Aiga Kerisiano—ʻIa Nofosauni’

“Ia outou nofosauni . . . auā o le itula tou te lē manatunatu ai, e sau ai le Atalii o le tagata.”​—LUKA 12:40.

1, 2. Aiseā e tatau ai ona tatou amanaʻia le timaʻiga a Iesu ia “mataala”?

O LE a faapefea oe ma lou aiga “pe a taunuu le Atalii o le tagata i lona mamalu,” ma tuueseese “tagata”? (Mata. 25:31, 32) Ona o le a tupu lenei mea i le taimi e lē o mafaufau i ai, e tāua la ona utagia le timaʻiga a Iesu ʻia nofosauni’!​—Luka 12:40.

² Na talanoaina i le mataupu ua mavae atu, e mafai ona fesoasoani tagata taʻitoʻatasi o le aiga, ina ia tumau ona mataala faaleagaga le aiga e ala i le tausia o le tiute tauave a le tagata lava ia. Seʻi o tatou talanoaina isi auala e tatou te saosaolaumea ai i le lelei faaleagaga o o tatou aiga.

Ia “Lelei” Lau Vaai

3, 4. (a) O ā mea e ao ona faaeteete i ai aiga Kerisiano? (e) O le ā le uiga o le “lelei” o la tatou vaai?

³ Ina ia nofosauni i le maliu mai o Keriso, e ao ona faaeteete aiga neʻi ese mea e taulaʻi atu i ai nai lo le tapuaʻiga moni. E manaʻomia ona latou faaeteete i mea e tosina ese ai mai le upu moni. Talu ai ua maileia le tele o aiga i le manaʻo tele i meafaitino, ia mafaufau i le fetalaiga a Iesu i le tāua o le tausia pea  o le “lelei” o la tatou vaai. (Faitau le Mataio 6:22, 23.) E pei lava ona faamalamalama e se molī o tatou ala ma tatou savavali ai e aunoa ma le paʻuʻū, ua faapena foʻi ona faamalamalamaina o tatou ala i mea ua tatou iloa e ala i ʻmata o tatou loto’, ma ola ai e aunoa ma le tautevateva.​—Efe.  1:18.

⁴ Ina ia manino le vaai a ō tatou mata, e ao ona lelei ma taulaʻi atu le vaai i le mea o loo tepa atu i ai. E faapena foʻi mata o le loto. O se mata e lelei faafaatusa, o lona uiga e taulaʻi le vaai i le mea e tasi. Nai lo le taulaʻi atu i se olaga e faaautū i meafaitino, ma alu uma le taimi i le tausia o le aiga, e taulaʻi atu la tatou vaai i mea faaleagaga. (Mata. 6:33) O lona uiga, ia tatou loto malilie i mea ua tatou maua, ma faamuamua le auaunaga i le Atua i o tatou olaga.​—Epe. 13: 5.

5. Na faapefea ona faaalia e se tamaʻitaʻi talavou, le taulaʻi atu o ona “mata” i le auaunaga iā Ieova?

⁵ Maʻeu ni iʻuga lelei e maua, pe a aʻoaʻo le fanau ia lelei le vaai, po o le taulaʻi atu i le mea e tasi! Seʻi manatu i le faataʻitaʻiga a se tamaʻitaʻi talavou mai Aitiope. Sa lelei tele i le aʻoga ma ina ua uma lana aʻoga, sa ofo atu i ai se sikolasipi mo nisi aʻoaʻoga e maualuluga atu. Ae ona na taulaʻi atu lana vaai i le auaunaga iā Ieova, na lē taliaina ai le avanoa sikolasipi. E leʻi umi ae ofo mai i ai se galuega e 4,200 tālā Amerika le totogi i le masina, o se totogi e matuā maualuga pe a faatusatusa atu i totogi masani o lenā atunuu. Ae peitaʻi, na taulaʻi atu “mata” o lenei tamaʻitaʻi i le auaunaga paeonia. E leʻi tau talanoa atu i ona mātua pe talia pe leai lenā galuega. O ā ni lagona o ona mātua ina ua la iloa le mea ua fai e la laʻua tama? Na latou fiafia faatasi ma taʻu atu lo la mitamita i lana faaiʻuga ua fai!

