma, pe faauuina po o isi mamoe, e galulue mamafa i le talaʻia o le tala lelei ma le faia o soo i lalo o le taʻitaʻiga a le Vaega Pule. O Kerisiano faauuina uma e lotomalilie e faaauau ona fai lenei galuega po o le ā lava le umi e finagalo le Atua e latou te tumau ai i le lalolagi o ni auauna a Ieova.