Po Ua E Agasala i le Agaga Paia?
Po Ua E Agasala i le Agaga Paia?
“O i ai le agasala e iʻu i le oti.”—1 IOANE 5:16.
1, 2. E faapefea ona tatou iloa e mafai ona agasala i le agaga paia o le Atua?
“SA IAI se fafine e nofo i Siamani, e ui lava sa auauna i le Atua ae na ia tusi mai: “O loo ōia lava aʻu i le manatu ua ou agasala i le agaga paia.” Pe e mafai moni lava e se Kerisiano ona agasala i le agaga paia po o le malosi galue o le Atua?
2 Ioe, e mafai ona agasala se tasi i le agaga paia o Ieova. Na fetalai Iesu: “O agasala uma ma upu faifai e faamagaloina ia i tagata; a o le faifai i le Agaga, e lē faamagaloina lea i tagata.” (Mataio 12:31) Ua lapataʻia foʻi i tatou: “Afai tatou te agasala ma le loto i ai pe a uma ona talia o le malamalama o le upu moni, ua lē toe lava se taulaga mo agasala, na o le faatali ma le mataʻu tele i le faamasinoga ma le toʻasā.” (Eperu 10:26, 27) Ae na tusi mai le aposetolo o Ioane: “O i ai le agasala e iʻu i le oti.” (1 Ioane 5:16) Peitaʻi, pe e faalagolago ea i le tagata ua faia le agasala matuiā e fuafua po ua ia faia “le agasala e iʻu i le oti”?
Ia Salamō e Faamagaloina Ai
3. O le ā e ono uiga i ai pe afai tatou te matuā faanoanoa i se agasala ua tatou fai?
3 O Ieova le Faamasino Sili mo ē fai mea sesē. O i tatou uma lava e ao ona tatou tala atu a tatou amio iā te ia, ma na te faia le mea tonu i taimi uma. (Kenese 18:25; Roma 14:12) O Ieova e filifilia po ua tatou faia se agasala e lē faamagaloina, ma o ia e filifilia po ua tatau ona aveesea lona agaga mai iā i tatou. (Salamo 51:11) Peitaʻi, afai e tatou te matuā faanoanoa i se agasala ua tatou fai, e ono uiga lenā mea ua salamō moni. Ae o le ā tonu lava le uiga o le salamō moni?
4. (a) O le ā le uiga o le salamō? (e) Aiseā e faamāfanafanaloto ai le Salamo 103:10-14?
4 O le salamō o lona uiga ua faanoanoa ma suia o tatou uiga e faatatau i se agasala sa tatou fai po o fuafua foʻi e fai a o leʻi salamō, ma ua liliu ese mai lenā olaga agasala. Afai ua tatou faia se agasala matuiā ae ua tatou uia laasaga talafeagai e faaalia ai ua tatou salamō moni, e mafai ona faamāfanafanaina i tatou i upu a le faisalamo: “E leʻi faia e ia [Ieova] iā i tatou e tusa ma a tatou agasala; e leʻi taui mai foʻi o ia iā i tatou e tusa ma a tatou amio leaga. Auā e pei ona maualuga o le lagi i le lalolagi, e faapea ona tele o lona alofa i ē matataʻu iā te ia. E pei ona vava mamao o sasaʻe ma sisifo, e faapea lava ona faamamao e ia iā i tatou o a tatou solitulafono. E faapei ona alofa mutimuti vale o le tamā i lana fanau, e faapea lava ona alofa mutimuti vale o Ieova i ē matataʻu iā te ia. Auā ua silafia lava e ia le mea na fai aʻi i tatou; ua manatu ia o le efuefu lava i tatou.”—Salamo 103:10-14.
5, 6. Ia taʻu mai le manatu autū o le 1 Ioane 3:19-22, ma faamatala le uiga o upu a le aposetolo.
