Suafa o le Atua i Pese Faa-Rusia

I LE 1877, na tusi ai e se fatupese lauiloa mai Rusia, e suafa iā Modest Mussorgsky se pese e faavae mai se tala i se mea na tupu i nofoaga anamua o loo taʻua i le Tusi Paia. Na ia tusi atu i sana uō: “Ua ou tusia se pese e faatatau i se vaaiga faale-Tusi Paia e taʻua o le Jesus Navinus [Iosua], ma faatatau atoa atu lava i faamatalaga a le Tusi Paia, ma o loo faasolosolo lelei i mea sa ui atu ai savaliga manumalo a Iosua e oo atu i Kanana.” I isi ana fātuga, e pei o le “The Destruction of Sennacherib” (Le Faaumatiaga o Sanerivi) na taʻua ai foʻi e Mussorgsky nisi o matua autū o le Tusi Paia, faapea ni tagata o loo taʻua o latou igoa i le Tusi Paia.

O le itu e mataʻina ai nei fātuga, auā i le fātuga lea “Jesus Navinus,” faapea foʻi lana fātuga i le 1874 o le “The Destruction of Sennacherib,” o loo taʻua ai e Mussorgsky le Atua, e ala i le faaaogā o se faaleoga faa-Rusia o Lona suafa, lea e tutusa atu i mataʻitusi konesane e fā o loo tusia ai lea suafa i Tusitusiga Eperu, יהוה (YHWH) ma e toetoe 7,000 taimi o loo taʻua ai lenā suafa.

E taʻu mai i nei pese a Mussorgsky, o le suafa o le Atua lea e taʻua i le Tusi Paia, o Ieova, sa iloa e tagata i Rusia a o leʻi taitai amata le lona 20 senituri. Ua talafeagai lenā mea, auā o Ieova lava na fetalai iā Mose: “O loʻu igoa lenā e faavavau, o laʻu faamanatuga lenā i lea tupulaga ma lea tupulaga.”—Esoto 3:15.

[Ata i le itulau 32]

Aʻoga faapitoa mo musika i St. Petersburg i le 1913, lea o loo teu ai fātuga na lomia a Mussorgsky

[Ē Ana le Ata i le itulau 32]

Pepa o le pese: Nofoaga e teu ai mea tau musika a le setete o Saint-Petersburg, na faaigoa iā N.A. Rimsky-Korsakov; vaaiga i le alatele: Faletusi a le Malo o Rusia i St. Petersburg