“Ia Leoleo i le Lafu Mamoe a le Atua o Loo Outou Tausia”

“Ia leoleo i le lafu mamoe a le Atua o loo outou tausia, aua le manatu i ai o se avega mamafa, ae ia faia ma le lotomalie.”​—1 PETE. 5:2.

1. O ā tulaga sa fesagaʻi ma Kerisiano ina ua tusia e Peteru lana uluaʻi tusi?

NA TUSIA e le aposetolo o Peteru lana uluaʻi tusi a o leʻi oo ina sauāina e le Emeperoa o Nero Kerisiano i Roma. Na manaʻo o ia e faamalosiau i ona uso talitonu. Sa “fealuaʻi” le tiapolo e saʻili e ʻaina Kerisiano. Ina ia tutū malosi ma tetee atu iā te ia, sa manaʻomia ona ʻfaaauau ona latou mafaufau lelei,’ ma ʻfaamaulalo i latou i lalo o le aao malosi o le Atua.’ (1 Pete. 5:6, 8) Sa manaʻomia foʻi ona latou autasi. E lē o se taimi lea e latou te “faatigā [ai] le tasi i le isi ma feʻainaʻi,” ina neʻi “faaumatia e le tasi le isi.”​—Kala. 5:15.

2, 3. O ai e tatau ona tatou tau faasaga i ai, ma o ā manatu o le a tatou iloiloina i nei mataupu?

² I aso nei, ua tatou fesagaʻi foʻi ma se tulaga talitutusa. O loo saʻili e le Tiapolo ni avanoa e puʻea ai i tatou. (Faaa. 12:12) Ua toetoe lava oo mai “le puapuaga tele, e leai sona tusa talu le amataga o le lalolagi.” (Mata. 24:21) E pei lava ona sa manaʻomia e Kerisiano i le uluaʻi senituri ona ʻalofia le feavauaʻi, e ao foʻi ona tatou faia faapea. Ina ia faataunuu lenei mea, e iai taimi e tatou te manaʻomia ai le fesoasoani mai i tane matutua ua agavaa.

³ Seʻi o tatou iloiloina auala e mafai ai e toeaina ona talisapaia atili le faaeaga, o le leoleoina o ʻle lafu mamoe a le Atua o loo latou tausia.’ (1 Pete. 5:2) Ona tatou manatunatu lea i le auala e tatau ona faia ai le galuega faaleoleo mamoe. I le mataupu o sosoo mai, o le a tatou tilofaʻia ai le auala e mafai ai e le faapotopotoga, ona ʻmanatu mamafa i ē o loo galulue fitā ma vaavaaia’ le lafu. (1 Tesa. 5:12) O se iloiloga o nei mataupu, o le a fesoasoani iā i tatou e tutū mausalī ai ma tetee atu i lo tatou Fili sili, i le iloaina o ia lea o loo tatou tau faasaga i ai.​—Efe. 6:12.

Leoleo le Lafu Mamoe a le Atua

4, 5. E tatau faapefea ona vaai toeaina i le lafu? Faataʻitaʻi.

⁴ Na faalaeiau e Peteru toeaina mai i Kerisiano o le uluaʻi senituri, ia latou maua le vaaiga a le Atua e uiga i le lafu mamoe ua tuuina atu iā i latou. (Faitau le 1 Peteru 5:1, 2.) E ui sa avea Peteru ma poutū i le faapotopotoga, ae e leʻi talanoa faualuga ai o ia i toeaina. Nai lo lea, na ia apoapoaʻi atu i toeaina i se auala e faaalia ai e tutusa uma i latou. (Kala. 2:9) E pei o le agaga sa iā Peteru, ua timaʻi mai le Vaega Pule i aso nei i toeaina i le faapotopotoga, ia taumafai e faataunuu lo latou tiute tauave tāua o le leoleoina o le lafu mamoe a le Atua.