5 E faamāfanafanaloto foʻi upu a le aposetolo o Ioane e faapea: “O le mea foʻi lea ua tatou iloa ai ua i le upu moni i tatou, e mautinoa foʻi o tatou loto i ona luma, auā pe afai e faasala o tatou loto iā i tatou, ua sili lava le Atua i o tatou loto, ua silafia foʻi e ia mea uma. Le ʻau pele e, afai e lē faasala o tatou loto iā i tatou, e maua ai e i tatou le loto tele i luma o le Atua. O mea uma foʻi tatou te ōle atu ai, e maua mai iā te ia, auā ua tatou tausi i ana poloaiga, tatou te faia foʻi mea e lelei i ona luma.”—1 Ioane 3:19-22.
6 Ua tatou ‘iloa ua i le upu moni i tatou’ ona o loo tatou faaalia le alofa faaleuso ma tatou te lē o faaauau ona faia le agasala. (Salamo 119:11) Afai tatou te manatu ua tatou nofo sala po o le ā lava se māfuaaga, e ao lava ona tatou manatua e “sili lava le Atua i o tatou loto, ua silafia foʻi e ia mea uma.” Ua faaalia mai iā i tatou le alofa mutimutivale o Ieova auā ua ia silafia lo tatou “alofa faamaoni i le ʻau uso,” o lo tatou faasagatau atu i le agasala, ma a tatou taumafaiga e fai lona finagalo. (1 Peteru 1:22) O le a “lē faasala o tatou loto iā i tatou” pe a tatou faalagolago iā Ieova, faaalia le alofa faaleuso, ma lē taʻusalaina i tatou i le faifai pea ma le loto i ai o le agasala. O le a tatou “loto tele i luma o le Atua” po o le saʻoloto e talanoa i le Atua e ala i le tatalo, ma o le a ia tali mai iā i tatou auā o loo tatou tausia ana poloaʻiga.
O Ē na Agasala i le Agaga Paia
7. E faapefea ona fuafua pe faamagaloina se agasala pe leai?
7 O ā agasala e lē mafai ona faamagaloina? Ina ia tali lenei fesili, seʻi tatou talanoaina ni faaaʻoaʻoga o i le Tusi Paia. E ao ona faamāfanafanaina i tatou i lenei manatu pe afai tatou te salamō ma mafatia i ni o tatou sesē matuiā. Ia mātau mai, e lē faalagolago le faamagaloga i le ituaiga agasala sa fai; a o le uunaʻiga na fai ai, pe sa loto i ai, ma le loloto o le manaʻo na māfua ai ona fai le agasala; o inā e fua i ai pe faamagaloina se agasala pe leai.
8. Sa faapefea ona agasala i le agaga paia nisi o taʻitaʻi lotu Iutaia i le uluaʻi senituri?
8 O taʻitaʻi lotu Iutaia i le uluaʻi senituri o ē na matuā tetee ma le sauā iā Iesu Keriso sa agasala i latou i le agaga paia. Sa latou iloa lelei le galue o le agaga o le Atua iā Iesu a o ia faia vavega lea sa faamamaluina ai Ieova. Peitaʻi sa faapea mai nei fili o Iesu Keriso o le mana o Satani le Tiapolo na faia ai na mea. E tusa ai o le fetalaiga a Iesu, o i latou na upu vale i le agaga paia o le Atua, ua latou faia le agasala e lē mafai ona faamagaloina i le “olaga nei po o le atalī.”—Mataio 12:22-32.
9. O le ā lenei mea o le upu vale, ma o le ā le faamatalaga a Iesu na fai e faatatau i ai?
9 O le upu vale, e uiga atu i faamatalaga lē saʻo e taufaaleaga, o upu tutui ma upu mamafa. Talu ai o le agaga paia e puna mai le Atua, o le tautala tetee i lenā agaga e tusa lava lea ua tautala tetee iā Ieova. O le faaauau ona tautala e aunoa ma le salamō i ia ituaiga faamatalaga, e lē faamagaloina. O le mea na tupu lea na māfua ai ona taʻua e Iesu lea ituaiga agasala ua iloa mai ai, sa faasino atu Iesu iā i latou e tetee ma le loto i ai i gaoioiga a le agaga paia o le Atua. Talu ai sa vaai le ʻau Faresaio i le galue o le agaga paia o Ieova iā Iesu ae na latou faapea mai ai o le mana o le Tiapolo, o lea na latou upu vale ai ma agasala i le agaga. O le mea lea na fetalai ai Iesu: “A o lē faifai i le Agaga Paia, e lē faamagaloina o ia, a lē tu a lē tu lava; a e peitaʻi e nofo sala o ia i le agasala faavavau.”—Mareko 3:20-29.
