O Filifiliga e Maua ai le Fiafia

“MAʻIMAU e, pe ana ese saʻu filifiliga na fai!” Ua faafia ona e faia lenā lava faamatalaga? E tatou te mananaʻo uma lava e faia ni filifiliga e tatou te lē faanoanoa mulimuli ai, aemaise lava pe a aafia ai o tatou olaga. E faapefea la ona tatou faia filifiliga e maua ai le fiafia?

Muamua lava, e manaʻomia ona iai ni tapulaa e maufaatuatuaina moni. Po o iai ea ni tapulaa faapenā? E manatu le toʻatele o tagata e leai ni tapulaa. Ma e tusa ai ma se iloiloga na faia i le Iunaite Setete, e talitonu le 75 pasene o tamaiti aʻoga i kolisi maualuluga faapea, e leai se mea e taʻu o tapulaa o le saʻo ma le sesē, ma o le manatu foʻi e faatatau i le lelei ma le leaga e eseese lava, e fua i “mea e faatāuaina e le tagata lava ia, faapea ma le eseese o aganuu.”

Pe talafeagai ea ona manatu faapea o tapulaa i amioga tatau, ua na o se mataupu e faatatau i le manatu o le tagata lava ia, po o manatu ua taliaina e le toʻatele o tagata? E matuā leai lava. Pe ana fai e saʻoloto le tagata e fai le mea e manaʻo i ai, e iʻu ai i se tulaga fenuminumiaʻi. O ai e manaʻo e ola i se nofoaga e leai ni tulafono, leai ni fale faamasino, ma e leai ni leoleo? E lē gata i lea, o manatu o le tagata lava ia, e lē o ni taʻiala e maufaatuatuaina. E tatou te ono filifili e fai se mea e tatou te manatu e saʻo, ae iloa mulimuli ane e sesē le filifiliga na fai. O le mea moni, o le talaaga atoa o le fanau a tagata e faamaonia ai le moni o le taʻiala lenei o le Tusi Paia: “E lē o i le tagata lona ala, e lē o i le tagata e savali ona faatonuina le mea e ui ai o ia.” (Ieremia 10:23) O fea la, e tatou te liliu atu i ai mo se taʻitaʻiga, pe a faia filifiliga i mataupu tāua o le olaga?

O le tauleʻaleʻa lea na taʻua i le mataupu na muamua atu, sa atamai lana gaoioiga na fai i  le alu atu iā Iesu mo se fautuaga. Ae e pei ona tatou iloa i le tali atu a Iesu i le fesili a le tauleʻaleʻa, na ia faasino o ia i le tulafono a le Atua. Na silafia e Iesu o Ieova le Atua o le Puna sili o le poto ma le atamai, ma e na te silafia le mea e sili ona lelei mo Ana foafoaga ola na ia faia. O le māfuaaga lenā, na fetalai ai Iesu: “O laʻu aʻoaʻoga e lē o saʻu lava, a o lana na auina mai aʻu.” (Ioane 7:16) Ioe, o le Afioga a le Atua o le puna maufaatuatuaina o taʻiala, e fesoasoani iā i tatou i le faia o filifiliga atamai o le olaga. Seʻi o tatou iloiloina nei ni nai mataupu silisili o loo i le Afioga a le Atua, lea afai e faatatauina o le a faateleina ai lo tatou fiafia.

Le Tulafono Faaauro

I lana Lauga taʻutaʻua i luga o le Mauga, na aʻoaʻo ai e Iesu se mataupu silisili e fesoasoani iā i tatou, i le faia o filifiliga atamai i a tatou fesootaʻiga ma isi. O lana fetalaiga lenei: “O mea uma foʻi tou te loto i ai ia faia e tagata iā te outou, ia faapea lava ona outou faia iā te i latou.” (Mataio 7:12) O le mataupu silisili lenei e faatatau i amioga, e masani ona taʻua o le Tulafono Faaauro.

Ua faaaogā e nisi se faaupuga talitutusa ae e uiga atu i mea e aua le faia, i lo le mea e ao ona fai: “Aua le faia i isi le mea e te lē manaʻo e fai mai e isi iā te oe.” Ina ia faaalia le eseesega o le Tulafono Faaauro ma le toe faaupu o le Tulafono Faaauro i le tulaga faafeagai e pei ona taʻua, seʻi mātau mai la i le faataoto a Iesu i le Samaria agalelei. Na fasia se tagata Iutaia ma tuu ai i le auala ua tali oti. Na iloa e le ositaulaga ma le sā Levī ae na faaauau pea a la faigāmalaga. Talu ai la te leʻi faia se mea e fesoasoani ai i le tulaga pagatia o le tamāloa, e ono faapea atu, na la gaoioi i le tulaga tuufaafeagai o le Tulafono Faaauro. I le faaeseesega, na ui ane le tagata Samaria ma tū e fesoasoani. Ona ia fusifusia lea o manuʻa o le tamāloa ma avatu o ia i se faletalimālō. Na ia faia i le tamāloa le mea e mautinoa e manaʻo foʻi e fai iā te ia. Na ia faatatauina le Tulafono Faaauro—ma faia se filifiliga saʻo.—Luka 10:30-37.