⁵ Na tusi Peteru e ao i toeaina ona ʻleoleoina le lafu mamoe a le Atua o loo latou tausia.’ E tāua tele ona latou iloa, o Ieova ma Iesu Keriso e ana le lafu mamoe. E manaʻomia ona tali atu toeaina i le Atua e tusa ai ma le auala o loo latou vaavaaia ai lana lafu. Seʻi faapea ua manaʻo sau uō e te vaaia lana fanau a o malaga ese. Po o le a e lē tausia lelei lana fanau ma fafaga i latou? Afai e maʻi se tasi o lana fanau, po o le a e lē faamautinoa ua ia maua se fesoasoani mai i se fomaʻi? E faapena foʻi toeaina o le faapotopotoga, e ao ona latou “leoleo le faapotopotoga a le Atua, lea ua ia faatauina mai i le toto o lona lava Alo.” (Galu. 20:28) E latou te manatua ua faatauina  mamoe taʻitoʻatasi i le toto tāua o Iesu Keriso. Talu ai e tali atu toeaina i le Atua, o lea e latou te fafagaina ai, puipuia ma tausia le lafu.

6. O le ā le tiute tauave sa i ai i leoleo mamoe i aso anamua?

⁶ Ia manatu i tiute tauave a leoleo mamoe i taimi o le Tusi Paia. Sa tatau ona latou lavātia le vevela i le ao ma le mālūlū i le pō, ina ia tausia ai le lafu. (Kene. 31:40) Sa oo lava foʻi ina lamatia ai o latou ola. Na laveaʻiina e le tama leoleo mamoe o Tavita lana lafu mai i manu feʻai, e aofia ai se leona ma se pea. E tusa ai ma na manu, na taʻua e Tavita, na ia ʻtago atu i le ʻava a le manu ma fasimate.’ (1 Samu. 17:34, 35) Maʻeu le toa! E mautinoa sa toetoe lava ʻai o ia e le manu! Ae e leʻi faatalatū ai e laveaʻi ana mamoe.

7. I se auala faafaatusa, e faapefea ona seʻi ese mai e toeaina mamoe mai i nifo o Satani?

⁷ I aso nei, e ao ona mataala toeaina i osofaʻiga a le Tiapolo e pei o se leona. E ono aofia ai se gaoioiga lototele faafaatusa, e pei o le seʻi ese mai o se mamoe mai i nifo o le Tiapolo. E tai pei lava ua tago atu toeaina i le ʻava a le manu feʻai, ina ia faasao mai se tasi o mamoe. Atonu e latou te fautua atu i nisi o uso ua lē mataala, o ē ua faaosoosoina i mailei a Satani. (Faitau le Iuta 22, 23.) E mautinoa, e lē faia e toeaina lenei galuega e aunoa ma le fesoasoani a Ieova. E latou te faapelepele i le mamoe ua faamanuʻalia, fusifusi ona manuʻa ma faateʻa lona tigā e ala i upu mai le Afioga a le Atua.

8. O fea e taʻitaʻia i ai e toeaina le lafu, ma e faapefea?

⁸ E taʻitaʻia foʻi e se leoleo mamoe le lafu i laufanua lauusiusi o loo iai ni vai. E faapena foʻi ona taʻitaʻia e toeaina le lafu i le faapotopotoga, ma faalaeiau i latou e auai i sauniga, ina ia fafaga lelei ai i latou ma maua ai “a latou meaʻai i le taimi tatau.” (Mata. 24:45) Atonu e tele se taimi e ao ona faaalu e toeaina e fesoasoani ai i ē o mamaʻi faaleagaga, ina ia faamalosia i latou i upu mai i le Tusi Paia. Atonu ua toe fia foʻi mai i le lafu se mamoe ua sē. O lea, nai lo o le talanoa atu i se auala e  faamataʻu ai le uso, e faamatala atu i ai ma le agalelei e toeaina taʻiala mai i le Tusi Paia, ma le auala e faatatau ai i lona olaga.

9, 10. E faapefea ona tausia e toeaina ē ua mamaʻi faaleagaga?

⁹ Pe a e maʻi, o le ā le ituaiga o fomaʻi e te manaʻo e vaaia oe? Pe e te fiafia i se fomaʻi e faatopelau ona vaai oe, ona tuu atu lea o se pepa talavai ina ia e alu ese ai, ae seʻi vaai le isi maʻi? Pe e lē sili atu ea se fomaʻi e uaʻi ma faalogo mai iā te oe, ma faamatala lelei mai lou maʻi ma togafitiga e aogā iā te oe?

