Ia Olioli i le Galuega o le Faia o Isi ma Soo
Ia Olioli i le Galuega o le Faia o Isi ma Soo
“O le mea lea, ia outou ō atu e fai tagata o nuu uma lava ma soo.”—MATA. 28:19.
1-3. (a) O ā lagona o le toʻatele e faatatau i le faia o suʻesuʻega faale-Tusi Paia? (e) O ā fesili o le a tatou iloiloina?
NA TUSI mai se tuafafine e auai i se vaega e tautatala i le gagana Hinitū i le Iunaite Setete e faapea, “Sa matou suʻesuʻe ma se aiga mai Pakisitana mo le 11 vaiaso ua tuanaʻi.” Ua ia faapea atili mai, “E mautinoa ua avea i matou ma uō. E maligi oʻu loimata pe a ou mafaufau ua lē o toe umi ona toe foʻi lea o lenei aiga i Pakisitana. Ou te tagi ona e lē gata e lagona loʻu faanoanoa i le motusia o la matou mafutaga, ae o le olioli foʻi na ou maua a o aʻoaʻoina i latou e faatatau iā Ieova.”
2 Pe sa iai se taimi na e tofo ai i le olioli e maua mai le suʻesuʻeina o le Tusi Paia faatasi ma se isi tagata, e pei o lenei tuafafine? Sa matuā olioli Iesu ma ona soo i le uluaʻi senituri, i le galuega o le faia o isi ma soo. Ina ua toe foʻi mai soo e toʻa 70 lea na toleni e Iesu, ma se lipoti e olioli ai, ona ‘matuā fiafia ai lea o Iesu i le agaga paia.’ (Luka 10:17-21) O loo faapena foʻi ona olioli le toʻatele i aso nei i le faia o isi ma soo. O se faamaoniga, i le 2007, na faia ai e tagata talaʻi fiafia ma galulue mamafa, suʻesuʻega faale-Tusi Paia i se faatatauga e ono ma le afa miliona i masina taʻitasi!
3 Peitaʻi, o nisi tagata talaʻi e leʻi tofo lava i le faaeaga o le faia o se suʻesuʻega faale-Tusi Paia. O isi atonu latou te leʻi faia lava se suʻesuʻega faale-Tusi Paia i nai tausaga ua tuanaʻi atu. O ā luʻi tatou te ono fesagaʻia a o taumafai e fai se suʻesuʻega fale-Tusi Paia? E ono mafai faapefea ona tatou foʻia na luʻi? Ma o ā taui tatou te maua pe afai tatou te faia le mea sili tatou te mafaia e usitaʻia ai le faatonuga a Iesu: “O le mea lea, ia outou ō atu e fai tagata o nuu uma lava ma soo”?—Mata. 28:19.
Luʻi e Mafai Ona Aveesea ai lo Tatou Olioli
4, 5. (a) O le ā le tali mai a le toʻatele o tagata i nisi vaega o le lalolagi? (e) O ā luʻi ua fesagaʻi ma le ʻautalaʻi i nisi vaipanoa?
4 I nisi vaega patino o le lalolagi, e talia fiafia ai e tagata a tatou lomiga ma mananaʻo latou te suʻesuʻeina le Tusi Paia ma i tatou. Na tusi mai se tasi ulugalii mai Ausetalia sa galulue mo se taimi lē tumau i Zambia, e faapea: “E saʻo lelei lava tala na ma faalogo ai. O Zambia o se oganuu e fuatele mai ai le talaʻiga. O le molimau atu i ala tele o se mea e ofo tele ai! E ō mai tagata iā i maʻua, ma o nisi e talosaga mai mo ni lomiga patino o mekasini.” I se tausaga talu ai nei, na faia ai e uso ma tuafāfine i Zambia le silia i le 200,000 suʻesuʻega faale-Tusi Paia—o lona uiga, i se fuafaatatau, e sili atu i le tasi le suʻesuʻega faale-Tusi Paia a le tagata talaʻi e toʻatasi.
5 Peitaʻi, i isi vaipanoa, atonu e lē faigofie mo le ʻautalaʻi ona ofo atu lomiga ma fai e lē aunoa ni suʻesuʻega faale-Tusi Paia. Aiseā? E masani ona lē maua atu tagata i o latou fale, ia pe maua atu foʻi tagata i o latou fale ae atonu e lē naunau i mataupu e faatatau i lotu. Atonu na latou soifua aʻe i ni aiga e lē lolotu, pe e tetee foʻi ona o pepelo aliali a lotu sesē. O le toʻatele o tagata ua faamanuʻalia ma faileagaina e leoleo mamoe pepelo. (Mata. 9:36) E tatou te faatalitalia la nei tagata, e lē faigofie ona uaʻi mai i ni talanoaga e faatatau i le Tusi Paia.
