Pe E te Fiafia Moni i le Afioga a le Atua?

UA FAAPEA mai Leilani: “Ina ua amata ona ou faitauina e lē aunoa le Tusi Paia, sa ou manatu o se mea e tau lava ina ia faataunuu. Sa faigatā ona ou malamalama i ai, ma e masani ona tafao loʻu mafaufau a o faitau.”

O isi foʻi ua faapea mai, na amata ona latou faitauina le Tusi Paia, ae e lē fiafia i ai. Peitaʻi sa latou taumafai pea, ona e latou te iloa o le faitauina o le Tusi Paia o se mea e ao ona fai. Ua faapea mai Mareko: “E faigofie lava ona iai mea e faalavelave i loʻu faitauina ma le suʻesuʻeina o le Tusi Paia. Sa tele ina ou tatalo ma taumafai ina ia avea le faitauina o le Tusi Paia i aso taʻitasi ma vaega o laʻu faasologa masani.”

O le ā e mafai ona e fai ina ia atiaʻe ai se lotofaafetai mo le Afioga a le Atua, le Tusi Paia? E faapefea ona e maua le fiafia i le faitauina? Ia iloilo fautuaga o loo mulimuli mai.

Sini ma Auala e Fai Ai

Amata lau faitauga Tusi Paia i le tatalo, ma ia taulaʻi lou mafaufau i lau faitau. Ōle atu iā Ieova mo lana fesoasoani ina ia e atiaʻe se naunau e suʻesuʻe i lana Afioga. Talosaga iā te Ia e fesoasoani i lou loto ma lou mafaufau, ina ia iloa atili lona poto. (Sala. 119:34) A lē faia faapea, e vave lava ona avea le suʻesuʻeina o le Tusi Paia ma mea e tau lava ina faataunuu, ma mou atu ai le naunau e faaauau pea ona suʻesuʻe. Ua faapea mai Lina: “E masani ona vave tele laʻu faitau, ma misi ai le tele o isi manatu lelei. E tele ina ou lē malamalama i manatu tāua. Ou te tatalo ina ia lē tafaofao solo loʻu mafaufau ae uaʻi atu i laʻu faitauina o le Tusi Paia.”

Faatāua mea ua e aʻoaʻoina. Ia manatua, o le malamalama ma le faatatauina o upu moni o le Tusi Paia, e maua ai le ola. O lea la, ia taumafai ma le faamaoni e saʻili ma faatatau manatu aogā. Ua faapea mai Kilisi: “Ou te mataala i mea ou te faitauina e ono iloa ai uiga ma uunaʻiga sesē o loʻu loto. O se mea e faafouina ai, le tele o faamatalaga mai le Tusi Paia ma a tatou lomiga ua aogā iā te aʻu, e ui matou te leʻi feiloaʻi ma ē na tusia.”

Ia faatulaga sini e mafai ona e ausia. Taumafai e aʻoaʻoina se mea fou e uiga i tagata o loo taʻua i le Tusi Paia. E mafai ona e maua le tele o faamatalaga mataʻina e uiga iā i latou, e ala i le faaaogā o le tusi Insight on the Scriptures po o le Watch Tower Publications Index. A o faasolo ina e malamalama i uiga ma faalogona o tagata o loo taʻua i le Tusi Paia, o le a pei ai e moni i latou iā te oe.

Saʻili auala fou e fefulifulisaʻi ai i mau o le Tusi Paia. (Galu. 17:2, 3) Ua faia faapea e Sofia pe a fai ana suʻesuʻega. Ua ia faapea mai: “O loʻu naunautaʻiga, ia ou iloa auala fou ou te fefulifulisaʻi ai ma tagata i le faiva ma nisi foʻi taimi, ma ia manino le auala ou te faamatala ai upu moni faale-Tusi Paia. O Le Olomatamata o se meafaigaluega e sili ona lelei i le faia faapea.”​—2 Timo. 2:15.

Faaata i le mafaufau tala faale-Tusi Paia. Ua taʻua i le Eperu 4:12: “O loo ola le afioga a le Atua.” A o e faitauina le Tusi Paia, ia pei lava o  loo e aafia ai i mea o loo tutupu, e ala i le faaata i lou mafaufau mea sa vāai i ai tagata o loo taʻua i tala. Ia pei o loo e lagona atu mea sa latou faalogo i ai. Faatusatusa mea na tutupu i o latou olaga, ma mea o loo tutupu i lou olaga. Faaaʻoaʻo i le auala sa latou taulimaina ai tulaga na tulaʻi mai. O lou faia faapea e te malamalama ai ma manatua tala o loo i le Tusi Paia.

Faaalu se taimi ina ia e malamalama i uiga o mau faigatā. Ia lava le taimi ua e faaavanoaina mo au suʻesuʻega. Atonu e lāgā ai nisi fesili e manaʻomia ai ona fai nisi saʻiliʻiliga loloto. Suʻesuʻe i upu e te lē masani ai, iloilo faamatalaga pito i lalo o le itulau, atoa ma mau faasino. O le tele o lou malamalama ma faatatau mea o loo e faitauina, o le tele foʻi lenā o lou fiafia i le Afioga tusia a le Atua. Ona e faapea atu lea e pei o le faisalamo: “Ua fai ma oʻu tofi . . . faamanatuga [a Ieova] i aso uma lava, auā o mea ia e fiafia i ai loʻu loto.”​—Sala. 119:111.