¹⁰ E mafai foʻi e toeaina ona faalogo atu i lē ua maʻi faaleagaga, ma fesoasoani atu ia toe malosi lea tagata, ma i se auala faafaatusa, ua latou “uu iā te ia i le suāuu i le suafa o Ieova.” (Faitau le Iakopo 5:14, 15.) O le Afioga a le Atua e tai pei o le pasama mai i Kiliata, e mālōlō ai lē ua maʻi. (Iere. 8:22; Eseki. 34:16) O le faatatauina o mataupu silisili o le Tusi Paia, e mafai ona fesoasoani i le tagata ua tautevateva, ia toe sagatonu ai lona itu faaleagaga. Ioe, e tāua tele i toeaina ona faalogo atu i faafitauli o le mamoe ua maʻi faaleagaga, ma tatalo faatasi ma ia.

Ia Lē Manatu o se Avega Mamafa ae ia Fai ma le Lotomalie

11. O le ā e uunaʻia ai toeaina e leoleo le lafu a le Atua ma le lotomalilie?

¹¹ Na faamanatu atu foʻi e Peteru i toeaina, le auala e tatau ma le auala e lē tatau ona faia ai le galuega faaleoleo mamoe. E ao i toeaina ona manatu i le leoleoina o le lafu a le Atua, ʻe lē o se avega mamafa, ae o se mea e faia ma le lotomalie.’ O le ā e uunaʻia ai toeaina e auauna atu ma le lotomalilie i o latou uso? Ae o le ā na uunaʻia ai Peteru e leoleo ma fafaga mamoe a Iesu? O se tasi o māfuaaga, o lona alofa faapelepele mo le Alii. (Ioa. 21:15-17) Ona o le alofa o toeaina, ua “lē toe ola [ai] i latou mo i latou lava, ae . . . ola mo ia o lē na maliu mo i latou.” (2 Kori. 5:14, 15) O lenei alofa atoa ai ma le alofa i le Atua ma o latou uso, ua uunaʻia ai toeaina e auauna atu i le lafu, fai ni taumafaiga ma faaaogā a latou alagāʻoa ma le taimi e faia ai faapea. (Mata. 22:37-39) E latou te ofoina atu le fesoasoani ma le lotomalilie, ae lē ma le tigā.

12. O le ā le tele na ofo atu ai e Paulo le fesoasoani mo ona uso?

¹² O le ā le tele e ao ona avatu ai e toeaina le fesoasoani? E latou te faaaʻoaʻo iā Paulo i le auala e tausia ai mamoe, e pei foʻi ona ia faaaʻoaʻo iā Iesu. (1 Kori. 11:1) Ona sa alofa faapelepele Paulo ma ana aumea i uso i Tesalonia, na latou lotomalilie ai e avatu i na uso ʻe lē na o le tala lelei a le Atua, ae faapea foʻi ma o latou ola.’ Ona o le faia faapea, sa latou tausi faapelepele ai i nei uso, “e pei ona tausi faapelepele e se failele o lana fanau.” (1 Tesa. 2:7, 8) Na malamalama lelei Paulo i faalogona o se failele i lana fanau. E na te faia mea uma mo i latou, e aofia ai le ala i luga i le leva o le pō e fafaga i latou.

13. O ā mea e ao ona faapaleni e toeaina?

¹³ E ao i toeaina ona iloa le auala e faapaleni ai o latou tiute tauave faaleoleo mamoe, ma o latou tiutefai i le aiga. (1 Timo. 5:8) O taimi e faaalu e toeaina i meafai a le faapotopotoga, o taimi tāua ia sa ono mafai ona faatasi ai ma o latou aiga. O se tasi o auala e mafai ona faapaleni ai nei tiute tauave e lua, o le valaaulia lea o isi e auai i la latou Tapuaʻiga a le Aiga i nisi taimi. A o faagasolo tausaga, na valaaulia ai e Masanao o se toeaina i Iapani, nisi o loo nofofua ma aiga e lē upu moni le tamā, e auai i la latou suʻesuʻega faaleaiga. Mulimuli ane, o nisi na ia fesoasoani i ai ua avea ma toeaina, ma ua faataʻitaʻi i lana faaaʻoaʻoga.