E tele auala e mafai ona tatou faatatauina ai lenei tulafono tau amio, ma maua ai iʻuga lelei. Seʻi faapea ua sifi mai se aiga fou ma nonofo i lo outou vaipanoa. Aiseā e te lē tausolomua ai e faafeiloaʻi, ma talia lelei tagata o lenā aiga? E te ono fesoasoani iā i latou e faamasani ma le oganuu ma tali ni a latou fesili, faapea ma ni mea e latou te manaʻomia. O le tausolomua e faaalia le manatu mamafa i ou tuaoi, o le a e ati aʻe ai se faiā lelei ma ou tuaoi fou. O le a e maua foʻi le faamalieina, ona o loo e faia le mea e fiafia ai le finagalo o le Atua. Pe lē o se filifiliga atamai ea lenā?

Filifiliga e Faavae i le Alofa mo Isi

E ese mai i le Tulafono Faaauro, ua aumai foʻi e Iesu isi taʻiala e fesoasoani iā te oe i le faia o filifiliga atamai. Ina ua fesiligia Iesu po o le ā le tulafono e sili o loo i le Tulafono a Mose, na ia tali atu: “E te alofa atu i le Alii lou Atua ma lou loto atoa, ma lou agaga atoa, ma lou manatu atoa. O le poloaʻiga muamua lenā ma le sili. E faapena foʻi lona lua, E te alofa atu i lē lua te tuaoi, ia pei o oe lava iā te oe. O na poloaʻiga e lua ua autū ai le tulafono uma ma le ʻau perofeta.”—Mataio 22:36-40.

I le pō a o lumanaʻi lona maliu, na tuu atu ai e Iesu i ona soo se “poloaʻiga fou,” ia fealofani. (Ioane 13:34) Aiseā na ia taʻua ai lea poloaʻiga faapea e fou? Aemaise ai, pe e na te leʻi faamatalaina ea o le alofa i tuaoi o se tasi o poloaʻiga e lua lea e autū ai le Tulafono? Na faatonuina tagata Isaraelu i lalo o le Tulafono faa-Mose: “E te alofa atu i lē lua te tuaoi ia pei o oe lava iā te oe.” (Levitiko 19:18) Ae peitaʻi, ua faatonuina nei e Iesu ona soo e faia le mea e sili atu i lo lenā. I lenā lava pō, na fetalai atu ai Iesu i ona soo, e lē o toe umi ae foaʻi atu loa lona ola mo i latou. Ona ia taʻu atu lea iā i latou e faapea: “O laʻu poloaʻiga lenei, ia outou fealofani, pei ona ou alofa atu iā te outou. E lē sili lava le alofa o se tasi i lenei alofa, ia tuuina atu e se tasi lona ola mo ana uō.” (Ioane 15:12, 13) Ioe, e fou lenei poloaʻiga, ona e manaʻomia ona faamuamua manaʻoga o isi i lo i tatou.

E tele auala e tatou te faaalia ai le alofa lē  manatu faapito, i lo le tau ina vaai tau o mea tatou fiafia i ai. Seʻi faapea mo se faataʻitaʻiga, o loo e nofo i se fale mautotogi e tele ni ona potu o loo mautotogi ai foʻi isi, ma o loo e manaʻo e ta lau musika i le leotele e te fiafia i ai, ae e lē fiafia ai lou tuaoi. Po o le a e loto malie ea e tuu le mea e te fiafia i ai, ina ia maua e lou tuaoi se siʻomaga toʻafimālie? I nisi faaupuga, po o le a e faamuamua le lelei o lou tuaoi na i lo oe?

Seʻi toe manatu i se isi tulaga. I se tasi o aso o le taumālūlū i Kanata o loo toʻa le aisa, na asiasi atu ai ni Molimau a Ieova i se tamāloa ua matua. A o faia le talanoaga, na taʻua ai e le tamāloa, ona o le tulaga faalētonu o lona fatu, na lē mafai ai ona ia asueseina le aisa mai luma o lona fale. Pe tusa o se itula mulimuli ane ai, ae ia faalogoina loa le paʻō o suō o loo asu ese ai le aisa. Ua toe foʻi ane Molimau e toʻalua e asu ese aisa i le auala ma faasitepu i luma o le fale o le tamāloa. Na tusi e le tamāloa se tusi i le ofisa o le lālā o Molimau a Ieova i Kanata ma faapea atu: “Ua ou iloa i le asō, le alofa moni faa-Kerisiano. Ua faaleleia ma suia ai laʻu vaaiga sesē i le lalolagi i aso nei. Ua faamalosia ai loʻu faaaloalogia o a outou taumafaiga maelega, o loo fai i le lalolagi atoa.” Ioe o le fesoasoani atu, e tusa lava pe laʻitiiti, ae e mafai ona iai se aafiaga lelei i isi. Maʻeu le mauaina ai o le fiafia i le faia o filifiliga mo le lelei o isi!

