Ia Ta‘ita‘ia e le Afioga a le Atua Ou Ala
Ia Taʻitaʻia e le Afioga a le Atua Ou Ala
“O lau afioga o le sulu lea i oʻu vae, ma le malamalama i loʻu ala.”—SALAMO 119:105.
1, 2. Aiseā ua toʻatele ai tagata e lē o taulau manuia i le saʻilia o le filemu moni ma le fiafia?
PE E te manatua se taimi na e fesili ai i se isi mo ni taʻiala? Atonu ua e latalata i le nofoaga o loo e agaʻi atu i ai, peitaʻi ua e lē mautinoa i nai faasinoga mulimuli o le auala. Pe atonu foʻi ua e sē ma manaʻomia ai ona sui atoa le ala e te ui ai. I ia tulaga e lua, pe e lē o se gaoioiga poto ea le mulimuli i faasinoga a se tasi e iloa lelei lea vaipanoa? E mafai ona fesoasoani lea tagata iā te oe ina ia e taunuu i lea nofoaga.
2 Ua faitau afe tausaga o taumafai tagata e faatonuina o latou olaga e aunoa ma le fesoasoani mai le Atua. Peitaʻi, e lē taulau manuia tagata lē lelei atoatoa pe afai latou te lē faalagolago i le Atua. E lē mafai ona latou maua le ala i le filemu moni ma le fiafia. Aiseā ua lē mafai ai ona latou ausia lea faamoemoe? Na taʻua e le perofeta o Ieremia i le silia ma le 2,500 tausaga ua mavae: “E lē o i le tagata e savali ona faatonuina le mea e ui ai o ia.” (Ieremia 10:23) E lē mafai ona taulau manuia se tasi e taumafai e faatonutonu ona ala e aunoa ma le taliaina o se fesoasoani mai sē e agavaa. Ioe, e manaʻomia moni lava e tagata taʻiala!
3. Aiseā ua matuā agavaa ai Ieova le Atua e aumaia taʻiala mo tagata, ma o le ā le mea ua ia folafola mai?
3 Ua matuā agavaa Ieova le Atua e aumaia ia taʻiala. Aiseā? Auā e sili atu lona silafia na i lo o se isi lava i le auala na faia ai tagata. Ua ia silafia lelei le auala na taʻitaʻisesēina ma agasala ai tagata ma le mea e manaʻomia mo i latou ina ia toe saʻo ai o latou ala. I le avea ai o Lē na Faia mea, e silafia foʻi e Ieova i taimi uma le mea e sili ona lelei mo i tatou. (Isaia 48:17) E ao ai ona tatou matuā faatuatua i ana folafolaga o loo i le Salamo 32:8: “Ou te aʻoaʻo iā te oe, ma faasino iā te oe i lea lava ala e te savali ai; ou te faatonu iā te oe, ma ou vaai iā te oe.” E tatou te mautinoa: E aumaia e Ieova taʻiala e sili ona lelei. Ae faapefea ona ia taʻitaʻia i tatou?
4, 5. E faapefea ona taʻitaʻia i tatou e afioga a le Atua?
4 Na tatalo se faisalamo iā Ieova: “O lau afioga o le sulu lea i oʻu vae, ma le malamalama i loʻu ala.” (Salamo 119:105) O loo i le Tusi Paia tuleiga ma faamanatuga a le Atua, ma e mafai ona fesoasoani iā i tatou e foʻia ai faafitauli. O lea la, pe a tatou faitau ma gauaʻi atu i le taʻitaʻiga a le Tusi Paia, e tatou te iloa moni ai le mea o loo faamatalaina i le Isaia 30:21: “E faalogo foʻi o outou taliga i le upu i o outou tua, . . . e faapea mai, O le ala lava lenei, ia outou savavali ai.”
