Le Auala ua Faasilisilia ai e Iesu le Amiotonu a le Atua

“Ua tuuina mai . . . e le Atua [Keriso] e fai ma taulaga ina ia tatou lelei ai ma le Atua, i le faatuatua i lona toto. Na faia lenei mea ina ia faaalia ai lana lava amiotonu.”—ROMA 3:25.

1, 2. (a) O le ā le faamatalaga i le Tusi Paia e uiga i le tulaga o le tagata? (e) O ā fesili o le a talanoaina i lenei mataupu?

UA LAUILOA le tala i le Tusi Paia e uiga i le fouvalega i Etena. Ua aafia ai i tatou uma i āuga o le agasala a Atamu e pei ona faamatalaina i upu nei: ‘Ua oo mai le agasala i le lalolagi ona o le tagata e toʻatasi, o le oti foʻi ona o le agasala, ona oo mai ai lea o le oti i tagata uma auā ua agasala uma lava.’ (Roma 5:12) E tusa lava pe e tatou te taumafai e faia le mea saʻo, ae e faia lava mea sesē, ma e manaʻomia ai ona faamagalo i tatou e le Atua. E pei ona taʻua ma le faanoanoa e Paulo: “Ou te lē faia le mea lelei ou te loto i ai, a o le mea leaga ou te lē loto i ai, o le mea lea ou te faia. Auē o aʻu le tagata malaia!”—Roma 7:19, 24.

² O lo tatou tulaga agasala ua lāgā ai fesili tāua nei: Na faapefea ona fanau mai Iesu le Nasareta e leai se agasala, ma aiseā na papatiso ai o ia? Na faapefea ona faasilisilia i le olaga o Iesu le amiotonu a Ieova? Ae e sili ona tāua, o ā mea na faataunuu i le maliu o Keriso?

Ua Luʻia le Amiotonu a le Atua

3. Na faapefea ona faasesē e Satani Eva?

³ Na teena ma le valea e o tatou uluaʻi mātua o Atamu ma Eva le pule silisili ese a le Atua, ae pulea i laʻua e ‘le uluaʻi gata, ua igoa foʻi i le Tiapolo ma Satani.’ (Faaa. 12:9) Seʻi manatu i le auala na tupu ai lenei mea. Na fesiligia e Satani le amiotonu o le pule a Ieova le Atua. Na fesili atu o ia iā Eva: “E moni ea na fetalai mai le Atua, e aua neʻi lua aai mai i fua o laau uma o le faatoʻaga?” Na toe taʻua e Eva le poloaʻiga manino a le Atua e faapea, e tasi le laau e aua neʻi paʻi i ai, ina neʻi feoti. Ona tuuaʻia lea e Satani le Atua e pepelo. Na faapea atu le Tiapolo: “E lua te lē oti lava.” Ona ia faasesē lea o Eva e talitonu, e iai se mea lelei o loo natia e le Atua mai iā i laʻua, ma pe a aai i le fua o le laau, ona avea lea o i laʻua e pei o le Atua, ma faia a laʻua lava faaiʻuga.—Kene. 3:1-5.

4. Na faapefea ona iai tagata i lalo o le pulega faatautavā a Satani?

⁴ E tusa na faapea atu Satani e sili ona fiafia le tagata pe a fai e ia lava ana filifiliga, e aunoa ma le faalagolago i le Atua. Nai lo o le sapasapaia o le tonu o le pule silisili ese a le Atua, na faalogo Atamu i lana avā ma ʻai ai foʻi i le fua faasāina. O lea na melea ai e Atamu lona tulaga lelei atoatoa i luma o Ieova, ma ua tatou pologa ai i le agasala ma le oti. E lē gata i lea, ua pulea ai i tatou e le pulega faatautavā a Satani “le atua o le lalolagi nei.”—2 Kori. 4:4, O le Tusi Paia Samoa—Lomiga 1884; Roma 7:14.

5. (a) Na faapefea ona faamaoni Ieova i lana upu? (e) O le ā le faamoemoe na folasia mai e le Atua i le fanau a Atamu ma Eva?