Filifiliga e Faavae i le Alofa i le Atua

O le isi vala e ao ona tatou manatua pe a faia ni filifiliga, o le mea na taʻua e Iesu o le poloaʻiga sili—ia tatou alolofa i le Atua. Na fai atu e Iesu na upu i tagata Iutaia, o se nuu ua uma ona tuuina atu iā Ieova. Ae peitaʻi, sa tatau lava i tagata Isaraelu taʻitoʻatasi ona filifili, pe e latou te auauna i lo latou Atua ma le loto atoa ma le alofa atoa.—Teuteronome 30:15, 16.

E faapenā foʻi filifiliga e te faia, e atagia atu ai ou lagona i le Atua. Mo se faataʻitaʻiga, a o faateleina lou iloa i aogā o le Tusi Paia, e te fesagaʻi ai foʻi ma se filifiliga. Po o le a e loto malie ea e faia sau suʻesuʻega faale-Tusi Paia faifai pea, ma taulaʻi atu ia avea ma soo o Iesu? O le faia faapea e mautinoa e aumaia ai le fiafia, auā na fetalai Iesu: “Amuia ē matitiva i le agaga.”—Mataio 5:3.

E tatou te lē o iloa pe na toe salamō le tauleʻaleʻa lea i lana filifiliga. Ae e tatou te iloa lagona o le aposetolo o Peteru, i lona mulimuli iā Iesu mo le tele o tausaga. I le tusa o le 64 T.A., a o lata i le iʻuga o lona soifuaga, na ia faamalosiau i ona uso talitonu e faapea: ‘Ia outou finafinau ina ia maua outou e ia ma le manuia, ua lē ponā, ma le lē mataʻuleagaina.” (2 Peteru 1:14; 3:14) E manino mai, e leʻi salamō Peteru i le filifiliga na ia faia i le silia i le 30 tausaga muamua atu, ma na ia faalaeiau isi ia pipii pea i filifiliga ua latou faia.

O le mulimuli atu i le fautuaga a Peteru, o lona uiga o le taliaina o le tiute tauave o le avea ma soo o Iesu, ma usitaia poloaʻiga a le Atua. (Luka 9:23; 1 Ioane 5:3) Atonu e foliga mai e faigatā, ae ua faamautinoa mai e Iesu i lana folafolaga: “Ia outou ō mai iā te aʻu, o outou uma o ē tigāina ma mafatia i avega, o aʻu  foʻi e mālōlō ai outou. Ia outou amoina laʻu amo, ma ia outou faaaʻoaʻo iā te aʻu, auā o aʻu lē agamalu ma le loto maulalo; ona maua lea e outou o le mālōlōga mo outou agaga. Auā e avegofie laʻu amo, o laʻu avega foʻi e māmā ia.”—Mataio 11:28-30.

Seʻi manatu i le mea na tupu iā Afa. I le sefulu o ona tausaga, na amata ai ona aʻoga i le tāina o le vaiolini, o se galuega na ia faamoemoe e galue ai faapolofesa i le lumanaʻi. E oo ane i le taimi ua 14 ona tausaga, ua avea o ia ma se tagata ta vaiolini i koneseti. Ae e leʻi fiafia ai lava o ia. Sa iai pea lava fesili a lona tamā e faatatau i le olaga, ma ia valaaulia aʻoaʻo faalelotu i lona fale; ae e leʻi faamalieina lava o ia i a latou tali. Sa talatalanoa lo latou aiga po o soifua moni le Atua, ma aiseā ua ia faataga ai pea le amioleaga. Ona amata lea o talanoaga a le tamā o Afa ma Molimau a Ieova. O le talanoaga lea na faagaeetia ai le tamā o Afa, ma oo ai lava ina fai se suʻesuʻega faale-Tusi Paia a le aiga atoa.

A o faagasolo taimi na oo ina malamalama Afa mai le Tusi Paia i le māfuaaga ua faataga ai e le Atua puapuaga, ma manino ai lana vaai i le fuafuaga moni o le olaga. Na faia e Afa ma isi tagata e toʻatolu o lona aiga se filifiliga, e lē taitai ona latou salamō ai. Na ia tuuina atu lona ola iā Ieova. “Ua ou fiafia tele ona ua faamanuiaina aʻu e Ieova i le iloaina o le upu moni, ma ia laveaʻi aʻu mai tulaga tauvā o loo taatele i tagata faimusika faapolofesa. E latou te fai so o se mea ina ia taulau manuia ai.”

O loo fiafia pea Afa i le tāina o le vaiolini e faafiafia ai ana uō, ae e lē o le mea autū lea e faatāuaina i lona olaga. Na i lo lenā, ua taulaʻi atu lona olaga i le auaunaga i le Atua. O loo auauna nei o ia i se tasi o lālā o Molimau a Ieova. I le pei o Afa ma le faitau miliona o isi, lea e ese mai le tauleʻaleʻa mauʻoa, e mafai foʻi ona e faia se filifiliga e te mauaina ai le fiafia tele—o le taliaina lea o le valaaulia a Iesu ia avea ma ona soo.

[Ata i le itulau 6]

O lau filifiliga e mafai ona aogā i olaga o isi tagata

[Ata i le itulau 7]

Po o le a e suʻesuʻeina ea le Tusi Paia ma avea ma soo o Iesu?