5 Ae mātau mai, o loo faasino atu le Salamo 119:105 i ni aogā se lua e sootaga faatasi o le Afioga a le Atua. Muamua, e avea ma sulu i o tatou vae. Pe a tatou fesagaʻi ma faafitauli i aso taʻitasi, e ao ona taʻitaʻia o tatou ala i taʻiala o loo i le Tusi Paia ina ia tatou faia ai filifiliga atamai, ma ʻalofia ai mailei o lenei lalolagi. O lona lua, o faamanatuga a le Atua e fai ma malamalama i o tatou ala, ma fesoasoani e faia filifiliga e ōgatusa ma lo tatou faamoemoe o le ola e faavavau i le Parataiso ua folafola mai e le Atua. Ona ua malamalama lelei le ala, o le a mafai la ona tatou iloa āuga lelei pe leaga o se filifiliga. (Roma 14:21; 1 Timoteo 6:9; Faaaliga 22:12) Seʻi o tatou iloiloina atili pe faapefea i fetalaiga a le Atua o loo i le Tusi Paia ona avea ma sulu i o tatou vae ma malamalama i o tatou ala.
‘O le Sulu i Oʻu Vae’
6. O ā tulaga e avea ai afioga a le Atua ma sulu i o tatou vae?
6 E tatou te faia filifiliga i aso uma. O isi filifiliga e foliga mai e laiti, ae e iai taimi e tatou te fesagaʻia ai se tulaga e tofotofoina ai a tatou amioga tau i feusuaʻiga, faamaoni, po o lo tatou solitū. Ina ia taulau manuia i ia tofotofoga, e tatau ona tatou ‘aʻoaʻo soo e iloa le lelei ma le leaga.’ (Eperu 5:14) Pe a tatou iloa lelei le Afioga a le Atua ma malamalama i ona taʻiala, o lona uiga o loo tatou aʻoaʻo o tatou loto fuatiaifo ina ia faia filifiliga e fiafia ai Ieova.—Faataoto 3:21.
7. Faamatala mai se tulaga e ono manaʻo ai se Kerisiano e faifaimea ma ē e lē o ni Molimau e faigaluega faatasi.
7 Seʻi manatu i le faaaʻoaʻoga lenei. Po o oe o se tagata matua o loo taumafai ma le faamaoni e faafiafia le finagalo o Ieova? (Faataoto 27:11) Pe afai o loo e faia faapea, e ao la ona faamālō atu iā te oe. Ae seʻi faaata i lou mafaufau mo sina taimi, nisi tou te faigaluega faatasi o loo tuu atu iā te oe se pepa ulufale i se taaloga. E latou te fiafia e galulue faatasi ma oe ma e mananaʻo tou te faifaimea faatasi pe a mānava galuega. Atonu e te manatu e lē leaga ia tagata. Atonu o loo latou faaalia foʻi i o latou olaga ni uiga ma ni amioga lelei. O le ā lau filifiliga? Pe e iai se lamatiaga o le talia o le valaaulia? E faapefea ona fesoasoani le Afioga a le Atua iā te oe e fai se filifiliga saʻo i lea tulaga?
8. O ā taʻiala mai le Tusi Paia e fesoasoani iā i tatou e manatunatu ai e uiga i aumea?
8 Seʻi manatu i ni taʻiala mai le Tusi Paia. Atonu o le taʻiala muamua e te manatua o loo i le 1 Korinito 15:33: “O le feoaʻi ma ē amio leaga e leaga ai amio lelei.” Po o le mulimuli ea i lea taʻiala e manaʻomia ai ona tatou ʻalofia so o se tasi e lē o se Molimau a Ieova? O le tali saʻo mai le Tusi Paia e leai. Auā na faaalia e le aposetolo o Paulo le alofa mo “tagata uma” e aofia ai tagata e lē talitonu. (1 Korinito 9:22) I le avea o ni Kerisiano, e ao ona tatou naunau fiafia i isi e aofia ai i latou e lē tutusa o tatou talitonuga. (Roma 10:13-15) E faapefea la ona tatou usiusitai i le fautuaga ia ‘agalelei i tagata uma lava,’ pe a faaesea i tatou mai tagata e manaʻomia la tatou fesoasoani?—Kalatia 6:10.
