O Loo Ola le Afioga a Ieova

Manatu Tāua Mai le Tusi o Mataio

O MATAIO le tagata muamua na tusia se tala faaoso naunau i le soifuaga o Iesu ma lana faiva, o se uō māfana a Iesu Keriso ma o se tasi sa ao lafoga muamua. Na uluaʻi tusia le Evagelia a Mataio i le gagana Eperu ma faaliliuina mulimuli ane i le gagana Eleni. Na māeʻa i le tusa o le 41 T.A., lea ua fesootaʻi ai le Tusitusiga Eperu i le Tusitusiga Eleni.

Na uluaʻi tusia lenei Evagelia uigā mo tagata Iutaia, ma o loo faaatagia mai ai Iesu o le Mesia na folafolaina, ma o le Alo o le Atua. O le uaʻi totoʻa atu i lenei feʻau, o le a faamalosia ai lo tatou faatuatua i le Atua moni, o lona Alo, ma Ana folafolaga.—Epe. 4:12.

“UA LATALATA MAI LE MALO O LE LAGI”

(Mata. 1:1–20:34)

Na faamatilatila e Mataio le matua o le Malo ma aʻoaʻoga a Iesu, e ui o le faia faapea na sala ese ai mai i le faamatala mai o mea na tutupu i le faasologa saʻo. O se faaaʻoaʻoga, o loo taʻua i le amataga o le tusi le Lauga i le Mauga, e ui na faia e Iesu lenā lauga pe tusa o le tausaga talu ona amata lana faiva.

A o faagasolo lana faiva i Kalilaia, na faia e Iesu ni vavega, avatu ni faatonuga e tusa ai o le faiva i aposetolo e 12, taʻua le sesē o le ʻau Faresaio, ma faamatala atu talafaatusa e uiga i le Malo. Ona ia tuua lea o Kalilaia, ae alu atu i “tuaoi o Iutaia ma sopo atu i le isi itu o Ioritana.” (Mata. 19:1) Na taʻu atu e Iesu i ona soo a o ō atu i le ala: ‘E tatou te ō atu i Ierusalema, ma e faasalaina le Atalii o le tagata i le oti, ae e toe faatūina o ia i le aso lona tolu.’—Mata. 20:18, 19.

Taliina o Fesili Faale-Tusi Paia:

3:16—O le ā le uiga na ‘matala mai ai le lagi’ i le taimi o le papatisoga o Iesu? E foliga e faailoa mai ai, na toe manatua e Iesu lona soifuaga a o leʻi afio mai i le lalolagi.

5:21, 22—Pe e sili atu ona matuiā le fai atu o faaupuga ita, nai lo le teuloto o le ita? Na lapataʻi Iesu, o se tasi e teuloto pea le ita i lona uso, ua ia faia le agasala matuiā. Peitaʻi, o le faaalia o le ita e ala i le fai atu o ni upu faatigā, e sili atu ona matuiā ma e faasalaina ai se tasi i le faamasinoga e maualuga atu nai lo le faamasinoga a le nuu.

5:48—Pe e mafai ona tatou ‘atoatoa ona lelei e pei foʻi o lo tatou Tamā o i le lagi’? Ioe, i se uiga e faatapulaa. O loo talanoa Iesu e faatatau i le alofa, ma na ia taʻu atu i le ʻaufaalogologo ina ia faaaʻoaʻo i le Atua, ia atoatoa ona lelei, pe atoatoa i lo latou alofa. (Mata. 5:43-47) E faapefea? E ala i le faalautele atu o le alofa e aofia ai ma o latou fili.

7:16—O ā “fua” e mātaulia ai le tapuaʻiga moni? E aofia i nei fua mea e sili atu nai lo o a tatou amioga. E aofia ai foʻi o tatou talitonuga, po o aʻoaʻoga e tatou te piiama atu i ai.

10:34-38—Pe e māfua fevaevaeaʻiga i le aiga ona o le feʻau o le Tusi Paia? E leai. Nai lo lea, e māfua fevaevaeaʻiga ona o manatu o tagata lē talitonu o aiga. E latou te ono filifili e teena le faa-Kerisiano, lea e māfua ai fevaevaeaʻiga i le aiga.—Luka 12:51-53.

