‘Na Tusia e Aʻoaʻo ai i Tatou’

“E LEAI se iʻuga i tusi o tusi e tele.” (Failauga 12:12) O le tele o mea ua lomia i aso nei ua faamaonia ai le moni o na upu e pei ua faatoʻā tusia. E faapefea la ona filifilia e se tagata faitau faautauta se mataupu e uaʻi atu i ai?

A o mafaufau se tagata po o le ā se tusi e fia faitau ai, e toʻatele e fia iloa ni faamatalaga e faatatau i le tusitala. E ono faaaofia e tagata e lomia tusi ni faamatalaga pupuu e pei o le igoa o le tusitala, o lona nuu, o ana taumafaiga i aʻoga, ma se lisi o ana tusi na lomia. E tāua le iloa o se mea e faatatau i le tusitala, e pei ona faamaonia i senituri ua teʻa, sa faaaogā e tusitala tamaʻitaʻi ni igoa o ni tamāloloa, ina ia aua neʻi manatu faatauvaa ai isi iā i latou.

E pei ona mātauina i le mataupu ua teʻa, e faanoanoa ona ua lē amanaʻia e nisi Tusitusiga Eperu ona ua latou talitonu o le Atua o loo faaātaina ai, e sauā ma na ia faaumatia ona fili e aunoa ma se alofa mutimutivale. * Seʻi o tatou tilofaʻia po o ā faamatalaga o loo aumaia i Tusitusiga Eperu ma Tusitusiga Kerisiano Eleni e faatatau i le Tusitala o le Tusi Paia.

O le Tusitala o le Tusi Paia

E tusa ai ma Tusitusiga Eperu, na fetalai atu le Atua i le nuu o Isaraelu: “O aʻu o Ieova, ou te lē liliu.” (Malaki 3:6) I le 500 tausaga mulimuli ane, na faapea mai le tusitala o le Tusi Paia o Iakopo e uiga i le Atua: “E lē o iā te ia se mea faalētumau, po o sina liliu itiiti.” (Iakopo 1:17) Aiseā e manatu ai isi e ese le Atua o loo faailoa mai i Tusitusiga Eperu ma le Atua o loo i Tusitusiga Kerisiano Eleni?

O le tali, e tele vala eseese e faatatau i uiga o le Atua o loo faailoa mai i vaega eseese o le Tusi Paia. O loo faamatalaina le Atua i le tusi o Kenese e faapea ‘ua tigā lona finagalo,’ o ia “e ona le lagi ma le lalolagi,” ma “o lē na te faamasinoina le lalolagi uma.” (Kenese 6:6; 14:22; 18:25) Pe faasino atu nei faamatalaga eseese i se Atua e toʻatasi? O lea lava.

O se faaaʻoaʻoga: O se faamasino ua tele ina iloa e tagata a o latou feagai i faamasinoga, i lona maumauaʻi e tausisia le  tulafono. A o le taimi e tasi, e iloa e lana fanau o ia o se tamā e alofa toe agalelei. E iloa o ia e ana uō o sē e tamālii ma mālie ona uiga. O le faamasino, o le tamā, ma le uō o le tagata e tasi. E fesuisuiaʻi ona uiga i tulaga eseese.

I se tulaga tutusa, ua faamatalaina e Tusitusiga Eperu Ieova “o le Atua alofa mutimutivale ma le alofa fua, e telegese lona toʻasā, a e tele le alofa ma le faamaoni.” Ua tatou iloa foʻi e “lē faasaoina lava e ia o ē agasala.” (Esoto 34:6, 7) O loo faaāta mai e na vala e lua le uiga o le suafa o le Atua. O le uiga o le suafa o “Ieova” o Lē “E Gaoioi o Ia e Tusa ma Tulaga Manaʻomia.” O lea la, e avea le Atua ma so o se mea e manaʻomia ina ia faataunuu ai ana folafolaga. (Esoto 3:13-15) Ae lē suia lava o ia. Na fetalai Iesu: “O le Alii [Ieova] lo tatou Atua, o le Alii e toʻatasi ia.”—Mareko 12:29.

Po ua Suia Tusitusiga Eperu?

Ua fai ma masani le suia o tusi aʻoga pe a maua mai ni tusi fou pe suia foʻi manatu o tagata lautele. Pe na suia e Tusitusiga Kerisiano Eleni ia Tusitusiga Eperu i le auala lenā? E leai.