6. O ā luʻitau ua tapulaa ai mea e mafai ona fai e nisi tagata talaʻi?
6 O nisi tagata talaʻi faamaoni ua fesagaʻi ma se isi ituaiga luʻi, lea e mafai ona aveesea ai lo latou olioli. E ui lava i le taimi muamua sa latou maelega ai i le galuega o le faia o isi ma soo, ae i le taimi nei ua lē o toe faigofie ona o le tino maʻi pe ua lē mafai foʻi ona o le soifua matua. O nisi foʻi taimi, e tatou te nonofo lava tatou ma fai le faaiʻuga tatou te lē mafai ona fai se mea. O se faataʻitaʻiga, po o e manatu e te lē agavaa e fai se suʻesuʻega faale-Tusi Paia? Atonu e pei ou lagona o lagona o Mose ina ua faatonu atu o ia e Ieova e talanoa iā Farao. Na faapea atu Mose: “A e alofa, le Alii e, o aʻu o le tagata e lē iloa fai lauga, talu anamua.” (Eso. 4:10) E leai se eseesega o lagona o le lē agavaa ma le fefe ina neʻi lē taulau. Tatou te ono popole faapea o le a lē avea se tagata ma soo ona e lē o i tatou o ni faiaʻoga agavaa. Ona o le taumafai e ʻalofia le tulaʻi mai o lenā tulaga, tatou te ono teena ai le avanoa e faia ai se suʻesuʻega. E mafai faapefea ona tatou manumalo i luʻi na taʻua i luga?
Ia Saunia Lou Loto
7. O le ā na uunaʻia ai Iesu i lana faiva?
7 O le laasaga muamua lava, o le saunia lea o o tatou loto. Na fetalai Iesu: “O le tele o mea i le loto e tautala mai ai [le] gutu.” (Luka 6:45) Sa uunaʻia Iesu i lana faiva ona o le naunau moni mo le lelei o isi. O se faataʻitaʻiga, ina ua ia mātauina le tulaga vavaeese o tagata Iutaia mai le Atua, “ona mutimutivale ai lea o lona alofa iā i latou.” Na ia fetalai atu i ono soo: “E telē le galuega o le seleselega, . . . ia outou ʻaiʻoi atu ai i le Alii o le seleselega, ina ia auina mai se ʻaufaigaluega e faia le seleselega.”—Mata. 9:36-38.
8. (a) O le ā le mea e lelei ona tatou mafaufau i ai? (e) O le ā se mea tatou te aʻoaʻoina mai le faamatalaga a se tasi tagata aʻoga o le Tusi Paia?
8 A o tatou auai i le galuega o le faia o isi ma soo, o se mea lelei ona tatou mafaufau loloto i le tele o aogā ua tatou maua, ona sa faaalu e se tasi le taimi e tatou te suʻesuʻeina ai le Tusi Paia. Ia mafaufau foʻi e faatatau i tagata ia o le a tatou feiloaʻi i ai i le talaʻiga, ma aogā o le a latou maua pe afai e faalogo mai i le feʻau lea tatou te taʻu atu. Na tusi atu se tasi fafine i le ofisa o le lālā o le atunuu lea e nofo ai, e faapea: “Ou te fia taʻu atu iā te outou loʻu matuā talisapaia o Molimau na aʻoaʻoina aʻu i loʻu fale. Ou te iloa o nisi taimi e latou te fiu ai iā te aʻu ona o le tele o aʻu fesili, ma o taimi uma e umi ai ona ou taofiofia i latou i loʻu fale, nai lo le taimi sa tatau ona latou iai. Peitaʻi, e latou te onosaʻi iā te aʻu ma naunau e faasoa mai mea ua latou aʻoaʻoina. Ou te faafetai iā Ieova ma Iesu ona o le fesoasoani a nei tagata i loʻu olaga.”