11:2-6—Afai na iloa e Ioane o Iesu le Mesia, ona sa ia faalogo o faamaonia e le siʻufofoga o le Atua, aiseā la na ia fesili ai po o Iesu o “Lē maliu mai”? Atonu na fesili Ioane ina ia maua ai se faamautinoaga mai iā Iesu  lava ia. I le isi itu, na fia iloa e Ioane pe sa iai “se isi tagata” e afio mai i le mana o le Malo ma faataunuu faamoemoega uma o tagata Iutaia. Na faaalia i le tali a Iesu, e leai se isi tagata e mulimuli mai iā te ia.

19:28—O le ā e faaatagia mai e “ituaiga e sefulu lua o Isaraelu,” ia o le a faamasinoina? E latou te lē faaatagiaina ituaiga e 12 o le Isaraelu faaleagaga. (Kala. 6:16; Faaa. 7:4-8) E avea aposetolo na fetalai i ai Iesu, ma vaega o le Isaraelu faaleagaga, ae lē o ni faamasino o lea vaega. Na osia e Iesu ‘⁠se feagaiga ma i latou mo se malo,’ ma e avea i latou ma ‘⁠malo ma ositaulaga i le Atua.’ (Luka 22:28-30; Faaa. 5:10) O i latou o i le Isaraelu faaleagaga, o le a latou ‘faamasinoina le lalolagi.’ (1 Kori. 6:2) O lea la, o “ituaiga e sefulu lua o Isaraelu,” o i latou ia e faamasinoina e le vaega e nofoia nofoālii, e foliga mai e faaatagia mai ai le lalolagi o tagata, ia e lē o i lenā vasega mamalu faaositaulaga, e pei ona faaata mai e ituaiga e sefulu lua i le Aso o le Togisala.—Levi., mata. 16.

Lesona mo i Tatou:

4:1-10. Ua tatou aʻoaʻoina i lenei tala, e iai moni Satani ma e lē o se uiga o le leaga. Ua ia faaaogā “tuʻinanauga o le tino, ma tuʻinanauga o mata, ma le faalialiavale o meafaitino a se tasi” e faaosoosoina ai i tatou. Peitaʻi, o le faatatauina o taʻiala a le Tusi Paia e fesoasoani iā i tatou e tumau ai ma le faamaoni i le Atua.—1 Ioa. 2:16.

5:1–7:29. Ia e naunau i mea faaleagaga. Ia faatupu le filemu. Teena mafaufauga lē mamā. Tausi i lau upu. Pe a tatalo, ia faamuamua mea faaleagaga nai lo o mea faaletino. Ia mauʻoa i le Atua. Ia saʻili muamua le Malo ma le amiotonu a le Atua. Aua le faamasinosino. Ia faia le finagalo o le Atua. Maʻeu le aogā o lesona o loo iai i le Lauga i le Mauga!

9:37, 38. E ao ona gaoioi e tusa ai ma la tatou talosaga i le Matai e “auina mai se ʻaufaigaluega e faia le seleselega,” i le auai ma le maelega i le galuega o le faia ma soo.—Mata. 28:19, 20.

10:32, 33. E lē tatau ona tatou fefefe e tautatala atu e uiga i lo tatou faatuatua.

13:51, 52. O le iloa o le uiga o upu moni o le Malo, e aumaia ai ma le tiute tauave o le aʻoaʻoina lea o isi ma tufa atu iā i latou nei ʻoa.

14:12, 13, 23. E tāua tele taimi mo na o i tatou lava ina ia manatunatu loloto ai i mea aogā.—Mare. 6:46; Luka 6:12.

17:20. E tatou te manaʻomia le faatuatua, e foʻia ai toʻatugā e pei o ni mauga ia e faalavelavea ai lo tatou agaʻi i luma faaleagaga, ma fesagaʻia ai faigatā. E lē tatau ona tatou faatalatū i le atiaʻe ma le faamalosia o lo tatou faatuatua iā Ieova ma ana folafolaga.—Mare. 11:23; Luka 17:6.

18:1-4; 20:20-28. O le lē lelei atoatoa faaletagata ma le siʻomaga tau tapuaʻiga lea na faatāuaina tulaga, na māfua ai ona soona manatu mamafa ai soo o Iesu i ni tofi maualuluga. E ao ona tatou atiaʻe le lotomaulalo a o leoleoina i tatou mai faanaunauga agasala, ma tausisia se vaaiga saʻo i faaeaga ma tiute tauave.