9. O le ā le fautuaga mai le Tusi Paia e fesoasoani ina ia paleni ai a tatou faiā ma ē tatou te faigaluega faatasi?
9 Peitaʻi, e ese le agalelei i se tasi e faigaluega faatasi, ma le avea o se tasi ma uō māfana. E iai foʻi se isi taʻiala o le Tusi Paia e faatatau i lea tulaga. Na lapataʻi atu Paulo i Kerisiano: “Aua tou te amo faalēgatasi ma ē lē faatuatua.” (2 Korinito 6:14) O le ā le uiga o le faaupuga “aua tou te amo faalēgatasi”? O loo faaliliuina i isi Tusi Paia i le “aua le faifaimea faatasi,” “aua le taumafai e galulue e pei e tutusa,” po o le “aua le ati aʻe ni faiā lē talafeagai.” O le ā le taimi e lē talafeagai ai se faauōga ma se tasi e te lua faigaluega faatasi? O fea le taimi e lē talafeagai ai le lua faauōga ma avea ai ma sē ua amo faalēgatasi? E mafai e le Afioga a le Atua le Tusi Paia ona taʻitaʻia ou ala i lea tulaga.
10. (a) Na faapefea ona filifilia e Iesu ana uō? (e) O ā fesili e fesoasoani i se tasi e fai ai filifiliga atamai i ē e faauō i ai?
10 Seʻi manatu i le faaaʻoaʻoga a Iesu, o lē na alofa i tagata talu mai le amataga. (Faataoto 8:31) A o iai i le lalolagi, na māfana lana faiā ma ona soo. (Ioane 13:1) Na “alofa” foʻi Iesu i se tamāloa na taʻitaʻi sesē e tapuaʻiga. (Mareko 10:17-22) Peitaʻi, na faatulaga e Iesu tapulaa i le filifilia o ana uō māfana. E na te leʻi ati aʻe ni faiā māfana ma tagata e leʻi fiafia moni e fai le finagalo o lona Tamā. I se tasi mea na tupu, na fetalai Iesu: “O aʻu uō outou, pe afai tou te faia mea uma lava ou te fai atu ai iā te outou.” (Ioane 15:14) Atonu e lelei le lua faauōga ma se tasi e te lua faigaluega faatasi. Afai o lea, e lelei ona e fesili ifo iā te oe lava: ‘Pe e naunau lea tagata e faia faatonuga a Iesu? Pe e manaʻo lea tagata e iloa Ieova, o Lē na faatonuina i tatou e Iesu, e tapuaʻi atu i ai? Pe e tutusa ana tapulaa tau amio ma aʻu tapulaa o se Kerisiano?’ (Mataio 4:10) E te maua tali manino i na fesili, a o e talanoa i tagata tou te faigaluega faatasi ma tausisi pea e faatatau tapulaa a le Tusi Paia.
11. Taʻu mai ni tulaga e ao ai ona taʻitaʻia e afioga a le Atua o tatou ala.
11 E tele foʻi isi tulaga e avea ai afioga a le Atua e pei o se sulu i o tatou vae. O se faaaʻoaʻoga, o se Kerisiano e lē faigaluega atonu ua na maua se galuega sa ia manaʻomia vave. Peitaʻi, e manaʻomia lona taimi ma le malosi i lea galuega, ma pe afai e na te taliaina, o le a ia misia nisi o sauniga faa-Kerisiano ma lē auai ai i isi galuega e fesootaʻi atu i le tapuaʻiga moni. (Salamo 37:25) O se isi Kerisiano ua faaosoosoina e matamata i faafiafiaga e solia ai taʻiala a le Tusi Paia. (Efeso 4:17-19) Ae o se isi Kerisiano, e faigofie ona tigā lona loto i masei a ona uso talitonu. (Kolose 3:13) I ia tulaga uma, e ao ona avea le Afioga a le Atua ma sulu i o tatou vae. E tatou te taulau manuia e fesagaʻia so o se faafitauli o le olaga pe a tatou mulimuli i taʻiala a le Tusi Paia. O le Afioga a le Atua e “aogā foʻi ia e aʻoaʻo ai, e aʻoaʻi ai, e faatonu ai, e faapoto ai foʻi i le amiotonu.”—2 Timoteo 3:16.