9. O le ā le mea sa taulaʻi i ai Iesu, ma e faapefea ona tatou faaaʻoaʻo iā te ia?
9 O le mea moni, e lē o tagata uma na tali ane i taumafaiga a Iesu e fesoasoani iā i latou. (Mata. 23:37) O nisi sa mulimuli atu iā te ia ae na mulimuli ane toe tetee i ana aʻoaʻoga, ma na “lē toe savavali ai ma ia.” (Ioa. 6:66) Peitaʻi, e leʻi avea le lē tali lelei ane o isi ma itu na manatu ai Iesu e faapea, ua lē aogā lana feʻau. E ui lava o le tele o fatu na ia lūlūina e leʻi fua mai, ae sa taulaʻi atu Iesu i mea lelei na ia faia. Sa ia silasila atu ua sinasina le fanua mo le seleselega, ma sa ia maua le olioli tele ona o le fesoasoani atu i lenā seleselega. (Faitau le Ioane 4:35, 36.) Nai lo le tau ina taulaʻi atu o le vaai i le fanua e lē ola ai se mea, i le va o tagutugutu o saito, pe mafai ona tatou taulaʻi atu i le seleselega lea e ono mafai ona maua mai i a tatou oganuu tofia? Seʻi o tatou iloiloina le auala e mafai ona tatou tausisia ai lenā uiga mautinoa.
Talaʻi ma le Sini e Amata se Suʻesuʻega Faale-Tusi Paia
10, 11. O le ā e te faia ina ia tumau ai lou olioli?
10 E lūlū e se faifaatoʻaga ni fatu ma le faamoemoe e selesele mai i le taimi o le seleselega. I se tulaga tutusa, e manaʻomia ona tatou talaʻi ma le sini ia amata ni suʻesuʻega faale-Tusi Paia. Ae faapefea pe afai e te faaalu pea le tele o le taimi i le talaʻiga, ae itiiti ni nai tagata e maua atu i fale, pe foliga mai foʻi ua lē mafai ona toe asiasi atu i au toe asiga? E mafai ona avea lenei tulaga ma mea e lē fiafia ai. Po o le a e fiu ai i le talaʻiga mai i lea fale i lea fale? E mautinoa e leai! E toʻatele tagata o loo mafai lava ona feiloaʻi i ai e ala i lenei metotia o le talaʻiga, lea ua leva ona faaaogā.
11 Peitaʻi, ina ia tumau pea lou olioli, pe mafai ona e faatele atu auala e te talaʻi ai, pe atonu ia faaaofia ai nisi auala e maua ai tagata? O se faataʻitaʻiga, po ua e faataʻitaʻi ona molimau atu i tagata i le ala tele, pe molimau atu i tagata i o latou fale faigaluega? Pe mafai ona e faafesootaʻia tagata e ala i le telefoni, pe maua foʻi numera o telefoni a tagata ia na e talanoa i ai i le feʻau o le Malo, ina ia mafai ona e fesootaʻi pea ma i latou? E ala i le faaalia o le onosai ma le fetuunaʻi i lau faiva, o le a e tofo ai i le olioli i le mauaina o tagata e tali fiafia mai i le feʻau o le Malo.
Fesagaʻia le Lē Ano Mai
12. O le ā tatou te mafai ona fai pe a foliga mai e lē ano mai le toʻatele o tagata i la tatou oganuu?
12 Ae faapefea pe afai o le toʻatele o tagata i lau oganuu e lē fiafia i lotu? Pe mafai ona fetuunaʻi le auala e te talanoa ai e fua i mea e latou te fiafia i ai? Na tusi le aposetolo o Paulo i uso talitonu i Korinito e faapea: “Sa ou faapei o se Iutaia i tagata Iutaia . . . Sa ou faapei o sē e lē nofo i le tulafono i ē e lē nonofo i le tulafono, e lē ona ua ou lē nofo i le tulafono a le Atua.” O le ā le uunaʻiga na iā Paulo? Na ia taʻua e faapea, “Ua avea aʻu ma mea uma i tagata o ituaiga uma, ina ia faaolaina nisi i aʻu taumafaiga uma.” (1 Kori. 9:20-22) Pe mafai ona tatou talanoa atu i mataupu e tatou te ioe faatasi i ai ma tagata o la tatou oganuu? O le toʻatele o tagata e lē ō i ni lotu, e mananaʻo ia faaleleia tulaga o o latou aiga. Atonu foʻi o loo latou saʻili mo se fuafuaga i le olaga. Pe mafai ona tatou faailoa atu le feʻau o le Malo i na tagata, i se auala o le a latou fiafia i ai?
13, 14. E mafai faapefea ona tatou faateleina le olioli e maua mai le galuega o le faia o isi ma soo?
