Ia Faapelepele i Ou Uso ma Tuafāfine Logonoa!

O TAGATA o le Atua, o se aiga telē o uso ma tuafāfine faaleagaga, na amata mai lava i tane ma fafine i aso anamua. E aofia ai iā i latou na ia Samuelu, Tavita, Samasoni, Raava, Mose, Aperaamo, Sara, Noa, ma Apelu. E toʻatele tagata logonoa o loo iai i auauna faamaoni a Ieova. O se faaaʻoaʻoga, o tagata muamua e toʻalua na avea ma Molimau a Ieova i Mongolia, o se ulugalii logonoa. Ma o le iʻuga o le faamaoni o o tatou uso talitonu logonoa i Rusia, ua tatou manumalo ai i le faamasinoga, i le Faamasinoga o Aiā Tatau i Europa.

I aso nei, ua saunia e “le pologa faamaoni ma le faautauta” lomiga i le gagana logonoa, ma ua faatulaga foʻi faapotopotoga faapea ma fonotaga ma tauaofiaga, i le gagana a tagata logonoa. (Mata. 24:45) Ua aogā tele lea i tagata logonoa. * Ae pe na e taumānatu, pe faapeʻī le tulaga o tagata logonoa e taumafai e aʻoaʻo e faatatau i le Atua moni, ma agaʻigaʻi i luma e aunoa ma nei sauniuniga? Po o e manatu i se mea e te ono fai e fesoasoani ai i tagata logonoa o loo i lou vaipanoa?

A o Leʻi Mauaina Fesoasoani Faaonapōnei

E faapefea pe afai e te fesili atu i nisi o tagata matutua logonoa, pe na faapefea ona latou iloa le Atua? E latou te ono taʻu mai o latou lagona ina ua latou uluaʻi aʻoaʻoina e iai se suafa o le Atua—le auala na suia ai e lenā mea moni o latou olaga, ma faatumauina ai i latou a o leʻi oo mai polokalame o vitiō i le gagana e faaaogā ai taga, po o DVD e fesoasoani e aʻoaʻoina ai upu moni loloto o le Tusi Paia. E latou te ono faamatala mai le tulaga na iai le taimi a o leʻi faia sauniga faa-Kerisiano, pe faaliliuina i le gagana e faaaogā ai taga. I lo lenā, e nofo se tasi i autafa ma tusi faamatalaga i se fasi pepa e fesoasoani iā i latou e malamalama ai i mea o loo talanoaina. O le auala lenā na aʻoaʻoina ai e se uso logonoa upu moni o le Tusi Paia mo le fitu tausaga, a o leʻi faaliliuina sauniga i le gagana e faaaogā ai taga.

E manatua e Molimau matutua logonoa le tulaga na iai, i le taimi na talaʻi ai ma isi o le faapotopotoga i tagata e lelei le “faalogo.” O le tasi lima e uu ai se fasi pepa malo, o loo tusia ai se taulimaga faigofie mo le talaʻiga mai lea fale i lea fale. E uu e le isi lima le Olomatamata ma le Ala Mai! E faigatā tele ona taumafai e fai se suʻesuʻega faale-Tusi Paia ma se isi tagata logonoa, e faaaogā ai lomiga na iai lea e leai se isi o i laʻua e malamalama ai. E manatua e tagata talaʻi logonoa matutua le fiu i le lē malamalama mai o tagata iā i latou, ma lē mafai ai ona talanoa atili i upu moni o le Tusi Paia. E latou te iloa foʻi faalogona i le iai o se alofa loloto mo Ieova, ae e lē mafai ona gaoioi ma le mautinoa. Aiseā? Ona e latou te lē mautinoa pe saʻo lo latou malamalamaga i se mataupu patino.

E ui i nei toʻatugā, ae o loo tumau pea ma le faamaoni o tatou uso ma tuafāfine logonoa. (Iopu 2:3) O loo latou matuā faamoemoe atu pea iā Ieova. (Sala. 37:7) Ma ua faamanuiaina nei i latou e Ieova e sili atu, i lo mea na faatalitalia e le toʻatele o i latou.