6, 7. O le ā le lamatiaga e ao ona tatou “mataala pea” i ai?

⁶ O fetalaiga a Iesu o loo i le Mataio 6:22, 23, ua iai ni faaupuga lapataʻi e faatatau i le matapeʻapeʻa. O loo faaaogā i le Tusi Paia faaupuga “lelei lau vaai” ma le “leaga lau vaai.” Pe a leaga le vaai, o lona uiga ua matapeʻapeʻa pe manaʻo tele lea tagata. (Mata. 6:23) O ā lagona o Ieova i le manaʻo tele po o le matapeʻapeʻa? Ua taʻua i le Tusi Paia: “O le faitaaga, ma amioga lē mamā uma, po o le matapeʻapeʻa, aua lava neʻi taʻua iā te outou.”​—Efe. 5:3.

⁷ E ui e faigofie ona iloa atu le matapeʻapeʻa o isi, ae e faigatā ona tatou iloa lo tatou foʻi matapeʻapeʻa. O lea, o se gaoioiga poto le utagiaina o le fautuaga a Iesu: “Ia outou mataala pea ma leoleo iā te outou i le manaʻo tele.” (Luka 12:15) E ao la ona iloilo totoʻa i tatou lava, ina ia iloa po o fea o taulaʻi i ai o tatou loto. E tatau ona mafaufau lelei aiga Kerisiano i le taimi ma tupe o loo faaalu i faafiafiaga, i tafaoga, ma le mauaina o meafaitino.

8. Pe a faia ni faatauga, e faapefea ona tatou “mataala pea”?

⁸ E iai isi mea e ao ona mafaufau muamua i ai, nai lo le manaʻo i se mea ma faatau loa. Ia mafaufau muamua: ʻPo o le a maua se taimi e faaaogā ai lenei mea ma tausia lelei? O le ā le umi ona ou faatoʻā iloa lea faaaogā lelei?’ Outou talavou, aua le seetia gofie i faasalalauga o oloa, ma tagisā ina ia maua lavalava taugatā ma isi lava mea. Ia taofiofi lou manaʻo. Ia mafaufau foʻi i le auala o le a aafia ai le sauniuni atu o lou aiga i le maliu mai o le Atalii o le tagata, ona o le faatauina o lea mea. Ia faatuatua i le folafolaga a Ieova: “Ou te lē tuua lava oe, ma ou te lē tuulafoaʻia lava oe.”​—Epe. 13:5.

Ia Ausia Sini Faaleagaga

9. O le ā le aogā o le taumafai o se aiga e ausia sini faaleagaga?

⁹ O se isi auala e faamalosia ai le faatuatua o tagata o le aiga ma saosaolaumea mo lo  latou lelei faaleagaga, o le faatulaga lea o sini faaleagaga ma taumafai e ausia. O le faia faapea, e fesoasoani e iloa ai e le aiga lo latou lava agaʻigaʻi i luma i le faafiafiaina o Ieova, ma mafai ai ona latou iloa po o ā mea e ao ona faatāua.​—Faitau le Filipi 1:10.

10, 11. O ā ni sini faaleagaga o loo tuliloaina e lou aiga, ma o ā ni sini o loo e manaʻo e faatulaga mo le lumanaʻi?