13 Ua faatupulaʻia le ʻautalaʻi ua faateleina lo latou olioli e maua mai le galuega o le faia o isi ma soo, e oo lava foʻi i vaipanoa e foliga mai o le toʻatele o tagata e lē ano mai. E faapefea? E ala i le aʻoaʻoina o se isi gagana. Na mātauina e se tasi ulugalii ua silia i le taʻi 60 o la tausaga e faapea, e faitau afe tamaiti aʻoga mai Saina ma o latou aiga o loo nonofo i le oganuu a le latou faapotopotoga. Fai mai le tane, “Ona o lenei tulaga, na faalaeiauina ai i maʻua e aʻoaʻoina le gagana Saina.” Ua ia faapea atili mai, “E ui lava o le a alu ai le taimi i aso taʻitasi i le aʻoaʻoina o le gagana, ae na ma olioli ona na iʻu i le tele o suʻesuʻega faale-Tusi Paia ma tagata Saina i lo matou vaipanoa.”
14 E tusa lava foʻi pe e te lē mafai ona aʻoaʻo se isi gagana, ae e mafai ona e faaaogā lelei le tamaʻi tusi, Good News for People of All Nations pe a e feiloaʻi iā i latou e tautatala i se isi gagana. E mafai foʻi ona e maua ni lomiga i le gagana a le tagata e te feiloaʻi i ai. Ioe, e manaʻomia le tele o le taimi ma taumafaiga ina ia fesootaʻi ma i latou e ese a latou gagana ma aganuu. Ae ia aua neʻi galo le mataupu silisili o loo i le Afioga a le Atua, e faapea: “O lē e lima foaʻi, e tele ana mea e maua.”—2 Kori. 9:6.
E Aofia ai le Faapotopotoga Atoa
15, 16. (a) Aiseā e aofia uma ai le faapotopotoga atoa i le galuega o le faia o isi ma soo? (e) O le ā le vaega o loo faia e tagata matutua?
15 Peitaʻi, o le faia o isi ma soo e lē faalagolago i taumafaiga a se tagata e toʻatasi. Nai lo lea, o le faapotopotoga atoa e fesoasoani ina ia faia tagata ma soo. Aiseā? Na fetalai Iesu: “O le mea lea e iloa ai e tagata uma o oʻu soo outou, pe afai tou te fealofani.” (Ioa. 13:35) O le mea moni, pe a auai tagata aʻoga o le Tusi Paia i sauniga, e masani lava ona faagaeetia i le siʻomaga alofa i a tatou faatasiga. Na tusi se tasi tagata aʻoga o le Tusi Paia e faapea: “E ese loʻu fiafia e auai i sauniga. E talia fiafia aʻu e tagata!” Na fetalai Iesu e faapea o i latou e avea ma ona soo e ono sauāina e o latou aiga faaletino. (Faitau le Mataio 10:35-37.) Ae ui i lea, na ia folafola mai e toʻatele ‘uso, tuafāfine, tinā ma fanau’ faaleagaga o le a latou maua i le faapotopotoga.—Mare. 10:30.
16 O loo faapitoa ona faia e o tatou uso ma tuafāfine matutua, se vaega tāua i le fesoasoani i tagata aʻoga o le Tusi Paia ina ia agaʻigaʻi i luma. I le ā le auala? E ui lava e lē mafai e nisi o tagata matutua ona fai se suʻesuʻega faale-Tusi Paia, ae o a latou tali faamalosiʻau i sauniga a le faapotopotoga, e faamalosia ai le faatuatua o tagata uma lava e faalogo i ai. O lo latou talaaga o le savavali “i le ala o le amiotonu,” ua matagofie atili ai le faapotopotoga, ma tosina mai ai tagata loto faamaoni i le faalapotopotoga a le Atua.—Faata. 16:31.
Foʻia o Tatou Popolega
17. O le ā e mafai ona tatou fai ina ia manumalo ai i faalogona o le lē agavaa?
17 Ae faapefea pe afai o loo e tauivi ma faalogona o le lē agavaa? Manatua foʻi, na fesoasoani atu Ieova iā Mose e ala i le avatu iā te ia o le agaga paia ma sē la te toʻalua, o lona uso o Arona. (Eso. 4:10-17) Na folafola mai e Iesu e faapea o le a fesoasoani le agaga o le Atua i la tatou galuega talaʻi. (Galu. 1:8) E lē gata i lea, na auina atu e Iesu tagata talaʻi e taʻitoʻalua i le paga. (Luka 10:1) O lea la, pe afai o se luʻi iā te oe le faia o se suʻesuʻega faale-Tusi Paia, ia tatalo mo le agaga o le Atua ina ia aumai iā te oe le atamai, ona lua galulue lea ma se paga e te lagona ai le mautinoa, ma o sē e ono mafai ona fesoasoani lona tomai iā te oe. O se mea e faamalosia ai le faatuatua pe a manatua e faapea, na filifili Ieova e faaaogā tagata lautele—o “mea vaivai a le lalolagi”—ina ia faataunuuina lenei galuega e lē mafaatusalia.—1 Kori. 1:26-29.