Pe ana manatu Iesu e suia Tusitusiga Eperu i faamatalaga o lana faiva ma tusitusiga a ona soo, e mautinoa lava e na te faailoaina mai. Peitaʻi, a o leʻi afio Iesu i le lagi, ua faapea mai le tala a Luka e faatatau iā te ia: “Ona faamatala ai lea e ia iā te i laʻua [o ona soo] o mea ua tusia iā te ia i Tusi uma, ua amata mai iā Mose atoa ma le ʻau perofeta uma [i Tusitusiga Eperu].” Mulimuli ane, ua faailoa atu Iesu i ona aposetolo faamaoni ma isi. Na toe faapea atili le tala: “Ua fetalai atu ia iā te i latou, ‘O upu ia na ou fai atu ai iā te outou, ina o oʻu iā te outou; e tatau ona taunuu o mea uma ua tusia iā te aʻu i le tulafono a Mose, ma le ʻau perofeta, ma salamo.’” (Luka 24:27, 44) Aiseā na faaauau ai ona faaaogā e Iesu Tusitusiga Eperu seʻia oo i le faaiʻuga o lana faiva i le lalolagi, pe afai ua lē o toe aogā?

Ina ua māeʻa ona faavae le faapotopotoga  Kerisiano, na faaauau ai loa ona faaaogā e soo o Iesu Tusitusiga Eperu ina ia faamatilatila ai valoaga e leʻi faataunuuina, o taʻiala mai le Tulafono a Mose ia na maua ai ni lesona tāua, ma tala i auauna anamua a le Atua o ē na faia ni faaaʻoaʻoga lelei mo Kerisiano ina ia tutumau faamaoni ai. (Galuega 2:16-21; 1 Korinito 9:9, 10; Eperu 11:1–12:1) Na tusi le aposetolo o Paulo: “O tusi paia uma lava e mai le Agaga o le Atua ia, e aogā foʻi ia.” * (2 Timoteo 3:16) E faapefea ona aogā Tusitusiga Eperu i aso nei?

Fautuaga mo le Olaga i Aso Faisoo

Seʻi tagaʻi i le faafitauli o le faailogalanu i aso nei. Na faapea mai se tauleʻaleʻa Aitiope e 21 ona tausaga, lea e nofo i se aai i Europa i sasaʻe: “A matou fia ō i se mea, e tatau ona matou ō o se vaega. Atonu o le vaai mai e toʻatele i matou ona lē osofaʻia ai lea o i matou. E lē mafai ona matou ō i fafo pe a teʻa le 6 i le afiafi, aemaise lava le nofoaga e puʻe ai le nofoaafi. Pe a vaai mai tagata iā i matou, e latou te taulaʻi mai i le na o le lanu o o matou paʻu.” Pe iai se fofō i Tusitusiga Eperu mo lenei faafitauli matuiā?

Na faatonuina le fanauga a Isaraelu anamua: “A aumau iā te oe se tagata ese i lo outou nuu, aua tou te faatigā iā te ia. O le tagata ese o loo aumau iā te outou, ia tusa lava ia iā te outou ma le tama a le eleele, e te alofa atu iā te ia e pei o oe lava iā te oe; auā sa aumau outou i le nuu o Aikupito.” (Levitiko 19:33, 34) Ioe, na amanaʻia e lenā tulafono i Isaraelu anamua ia “tagata ese,” ma o loo faamauina i Tusitusiga Eperu. Pe e te lē ioe o taʻiala o loo faamauina i lenā tulafono, o le fofō lea mo le faailogalanu i aso nei?

E ui e lē auʻiliʻili ni fautuaga e faatatau i le faaaogāina o tupe, ae o loo iai i Tusitusiga Eperu ni taʻiala aogā e mafai ai ona faaaogā ma le faautauta tupe. Mo se faaaʻoaʻoga o loo faapea mai le Faataoto 22:7: “E auauna foʻi lē e nofo aitalafu i lē ua au mai ai ana mea.” (The Bible in Basic English) E ioeina e i latou e iai le  tomai i tupe le oo o faigatā i tagata e lē faautauta i le faatau o mea e ala i aitalafu.

O le saʻilia o le ʻoa e tusa lava po o ā āuga e oo i ai, ua taatele i lenei lalolagi o loo pupū atu i meafaitino. Na iloa lelei e le tupu o Solomona o lē na aupito i mauʻoa i le talafaasolopito, i lona faapea mai: “O lē ua manaʻo i le ario, e lē malie o ia i le ario; o lē ua manaʻo foʻi i le oloa tele, e leai sana mea e maua ai; o le mea faatauvaa foʻi lea.” (Failauga 5:10) Maʻeu se lapataʻiga atamai!

Le Faamoemoe mo le Lumanaʻi

E tasi le matua o le Tusi Paia atoa: O le Malo i le pulega a Iesu o le a auala mai ai le faamaonia o le tonu o le pule silisili ese a le Atua, ma le faapaiaina o Lona suafa.—Tanielu 2:44; Faaaliga 11:15.

