Fesili Mai le ʻAufaitau

O le ā le uiga o le fetalaiga a Iesu, o lana auauna faamaoni o le a “mafaufau”?

Na lāgā e Iesu le fesili: “O ai foʻi le auauna faamaoni ma le mafaufau, ua tofia e lona alii e pule i ana auauna, ia avatu a latou mea e ʻai i ona itu aso?” (Mataio 24:45) O le “auauna” o loo saunia maia “mea e ʻai” faaleagaga, o le faapotopotoga lea o Kerisiano ua faauuina i le agaga. Aiseā na taʻua ai e Iesu i latou e mafaufau? *

E sili atu ona tatou mafaufau i aʻoaʻoga a Iesu lava ia, ina ia malamalama ai po o le ā na ia faatatau atu i ai le upu “mafaufau.” Mo se faaaʻoaʻoga, ina ua ia taʻua “le auauna faamaoni ma le mafaufau,” sa faamatala ai e Iesu le faataoto i taupou e toʻasefulu, ia sa faatalitalia le taunuu ane o le faatoʻāfaiavā. O le taʻua o taupou e faamanatu mai ai iā i tatou Kerisiano faauuina na sa iai a o leʻi oo i le 1914, o ē na naunau atu e faatalia le taunuu ane o le Faatoʻāfaiavā sili, o Iesu Keriso. Mai lenā toʻasefulu, e toʻalima e leʻi lava ni a latou suāuu e tutu ai a latou lamepa ina ua taunuu ane le faatoʻāfaiavā, ma lē mafai ai ona latou auai i le tausamaaga. Peitaʻi sa iloa le mafaufau lelei po o le faautauta o le isi toʻalima, auā na lava a latou suāuu na faaleoleo, na mafai ai pea ona faaolaola a latou lamepa ina ua taunuu ane le faatoʻāfaiavā, ma faataga ai e ulufale atu i le tausamaaga.—Mataio 25:10-12.

Ina ua avea Iesu ma tupu o le Malo i le 1914, e toʻatele nisi Kerisiano faauuina sa manatu o le a latou faatasi atu iā Iesu i lenā lava taimi i le lagi. Peitaʻi sa tele nisi galuega e tatau ona latou faia i le lalolagi, ma e iai nisi o i latou sa leʻi sauniunia mo na galuega. Sa pei i latou o taupou valea pe sa leʻi mafaufau lelei, auā sa leʻi lava tāoso i latou i le itu faaleagaga, ma lē sauniunia ai e faaauau ona latou faasusulu atu le malamalama. Peitaʻi, sa toʻatele lava isi na gaoioi ma le mafaufau lelei—i le poto ma le tōfā mamao—ma sa tumau ai pea lo latou malolosi faaleagaga. Ina ua latou iloa o loo tele nisi galuega e ao ona faia, sa latou sagaʻi atu loa ma le fiafia e faataunuu na galuega. Ma na faamaonia ai i inā le avea o i latou ma “auauna faamaoni ma le mafaufau.”

Seʻi manatu foʻi i le faaaogāina e Iesu o lenei upu, i le Mataio 7:24. Na fetalai Iesu: “Ai sē faalogo i aʻu upu nei, ma faia e ia, ou te faatusaina o ia i le tagata poto, ua na faia lona fale i luga o le papa.” Sa fau e le tagata poto po o le tagata mafaufau, lona fale malosi, auā sa ia iloa e ono agi mai se afā. Peitaʻi o le tagata valea, na ia fau lona fale i luga o le oneone, ma toe malepe ifo ai lenā fale. Lona uiga la, o se soo o Iesu e poto pe mafaufau lelei, o se tasi lea na te muaʻi iloa atu iʻuga leaga e iʻu i ai pe a mulimuli i le atamai faaletagata. O lona faautauta ma le lelei o ana filifiliga, ua mafai ai ona faavae mausalī lona faatuatua, o ana gaoioiga, ma aʻoaʻoga, i mea na aʻoaʻo mai e Iesu. E faapena foʻi le auala o loo gaoioi ai “le auauna faamaoni ma le mafaufau.”

Mātau foʻi le faaaogāina o le upu “mafaufau” po o le “poto” i isi faaliliuga o Tusitusiga Eperu. Mo se faaaʻoaʻoga, na tofia e Farao le tama o Iosefa e pule i le faasoasoaina o taumafa i Aikupito. O se vaega o le fuafuaga a Ieova ina ia saunia meaʻai mo ona tagata. Aiseā na filifilia ai Iosefa? Na faapea atu Farao iā Iosefa: ‘E leai sē tusa ma oe i le mafaufau ma le poto.’ (Kenese 41:33-39; 45:5) O loo taʻua foʻi e le Tusi Paia Apikaila, sa “mafaufau lelei.” Sa ia foaʻi atu taumafa mo lē na faauuina e Ieova, o Tavita ma ana ʻau. (1 Samuelu 25:3, 11, 18) E mafai ona taʻua Iosefa ma Apikaila o ni tagata mafaufau pe popoto, auā sa la malamalama lelei i le finagalo o Ieova, ma gaoioi ai ma le atamai ma faia filifiliga lelei.

O lea la, ina ua fetalai Iesu faapea, e mafaufau le auauna faamaoni, sa ia faailoa mai ai, o i latou o loo suitulaga mai e lenā auauna, o le a latou faaalia le faautauta, le tōfā mamao, ma filifiliga lelei, auā o loo faavae lo latou faatuatua, a latou gaoioiga, ma aʻoaʻoga i le Afioga a le Atua.

[Faaopoopoga i lalo]