Po o E Iloa Atu Faamaoniga o le Taʻitaʻiga a le Atua?

E LEʻI vaaia muamua se mea faapea e tagata Isaraelu ma tagata Aikupito. Ina ua ō ese tagata Isaraelu mai Aikupito, sa iai pea le ao faaniutū i aso uma, ma sa avea ma afi faaniutū i le pō. Maʻeu se mea faagaeeloto! Ae o fea sa puna mai ai? O le ā lona fuafuaga? Ma e ui ua mavae le 3,500 tausaga, ae o le ā e tatou te aʻoaʻoina mai le auala sa manatu ai Isaraelu i “le afi ma le ao faaniutū”?​—Eso. 14:24.

Ua faamatala mai i le Afioga a le Atua le puna, ma le fuafuaga o le ao: “Ua muamua atu Ieova i o latou luma i le ao ina ia taʻitaʻia ai i latou i le ala i le ao faaniutū, ma le afi faaniutū i le pō ina ia faamalamalama ai i latou, a o malaga i le ao ma le pō.” (Eso. 13:21, 22) Sa faaaogā e Ieova le ao ma le afi faaniutū, e taʻitaʻia ai lona nuu mai Aikupito ma le toafa. Sa manaʻomia ona latou nofosauni e mulimuli atu i ai. Ina ua toetoe a osofaʻi e ʻautau a Aikupito tagata o le Atua, na oo le ao i lo latou va, ma puipuia ai tagata Isaraelu. (Eso. 14:19, 20) E ui sa mamao le auala sa taʻitaʻia ai i latou e le ao, ae pau lea o le auala e latou te taunuu ai i le Nuu o le Folafolaga.

O le iai o le ao, sa faamautinoa ai i tagata o le Atua, le faatasi ai o Ieova. Sa iai taimi na fetalai mai ai Ieova e ala i le ao faaniutū. (Nu. 14:14; Sala. 99:7) Sa faailoa mai foʻi e le ao le tofia e Ieova o Mose e taʻitaʻia le nuu. (Eso. 33:9) O le taimi mulimuli na taʻua ai le ao faaniutū i le Tusi Paia, o le taimi na tofia ai e Ieova Iosua e sui ai Mose. (Teu. 31:14, 15) E mautinoa lava, na faalagolago le taulau manuia o le faigāmalaga a le nuu o Isaraelu, i lo latou iloaina o faamaoniga o le taʻitaʻiga a le Atua ma mulimuli ai.

Ua Latou Lē Amanaʻia Faamaoniga

Sa matuā maofa le nuu o Isaraelu, ina ua faatoʻā vaaia le ao faaniutū. Ae pagā lea, e leʻi tumau lo latou faatuatuaina o Ieova, e ui sa vaaia lenei vavega i aso taʻitasi. E tele taimi na latou fesiligia ai le taʻitaʻiga a le Atua. Ina ua tuliloaina e ʻautau a Aikupito, e latou te leʻi faaalia le faatuatua i le mana faasaoola o Ieova. Nai lo lea, na latou tuuaʻia Mose i le taʻitaʻia o i latou e feoti i le toafa. (Eso. 14:10-12) Ina ua faasaoina i latou mai le Sami Ulaula, na latou muimuiina Mose, Arona, ma Ieova ona ua latou faapea ua lē lava meaʻai ma vai. (Eso. 15:22-24; 16:1-3; 17:1-3, 7) Mulimuli ane, sa latou tauanau Arona e fai se povi auro. Seʻi manatu foʻi! I le isi itu o le togālauapi, sa vaaia e le nuu o Isaraelu le ao ma le afi faaniutū​—o se faamaoniga mamalu o Lē na faasaoina i latou mai Aikupito—​ae e lē mamao mai i inā, ua latou tapuaʻi ai i se atua e leai se ola, ma faapea atu: “Isaraelu e, o lo outou atua lenei, o lē na taʻitaʻia outou mai i Aikupito.” Pagā se “gaoioiga e matuā lē faaaloalo”!​—Eso. 32:4; Nee. 9:18.