⁵ Na faamaoni Ieova i lana upu, ma faasala loa Atamu ma Eva i le oti. (Kene. 3:16-19) Ae e lē faapea ua lē taulau le finagalo o le Atua. Na taulau! Auā ina ua faasalaina Atamu ma Eva, na folasia mai e Ieova se faamoemoe matagofie mo a la fanau i le lumanaʻi. Na ia faia faapea  i le faailoa atu o lona finagalo, o le a iai se “fanau” o le a tuʻimomomoina lona mulivae e Satani. Ae peitaʻi, o le a toe malosi lenā Fanau folafolaina mai i le manuʻa o lona mulivae, ma o le a ia ‘tuʻimomomoina le ulu o Satani.’ (Kene. 3:15) Ua faalautele e le Tusi Paia lenei manatu i le faapea mai e uiga iā Iesu Keriso: “O le mea lea ua faaali mai ai le Alo o le Atua, ina ia faalēaogāina ai galuega a le Tiapolo.” (1 Ioa. 3:8) Ae na faapefea ona faasilisilia le amiotonu a le Atua i le amio a Iesu ma lona maliu?

Le Uiga o le Papatisoga o Iesu

6. E faapefea ona tatou iloa e leʻi aafia Iesu i le agasala tuufaasolo mai iā Atamu?

⁶ Ina ua tagata matua, sa tutusa lelei Iesu ma Atamu a o lelei atoatoa. (Roma 5:14; 1 Kori. 15:45) O lona uiga sa tatau ona fanau mai Iesu e lelei atoatoa. Na faapefea ona faia lenā mea? Na faamatala atu e le agelu o Kaperielu lenei mea iā Maria le tinā o Iesu: “E iā te oe le agaga paia, ma e faamalumalu ifo iā te oe le mana o le Silisili Ese. O le mea lea e taʻua ai lē o le a fanau mai, e paia ma o le Alo o le Atua.” (Luka 1:35) A o laʻitiiti Iesu, e foliga mai na faailoa atu e Maria iā te ia nisi o vala e uiga i lona fanau mai. O lea, ina ua maua Iesu e Maria ma Iosefa lona tamāfai i le malumalu o le Atua, na fesili atu le tamaitiiti: “Pe lua te lē iloa ea e tatau ona ou iai i le fale o loʻu Tamā?” (Luka 2:49) E manino mai, a o laʻitiiti Iesu, sa iloa e ia o ia o le Alo o le Atua. O lea la, sa tāua tele iā te ia le faasilisilia o le amiotonu a le Atua.

7. O ā mea tāua sa iai iā Iesu?

⁷ Na faaalia e Iesu lona naunau i mea faaleagaga, i le auai e lē aunoa i sauniga o le tapuaʻiga. Talu ai e lelei atoatoa lona mafaufau, e mautinoa la na ia ave i fale mea uma na faalogo ma faitau i ai i Tusitusiga Eperu. (Luka 4:16) Na iai foʻi iā te ia se isi mea tāua, o se tino tagata lelei atoatoa e mafai ona faia ai le taulaga mo tagata. Ina ua papatisoina Iesu, na tatalo o ia ma atonu na mafaufau i upu faavaloaga o loo i le Salamo 40:6-8.—Luka 3:21; faitau le Eperu 10:5-10. *

8. Aiseā na taumafai ai Ioane le Papatiso e taofia Iesu mai i le papatisoina?

⁸ I le taimi muamua, na taumafai Ioane le Papatiso e taofia Iesu mai i le papatisoina. Aiseā? Auā na papatiso e Ioane tagata Iutaia e faailoga ai lo latou salamō mai i le solia o le Tulafono. E lē taumatea sa  iloa e Ioane e amiotonu Iesu ma e lē manaʻomia ona salamō, auā na aiga laʻua. Ae na faamautinoa atu e Iesu iā Ioane, e tatau ona papatisoina o Ia. Na faamatala atu e Ia: “E faapea ona tatau iā i tatou ona faataunuuina o mea tonu uma.”—Mata. 3:15.