“E TUUINA ATU LE ATALII O LE TAGATA”

(Mata. 21:1–28:20)

Na afio Iesu i Ierusalema “o loo tiʻetiʻe i le asini” iā Nisani 9, 33 T.A. (Mata. 21:5) I le aso na sosoo ai, na ia afio i le malumalu ma faamamāina. Iā Nisani 11, na ia aʻoaʻo i le malumalu, faailoa le sesē o le ʻautusiupu ma le ʻau Faresaio, ma mulimuli ane tuuina atu i ona soo “le faailoga o [lona] faatasi mai, ma le iʻuga o le faiga o mea a le lalolagi.” (Mata. 24:3) Na ia fetalai atu iā i latou i le aso na sosoo ai: “Ua outou iloa ua toe lua aso ona oo lea i le paseka, ma e tuuina atu le Atalii o le tagata ina ia tutuʻi i luga o le laau.”—Mata. 26:1, 2.

Ua oo iā Nisani 14. Ina ua mavae le faavaeina o le Faamanatuga o lona maliu ua lata ane, na faalataina ai Iesu, puʻea faapagota, saisai, ma faatautauina i luga o le laau. Na toe faatūina  aʻe o ia mai le oti i le aso lona tolu. A o leʻi afio i le lagi, na poloaʻi atu Iesu lē na toe faatūina i ona soo: “O le mea lea, ia outou ō atu e fai tagata o nuu uma lava ma soo.”—Mata. 28:19.

Taliina o Fesili Faale-Tusi Paia:

22:3, 4, 9—O anafea na avatu ai valaau e tolu i le ʻaiga o le faaipoipoga? Na avatu le uluaʻi valaau e faapotopoto le vasega o le faatoʻānofotane ina ua amata talaʻi Iesu ma ona soo i le 29 T.A., ma faaauau pea seʻia oo i le 33 T.A. Na faalautele atu le valaau lona lua i le taimi na liligi ifo ai le agaga paia i le Penetekoso 33 T.A. i le 36 T.A. Na avatu na valaau i na o tagata Iutaia, o tagata Iutaia liulotu, ma tagata Samaria. Peitaʻi, na avatu le valaau lona tolu i tagata i fafo atu o le aai, o tagata o Nuu Ese lē peritomeina, e amata mai i le 36 T.A. ina ua faaliliuina le fitafita Roma o Konelio ma faaauau mai ai pea i o tatou aso.

23:15—Aiseā sa avea ai se tagata na faaliulotu e le ʻau Faresaio o se “tagata e tatau ona alu i Kena, e sili atu lona faasalaga” i le ʻau Faresaio? O nisi na liulotu a le ʻau Faresaio, atonu o nisi na avea muamua ma tagata na faia ni agasala matuiā. O le faaliliuina i se tulaga e sili ona mapolotu e pei o le ʻau Faresaio, ua sili atu ai ona latou leaga, o le mea moni, atonu ua sili atu ona leaga nai lo o o latou faiaʻoga ua taʻusalaina. O lea, ua sili atu ona tatau iā i latou ona ‘ō i Kena,’ pe a faatusatusa atu i Faresaio Iutaia.

27:3-5—O le ā le mea na faanoanoa ai Iuta? E leai se faailoaga e faapea o le faanoanoa o Iuta, o se salamō moni. Nai lo o le saʻili o le faamagaloga a le Atua, na ia taʻutino lana measesē na fai i ositaulaga ma toeaina. Na talafeagai le matuā lagonaina e Iuta o le nofosala ma le atuatuvale, ona na ia faia “le agasala e iʻu i le oti.” (1 Ioa. 5:16) Na faanoanoa o ia ona sa i se tulaga ua leai se faamoemoe.

Lesona mo i Tatou:

21:28-31. E matuā tāua iā Ieova lo tatou faia o lona finagalo. O se faaaʻoaʻoga, e ao ona faia so tatou sao maelega i le talaʻia o le Malo ma le galuega o le faia ma soo.—Mata. 24:14; 28:19, 20.

22:37-39. Ua taaofaʻi mai e poloaʻiga sili e lua mea e finagalo i ai le Atua iā i latou e tapuaʻi atu iā te ia!

[Ata i le itulau 31]

Po o e auai ma le maelega i le galuega o le seleselega?

[Ē Ana le Ata]

© 2003 BiblePlaces.com

[Ata i le itulau 31]

Na faamatilatila e Mataio le matua o le Malo