O nei gaoioiga fouvale a Isaraelu, ua iloa ai lo latou matuā lē amanaʻia o le taʻitaʻiga a Ieova. E leʻi lava lo latou malamalamaga i mea faaleagaga. Sa latou vaaia le ao ma le afi faaniutū, ae ua galo iā i latou le uiga o  lea mea. E ui ʻna latou faatigā i Lē e Paia o Isaraelu,’ ae sa faaauau ona taʻitaʻia i latou ma le alofa e Ieova, e ala i le ao faaniutū seʻia taunuu i le Nuu o le Folafolaga.​—Sala. 78:40-42, 52-54; Nee. 9:19.

Iloa Atu Faamaoniga o le Taʻitaʻiga a le Atua i Aso Nei

I aso nei, e lē tuua e Ieova ona tagata e aunoa ma se taʻitaʻiga manino. E pei ona lē finagalo Ieova e saʻilia e le nuu o Isaraelu lo latou lava auala, ua faapena foʻi ona lē finagalo o Ia, e suʻe e i tatou lava le ala i le lalolagi fou ua folafolaina mai. Ua tofia Iesu Keriso o le Taʻitaʻi o le faapotopotoga. (Mata. 23:10; Efe. 5:23) Ua ia tuu atu le pule i le vasega o le pologa faamaoni, lea ua faia aʻe i Kerisiano faamaoni ua faauuina i le agaga paia. Ona tofia lea e lenā vasega ia ovasia i totonu o faapotopotoga Kerisiano.—Mata. 24:45-47; Tito 1:5-9.

E faapefea ona tatou iloa lenei vasega o le pologa faamaoni, po o le auauna pule? Mātau le auala ua faailoa mai ai e Iesu: “O ai foʻi le auauna pule e faamaoni ma faautauta, ua tofia e lona matai e vaavaaia lana ʻautautua, ma avatu a latou meaʻai e talafeagai i le taimi tatau? E fiafia lenā pologa pe a taunuu mai lona matai, ma maua mai o loo ia faia faapea!”​—Luka 12:42, 43.

O lea, e “faamaoni” le vasega o le auauna pule, ma e lē taitai ona ia ʻolegia pe lafoaʻia Ieova, Iesu, upu moni faale-Tusi Paia, po o tagata o le Atua. O le “faautauta” ua faaalia ai e le vasega o le auauna pule le utaga mamao, i le taʻitaʻiina o le galuega tāua o le talaʻia o le “tala lelei o le malo,” ma le ʻfaia o tagata o nuu uma lava ma soo.’ (Mata. 24:14; 28:19, 20) E faasoasoa atu e le vasega o le auauna pule meaʻai lelei faaleagaga “i le taimi tatau.” Ua iloatino le finagalo malie o Ieova ona o faamanuiaga e pei o le faatuputeleina o ona tagata, o taʻiala i le faia o faaiʻuga tāua, le faaleleia o le malamalamaga i upu moni o le Tusi Paia, le puipuiga mai le tafiesea atoatoa o ona tagata mai o latou fili, ma le toʻafilemu o le loto ma le mafaufau.​—Isa. 54:17; Fili. 4:7.

Tali Atu i le Taʻitaʻiga a le Atua

E faapefea ona faaalia lo tatou talisapaia o le taʻitaʻiga a le Atua? Ua faapea mai le aposetolo o Paulo: “Ia usiusitaʻi i ē o taʻimua iā te outou ma ia gauaʻi iā i latou.” (Epe. 13:17) E lē faigofie le faia faapea i taimi uma. O se faataʻitaʻiga: Seʻi faapea o oe o se tagata Isaraelu i aso o Mose. Ua fai si leva ona tou savavali, ma ua tū le ao faaniutū. O le ā le umi o le a tū ai? Se aso? Se vaiaso po o ni nai masina? Atonu e te faapea, ʻPo o manaʻomia ona āu ese aʻu mea uma?’ Atonu e te āu ese mai na o ni nai mea, ma ua oo lava ina aveese mea uma mai lau ato, ona ua e fiu e tau suʻe se mea. A o toetoe lava uma ona aveese au mea, ae ua e vaai atu loa o le a agaʻi ese le ao faaniutū​—ona toe tapena foʻi lea o au mea! E faalavelave soo ma e lē faigofie lenā tulaga. Ae ui i lea, sa tatau i le nuu o Isaraelu ona latou “malaga ese loa.”​—Nu. 9:17-22.