9. O le ā na faailogaina i le papatisoga o Iesu?

⁹ Ona o se tagata lelei atoatoa e pei o Atamu, atonu la sa silafia e Iesu e mafai ona ia maua se fanau lelei atoatoa. Peitaʻi, e lē o le lumanaʻi lenā na manaʻo i ai Iesu, ona e lē o le finagalo lenā o Ieova mo ia. Na auina mai e le Atua Iesu i le lalolagi e faataunuu le matafaioi o le Fanau folafolaina, po o le Mesia. E aofia ai le faataulagaina e Iesu o lona soifua lelei atoatoa faaletagata. (Faitau le Isaia 53:5, 6, 12.) O lea la, e lē tutusa le uiga o le papatisoga o Iesu ma lo tatou papatisoga. E leʻi manaʻomia ona tuuina atu lona ola iā Ieova, auā o Iesu o se tasi o le nuu o Isaraelu ua uma ona tuuina atu i le Atua. Ae o le papatisoga o Iesu na faailoga ai lona ofoina atu o ia lava e fai le finagalo o le Atua, e pei ona valoia i le Tusi Paia e uiga i le Mesia.

10. I le avea ma Mesia, o le ā na aofia ai i le faia o le finagalo o le Atua, ma o ā lagona o Iesu i lenei mea?

¹⁰ E aofia i le finagalo o Ieova mo Iesu, le talaʻia o le tala lelei o le Malo o le Atua, le faia o isi ma soo, ma le sauniunia o i latou mo lea galuega i le lumanaʻi. E aofia foʻi i le ofoina atu e Iesu o ia lava, lona lotomalie e onosaia sauāga ma le maliu tigā, ina ia lagolagoina ai le pule silisili ese amiotonu a Ieova. Sa matuā fiafia Iesu e fai le finagalo o le Atua, ma ofo atu lona tino e fai ai le taulaga ona o le alofa moni i lona Tamā i le lagi. (Ioa. 14:31) Sa olioli foʻi o ia ona ua mafai ona tuu atu i le Atua le tāua o lona ola lelei atoatoa e fai ma togiola, e toe faatau mai ai i tatou mai i le nofo pologa i le agasala ma le oti. Pe na finagalo malie le Atua ina ua ofo atu e Iesu o ia lava e faatino nei tiute tauave faigatā? Ioe!

11. Na faapefea ona faaalia e Ieova lona finagalo malie iā Iesu o le Mesia folafolaina, po o le Keriso?

¹¹ E molimau tusitala uma e toʻafā o Evagelia i le faaalia manino mai e Ieova le Atua, o lona fiafia ina ua alu aʻe Iesu mai i le vai o Ioritana. Na molimau Ioane le Papatiso: “Na ou iloa atu le agaga ua alu ifo mai i le lagi e pei o se lupe, ma tumau i luga o [Iesu] . . . Ua ou vaai i ai, ma ou te molimau atu o ia lenei o le Alo o le Atua.” (Ioa. 1:32-34) Na fetalai mai foʻi Ieova i lenā taimi: “O loʻu Atalii pele lenā, o lē ua malie i ai loʻu loto.”—Mata. 3:17; Mare. 1:11; Luka 3:22.

Faamaoni e Oo i le Oti

12. O le ā na faia e Iesu i le tolu ma le ʻafa tausaga ina ua uma lona papatisoga?

¹² I le tolu ma le ʻafa tausaga na sosoo ai, na uaʻi atoatoa atu Iesu i le aʻoaʻoina o tagata e uiga i lona Tamā ma le tonu o le pule silisili ese a le Atua. Na vaivai o ia a o femaliuaʻi i le Nuu Folafolaina, ae e leʻi taofia ai lona molimau māeʻaeʻa i le upu moni. (Ioa. 4:6, 34; 18:37) Na aʻoaʻo e Iesu isi e uiga i le Malo o le Atua. E ala i le faamālōlōina faavavega o ē mamaʻi, fafaga motu o tagata na fia aai ma faatutūina ē na maliliu, na ia faataʻitaʻia ai mea o le a faia e le Malo mo tagata.—Mata. 11:4, 5.

