E Matuā Tāua A‘oa‘oga Mai i le Atua
E Matuā Tāua Aʻoaʻoga Mai i le Atua
“E moni lava, ua ou lotomalie e lafoaʻi ia mea ona o le matuā tāua o le iloa o Keriso Iesu.”—FILI. 3:8.
1, 2. O le ā le filifiliga ua faia e nisi Kerisiano, ma aiseā?
MAI lava i lona laʻitiiti, sa mataʻina Ropati i le aʻoga. Ina ua na o le valu ona tausaga, na asiasi faapitoa atu se tasi o ona faiaʻoga i lona aiga ma fai atu iā te ia, e mafai lava ona ia faia so o se mea. Sa faailoa atu e le faiaʻoga lona faamoemoe e faapea, i se aso o le a avea o ia ma fomaʻi. O ana taumafaiga i le aʻoga maualuga na agavaa ai o ia e aʻoga i so o se iunivesite e sili ona lelei i lona atunuu. Ae na filifili Ropati e tuua le avanoa sa manatu i ai le toʻatele o se avanoa e lē laumaua, ina ia faataunuu lona sini o le auauna o se paeonia sauatoa.
2 E toʻatele Kerisiano talavou ma ē matutua e pei o Ropati, na maua avanoa e agaʻigaʻi ai i luma i lenei faiga o mea. Ua filifili nisi e lē faaaogāina atoatoa na avanoa, ina ia latou faataunuuina sini faaleagaga. (1 Kori. 7:29-31) O le ā ua uunaʻia ai Kerisiano e pei o Ropati ina ia galulue mamafa i le galuega talaʻi? E lē gata o lo latou alolofa iā Ieova, o le māfuaaga sili lea, ae e latou te talisapaia foʻi le matuā tāua o aʻoaʻoga mai i le Atua. Pe na e mafaufau talu ai nei po o le a faapeʻī lou olaga pe ana e lē aʻoaʻoina le upu moni? O le toe mafaufau i nisi o faamanuiaga mataʻina ua tatou olioli ai ona o le aʻoaʻoina e Ieova, o le a fesoasoani iā i tatou e manatua ai pea le tāua o le tala lelei, ma maelega ai e talaʻi atu i isi.
O se Faaeaga le Aʻoaʻoina e le Atua
3. Aiseā e tatou te mautinoa ai, e finagalo Ieova e aʻoaʻoina tagata e lē lelei atoatoa?
3 Ona o lona agalelei, ua finagalo ai Ieova e aʻoaʻoina tagata e lē lelei atoatoa. Ua taʻua faavaloaga i le Isaia 54:13 e faatatau i Kerisiano faauuina e faapea: “E aʻoaʻoina lau fanau uma lava e Ieova; e tele foʻi le manuia o lau fanau.” O le mataupu silisili o loo iai i lenā mau, e faatatau atu foʻi i “isi mamoe” a Keriso. (Ioa. 10:16) E manino lenei tulaga i se valoaga ua faataunuuina i o tatou aso. Na vaaia e Isaia i se faaaliga tagata mai i atunuu uma, o loo gasolo atu i le tapuaʻiga moni. Ua ia faamatalaina i latou e pei o loo fai atu le tasi i le isi: “Tatou ō aʻe ia i le mauga o Ieova, o le fale o le Atua o Iakopo; e aʻoaʻo mai foʻi o ia iā te i tatou i ona ala, ona tatou savavali ai lea i ona ala.” (Isa. 2:1-3) Maʻeu se faaeaga o le aʻoaʻoina e le Atua!
4. O le ā e manaʻomia e Ieova mai iā i latou o loo ia aʻoaʻoina?
4 O le ā e manaʻomia ona tatou faia ina ia maua aogā i aʻoaʻoga mai i le Atua? O le manaʻoga sili lava, ia lotomaulalo ma aʻoaʻogofie se tagata. Na tusi le faisalamo o Tavita e faapea: “O Ieova, e agalelei ma amiotonu ia, . . . na te aʻoaʻo mai foʻi i ē agamalu i lona ala.” (Sala. 25:8, 9) Na fetalai foʻi Iesu e faapea: “Ou te vivii atu iā te oe i luma o tagata, loʻu Tamā e, le Alii o le lagi ma le lalolagi, auā ua e matuā natia nei mea mai tagata popoto ma ē atamamai, a ua faaalia i tamaiti.” (Luka 10:21) Pe e te lē lagona ea le māfana atu i le Atua, o lē e na te ‘foaʻi mai le agalelei faifua i ē e lotomaulalo’?—1 Pete. 5:5.