¹⁰ E aogā tele mo tagata uma o le aiga le faatulaga o sini e mafai ona ausia i aso taʻitasi. O se faataʻitaʻiga, o le sini o le talanoaina o le mau i aso taʻitasi. O tali a tagata taʻitoʻatasi o le aiga, e mafai ai ona iloa e le ulu o le aiga lo latou tulaga faaleagaga. O le sini o le faitauina pea o le Tusi Paia o se aiga, o se avanoa lelei mo le fanau e faaleleia ai la latou faitau tusi ma lo latou malamalama i le feʻau mai le Tusi Paia. (Sala. 1:1, 2) O se mea tatau foʻi le faatulaga o se sini e faaleleia a tatou tatalo. O le faamalosia o vala eseese o le fua o le agaga, o se isi foʻi sini e lelei ona tuliloaina. (Kala. 5:22, 23) Ae faapefea le sini o le taumafai e faaalia le agaalofa i ē tatou te feiloaʻi i le talaʻiga? O le taumafai ina ia faia faapea o se aiga, e aʻoaʻoina ai e le fanau le alofa, ma atonu e uunaʻia ai i latou e avea ma paeonia sauatoa po o misionare.

¹¹ Aiseā e te lē iloiloina ai ni sini e mafai e oe ma lou aiga ona tuliloaina? Pe e mafai ona faatulaga se sini o lo outou aiga e faatele le taimi i le auaunaga? Pe e mafai ona tou galulue ina ia foʻia le popole e talaʻi atu e ala i le telefoni, i ala tetele, ma nofoaga o pisinisi? Ae ā le galulue i se vaipanoa o loo manaʻomia ai ni tagata talaʻi o le Malo? Pe e mafai e se tagata o le aiga ona aʻoaʻoina se isi  gagana, ina ia talaʻi atu i tagata mai isi atunuu?

12. O le ā e mafai ona faia e ulu o aiga ina ia tuputupu aʻe faaleagaga le aiga?

¹² Ona o oe o le ulu, ia e mataʻituina vala e mafai ona tuputupu aʻe ai faaleagaga lou aiga. Ona e faatulaga lea o sini patino ina ia ausia. O sini tou te faatulaga o se aiga, e ao ona talafeagai ma faigofie ona ausia e tusa ai ma lo outou tulaga ma agavaa. (Faata. 13:12) O le mea moni, e alu se taimi i le taumafai e ausia sini talafeagai. O lea ia faaaogā tatau le taimi mo mea faaleagaga, nai lo le alu uma o le taimi e matamata ai i le TV. (Efe. 5:15, 16) Taumafai malosi e ausia sini ua faatulaga mo lou aiga. (Kala. 6:9) E ʻiloa e tagata uma’ le agaʻigaʻi i luma o se aiga o loo tuliloaina sini faaleagaga.​—1 Timo. 4:15.

Ia Faia Pea le Tapuaʻiga a le Aiga i le Afiafi

13. O le ā le suiga sa faia i le faasologa o sauniga faalevaiaso, ma o ā fesili e ao ona tatou manatunatu i ai?

¹³ O se isi fesoasoani sili ina ia “nofosauni” ai pea aiga mo le maliu mai o le Atalii o le tagata, o le suiga mataʻina lea sa faia i le faasologa o sauniga faalevaiaso, lea na amata iā Ianuari 1, 2009. Ua lē toe manaʻomia ona feiloaʻi faatasi i se isi aso mo le sauniga lea sa taʻua o le Suʻesuʻega Tautusi a le Faapotopotoga, ona ua tuufaatasia lea sauniga ma le Aʻoga o le Faiva Faatiokarate ma le Sauniga o le Auaunaga. Sa faia lenei suiga ina ia maua ai e aiga le avanoa e faaaogā ai se afiafi patino, ina ia tapuaʻi faatasi ai o se aiga ma faamalosia faaleagaga i latou. Ona o lea ua tuanaʻi se taimi talu mai le amataga o lea suiga, e mafai ona fesili ifo iā i tatou lava: ʻPo o oʻu faaaogāina le taimi lea ua faaavanoa mai mo le Tapuaʻiga a le Aiga, po o suʻesuʻega a le tagata lava ia? Po ua ou faaaogā tatau lenei suiga?’

