Olioli Ina ua “Manumalo Faatasi ma le Tamaʻi Mamoe”

I SE tusi na ia tusia i le 1971, na toe manatunatu ai Carey W. Barber i uluaʻi tausaga e 50 o lana auaunaga i le Atua moni: “Na uigaese le lelei o tausaga i le auaunaga iā Ieova. O le aufaatasiga ma ona tagata; le puipuia mai tagata amioleaga o le lalolagi a Satani; le faamoemoe o le manumalo faatasi ma le Tamaʻi Mamoe, o Iesu Keriso, ma le faamaoniga o le alofa o Ieova ua aumaia ai le filemu ma le faamalieina lea e leoleoina ai le loto, ma aumaia ai le faamoemoe mautinoa i le manumalo faaiʻu.”

I le ono tausaga mulimuli ane, na amata ai ona auauna le uso o Barber, o ia o se Kerisiano faauuagagaina, i le avea o se sui o le Vaega Pule o Molimau a Ieova. A o faagasolo le 30 tausaga mulimuli ane i lenā tofiga, sa faaauau pea ona ia taulaʻi atu ina ia “manumalo faatasi ma le Tamaʻi Mamoe.” Na ia ausia lenā tulaga e ala i le tumau faamaoni seʻia oo i lona maliu i le Aso Sa, Aperila 8, 2007 i le 101 o ona tausaga.—1 Korinito 15:57.

Na fanau o ia i Egelani i le 1905 ma na papatiso i Winnipeg i Kanata, i le 1921. Na la siitia atu ma lona uso masaga o Norman i Brooklyn, Niu Ioka i le lua tausaga mulimuli ane e fesoasoani i se galuega fou. O le taimi lenā o le a amata ona lolomia e tagata o Ieova a latou lava tusi mo le faalauiloaina atu o le tala lelei o le Malo, “i le atu laulau uma.” (Mataio 24:14) O se tasi o uluaʻi tofiga o le uso o Barber o le galue lea i se tamaʻi masini e lolomi ai tusi. E lē gata i tusi na lomia ae na lomia ai foʻi ma faamatalaga mo faamasinoga faaletulafono lea sa faia i le Faamasinoga Maualuga i le Iunaite Setete. Na mulimuli ane galue le uso o Barber i le Matagaluega o Auaunaga, lea e taulaʻi atu i mataupu faalefaapotopotoga ma le galuega talaʻi i le atunuu.

O le iai o se na talaaga, na agavaa lelei ai o ia ina ua tofia i le 1948 e avea o se ovasia femalagaaʻi e asiasi i fonotaga ma faapotopotoga i le vaega atoa i sisifo o le Iunaite Setete. Na ia faapea mai sa ia fiafia tele e galue i fafo i le galuega talaʻi. O lenei tofiga sa mafai ai ona feiloaʻi atu le tele o uso ma tuafafine i le uso o Barber. Sa matuā aogā tele lona sogasogā ma le maelega i le faiva, ina ua mulimuli ane auai i le vasega lona 26 o le Aʻoga Faale-Tusi Paia a le Olomatamata o Kiliata. A o faagasolo le aʻoga, sa ia feiloaʻi atu ai iā Sydney Lee Brewer o se tasi na la aʻoʻoga faatasi e sau mai Kanata. Na la faaipoipo ina ua uma le faauuga ma alu loa le la tafaoga o le faaipoipoga i se faigāmalaga puupuu, ina ia galulue i faapotopotoga i le vaipanoa o Chicago, i Illinois. E mautinoa sa avea le tuafafine o Sydney o se aumea lelei, ma o sē na fai ma faamalosiau i lana tane a o faagasolo o la tausaga e luasefulu i le galuega femalagaaʻi.

O le a manatua pea e i latou na feiloaʻi atu i le uso o Barber ana lauga ma manatu lelei, a o galue o se ovasia itumalo po o le matagaluega, pe a o faagasolo foʻi le 30 tausaga na ia galue ma faimalaga solo ai o se sui o le Vaega Pule. Ua iā i tatou foʻi māfuaaga uma e olioli ai i lona “manumalo faatasi ma le Tamaʻi Mamoe.”