5. O le ā ua mafai ai ona tatou maua le poto i le Atua?
5 I le avea o ni auauna a Ieova, pe mafai ona tatou faapea ifo ua tatou maua le upu moni, ona o o tatou lava tomai ma lo tatou poto? E leai. O le mea moni, e lē mafai ona tatou maua le poto i le Atua i a tatou lava taumafaiga. Na fetalai Iesu e faapea: “E lē mafai ona sau se tagata iā te aʻu pe a lē tosina mai o ia e le Tamā o lē na auina mai aʻu.” (Ioa. 6:44) E ala i le galuega talaʻi ma le agaga o le Atua, ua tosina mai ai e Ieova tagata e pei o ni mamoe, o i latou “o mea ua manaʻomia e nuu uma.” (Ha. 2:7) Pe e te lē lotofaafetai ona o oe o se tasi ua tosina mai e Ieova i lona Alo?—Faitau le Ieremia 9:23, 24.
Le Mana e Suia ai Olaga
6. O ā ni āuga mataʻina e oo i tagata ona o le aʻoaʻoina o “le malamalama o Ieova”?
6 I le faaaogāina o se talafaatusa matagofie, ua faamatalaina ai i le valoaga a Isaia le suiga o uiga o tagata o loo faia i o tatou aso. O tagata na sauā muamua ua filemu. (Faitau le Isaia 11:6-9.) O ē na feitagaʻi ona o feeseeseaʻiga i lanu, atunuu, ituaiga, po o nisi māfuaaga i aganuu, ua aʻoaʻoina e nonofo faatasi i le autasi. I se uiga faafaatusa, ua latou ‘tuʻi a latou pelu e fai ma uʻamea o suōtosina.’ (Isa. 2:4) O le ā le māfuaaga o nei suiga? Ua aʻoaʻoina e tagata “le malamalama o Ieova” ma faatatauina i o latou olaga. E ui lava e lē lelei atoatoa auauna a le Atua, ae ua faia aʻe iā i latou se ʻauuso moni faavaomalo. O le fiafia o tagata i le tala lelei i le lalolagi aoao ma le fua lelei ua maua mai ai, ua faamaonia ai le matuā tāua o aʻoaʻoga mai i le Atua.—Mata. 11:19.
7, 8. (a) O ā nisi o “mea ua matuā mautū,” ua fesoasoani aʻoaʻoga mai i le Atua e lepetia? (e) O le ā e faaalia ai o aʻoaʻoga mai i le Atua ua viia ai Ieova?
7 Na faatusa e le aposetolo o Paulo le galuega talaʻi a auauna a le Atua, i se taua faaleagaga. Na ia tusi e faapea: “E lē faaletino auupega o la matou taua, ae e faamalosia e le Atua e lepetia ai mea ua matuā mautū. Auā ua matou faatoʻilaloina manatu sesē ma mea maualuluga uma e tetee i le iloa o le Atua.” (2 Kori. 10:4, 5) O ā nisi o “mea ua matuā mautū” ua faasaʻoloto ai e aʻoaʻoga mai i le Atua tagata? O avega mamafa o aʻoaʻoga sesē, talitonuga faanuupō, ma filosofia a tagata, ua na o ni nai mea na ua taʻua. (Kolo. 2:8) O aʻoaʻoga mai i le Atua ua fesoasoani i tagata e foʻia ai amioga leaga, ma atiaʻe ai uiga o le Atua. (1 Kori. 6:9-11) E faaleleia ai olaga i le aiga. Ma ua maua ai e i latou e leai se faamoemoe, se fuafuaga moni i le olaga. O le ituaiga aʻoaʻoga lenei o loo manaʻomia i aso nei.