14. (a) O le ā le fuafuaga autū mo le faia pea o le Tapuaʻiga a le Aiga i le afiafi, po o suʻesuʻega a le tagata lava ia? (e) Aiseā e tāua tele ai le tuu ese o se afiafi mo suʻesuʻega?

¹⁴ O le fuafuaga autū mo le Tapuaʻiga a le Aiga po o suʻesuʻega a le tagata lava ia, ina ia atili ai ona mafuta vavalalata i le Atua. (Iako. 4:8) Pe a tatou faaaluina le taimi e suʻesuʻe ai le Tusi Paia ma faateleina lo tatou iloa e uiga i Lē na foafoaina mea, e faamalosia ai la tatou faiā ma Ia. O le tele o lo tatou mafuta iā Ieova, o le a atili ai ona uunaʻia i tatou e alolofa iā te ia ma lo tatou ʻloto atoa, ma lo tatou ola atoa, ma lo tatou mafaufau atoa, ma lo tatou malosi atoa.’ (Mare. 12:30) E mautinoa la, tatou te naunau ia usiusitaʻi i le Atua ma faataʻitaʻi iā te ia. (Efe. 5:1) E matuā manaʻomia le faia pea o le Tapuaʻiga a le Aiga i le afiafi, ina ia fesoasoani iā i latou uma e “nofosauni pea” faaleagaga, a o tatou faatalitali atu i le “puapuaga tele” ua folafolaina mai. (Mata. 24:21) E tāua tele lenā tulaga ina ia faasaoina ai i tatou.

15. O le ā le aafiaga i faalogona o tagata o le aiga, ona o le Tapuaʻiga a le Aiga i le afiafi?

¹⁵ E iai foʻi ma se isi fuafuaga mo le Tapuaʻiga a le Aiga​—e fesoasoani ina ia māfana ai le mafutaga a le aiga. O le faaaluina o le taimi i vaiaso taʻitasi e talatalanoa faatasi ai i mea faaleagaga, e iai se aafiaga lelei i faalogona o tagata o le aiga. Maʻeu le māfana o faalogona o ulugalii pe a la fefaaaliaʻi ni mea tāua faaleagaga ua la aʻoaʻoina mai le Tusi Paia! (Faitau le Failauga 4:12.) O mātua ma fanau e tapuaʻi faatasi, e mautinoa lo latou autasi i le alofa, ona o le “fusi lea e atoatoa ona autasi ai.”—Kolo. 3:14.

16. Faamatala mai aogā ua maua e ni tuafāfine e toʻatolu, ona o le faatulaga o se afiafi mo le suʻesuʻeina o le Tusi Paia.

¹⁶ Seʻi mātau mai aogā ua maua e ni tuafāfine e toʻatolu, ona o le faatulagaga o se afiafi  mo suʻesuʻega faale-Tusi Paia. E ui latou te lē aiga, ae ua leva ona nonofo i le aai e tasi, ma ua masani lelei nei tuafāfine matutua ua maliliu a latou tane. Na latou mananaʻo e faatele se taimi e latou te faatasitasi ai, ae i le taimi e tasi, na latou mananaʻo e faaaogā na faatasitasiga e talanoa ai i mea faaleagaga, o lea sa faia sa latou fuafuaga e feiloaʻi i se afiafi e suʻesuʻe le Tusi Paia. Sa latou amataina lea fuafuaga i le faaaogāina o le tusi, “Bearing Thorough Witness” About God’s Kingdom. Ua faapea mai se tasi o i latou: “E ese lo matou fiafia i la matou faatasitasiga, ma o le tele o taimi e ova atu i le itula la matou suʻesuʻega. E matou te taumafai e faaata faalemafaufau tulaga sa oo i o tatou uso i le uluaʻi senituri, ma talatalanoa i le mea e matou te faia pe a teʻi ua tutupu na mea iā i matou. Ona matou taumafai lea e faaaogā i le auaunaga mea sa matou aʻoaʻoina mai i a matou talanoaga. O le faia faapea, ua sili atu ona fua mai, ma matou olioli i le galuega o le talaʻia o le Malo ma le faia o tagata ma soo.” E faaopoopo atu i le atiina aʻe o i latou i le itu faaleagaga, ua atili ai ona vavalalata le tasi i le isi. Ua latou faapea mai: “E matou te faapelepele i lenei faatulagaga.”