10. Aiseā na taʻua ai e Iesu Iuta o “le tagata o le malaia”?
10 E lelei foʻi ona manatu mai i le tulaga o Iuta le Sekara. Sa ola Iuta i se olaga lē faamaoni, sa ia gaoia tupe mai le pusa tupe na tuu atu na te vaaia. (Ioane 12:5, 6) Mulimuli ane na oo atu Iuta i taʻitaʻi Iutaia ma faatulaga ai na te faalataina Iesu i tupe e 30. E moni sa faanoanoa Iuta ina ua uma ona ia faalata Iesu, peitaʻi e leʻi salamō o ia i lana agasala na fai ma le loto i ai. A fua la i le mea na tupu, e lē talafeagai iā Iuta se toe tū, o le ala lea o le taʻua o ia e Iesu o “le tagata o le malaia.”—Ioane 17:12; Mataio 26:14-16.
O Ē na Lē Agasala i le Agaga Paia
11-13. Na faapefea ona agasala le tupu o Tavita ma Patesepa, ma o le ā le faamāfanafanaga e maua mai i le auala na feutagaʻi ai le Atua ma i laʻua?
11 O Kerisiano e taʻutino a latou agasala matuiā, ma sa latou maua se fesoasoani faaleagaga mai i toeaina o le faapotopotoga, e iai lava taimi latou te mafatia ai pe a manatu i le taimi ua teʻa na latou solia ai le tulafono a le Atua. (Iakopo 5:14) Afai o oo iā i tatou ni mafatiaga faapea, e aogā la iā i tatou lo tatou iloiloina o le mea o fai mai ai le Tusi Paia e uiga iā i latou na faamagaloina a latou agasala.
12 E matuiā le agasala a Tavita ona o le gaoioiga na la fai ma Patesepa le avā a Uria. Na iloa e Tavita mai lona fale lenei fafine lalelei o taʻele. Ona faatonu lea e Tavita ina ia aumai le fafine i lona maota ma la faia ai le feusuaʻiga. Ina ua taʻu atu e le fafine o ia ua maʻitō, ona fai lea e Tavita le fuafuaga ina ia sau Uria le tane a le fafine, la te momoe ina ia nanā ai le mulilua ua fai. Ina ua lē taulau lenā, ona faufau lea e le tupu ina ia fasiotia Uria i le taua. Ina ua uma lenā, ona avea lea o Patesepa ma avā a Tavita ma fanauina ai se tama lea na iʻu ina oti.—2 Samuelu 11:1-27.
13 Sa tauaao e Ieova le mataupu na tulaʻi mai iā Tavita ma Patesepa. Na faamagalo Tavita e le Atua, sa silasila le Atua i le salamō o Tavita aemaise le feagaiga i se Malo na la faia ma Tavita. (2 Samuelu 7:11-16; 12:7-14) E foliga na salamō moni Patesepa auā o lea na faaeaina o ia e avea ma tinā o le tupu o Solomona ma o se tasi o le gafa na fanau mai ai Iesu Keriso. (Mataio 1:1, 6, 16) Afai tatou te agasala, e lelei ona manatua e mātau mai e Ieova o tatou uiga salamō.