E ala i Tusitusiga Eperu, tatou te maua ai faamatalaga e faatatau i le ituaiga o olaga e maua i le Malo o le Atua, lea tatou te maua ai faamāfanafanaga ma vāvālalata atu ai i le Puna o faamāfanafanaga, o Ieova le Atua. Mo se faaaʻoaʻoga, na valoia e le perofeta o Isaia o le a iai se taimi e filemu ai meaola ma tagata: “E nofo faatasi le luko ma le tamaʻi mamoe, e taoto foʻi le nameri faatasi ma le tamaʻi ʻoti; e faatasi foʻi le tamaʻi povi ma le leona taanoa atoa ma le manu peti, e taʻitaʻiina foʻi i latou e le tama itiiti.” (Isaia 11:6-8) Maʻeu se fuafuaga inā mataʻina tele!

E faapefea i latou o loo aafia i le faailogalanu, se gasegase tugā, po o le faalētonu o le tamaoaiga ae leai se mea e mafai i ai? Ua faamatalaina mai faavaloaga e Tusitusiga Eperu e faatatau iā Keriso Iesu e faapea: “E laveaʻi e ia o lē mativa i lona alaga mai; atoa ma lē ua puapuagatia, ma lē ua leai sona fesoasoani. E alofa atu ia i lē ua vaivai ma lē ua mativa; e faaola lava e ia ē ua matitiva.” (Salamo 72:12, 13) E aogā tele nei valoaga auā e faaauupegaina ai i latou e faatuatua i nei valoaga, e fesagaʻia le lumanaʻi i le faamoemoe ma le mautinoa.—Eperu 11:6.

E lētioa faagaeeina le aposetolo o Paulo e tusi: “O mea uma foʻi na tusia anamua, na tusia ia e aʻoaʻo mai ai iā te i tatou; ina ia tatou maua le faamoemoe e tupu mai i le onosai, ma le faamāfanafana mai o Tusi”! (Roma 15:4) Ioe, o loo avea pea Tusitusiga Eperu ma vaega tāua o le Afioga a le Atua, le Tusi Paia. E matuā tāua mo i tatou i aso nei. O lea, matou te faamoemoe o le a outou taumafai e suʻesuʻe le Tusi Paia atoa po o ā aʻoaʻoga moni ma mafai ai ona faalatalata atu i Lē na tusiaina, o Ieova le Atua.—Salamo 119:111, 112.

[Faaopoopoga i lalo]

[Pusa i le itulau 6]

FEAGAIGA TUAI PO O TUSITUSIGA EPERU?

O le faaupuga “feagaiga tuai” o loo maua i le 2 Korinito 3:14. O loo faaaogā le “feagaiga” i le faaliliuga nei e sui ai le upu Eleni di·a·theʹke. O le ā le uiga o le feagaiga tuai i le 2 Korinito 3:14?

Na faamatala mai e Edward Robinson o se tusitala o se lomifefiloi e faapea: “Talu ai o loo iai le feagaiga anamua i tusi a Mose, o loo tuu ai le [di·a·theʹke] mo le tusi o feagaiga, o tusitusiga a Mose, mo se faaaʻoaʻoga, o le tulafono.” I le 2 Korinito 3:14, na faasino atu ai le aposetolo o Paulo i le Tulafono a Mose, ua na o se vaega lea o Tusitusiga a uluaʻi Kerisiano.

O le ā la se igoa talafeagai e ono faaigoa ai uluaʻi tusi e 39 o le Tusi Paia? Na i lo le faapea ua leva pe uma foʻi taimi o lenei vaega o le Tusi Paia, sa faasino atu Iesu ma ona soo i nei vaega o “Tusi” po o Tusitusiga, ma le “Tusi Paia.” (Mataio 21:42; Roma 1:2) O lea, ina ia ōgatusa ma fetalaiga faagaeeina, e faaaogā e Molimau a Ieova le faaupuga Tusitusiga Eperu e faasino atu ai i le Feagaiga Tuai, auā na tusia le tele o lenā vaega o le Tusi Paia i le gagana Eperu. O lea, latou te faaaogā foʻi le Tusitusiga Eleni e faasino atu ai i le Feagaiga Fou, auā na faagaeeina e le Atua ni tane e tusia lenei vaega o le Tusi Paia i le gagana Eleni.

[Ata i le itulau 4]

E mafai ona iloa se tane o se faamasino maumauaʻi, o se tamā alofa, ma o se uō

[Ata i le itulau 5]

Na faaaogā e Iesu Tusitusiga Eperu i lana faiva

[Ata i le itulau 7]

O ā taʻiala a le Tusi Paia e mafai ona fesoasoani i se tagata e fai ai ni filifiliga saʻo?