Po o le a E Ola ea Tau Lava o le Taimi Nei?

“OU TE lē manatunatu i le lumanaʻi. E oo mai lava.” O na faaupuga masani e lē faavaea, na tusia e se saienitisi e suafa iā Albert Einstein. E toʻatele foʻi tagata e manatu faapena. E latou te ono faapea mai, “Aiseā e popole ai fua i le lumanaʻi?” Po o lou faalogo foʻi i nisi o faapea: “Fai le mea e te fiafia ai.” “Ola mo le asō.” “Aua le manatu i le aso a taeao.”

Ioe, o na manatu taatele, e lē o se mea fou. Sa tautū tagata Epikuro anamua i le faaupuga: “Tau lava o le ʻai, inu ma fai mea e te fiafia ai. O isi mea uma e lē tāua. O manatu foʻi na o i latou na ola i le taimi o le aposetolo o Paulo. Na latou faapea mai, “Inā tatou aai ma inu, auā o a taeao e tatou te feoti ai.” (1 Korinito 15:32) E latou te talitonu na o le pau lenei o le olaga ua tatou maua, ma ua latou faalauiloa ai le manatu, e tatau ona tatou matuā faaaogā le olaga.

E iai le faitau miliona o tagata i le lalolagi e manatu, e lē uiga atu le matuā faaaogā o lenei olaga i le saʻilia o le fiafia faapea o le mea silisili i le olaga. O le tele o faigatā ua oo i le toʻatele, ua oo ai i se olaga e tumu i faafitauli ma tigāina. Aiseā e ao ai ona latou manatu i le lumanaʻi, o se “taimi o i luma” e masani ona lē mautinoa ma lē taulau?

Pe Ao Ona Tatou Fuafua mo le Lumanaʻi?

E oo foʻi i tagata e lē faigatā tele o latou tulaga, e masani ona latou manatu e leai se tāua o ni fuafuaga e faia mo le lumanaʻi. Latou te ono faapea mai, “Aiseā e popole ai?” E ono manatu nisi, o i latou o ē fuafua mo le lumanaʻi e tele ina lē fiafia ma lē taulau. E oo foʻi i le augātamā anamua o Iopu, na faavaivaia o ia ina ua vaai atu i ana fuafuaga ua “faalēiʻuina,” ma ua faaleagaina uma mea na ia mafaufau i ai o le a maua ai se lumanaʻi fiafia mo ia ma lona aiga.—Iopu 17:11; Failauga 9:11.

Na faatusaina e se fatusolo Sikotilani o Robert Burns, o tatou tulaga faigatā i se tamaʻi isumu lea ua faatamaʻia ma le lē iloa e le palau a Burns le mea e nofo ai. Na sola le isumu i le fia ola, ina ua faaleaga uma ana mea. ‘Ioe,’ e manatu le fatusolo, ‘e masani ona leai se tatou malosi e fesagaʻia ai mea e  sili atu na i lo mea tatou te mafaia, lona uiga e oo lava i ni fuafuaga e lelei ona faatulaga, e masani ona lē taulau.’

Po o lona uiga ea la, e lē aogā ona fuafua mo le lumanaʻi? O le mea moni, o le lē fuafua mamao e mafai ona oo ai i ni iʻuga leaga, pe a tupu ni afā po o ni mala faalenatura. Mo se faataʻitaʻiga, e leʻi iai se tasi na mafai ona ia taofia le oo mai o le Afā o Katerina. Pe lē o se mea lelei ea pe ana muaʻi iloa ma faia ai ni fuafuaga mamao ina ia faaitiitia aafiaga e oo i le aai ma ē o loo nonofo ai?

O le ā sou manatu? Pe o se mea tatau ea le ola tau lava mo le asō ae faagalo le aso a taeao? Seʻi manatu i le mea o loo talanoaina e le mataupu o sosoo mai.

[Ata i le itulau 3]

“Tau lava o le ʻai, inu ma fai mea e te fiafia ai. O isi mea uma e lē tāua”

[Ata i le itulau 4]

Pe ana muaʻi iloa ma fuafua mamao semanū e faaitiitia aafiaga o le Afā o Katerina?

[Ē Ana le Ata]

U.S. Coast Guard Digital