8 O se tasi o uiga ua fesoasoani Ieova i tagata e atiaʻe, o le faamaoni, e pei ona faaalia i le mea lenei na tupu. (Epe. 13:18) Na talia e se fafine i Initia se suʻesuʻega faale-Tusi Paia, ma mulimuli ane agavaa e avea ma tagata talaʻi e leʻi papatisoina. I se tasi aso ina ua foʻi mai i le galuega o le fausiaina o le Maota mo Sauniga, na ia mauaina ai se filifili auro e tusa ma le valu selau tālā Amerika lona tau, i autafa o se fale faatali pasi. E ui ina mativa o ia, ae na ia avatu le filifili i le ofisa o leoleo. Sa faigatā ona talitonu le leoleo i lenei mea ua tupu! Mulimuli ane, na fesili atu le isi leoleo i le fafine, “Aiseā na e manaʻo ai e faafoʻi mai le filifili?” Na ia faamatala atu, “Ua suia e aʻoaʻoga a le Tusi Paia loʻu olaga, ma ua ou faamaoni i le taimi nei.” O le ofo tele o le leoleo, na ia faapea atu ai i le toeaina Kerisiano lea na ō mai ma le fafine i le ofisa o leoleo: “E silia i le 38 miliona tagata i lenei setete. A mafai ona e fesoasoani i ni tagata se toʻasefulu e suia o latou olaga e pei o lenei fafine, o se taumafaiga sili lenā.” Pe a tatou mafaufau i le faitau miliona o tagata ua faaleleia o latou olaga e aʻoaʻoga mai i le Atua, ua tele la māfuaaga e tatou te vivii atu ai iā Ieova?
9. E mafai faapefea e tagata ona faia ni suiga tetele i o latou olaga?
9 O le mana o le Afioga a le Atua ua faaliliuina ai tagata, faatasi ma le fesoasoani a Ieova e ala i lona agaga paia, ua mafai ai e tagata ona faia ni suiga tetele i o latou olaga. (Roma 12:2; Kala. 5:22, 23) Ua faapea mai le Kolose 3:10: “Ia oofu outou i le tagata fou ua faafouina e ala i le iloa lelei o mea, ina ia foliga e pei o Lē na faia o ia.” O le feʻau o loo i le Afioga a le Atua, le Tusi Paia, o loo iai le mana e faaalia ai le tagata moni i totonu, ma e mafai ona suia ai le auala e mafaufau ai ma ona lagona e uiga i mea. (Faitau le Eperu 4:12.) E ala i le mauaina o le poto saʻo i le Tusi Paia ma le faaōgatusa o le olaga ma tapulaa amiotonu a Ieova, e mafai ai ona avea se tagata ma uō a le Atua, ma maua le faamoemoe o le ola e faavavau i le lumanaʻi.
E Sauniunia i Tatou e Ieova mo le Lumanaʻi
10. (a) Aiseā e na o Ieova ai e mafai ona fesoasoani e sauniunia i tatou mo le lumanaʻi? (e) O ā ni suiga tetele ua lē o toe umi ae aafia ai le lalolagi atoa?
10 E na o Ieova lava e mafai ona fesoasoani e sauniunia i tatou mo le lumanaʻi, auā e na te silafia mea o le a tutupu. E na te silafia le lumanaʻi o tagata. (Isa. 46:9, 10) Ua faaalia i le valoaga o le Tusi Paia e faapea, “o loo latalata mai le aso tele o Ieova.” (Sefa. 1:14) I lea aso, o le a faamaonia ai upu o loo i le Faataoto 11:4: “E lē aogā le oloa i le aso o le toʻasā; a o le amiotonu, e laveaʻi lea nai le oti.” Pe a oo i le taimi e faataunuu ai le faasalaga faafaamasinoga a Ieova i le lalolagi a Satani, o le mea e sili ona tāua o le maua o le finagalo malie o le Atua. O le a lē aogā tupe. O le mea moni, ua faapea mai le Esekielu 7:19: “E lafoaʻi e i latou a latou ario i fafo, ma a latou auro e fai ma mea leaga ia.” O le muaʻi iloaina o lenā tulaga, e mafai ona fesoasoani iā i tatou e gaoioi ai ma le poto i le taimi nei.