ʻAlofia le faatopelau ona faitau lomiga. Ia talafeagai le umi ua e faatulagaina mo au suʻesuʻega. Ia faapaleni ma le taimi ua e tuu e fai ai au sauniuniga mo sauniga. Ua faapea mai Rasela: “E tele taimi ou te matuā popole ai, ma lē sagatonu ai loʻu mafaufau. O lea, ou te maua aogā pe a faapupuu aʻu suʻesuʻega. E fesoasoani lea ina ia ou maua ai le tele o aogā i le faia o aʻu suʻesuʻega.” Ua taʻutino mai e Kilisi: “Afai e faatopelau ona ou faia, e lē lelei ai loʻu lotofuatiaifo ona e lē o tele ni mea aogā ua ou mauaina. E masani lava ona lē pāʻia loʻu loto i mea ua ou suʻesuʻeina.” O lea la, aua le faanatinatia.

Ia matuā naunau i le Afioga a le Atua. Ua faapea mai le aposetolo o Peteru: “Faapei o pepe faatoʻā fananau mai, ia naunau outou i le suāsusu e lē suia mai i le afioga a le Atua, ina ia mafai ai ona outou tutupu aʻe ia maua le faaolataga.” (1 Pete. 2:2) O le faanaunauga masani o le pepe, e manaʻo i le suāsusu. Ma ua faailoa mai i le Tusi Paia, e tatau ona tatou naunau i le afioga a le Atua. Afai e te faitauina se itulau i aso taʻitasi, e mautinoa o le a oo iā te oe lenā naunautaʻiga. Nai lo le avea o se mea e faigatā, e oo ina avea ma mea e sili ona e fiafia i ai.

Mafaufau loloto i mea e te faitau ai i le Tusi Paia. E tele aogā e tatou te maua i le mafaufau loloto i mea ua tatou faitau ai. O le faia faapea, e mafai ai ona e faafesootaʻia mataupu eseese  ua e tilofaʻia. E lē umi lava, ae e mauaina le atamai, lea ua pei o ni penina faaleagaga e te fiafia i ai.​—Sala. 19:14; Faata. 3:3.

Taimi Alu Aogā

O le tausisi i le faia pea o au suʻesuʻega, e manaʻomia ai ni taumafaiga, ae e anoanoaʻi faamanuiaga e maua ai. E faaleleia ai lou malamalamaga i mea faaleagaga. (Epe. 5:12-14) O le atamai ma le utaga mamao e te maua mai i le Tusi Paia, e faatupu ai le fiafia, le toʻafimālie ma le filemu. O le atamai e maua mai i le Afioga a le Atua, e pei o le ʻlaau o le ola’ iā i latou e talia ma faatatauina.​—Faata. 3:13-18.

O le suʻesuʻe loloto i le Afioga a le Atua, e faamalamalamaina ai lou loto. (Faata. 15:14) E fesoasoani iā te oe ina ia avatu ai fautuaga e faavae moni i le Tusi Paia. Afai e faia au filifiliga e faavae i mea ua e faitauina i le Afioga faagaeeina a Ieova, ma lomiga mai le “pologa faamaoni ma le faautauta,” o le a faafouina ma toʻafimālie ai lou olaga. (Mata. 24:45) O le a atili ai ona e maua se vaaiga mautinoa i mea, ma taʻitaʻia ai lou olaga e mea faaleagaga. E lē gata i lea, o mea uma e fesootaʻi atu i lau faiā iā Ieova, e taulau manuia.​—Sala. 1:2, 3.

O se loto ua faatumulia i le alofa mo le Atua, e uunaʻia ai oe e taʻu atu i isi lou faatuatua. O se gaoioiga e tauia tele. I le taimi nei, o loo taumafai Sofia e manatua ma faaaogā ni mau eseese, ina ia faaosofia ai le naunau fia faalogo o tagata, ma atili ai ona uigā ma fiafia lana auaunaga. O lana tala: “O foliga fiafia o tagata pe a latou faalogo i se fuaiupu mai le Tusi Paia, ou te fiafia ai foʻi.”

Ae o le aogā aupito sili ona tāua o le fiafia i le faitauina o le Afioga a le Atua, o le iai lea o se faiā vavalalata ma Ieova. O le suʻesuʻe i le Tusi Paia, e te iloa ai ana tapulaa ma sapaitalia lona alofa, agalelei, ma lona faimeatonu. E leai se isi gaoioiga e sili atu ona tāua pe tauia. Ia e toʻaga e suʻesuʻe i le Afioga a le Atua. O le faia faapea, o le a faaaogā tatau ai lou taimi.—Sala. 19:7-11.

[Pusa/Ata i le itulau 5]

FAITAUINA O LE AFIOGA A LE ATUA: SINI MA AUALA E FAI AI

▪ Amata lau faitauga Tusi Paia i le tatalo, ma ia taulaʻi lou mafaufau i lau faitau.

▪ Faatāua mea ua e aʻoaʻoina.

▪ Ia faatulaga sini e mafai ona e ausia.

▪ Saʻili auala fou e fefulifulisaʻi ai i mau o le Tusi Paia.

▪ Faaata i le mafaufau tala faale-Tusi Paia.

▪ Faaalu se taimi ina ia e malamalama i uiga o mau faigatā.

▪ ʻAlofia le faatopelau ona faitau lomiga.

▪ Ia matuā naunau i le Afioga a le Atua.

▪ Mafaufau loloto i mea e te faitau ai i le Tusi Paia.

[Ata i le itulau 4]

Pe a e faitauina se tala o le Tusi Paia, ia mafaufau e pei o loo e iai i se tulaga faapena