13. O le na aʻoaʻo e Iesu e faatatau i le tatalo?

¹³ E leʻi viiviia e Iesu o ia lava i ana aʻoaʻoga ma faamālōlōga, ae na ia faia se faataʻitaʻiga mataʻina o le lotomaulalo e ala i le avatu o le viiga uma iā Ieova. (Ioa. 5:19; 11:41-44) Na faailoa mai foʻi e Iesu mea e sili ona tāua e ao ona tatou tatalo atu ai. E tatau ona aofia i a tatou tatalo le “faapaiaina” o le suafa o  le Atua, o Ieova, ma ia aveesea e le pulega amiotonu a le Atua le pulega amioleaga a Satani, ona faia ai lea o Lona “finagalo i le lalolagi, e pei ona faia i le lagi.” (Mata. 6:9, 10) Na uunaʻia foʻi e Iesu i tatou e gaoioi e tusa ai ma na tatalo, e ala i le ‘saʻili muamua o le malo ma le amiotonu a le Atua.’—Mata. 6:33.

14. E ui ina lelei atoatoa Iesu, ae aiseā na lē faigofie ai ona ia faataunuu lana matafaioi e tusa ma le finagalo o le Atua?

¹⁴ A o lata le taimi e maliu faataulaga ai o ia, na atili ai ona iloa lelei e Iesu le matafaioi faigatā o loo ia tauaveina. Na faalagolago le faataunuuina o le finagalo o lona Tamā ma lona taʻuleleia, i le onosaia e Iesu o se faamasinoga lē tonu ma lona maliu tigā. I le toe lima aso maliu Iesu, na tatalo o ia: “O lenei, ua popole tele loʻu loto, ma o le ā saʻu upu e fai atu? Loʻu Tamā e, ia e faaola mai iā te aʻu i lenei itula. Ae ui i lea, o le mea lava lenei ua ou oo mai ai i lenei itula.” Ina ua uma ona faailoa atu nei lagona masani, ona uaʻi atu loa lea o Iesu i le mataupu e sili ona tāua ma tatalo atu: “Loʻu Tamā e, ia faamamaluina lou suafa.” Na tali vave mai Ieova: “Ua ou faamamaluina loʻu igoa, ma ou toe faamamaluina.” (Ioa. 12:27, 28) Ioe, na lotomalie Iesu e fesagaʻia le tofotofoga sili o le faamaoni e leʻi oo muamua i se tagata. Ae o le faalogo atu i na fetalaiga a lona Tamā o i le lagi, na matuā mautinoa ai e Iesu o le a taulau o ia i le faasilisilia ma le faamaonia o le tonu o le pule silisili ese a Ieova. Ioe, na taulau o ia!

Mea na Faataunuuina i le Maliu o Iesu

15. A o leʻi maliu Iesu, aiseā na faapea atu ai o ia: “Ua taunuu”?

¹⁵ A o tautau Iesu i luga o le laau e faapuapuagatia ai ma ua lata ina tō lana mānava, na faapea atu o ia: “Ua taunuu!” (Ioa. 19:30) E ala i le fesoasoani a le Atua, maʻeu le tele o mea na mafai ona faataunuu e Iesu i le tolu ma le ʻafa tausaga, mai i lona papatisoga seʻia oo i lona maliu! Ina ua maliu Iesu, na lūlū se mafuiʻe tele ma na faapea mai ai le taʻitaʻiʻau Roma na vaaia lona faasalaga: “E moni, o le Alo lava lenei o le Atua.” (Mata. 27:54) Atonu na vaai le taʻitaʻiʻau o tauemu tagata iā Iesu i lona faapea mai o ia o le Alo o le Atua. E ui i puapuaga uma na oo iā te ia, ae na tumau le faamaoni o Iesu ma faamaonia le pepelo tele o Satani. Na taʻua e Satani e faatatau i ē uma e lagolagoina le pule silisili ese a le Atua: “O mea uma foʻi ua iai i le tagata e avatu e ia e sui ai lona ola.” (Iopu 2:4) O le faamaoni o Iesu, na faaalia ai, sa ono mafai e Atamu ma Eva ona faamaoni i le tofotofoga faigofie na feagai ma i laʻua. Ae sili ai ona tāua, o le soifuaga ma le maliu o Iesu na lagolagoina ma faasilisilia ai le tonu o le pule silisili ese a Ieova. (Faitau le Faataoto 27:11.) Pe e iai nisi mea na faataunuuina i le maliu o Iesu? Ioe e iai!