11. O le ā se tasi o auala e fesoasoani ai aʻoaʻoga mai i le Atua, i le sauniunia o i tatou mo le lumanaʻi?
11 O se tasi o auala matilatila e sauniunia ai e aʻoaʻoga mai i le Atua i tatou, mo le oo mai o le aso o Ieova, o le fesoasoani lea ia tatou faatulaga mea e ao ona faamuamua. Na tusi atu le aposetolo o Paulo iā Timoteo e faapea: “Ia fai atu faatonuga i ē e mauʻoa i [le] faiga o mea a lenei lalolagi, ia aua le faamaualuga, ma ia lē faamoemoe i ʻoa e lē tumau, ae i le Atua.” E tusa lava pe e lē tele ni a tatou tupe, ae e mafai ona tatou maua aogā mai i lenei fautuaga a le Atua. O le ā e aofia ai? Nai lo o le faaputuina o ʻoa faaletino, e tatau ona tatou taumafai e “faia mea lelei” ma “ia tamaoaiga i galuega lelei.” O le faamuamua o mea faaleagaga i o tatou olaga, ua tatou ‘teua ai oloa mo i tatou lava o le faavae lelei mo le lumanaʻi.’ (1 Timo. 6:17-19) O lenā ala faataulagaina, e atagia mai ai le filifiliga lelei, auā e pei ona fetalai Iesu, “o le ā le aogā i le tagata pe afai na te maua le lalolagi uma ae maʻimau ai lona ola?” (Mata. 16:26, 27) I le iloaina o le lata tele mai o le aso o Ieova, e lelei mo i tatou taʻitoʻatasi ona iloilo: ʻPo o fea o faaputu ai aʻu ʻoa? Po o oʻu pologa mo le Atua po o ʻOa?’—Mata. 6:19, 20, 24.
12. Aiseā e lē tatau ai ona tatou lotovaivai pe a manatu faatauvaa nisi i la tatou faiva?
12 O le mea e sili ona tāua i “galuega lelei” ua faatulaga mai i le Afioga a le Atua mo Kerisiano, o le galuega faasaoola o le talaʻia o le Malo ma le faia o isi ma soo. (Mata. 24:14; 28:19, 20) E pei ona iai i le uluaʻi senituri, e iai nisi e manatu faatauvaa i la tatou faiva. (Faitau le 1 Korinito 1:18-21.) Ae e lē suia ai le tāua o la tatou feʻau, ma e lē faaitiitia ai le tāua o le tuu atu i tagata uma o le avanoa, e faaalia ai le faatuatua i lea feʻau manū o maua le taimi. (Roma 10:13, 14) A o tatou fesoasoani i isi ia maua aogā mai i aʻoaʻoga a le Atua, o le a tatou maua ai le tele o faamanuiaga.
Faamanuiaina Ona o le Ola Faataulaga
13. O ā ni faataulaga na faia e le aposetolo o Paulo ona o le tala lelei?
13 A o leʻi avea le aposetolo o Paulo ma Kerisiano, sa aʻoaʻoina o ia ina ia taulau i le faiga o mea faa-Iutaia. Ina ua pe tusa ma le 13 ona tausaga, sa siitia atu o ia mai i lona nuu o Taso, ae nofo i Ierusalema ina ia aʻoga ai i le faiaʻoga iloga o mea tau Tulafono, o Kamalielu. (Galu. 22:3) Na oo ina avea Paulo o se tagata iloga i ē e latou te tupulaga faatasi, ma pe ana faaauau ai i lenā ala, atonu e ono siitia lona tulaga e avea o se tagata taualoa i le faa-Iutaia. (Kala. 1:13, 14) Ina ua ia talia le tala lelei ma auai i le galuega talaʻi, sa ia tuua na mea uma. Pe na salamō Paulo i le filifiliga na ia faia? E leai. O le mea moni, na ia tusi e faapea: “E moni lava, ua ou lotomalie e lafoaʻi ia mea ona o le matuā tāua o le iloa o Keriso Iesu loʻu Alii. O ia foʻi, ua ou taliaina ai le lafoaʻiina o nei mea uma, ma ua ou manatu o otaota ia mea.”—Fili. 3:8.