14. Ua faapefea ona faataʻitaʻia mai le telē o le finagalo faamagalo o le Atua i le mea na oo i le tupu o Manase?
14 O loo faataʻitaʻia mai foʻi le telē o le finagalo faamagalo o Ieova i le mea na oo i le tupu o Iuta o Manase. Sa ia faia mea leaga i le silasila a Ieova. Sa faatutū e Manase fata faitaulaga mo Paala, ma tapuaʻi i “ʻau uma a le lagi,” sa ia fausia foʻi fata faitaulaga mo atua sesē i lotoā e lua o le malumalu. Sa ia faaui ane foʻi ona atalii i le afi, uunaʻia faiga faataulāitu, ma faapogaia tagata uma o Iuta ma Ierusalema “e fai le amio leaga e sili i le amio a nuu na faaumatia e Ieova i luma o le fanauga a Isaraelu.” E na te leʻi utagia lapataʻiga sa ala mai i perofeta a le Atua. Mulimuli ane, na ave faatagataotaua Manase e le tupu o Asuria. A o faaaunuua Manase, na salamō ma tatalo e lē aunoa i le Atua, o lē na faamagaloina o ia ma toe faafoʻi i le nofoaiga tautupu i Ierusalema ma ia toe ati aʻe le tapuaʻiga moni.—2 Nofoaiga a Tupu 33:2-17.
15. O le ā le mea na tupu i le olaga o le aposetolo o Peteru e faaalia ai e “matuā faamagaloina” e Ieova agasala?
15 I senituri mulimuli ane, na ogaoga le agasala a Peteru i lona faafitia o Iesu. (Mareko 14:30, 66-72) Peitaʻi na “matuā faamagaloina” e Ieova Peteru. (Isaia 55:7) Aiseā? Na salamō moni Peteru. (Luka 22:62) Na iai faamaoniga manino o le faamagalo a le Atua auā ina ua mavae aso e 50 i le aso Penetekoso, na maua e Peteru se avanoa tāua e molimau atu ai ma le loto tele e faatatau iā Iesu. (Galuega 2:14-36) O māfuaaga maumaututū na e talitonu ai, o le a faamagaloina foʻi e le Atua Kerisiano ua salamō moni i aso nei. Na pese le faisalamo: “Ioa e, afai e te mātaulia le amio leaga, le Alii e, o ai sē na te mafaia ona tulaʻi? A o iā te oe le faamagaloina o sala.”—Salamo 130:3, 4.
Aua le Soona Atuatuvale
16. O ā tulaga e faamagalo ai e le Atua agasala?
16 O faaaʻoaʻoga na taʻua e tatau ona fesoasoani e faaitiitia ai lo tatou atuatuvale po ua tatou agasala i le agaga paia. E faaalia i ia faaaʻoaʻoga e faamagalo e Ieova ē ua salamō moni. E tāua a tatou tatalo faatauanau i le Atua. Pe afai ua tatou agasala, e mafai ona tatou ōle atu e faamagalo i tatou e ala i le taulaga togiola a Iesu, le alofa mutimutivale o le Atua, o lo tatou lē lelei atoatoa, ma faamaumauga o la tatou auaunaga faamaoni. O le iloaina o le alofa tunoa o Ieova, e mafai ai ona tatou tatalo atu mo lana faamagaloga ma mautinoa e tali mai a tatou tatalo.—Efeso 1:7.
17. O le ā le mea e tatau ona fai pe afai ua tatou agasala ma manaʻomia se fesoasoani faaleagaga?
17 Ae faapefea pe afai ua lē mafai ona tatou tatalo ona ua tatou vaivai faaleagaga ona o le agasala? I lea tulaga na tusi le soo o Iakopo: “Inā aami atu [lenā tagata] i toeaina o le ekalesia, ia latou tatalo mo ia, pe a uma ona faauu iā te ia i le suāuu i le suafa o le Alii. O le tatalo foʻi e faia i le faatuatua e faaolaina ai le maʻi, e faatūina foʻi o ia e le Alii; afai foʻi ua agasala, e faamagaloina ia.”—Iakopo 5:14, 15.