“Le Malamalama i Loʻu Ala”
12. E faapefea ona avea afioga a le Atua ma malamalama i o tatou ala?
12 O loo taʻua foʻi i le Salamo 119:105, e mafai e afioga a le Atua ona faamalamalamaina o tatou ala ma mea o le a tutupu i le lumanaʻi. Ua tatou malamalama i mea o le a tutupu i le lumanaʻi, ona o loo faamatalaina i le Tusi Paia le uiga o le tulaga pagatia o le lalolagi ma le iʻuga o le a oo i ai. Ioe, ua tatou iloa ua tatou ola i “aso e gata ai” o lenei lalolagi amioleaga. (2 Timoteo 3:1-5) O le iloaina o mea o le a tutupu i le lumanaʻi, e tatau ona iai se aafiaga tāua i o tatou olaga i le taimi nei. Na tusi Peteru: “O lenei, o le a teʻa eseese nei mea uma, pe faapefea la outou amio e tatau ai i le amio lelei ma le amio Atua; o loo faatalitali ma naunau atu ia aulia mai le aso o le Atua.”—2 Peteru 3:11, 12.
13. E faapefea i le faanatinati o le taimi ua tatou ola ai ona aafia o tatou mafaufauga ma olaga?
13 E tatau ona atagia atu i le auala tatou te mafaufau ma ola ai, lo tatou talitonuga maumauaʻi o le a ʻmavae atu le lalolagi, atoa ma lona tuʻinanau.’ (1 Ioane 2:17) O le faatatauina o taʻiala a le Tusi Paia, o le a fesoasoani iā i tatou e faia ai ni filifiliga atamai i ni sini i le lumanaʻi. O se faaaʻoaʻoga, na fetalai Iesu: “A ia outou muaʻi saʻili lona malo ma lana amiotonu; ona faaopoopoina atu lea o ia mea uma iā te outou.” (Mataio 6:33) O se fiafiaga le vaai atu i le toʻatele o talavou o loo faaalia lo latou faatuatua i fetalaiga a Iesu, e ala i le sini atu i le auaunaga faataimi atoa! O isi e aofia ai le aiga atoa, ua tauofo e ō atu i atunuu o loo manaʻomia ai se ʻautalaʻi o le Malo.
14. Na faapefea ona faalautele e se aiga la latou auaunaga?
14 Seʻi manatu i se aiga Kerisiano e toʻafā na latou tuua le Iunaite Setete ina ia ō atu i Dominican Republic, e galulue ai i se faapotopotoga i se taulaga e 50,000 tagata e nonofo ai. E tusa ma le 130 tagata talaʻi i lea faapotopotoga. Ae iā Aperila 12, 2006, e tusa ma le 1,300 tagata na auai i le Faamanatuga o le maliu o Keriso! Ona o lea oganuu ua “sinasina mai nei i le seleselegasaito,” e na o le lima masina, ae ua faia e lenei tamā, tinā, atalii, ma le afafine ni suʻesuʻega faale-Tusi Paia e 30. (Ioane 4:35) Na faamatala mai e le tamā: “E 30 uso ma tuafāfine na ō mai i le faapotopotoga e fesoasoani mai. E pe ā ma le 20 e ō mai i le Iunaite Setete, a o isi e ō mai i Italia, Niu Sila, Sepania, Kanata, ma Bahamas. Na latou taunuu mai ma le naunau e faia se sao i le talaʻiga, ma ua iai se aafiaga lelei i le maelega o uso o lea vaipanoa.”
15. O ā ni faamanuiaga ua e maua ona o le faamuamua o manaʻoga o le Malo i lou olaga?
15 O le mea moni, e lē mafai e le toʻatele ona ō atu i isi atunuu e galulue ai i le mea o loo manaʻomia ai ni tagata talaʻi. Ae o i latou e mafai ona ō atu po o ē e mafai ona suia o latou tulaga ina ia avanoa ai e galulue i ia atunuu, e mautinoa o le a maua le tele o faamanuiaga e ala i le auai i lenei vala o le auaunaga. Po o fea lava e te galue ai, o le a e maua le fiafia pe a e auauna iā Ieova ma lou malosi atoa. Pe a e faamuamua manaʻoga o le Malo i lou olaga, ua folafola mai e Ieova o le a ia “sasaa atu le manuia mo outou, ina seʻia silisili ona tele.”—Malaki 3:10.
