‘Le Molimau Faamaoni i le Lagi’

UA LEVA ona vivii e tusitala ma fatupese le matagofie o le masina. Mo se faaaʻoaʻoga e iai se pese na faagaeeina e le Atua e faatatau i se fafine “e lalelei mai e pei o le masina.” (Pese a Solomona 6:10) Na faamatalaina faafatusolo e se faisalamo le masina, o “le molimau i le lagi e faamaoni lava.” (Salamo 89:37) O le ā le uiga o lenei faamatalaga e faatatau i le masina?

E lē taitai misia le faataamilosaga a le masina i le lalolagi lea e māeʻa i le 27.3 aso. O le faamaoni o le masina ua mafai ai ona faapea e maufaatuatuaina foʻi. Peitaʻi, e iai se isi māfuaaga loloto na manatunatu i ai le faisalamo e uiga i le masina. Sa ia faaigoa le masina o se “molimau faamaoni” i lana pese faavaloaga e faatatau i le Malo, lea na aʻoaʻo e Iesu ona soo e tatalo ai.—Mataio 6:9, 10.

E silia i le 3,000 tausaga ua mavae, na fai ai e Ieova le Atua se feagaiga mo se Malo ma le tupu o Isaraelu anamuā o Tavita. (2 Samuelu 7:12-16) O le fuafuaga o lenei feagaiga ina ia faatulaga se faavae faaletulafono mo Iesu Keriso, o se suli o Tavita, ina ia fai ma ona tofi le nofoālii e faavavau. (Isaia 9:7; Luka 1:32, 33) E tusa ai ma le nofoālii o le “fanau” a Tavita, na pese le faisalamo: “Pei o le masina e faatumauina ia e faavavau, ma le molimau i le lagi e faamaoni lava.”—Salamo 89:36, 37.

“O le malamalama itiiti e pule i le pō,” o le masina lea, ua talafeagai lea faamanatuga i le tumau o le pule a Keriso. (Kenese 1:16) E tusa ma lona Malo, ua faapea mai le Tanielu 7:14: “O lana pule o le pule e faavavau lea, e lē mavae atu ia, o lona malo foʻi e lē faaumatia.” O le masina o se molimau e faamanatu mai ai iā i tatou lenā Malo ma ana faamanuiaga o le a maua e tagata.

[Faamatalaga i Ata i le itulau 32]

Masina: o ata mai NASA