Saʻilia o le Faaleagaga

I LANA Lauga taʻutaʻua i le Mauga, na fetalai ai Iesu: “Amuia i latou e manatu mamafa i o latou manaʻoga faaleagaga.” (Mataio 5:3, NW) E mautinoa e te talitonu i lenā manatu. E iloa e tagata uma le manaʻoga mo mea faaleagaga i o latou olaga, ma ua manatu afai e iloa lenā manaʻoga, o le a latou maua foʻi le fiafia. Ae o le ā le uiga o le upu “faaleagaga”?

Ua faamatala i se lomifefiloi le faaleagaga o le “manatu mamafa po o le piiama atu i tū faalotu,” ma “o le uiga po o le tulaga o sē e faaleagaga.” E tutusa uma la uiga o faaupuga nei e pei o le “e faaleagaga,” “o sē e faaleagaga,” po o “sē e mafaufau faaleagaga.” Ina ia faamanino atili le upu, seʻi manatu i le faatusatusaga lenei: O se tagata e poto lava i mataupu tautupe, e taʻua o se tagata e mafaufau faapisinisi. I se tulaga tutusa, o se tasi e naunau e faatāua mea faaleagaga po o mea faalelotu, e taʻua o sē e mafaufau faaleagaga.

E faapefea la ona ausia le faaleagaga moni? E toetoe o lotu uma e faapea mai ua latou iloa le auala e ausia ai lea tulaga faaleagaga, ae o faasinoga eseese nei a nisi lotu. E manatu se Porotesano, e faasaoina se tasi i le auai i se sauniga lotu e toe faaolaola ai lagona faaleagaga. E saʻili e se Katoliko le faauōga ma le Atua i le Misasā. E saʻili e se tagata lotu Puta le malamalamaga i le manatunatu loloto. E taumafai se Hinitū e ʻalofia le toe fanau mai se isi tino pe a oti, e ala i le ola i se olaga e faafitia uma ai ona lava manaʻoga. Po o nei ea mea uma, o le ala lea e tau i le faaleagaga moni? Pe e iai se ala e tau atu i le faaleagaga?

E toʻatele e manatu o le tali i lenā fesili, o le leai. Latou te faapea mai, o le faaleagaga e faauiga i le “talitonu e aunoa ma le auai atu,” o lona uiga ia talitonu i se atua e aunoa ma le auai i se lotu. E manatu nisi e faasino le faaleagaga, e lē i se tulaga faalelotu, ae i se faanaunauga mo le filemu o le loto ma se olaga e iai se faamoemoe. Ua faapea mai e lē manaʻomia e i latou o loo saʻili mo le faaleagaga, se lotu. Ae manaʻomia ona tagatagaʻi ifo iā i latou lava, i o latou faalogona loloto. Ua taʻua e se tusitala: “O le faaleagaga moni, o se mea lea e i le loto ma faalogona o se tasi. O le auala lea e te faaalia ai le alofa, e te talia ma feutagaʻi ai ma le siʻomaga ma tagata o loo tou mafuta. E lē maua i se lotu po o le talitonu foʻi i se mea patino.”

E manino mai, e matuā eseese manatu o tagata i le faaleagaga. E faitau afe tusi ua faaalia mai ai le auala i se olaga faaleagaga, ae e lē o faamalieina pea ma lē mautonu i latou o loo faitau i ai i na tusi. Peitaʻi, e iai le tusi e tasi, o loo iai le taʻitaʻiga maufaatuatuaina i mataupu faaleagaga. O le tusi lea ua faamaonia e mai le agaga o le Atua. (2 Timoteo 3:16) Seʻi o tatou tilofaʻia po o ā fā a le Tusi Paia i le uiga o le faaleagaga ma lona tāua.

 [Faamatalaga i Ata i le itulau 2]

FAAVAA: Background: © Mark Hamblin/​age fotostock