Maua Aogā Mai le Taʻitaʻiga a Ieova
16. E faapefea ona tatou maua aogā o le gauaʻi atu i taʻitaʻiga a afioga a le Atua?
16 E pei lava ona tatou iloa, ua taʻitaʻia e afioga a Ieova i tatou i ni auala se lua e sootaga faatasi. E avea ma sulu i o tatou vae, ua fesoasoani iā i tatou e agaʻi ai i luma i le ala saʻo ma taʻitaʻia i tatou pe a faia ni filifiliga. Ma ua faamalamalama ai lo tatou ala, ua mafai ai ona tatou vaai manino atu i le lumanaʻi. O lea la, ua mafai ai ona tatou utagia le lapataʻiga a Peteru: “Ia outou fusi aʻe i sulugātiti o outou mafaufau, ia faautauta, ia atoatoa ona faamoemoe i le alofa tunoa e molia mai iā te outou pe a faaalia mai Iesu Keriso.”—1 Peteru 1:13.
17. E faapefea ona fesoasoani iā i tatou le suʻesuʻe o le Tusi Paia e usitai ai i le taʻitaʻiga a le Atua?
17 E mautinoa ua saunia e Ieova le taʻitaʻiga. O le fesili la, Po o le a e gauaʻi i ai? Ina ia malamalama i le taʻitaʻiga ua saunia e Ieova, ia fai nei sau faaiʻuga e faitau se vaega o le Tusi Paia i aso taʻitasi. Ia mafaufau loloto i mea e te faitau ai, taumafai e iloa le finagalo o Ieova i ia tulaga, ma mafaufau i auala eseese e mafai ona e faatatauina ai ia vala i lou olaga. (1 Timoteo 4:15) Ona faaaogā lelei lea o lou tomai faalemafaufau e faia ai au filifiliga.—Roma 12:1.
18. O ā faamanuiaga tatou te maua pe a avea le Afioga a le Atua ma taʻitaʻiga iā i tatou?
18 O le a faamalamalamaina i tatou e taʻiala o loo i le Afioga a le Atua, ma aumaia le taʻitaʻiga e tatou te manaʻomia, pe a faia filifiliga i le ala saʻo e ao ona mulimuli i ai. E tatou te mautinoa o tuleiga a Ieova ua faamauina o le a “faapotoina ai lē ua faigofie.” (Salamo 19:7) Pe a taʻitaʻia i tatou e le Tusi Paia, o le a faamanuiaina i tatou i se loto fuatiaifo mamā ma le faamalieina ona o le faafiafiaina o Ieova. (1 Timoteo 1:18, 19) O le a faamanuia e Ieova i tatou i le ola e faavavau, pe a taʻitaʻia e ana afioga o tatou ala i aso taʻitasi.—Ioane 17:3.
Pe E te Manatua?
• Aiseā e tāua ai ona taʻitaʻia e Ieova o tatou ala?
• E faapefea ona avea afioga a le Atua ma sulu i o tatou vae?
• E faapefea ona avea afioga a le Atua ma malamalama i o tatou ala?
• O le a faapefea ona fesoasoani le suʻesuʻeina o le Tusi Paia iā i tatou e mulimuli ai i le taʻitaʻiga a le Atua?
[Fesili mo le Suʻesuʻega]
[Ata i le itulau 15]
O le ā le taimi e lē talafeagai ai se faauōga ma sē e lē talitonu?
[Ata i le itulau 16]
O uō māfana a Iesu o i latou na faia le finagalo o Ieova
[Ata i le itulau 17]
Po o atagia atu i o tatou olaga o loo tatou faamuamua manaʻoga o le Malo?