18. Aiseā e mafai ai lava ona faamagalo le agasala a se tasi e tusa pe ua tuuesea mai le faapotopotoga?
18 E tusa pe lē salamō i lenā taimi se tasi na faia se mea sesē ma tuuesea mai le faapotopotoga, e lē faapea ai e lē mafai ona faamagalo lana agasala. Na tusi Paulo e uiga i se tasi na faauuina e le agaga i Korinito ae ua tuuesea mai le faapotopotoga: “Soia le faia se tasi mea i lenā tagata, tau lava o lenā sala na faasalaina ai o ia e le toʻatele. A o lenei, ia outou faamagalo atu ma faamāfanafana atu i lenā tagata, ina neʻi tofatumoanaina o ia i le tigā matuā tele.” (2 Korinito 2:6-8; 1 Korinito 5:1-5) Peitaʻi ina ia toe lelei le faiā ma Ieova e manaʻomia ona latou talia le fesoasoani faaleagaga mai le Tusi Paia e avatu e toeaina, ma faia ni faamaoniga o le salamō moni. E tatau ona latou “fua mai ni fua e tatau ma le salamō.”—Luka 3:8.
19. O le ā o le a fesoasoani iā i tatou e ‘faamaoni ai i le faatuatua’?
19 O le ā le māfuaaga e ono lagona ai e se tasi ua agasala i le agaga paia? Atonu o le soona faatāua naʻuā o ona faalogona, pe lē o malosi atoatoa foʻi le tino ma le mafaufau. I ia tulaga e fesoasoani le tatalo ma le lava o le mālōlō. Aemaise e tatau ona aua le faatagaina Satani e faavaivaia i tatou, ma taofia ai le auauna atu i le Atua. Afai e lē fiafia le finagalo o Ieova i le oti o se tagata amio leaga, e mautinoa foʻi la lona lē fiafia pe a leiloa atu se isi o ana auauna. Pe a tatou atuatuvale la faapea ua tatou agasala i le agaga, e tatau ona faaauau ona fafaga i tatou i le Afioga a le Atua, e aofia ai vaega faamāfanafanaloto e pei o le Salamo. E manaʻomia ona faaauau ona tatou auai i sauniga ma le talaʻia o le Malo. O le faia faapea o le a tatou ‘faamaoni ai i le faatuatua’ ma saʻoloto mai ai i le atuatuvale faapea ua faia se agasala e lē mafai ona faamagaloina.—Tito 2:2.
20. O ā ni fesili e fesoasoani i se tagata e na te iloa ai e leʻi agasala i le agaga paia?
20 O so o se tasi o loo popole pe faamata ua agasala i le agaga paia, atonu latou te ono fesili ifo: ‘Pe na ou upu vale ea i le agaga paia? Talu ai ua ou salamō mai laʻu agasala, pe ua suia nei loʻu mafaufau i lenā mea? Pe ou te faatuatua i le faamagalo a le Atua? Po o aʻu o se tagata ua fulitua i le upu moni ma teena le malamalama faaleagaga?’ Atonu e iloa ai e ia tagata latou te leʻi upu vale i le agaga paia o le Atua, pe avea ma ē ua fulitua i le upu moni. Ua latou salamō ma faaauau ona latou faatuatua i le faamagalo a Ieova. Pe afai o le tulaga lea latou te leʻi agasala i le agaga paia o Ieova.
21. O ā fesili o le a iloilo i le mataupu o sosoo mai?
21 Maʻeu le toʻafilemu o le mafaufau pe a mautinoa e tatou te leʻi agasala i le agaga paia! Peitaʻi e iai ni fesili e fesootaʻi i le agaga paia o le a iloiloina i le mataupu o loo sosoo mai. Mo se faataʻitaʻiga tatou te ono fesili ifo: ‘Po o taʻitaʻia moni aʻu e le agaga paia o le Atua? Po o atagia atu fua o le agaga paia i loʻu olaga?’
O le ā Lau Tali?
• Aiseā e faapea ai e mafai ona tatou agasala i le agaga paia?
• O le ā le uiga o le salamō?
• O ai na agasala i le agaga paia a o iai Iesu i le lalolagi?
• E foʻia faapefea le popole i le faia o se agasala e lē mafai ona faamagaloina?
[Fesili mo le Suʻesuʻega]
[Ata i le itulau 17]
Na agasala i le agaga paia o le Atua i latou na fai mai o vavega a Iesu na faia i le mana o Satani
[Ata i le itulau 18]
E ui na faafitia e Peteru Iesu, ae na te leʻi faia se agasala e lē mafai ona faamagaloina