18. E faapefea ona tatou foʻia le popole i le lē taulau?
18 E faapefea ona tatou foʻia le popole i le lē taulau? O se mea lelei ona manatua e lē pei le faia o soo o le faiga o se taumafataga, lea e faalagolago tasi le lelei ma le faalētonu i le tagata e toʻatasi —o le kuka. Nai lo lea, o le faia o isi ma soo e lē na o a tatou taumafaiga e faalagolago i ai. O Ieova e na te faia le vaega e sili ona tāua, o le tosina mai lea o tagata taʻitoʻatasi iā te ia. (Ioa. 6:44) Ae o i tatou ma isi i le faapotopotoga, e fai le mea e gata mai ai le mafai ina ia faaaogā le tomai o le aʻoaʻo atu, e fesoasoani ai i tagata aʻoga ina ia agaʻigaʻi i luma. (Faitau le 2 Timoteo 2:15.) Ma e manaʻomia e le tagata aʻoga ona gaoioi e tusa ma mea ua ia aʻoaʻoina. (Mata. 7:24-27) Pe afai e lē faaauau ona fai le suʻesuʻega faale-Tusi Paia a se tagata, atonu e tatou te lē fiafia. E tatou te faamoemoe e fai e tagata aʻoga o le Tusi Paia le filifiliga saʻo, ae ao i tagata taʻitoʻatasi ona “tala atu lana amio i le Atua.”—Roma 14:12.
O ā Aogā?
19-21. (a) O ā aogā tatou te maua mai le faia o suʻesuʻega faale-Tusi Paia? (e) O le ā le silasila a Ieova iā i latou uma e auai i le galuega talaʻi?
19 O le faia o suʻesuʻega faale-Tusi Paia e fesoasoani iā i tatou e taulaʻi atu ai pea i le saʻilia muamua o le Malo. E faaloloto atili ai foʻi upu moni o le Afioga a le Atua i o tatou mafaufau ma loto. Aiseā? Ua faamatala mai e se paeonia e igoa iā Barak e faapea: “O le faia o suʻesuʻega faale-Tusi Paia e uunaʻia ai oe e avea ma tagata aʻoga e sili ona lelei o le Afioga a le Atua. Ua ou iloa e tatau ona matuā mauaa i loʻu loto mea ua ou talitonu i ai, a o oʻu leʻi agavaa e aʻoaʻo le isi tagata.”
20 Pe afai e te lē o faia se suʻesuʻega faale-Tusi Paia, po o lona uiga la ua lē tāua i le Atua lau auaunaga? E mautinoa e leai! E matuā talisapaia e Ieova a tatou taumafaiga ina ia vivii atu iā te ia. O i latou uma o ē auai i le galuega talaʻi o le “ʻaufaigaluega faatasi ma le Atua.” Peitaʻi, o le faia o se suʻesuʻega faale-Tusi Paia e aumaia atili ai le olioli a o tatou vāai atu i le auala e faatupu ai e le Atua le fatu lea na tatou totō. (1 Kori. 3:6, 9) Ua faapea mai se paeonia e igoa iā Amy, “Pe a e vaai atu o agaʻigaʻi i luma se tagata aʻoga o le Tusi Paia, e te matuā lagona le lotofaafetai iā Ieova ona o le faaaogā o oe e avatu i lenā tagata se meaalofa matagofie—le avanoa e iloa ai Ieova ma maua le ola e faavavau.”
21 O le fai o le mea sili tatou te mafaia ina ia amata ma fai ai suʻesuʻega faale-Tusi Paia, o le a fesoasoani iā i tatou e taulaʻi atu ai pea e auauna i le Atua i le taimi nei, ma o le a faamalosia ai lo tatou faamoemoe o le ola i le lalolagi fou. Faatasi ai ma le fesoasoani a Ieova, atonu e tatou te fesoasoani ai foʻi e faasao ola o i latou e faalogo mai iā i tatou. (Faitau le 1 Timoteo 4:16.) E mautinoa o le a avea lea ma mea e olioli tele ai.
Pe E te Manatua?
• O ā luʻi e ono taofia ai nisi mai le faia o suʻesuʻega faale-Tusi Paia?
• O le ā tatou te ono fai pe a foliga mai o le toʻatele o tagata i la tatou oganuu e lē ano mai?
• O ā aogā tatou te maua mai le faia o se suʻesuʻega faale-Tusi Paia?
[Fesili mo le Suʻesuʻega]
[Ata i le itulau 9]
Po o e faatele atu auala e te talaʻi ai ina ia mafai ona maua tagata loto faamaoni?