E faapefea la ona tatou tali atu i le taʻitaʻiga mai le Atua? Po o tatou faatatauina “loa”? Pe e faaauau pea ona faia mea i le auala ua tatou masani ai? Po o tatou faamasani i faatonuga o loo iai i le taimi nei, e pei o le auala e faia ai suʻesuʻega faale-Tusi Paia, le talaʻi i tagata e tautatala i se isi gagana, le faia pea o le tapuaʻiga a le aiga, le felagolagomaʻi ma le Komiti o Mataupu Tau Falemaʻi, ma le auala e ao ona amioaʻi i tauaofiaga? E faaalia foʻi lo tatou faatāuaina o le taʻitaʻiga a le Atua e ala i le taliaina o fautuaga. Pe a fai ni faaiʻuga tāua, e tatou te lē faalagolago i lo tatou lava poto, ae tatou te saʻili i le taʻitaʻiga mai iā Ieova ma lana faalapotopotoga. E pei ona sulu atu se  tamaitiiti i mātua pe a pāpā faititili, e faapena foʻi ona tatou sulu atu i le faalapotopotoga a Ieova pe a lutia i faafitauli.

E moni, e iai masei o i latou o loo taʻimua i le vaega faalelalolagi o le faalapotopotoga a le Atua, e pei foʻi o Mose. E ui i lea, sa faamaonia le finagalo malie o le Atua ma lona tofia o Mose, e ala i le iai pea o le ao faaniutū. Mātau mai foʻi, e lē pule le tagata Isaraelu i le taimi e amata ona malaga ai. Nai lo lea, sa gaoioi tagata i le “faatonuga a Ieova e ala iā Mose.” (Nu. 9:23) O lea, e foliga mai sa avatu e Mose le faatonuga i le taimi e malaga ai, auā o ia lea sa auala mai ai faatonuga a le Atua.

I aso nei, o loo avatu e le vasega o le auauna pule se faatonuga manino pe a oo i le taimi ua tatau ona tatou gaoioi ai. E faapefea? E ala i mataupu i Le Olomatamata ma La Tatou Faiva o le Malo, lomiga fou, ma lauga i fonotaga ma tauaofiaga. E faaoo atu foʻi faatonuga i faapotopotoga e ala i ovasia femalagaaʻi, po o tusi ma aʻoga mo uso o loo tauaveina tiute i faapotopotoga.

Po o manino iā te oe faamaoniga o le taʻitaʻiga a le Atua? Ua faaaogāina e Ieova lana faalapotopotoga e taʻitaʻia ai i tatou, i nei aso e gata ai o lenei lalolagi amioleaga a Satani. O le iʻuga, e tatou te fiafia ai i le autasi, alofa ma le saogalemu.

Ina ua taunuu tagata Isaraelu i le Nuu o le Folafolaga, sa faapea atu Iosua: “Ua outou iloa lelei ma o outou lotoatoa, ma o outou tagata atoa, e leʻi iʻuvale se upu e tasi i upu lelei uma na fetalai mai ai Ieova lo outou Atua iā te outou. Ua faataunuuina uma iā te outou.” (Iosua 23:14) E mautinoa foʻi o le a taunuu atu tagata o le Atua i aso nei, i le lalolagi fou ua folafolaina mai. Peitaʻi, e faalagolago lo tatou iai i inā, i le telē o lo tatou lotomaulalo e talia le taʻitaʻiga a le Atua. O lea, tau ina ia faaauau ona tatou iloa atu faamaoniga o le taʻitaʻiga a Ieova!

[Ata i le itulau 5]

O loo taʻitaʻia i tatou e le faalapotopotoga a Ieova i aso nei

Lomiga ua tatala

Aʻoga Faatiokarate

Toleniga i faatasiga mo le auaunaga