Seʻi manatu i taumafaiga na faia e se uso logonoa e iai se avā ma se fanau. A o leʻi maua vitiō i le gagana e faaaogā ai taga, sa ia taulamua ma le faamaoni i le faia o le suʻesuʻega faale-Tusi Paia a lona aiga. Na taʻu mai e lona atalii e faapea: “Sa faigatā tele i loʻu tamā  ona fai le suʻesuʻega a lo matou aiga, ona e pau lava mea e mafai ona ia aʻoaʻo mai o mea o loo i lomiga. E masani ona ia lē malamalama atoatoa i mea o loo i le lomiga. E leai foʻi se fesoasoani e maua mai iā i matou le fanau. E vave tele ona matou taʻu atu pe a lē saʻo ona ia faamalamalamaina ni mea. E ui lava i nei mea uma, ae e na te faia pea lava le suʻesuʻega a le aiga. E lagona e ia o lo matou iloaina o se mea e faatatau iā Ieova, sa sili atu ona tāua nai lo o lona mā lea e seāseā tupu ona o le papaʻu o lona malamalama i le faa-Peretania.”

O loo iai foʻi se faataʻitaʻiga iā Richard, o se uso ua silia i le 70 ona tausaga, e logonoa toe tauaso ma e nofo i Brooklyn, Niu Ioka, i Amerika. E iloa Richard i lona auai e lē aunoa i sauniga faa-Kerisiano. E na te faaaogā se nofoaafi e alu ai, e na te faitauina mea e tū ai le nofoaafi ina ia ona iloa le mea e oso ese ai. O se tasi taimi o le taumālūlū, sa iai se timu aisa tele lea na lē oo ai le sauniga. Sa logo tagata uma i le faapotopotoga, ae na iai se faalētonu na tupu ua lē iloa ai e Richard. Ina ua iloa e uso le mea ua tupu, na latou saʻilia o ia ma maua atu o loo tūtū i fafo o le Maota mo Sauniga e faatali le taimi e tatala ai. Ina ua fesili atu pe aiseā na alu ai i le malosi o matagi ma le timu aisa, na ia tali mai, “Ou te alofa iā Ieova.”

O le ā E te Fai?

Po o nonofo ni tagata logonoa i lou vaipanoa? Pe mafai ona aʻo lau gagana e faaaogā ai taga ina ia mafai ona e fesootaʻi ma i latou? O tagata logonoa e masani ona agamalu ma onosaʻi pe a aʻo i isi la latou gagana. E te ono teʻi ua e feiloaʻi atu i se tagata logonoa i lau faiva. O le ā lau mea e fai? Taumafai e fesootaʻi ma i latou. Faaaogā taga, tusi i lalo faamatalaga, tusi i lalo ni mea, ata, po o mea uma na. E tusa lava pe faapea mai le tagata e lē fiafia i le upu moni, taʻu atu i se Molimau e logonoa po o se isi e iloa le gagana logonoa lau asiasiga na fai. Atonu e sili atu ona taliaina e tagata logonoa le feʻau, pe a avatu i le gagana e faaaogā ai taga.

Atonu o loo e aʻoaʻoina le gagana e faaaogā ai taga ma o loo e auai i se faapotopotoga a tagata logonoa. E faapefea ona e maua le tomai atili i le pese ma malamalama i le gagana? E ui atonu e iai nisi tagata talaʻi e lelei le faalogo i lau faapotopotoga, ae aiseā e te lē tautala ai pea i le gagana a tagata logonoa iā i latou? O le a fesoasoani lenei mea iā te oe e mafaufau ai i le gagana e faaaogā ai taga, lea e mafai ona vaaia. E iai taimi atonu e faaosoosoina ai oe e tautala, ona e faigofie atu lenā. Pe a aʻoaʻoina so o se gagana, e tatau ona e onosaʻi i taumafaiga fitā ina ia e lelei i le gagana e faaaogā ai taga.

