Fesili Mai le ʻAufaitau

Pe sa iai ni vae o le gata lea na talanoa iā Eva?

Ua taʻua i le Kenese 3:14, na fetalai Ieova le Atua i le gata na faasesēina Eva i le faatoʻaga i Etena: “E sili lou malaia i manu vaefā fanua uma, ma manu vaefā uma lava o le vao, ina ua e faia lenā mea; e te sosolo i lou manava, o le efuefu e te ʻai ai i aso uma o lou ola.” E lē o taʻua patino e le Tusi Paia faapea, o le manu lea sa faaaogā e faaosoosoina Eva, sa iai muamua ni ona vae ae ua toe aveese. E ono manatu faapena nisi ona o le faaupuga a le Kenese 3:14, peitaʻi e tatou te lē faapea ai, sa iai muamua ni vae o gata a o leʻi faamalaia e Ieova. Aiseā?

O le māfuaaga autū lava, sa faaautū le faasalaga a Ieova iā Satani, o ia moni lea o le agaga lē vaaia na faaaogāina sesē lenei meaola. Ua faamatala e le Tusi Paia Satani o “le tamā o le pepelo” ma “o le gata tuai.” O nei faaupuga, e foliga o loo faasino atu i le taimi na faaaogā ai e Satani se manu, o se gata, e avea ma ona leo e faasesē ai Eva ina ia lē usitai i le poloaʻiga a le Atua.—Ioane 8:44; Faaaliga 20:2.

Sa foafoaina e le Atua gata, ma e foliga na faaigoa e Atamu nei meaola o gata, a o leʻi fai le gaoioiga taufaasesē a Satani. E lē tatau ona tuuaʻia le gata lea na talanoa iā Eva, auā ua na o se meaola e leai se mafaufau. E mautinoa sa lē iloa e lenei meaola le faaaogā sesē o ia e Satani, ma sa lē malamalama foʻi i le faasalaga na fofoga mai e le Atua i ē na lē usitai.

Aiseā la, na taʻua ai e le Atua lea tulaga maulalo e peiseaʻī ua faamalaia ai le tino o le gata? Pe a fua i uiga masani o le gata, e fesoloaʻi solo i lona manava ma faaeto mai lona laulaufaiva e pei o loo taumafai e eto atu ai le pefu po o palapala, o se foliga ua fetaui lelei ma le tulaga maulalo ma le toʻilalo lea ua iai nei Satani. Muamua, sa iai i se tulaga faaeaea ma mamalu o se isi agelu a le Atua, ae ua iai i se tulaga maulalo lea e taʻua i le Tusi Paia, o le lua o le pogisa i seoli.—2 Peteru 2:4.

E lē gata i lea, e mafai e se gata moni ona ū ma manuʻa ai le mulivae o se tagata. E faapena foʻi Satani i lona tulaga toʻilalo, o le a ia ‘tuʻimomomoina le mulivae’ o le “fanau” a le Atua. (Kenese 3:15) O le vaega autū o lenā fanau, o Iesu Keriso lea, o lē na mafatia mo sina taimi ona o gaoioiga a ʻau a Satani. Peitaʻi e oo mai le taimi, o le a tuʻimomomo ai e faavavau le ulu faafaatusa o le gata, e Keriso ma ana ʻau o Kerisiano faauuina ua toe faatutūina mai le oti. (Roma 16:20) O lona uiga la, o le malaia lea na fetuu ai e le Atua le gata moni, o se ata faafaatusa lenā o le tulaga faatoʻilaloina ma le faaumatiaga aʻiaʻi o le a oo i le “gata tuai” lē vaaia, o Satani le Tiapolo.