17. O ā vala e fesoasoani i le taulau manuia o le Tapuaʻiga a le Aiga i le afiafi?

¹⁷ Ae faapefea oe? O ā aogā ua e maua ona o le iai o se afiafi mo le tapuaʻiga a le aiga, po o suʻesuʻega a le tagata lava ia? Afai e fai ma tuu, o le a lē taulau le fuafuaga o lenei faatulagaga. E tatau ona nofosauni le aiga atoa mo le suʻesuʻega i le taimi ua uma ona faatulaga. E lē tatau ona faalavelavea le afiafi o le suʻesuʻega ona o ni mataupu e lē tāua tele. E lē gata i lea, e ao ona filifili mataupu e talafeagai, ina ia aogā i le aiga le suʻesuʻega. O le ā e mafai ona e fai ina ia fiafia tagata uma i taimi o le suʻesuʻega? Ia uigā le auala e te aʻoaʻo atu ai, ma ia tausia pea se siʻomaga filemu ma le faaaloalo i le taimi o le suʻesuʻega.​—Iako. 3:18. *

ʻIa Mataala’ ma ʻIa Nofosauni’

18, 19. Ua faapefea ona aafia oe ma lou aiga i lo outou iloa ua lē o toe umi ae maliu mai le Atalii o le tagata?

¹⁸ O le faasolo ina leaga tele o le tulaga o mea i le lalolagi talu mai le 1914, ua mautinoa ai le oo o le lalolagi amioleaga a Satani i ona aso e gata ai. Ua faaloloʻi ma faamalumalu mai le aso mataʻutia o Amaketo. E lē o toe umi ae taunuu mai le Atalii o le tagata e faatino le faamasinoga a Ieova i tagata faalēmataʻu. (Sala. 37:10; Faata. 2:21, 22) E tatau ona iai ni aafiaga iā te oe ma lou aiga, ona ua outou iloa le mea o le a tupu.

¹⁹ Po o e utagia le fautuaga a Iesu ia “lelei” lau vaai? Po o tuliloaina e lou aiga sini faaleagaga, a o saʻilia e tagata o lenei lalolagi le ʻoa, le taʻutaʻua ma le pule? Po o sologa lelei le fuafuaga o le faia i se afiafi le Tapuaʻiga a le Aiga, po o le faia foʻi o le suʻesuʻega a le tagata lava ia? Po o taulau le fuafuaga na faia ai? E pei ona talanoaina i le mataupu ua mavae atu, po o faia lou tiute faale-Tusi Paia o se tane, se avā, po se tasi o le fanau, lea e fesoasoani ai i le aiga atoa ina ia ʻmataala’ ai? (1 Tesa. 5:6) Afai o e faia faapea, ua e ʻnofosauni’ la mo le maliu mai o le Atalii o le tagata.

[Faaopoopoga i lalo]

O ā Mea na E Aʻoaʻoina?

• Faamatala le auala e mafai ai e aiga Kerisiano ona “nofosauni” e ala i le . . .

“lelei” o le vaai.

faatulaga ma tuliloa sini faaleagaga.

faia pea i se afiafi le Tapuaʻiga a le Aiga.

[Fesili mo le Suʻesuʻega]

[Ata i le itulau 13]

O le “lelei” o le vaai e uunaʻia ai i tatou e teena ai faatosinaga a le lalolagi