14, 15. O ā faamanuiaga ua tatou maua ona o le avea ma “ʻaufaigaluega faatasi ma le Atua”?
14 I le pei o Paulo, ua faia foʻi e Kerisiano i aso nei ni faataulaga ina ia talaʻia ai le tala lelei. (Mare. 10:29, 30) Po o iai se mea ua tatou lē mauaina ona o le faia faapea? Ua pei lava lagona o Ropati, lea na taʻua i le amataga, o lagona o le toʻatele ina ua ia faapea mai: “E leai se mea ou te faanoanoa ai. O le faiva faataimi atoa ua aumaia ai iā te aʻu le olioli ma le faamalieina, ma ua ou ‘tofotofo ai ma iloa e lelei Ieova.’ O so o se taimi lava ou te faia ai ni faataulaga i mea faaletino ina ia faataunuu ai sini faaleagaga, e faamanuia lava aʻu e Ieova e sili atu i lo o mea na ou faataulagaina. E pei lava ou te leʻi faataulagaina se mea. E na o loʻu mauaina ai o mea!”—Sala. 34:8; Faata. 10:22.
15 Pe afai ua fai si umi o e auai i le galuega talaʻi ma le aʻoaʻo atu, e lē taumatea lou mauaina foʻi o ni avanoa e tofotofo ai ma iloa e lelei Ieova. Pe na iai se taimi na e lagona ai le fesoasoani a lona agaga, a o e taʻu atu i isi le tala lelei? Pe na e mātauina le tali fiafia mai o isi, a o tatalaina e Ieova o latou loto e uaʻi mai i le feʻau? (Galu. 16:14) Pe na fesoasoani Ieova iā te oe e foʻia ni luʻi, atonu e ala i le mauaina o le avanoa e faalautele atu ai lau faiva? Pe na ia lagolagoina oe i taimi faigatā, ma faaauau ai ona e auauna atu iā te ia ina ua e lagona ua fāi atu lou malosi? (Fili. 4:13) Pe a tatou mauaina le fesoasoani a Ieova a o fai la tatou faiva, e tatou te lagona le iai moni o Ieova ma māfana atili atu ai iā te ia. (Isa. 41:10) Pe e lē o se faamanuiaga ea le avea o se tasi o le “ʻaufaigaluega faatasi ma le Atua,” i le galuega tele o aʻoaʻoga mai i le Atua?—1 Kori. 3:9.
16. O ā ni ou lagona i taumafaiga ma faataulaga o loo e faia, e fesootaʻi atu i le aʻoaʻoina o isi e faatatau iā Ieova?
16 O le toʻatele o tagata, e faamoemoe ia faataunuu se mea e tumau ona aogā i o latou olaga. Ua tatou vaaia e oo lava i mea mataʻina ua faataunuuina e tagata o le lalolagi i aso nei, e lē umi ae galo. Peitaʻi, o galuega o loo faataunuu e Ieova i aso nei e fesootaʻi atu i le faapaiaina o lona suafa, e mautinoa o le a tumau ona iai o se vaega o le talaaga faale-Atua o tagata o Ieova. O le a manatua pea e faavavau. (Faata. 10:7; Epe. 6:10) Tau ina ia tatou faapelepele i lo tatou faaeaga, o le aʻoaʻoina o isi e faatatau iā Ieova, o se galuega o le a lē mafai ona galo.
O le a Faapefea Ona E Tali?
• O le ā e manaʻomia e Ieova mai iā i latou o loo ia aʻoaʻoina?
• E faapefea i aʻoaʻoga mai i le Atua ona suia ai olaga o tagata?
• O ā auala ua faamanuiaina ai i tatou, ona o le fesoasoani atu i isi ina ia maua aogā mai i aʻoaʻoga a le Atua?
[Fesili mo le Suʻesuʻega]
[Ata i le itulau 23]
O i latou ua aʻoaʻoina e Ieova, ua faia aʻe ai se ʻauuso moni faavaomalo
[Ata i le itulau 24]
Pe e lē o se faamanuiaga ea le avea o se tasi o le “ʻaufaigaluega faatasi ma le Atua”?