O le faia o taumafaiga filigā e faaaogā le gagana a tagata logonoa, e faaalia ai lou alofa ma le faaaloalo i o tatou uso ma tuafāfine logonoa. Seʻi faaāta i lou mafaufau lagona lotovaivai o loo oo i tagata logonoa i aso uma, ona o le lē mafai ona malamalama i tagata o loo latou faigaluega pe aʻoʻoga foʻi. Na faapea mai se tasi o uō logonoa: “E fetalanoaaʻi tagata i le mea o loo oʻu iai i aso uma. Ou te lagona ai le tuua toʻatasi ma le faaesea o aʻu, ma ou  te lē fiafia ai ma ou ita. E lē mafai e upu ona faamatala atoatoa oʻu faalogona i nisi taimi.” E tatau ona avea a tatou sauniga ma taimi e sili ona lelei, e maua ai e o tatou uso ma tuafāfine logonoa meaʻai faaleagaga, ma olioli i aufaatasiga ma mafutaga māfana.—Ioa. 13:34, 35.

Ia aua neʻi galo le tele o tamaʻi vaega o tagata logonoa o loo auai faatasi ma faapotopotoga. O loo faaliliuina sauniga mo i latou. Ina ia malamalama atoatoa i mea o loo talanoaina, e nonofo tagata logonoa i le pito i luma o le Maota mo Sauniga. O le auala lenei e mafai ai ona latou vāai i le tagata faaliliu, faapea ma le failauga i le taimi e tasi e aunoa ma le faalavelavea i se mea. Ua faaalia i mea e tutupu e faapea, e vave tele ona masani tagata o le faapotopotoga i lea tulaga, ma e lē o avea ma faalavelave. O nei faatulagaga e faatatau foʻi i fonotaga ma tauaofiaga ia e faaliliuina i le gagana e faaaogā ai taga. O tagata o le faapotopotoga o loo galulue mamafa, ua tatau i ai le faamālō ma le māfana mo le faaliliuina e pei lava ona faailoa atu e le tagata logonoa ia faamatalaga—i se auala e uigā, ma masani ai.

Atonu o loo e auai i se faapotopotoga o loo fesoasoani i se vaega o tagata logonoa, po o ni nai tagata logonoa foʻi o loo faaliliu i ai mataupu o le sauniga. O le ā e fai e faaalia ai, o loo e uaʻi patino atu i nai o tatou uso logonoa? Valaaulia i latou i lou fale. Pe afai e mafai, aʻoaʻo ni nai taga. Aua le matamuli ona o le faigatā ona fesootaʻi. O le a e maua lava le auala e fesootaʻi ai, ma o le faaalia o lenā alofa o le a maua ai ni mea e olioli ai e toe mafaufau i ai. (1 Ioa. 4:8) E tele ni mea e aʻoaʻoina mai i o tatou uso a Molimau. O i latou o ni tagata e lelei tele le talanoa, e tele le malamalama o loo iai, ma e agamālie foʻi. Ua faapea mai se uso e logonoa ona mātua: “E matou te māfuta ma tagata logonoa i loʻu olaga atoa, ma ua ou aʻoaʻoina le tele o mea mai iā i latou e sili atu i mea e mafai ona toe fai atu mo i latou. E mafai foʻi ona tatou aʻoaʻoina le tele o mea mai i o tatou uso ma tuafāfine logonoa.”

E alofa Ieova i ana auauna tapuaʻi faamaoni, e aofia ai i latou e logonoa. O a latou faaaʻoaʻoga o le faatuatua ma le onosaʻi, e mautinoa ua faaopoopo atu i le tamaoaiga o le faalapotopotoga a Ieova. O lea la, seʻi o tatou faapelepele i o tatou uso ma tuafāfine logonoa!

[Faaopoopoga i lalo]

[Ata i le itulau 31]

E sili atu ona fiafia le tagata logonoa i le feʻau o le Malo, pe a avatu i le gagana e faaaogā ai taga

[Ata i le itulau 32]

E tatau ona avea a tatou sauniga ma taimi e sili ona lelei, e maua ai e o tatou uso ma tuafāfine logonoa faalaeiauga faaleagaga