16, 17. (a) Aiseā na mafai ai ona maua e molimau anamua se tulaga amiotonu i luma o Ieova? (e) Na faapefea ona tauia e Ieova le faamaoni o lona Alo, ma o le ā o loo faaauau ona fai e Iesu Keriso?

¹⁶ Na soifua le toʻatele o auauna a Ieova a o leʻi afio mai Iesu i le lalolagi. Na latou maua se tulaga amiotonu i luma o le Atua ma le faamoemoe o le toetū. (Isa. 25:8; Tani. 12:13) Ae o le ā le faavae e tusa ma le tulafono a Ieova le Atua paia, ua mafai ai ona faamanuia e Ia tagata agasala i lea auala mataʻina? Ua taʻua i le Tusi Paia: “Ua tuuina mai . . . e le Atua [Iesu Keriso] e fai ma taulaga ina ia tatou lelei ai ma le Atua, i le faatuatua i lona toto. Na faia lenei mea ina ia faaalia ai lana lava amiotonu, auā na ia faamagaloina agasala ua mavae, a o  faapalepale mai pea le Atua; ina ia faaalia ai lana lava amiotonu i le taimi nei, ma iloa ai lona amiotonu a o ia taʻuamiotonuina le tagata e faatuatua iā Iesu.”—Roma 3:25, 26. *

¹⁷ Na tauia e Ieova Iesu i le toe faatūina o ia i se tulaga e sili atu i lo o lea na iai a o leʻi afio mai i le lalolagi. Ua maua nei e Iesu le ola e lē mafai ona oti o se foafoaga agaga faamamaluina. (Epe. 1:3) I le avea ma Ositaulaga Sili ma Tupu, o loo faaauau ona fesoasoani le Alii o Iesu Keriso i ona soo e faasilisilia le amiotonu a le Atua. Maʻeu lo tatou lotofaafetai iā Ieova lo tatou Tamā o i le lagi, o Lē e tauia tagata uma e faia faapea ma auauna faamaoni iā te ia e ala i le faaaʻoaʻo i lona Alo!—Faitau le Salamo 34:3; Eperu 11:6.

18. O le ā le autū o le mataupu o loo sosoo mai?

¹⁸ O tagata faatuatua uma mai lava iā Apelu, sa iai sa latou faiā māfana ma Ieova ona o le faatuatua ma le mautinoa i le Fanau folafolaina. Na silafia e Ieova o le a faamaoni atoatoa lona Alo, ma o lona maliu o le a ufiufi atoatoa ai “le agasala a le lalolagi.” (Ioa. 1:29) Ua maua foʻi e tagata i aso nei aogā mai i le maliu o Iesu. (Roma 3:26) O ā la faamanuiaga e mafai ona e maua ona o le togiola a Keriso? O le autū lenā o le mataupu o loo sosoo mai.

[Faaopoopoga i lalo]

O le ā Lau Tali?

• Na faapefea ona luʻia le amiotonu a le Atua?

• O le ā na faailogaina i le papatisoga o Iesu?

• O ā mea na faataunuuina ona o le maliu o Iesu?

[Fesili mo le Suʻesuʻega]

[Ata i le itulau 9]

Pe e te iloa o le ā na faailogaina i le papatisoga o Iesu?