ʻAlofia le Fia Maua o Mea​—Leoleo ma le Lotonaunau

14, 15. Aiseā e ao ai i toeaina ona faaeteete i le “fia maua o mea i se auala faapiʻopiʻo,” ma e faapefea ona latou faataʻitaʻi iā Paulo i lenei itu?

¹⁴ Na timaʻia foʻi e Peteru toeaina i le auala e leoleo ai le lafu e faapea, “aua le faia ona o  le fia maua o mea i se auala faapiʻopiʻo, ae ia faia ma le lotonaunau.” E lē faatalitalia e toeaina se taui tautupe mo a latou galuega, e ui e tele le taimi e alu ai. Na iloa e Peteru e tāua ona lapataʻia toeaina e uiga i lamatiaga o le leoleoina o le lafu, ona “o le fia maua o mea i se auala faapiʻopiʻo.” Ua faaalia mai le leaga o lenei mea, i olaga mauʻoa o faifeʻau o “Papelonia le Aai Tele,” ae o loo matitiva le toʻatele. (Faaa. 18:2, 3) O lea e tatau ai i toeaina ona faaeteete ina neʻi iai se faanaunauga faapena.

¹⁵ Na faia e Paulo se faaaʻoaʻoga lelei mo toeaina Kerisiano. Ona o Paulo o se aposetolo, ma na ono mafai ona “faatigāina” Kerisiano i Tesalonia i le tausia o ia, ae e ʻleʻi ai fua o ia i ni meaʻai a se tasi.’ Nai lo lenā, sa ia ʻgalue ma le fitā i le pō ma le ao.’ (2 Tesa. 3:8) O loo faataatia foʻi e le toʻatele o toeaina i aso nei, e aofia ai ma uso femalagaaʻi, se faaaʻoaʻoga lelei i lenā itu. E ui e latou te talisapaia le agaga talimālō o uso talitonu, ae e latou te lē “faatigāina” i se tasi.—1 Tesa. 2:9.

16. O le ā le uiga o le leoleoina o le lafu ma le “lotonaunau”?

¹⁶ E leoleoina e toeaina le lafu ma le “lotonaunau.” Ua faaalia lo latou lotonaunau e fesoasoani atu i le lafu e ala i lo latou agaga faataulaga. Peitaʻi, e latou te lē faamalosia le lafu e auauna iā Ieova; pe uunaʻia foʻi e toeaina alolofa nisi e auauna i le Atua i se agaga faatautavā. (Kala. 5:26) E iloa e toeaina e eseese uma mamoe. E latou te naunau e fesoasoani i o latou uso e auauna ma le fiafia iā Ieova.

Aua le Fia Pule ae ia Avea ma Faaaʻoaʻoga Lelei

17, 18. (a) Aiseā sa faigatā ai i le ʻauaposetolo i nisi taimi, ona malamalama i le aʻoaʻoga a Iesu i le lotomaulalo? (e) O le ā le tulaga talitutusa atonu ua tatou iai nei?

¹⁷ E pei lava ona tatou talanoaina, e ao i toeaina ona manatua o le Atua e ana le lafu o loo latou leoleoina, ae lē o i latou. E latou te faaeteete ina neʻi “fia pule i tagata o le Atua.” (Faitau le 1 Peteru 5:3.) E iai taimi na aapa atu ai aposetolo o Iesu i ni tulaga ona o uunaʻiga sesē. I le pei o taʻitaʻi o malo i na ona pō, sa latou mananaʻo i se tulaga maualuga.—Faitau le Mareko 10:42-45.

¹⁸ I aso nei, e tatau i uso o loo ʻaapa atu i le tofi o se ovasia’ ona iloilo māfuaaga e latou te faia ai faapea. (1 Timo. 3:1) E ao i toeaina ona fesili ifo iā i latou lava, po o iā i latou se faanaunauga fia pule po o le fia taʻutaʻua, e pei ona sa iai i nisi o le ʻauaposetolo. Afai sa iai lenā faafitauli i le ʻauaposetolo, e tāua la ona iloa e toeaina, e ao ona latou taumafai malosi e ʻalofia lenā faanaunauga leaga o le fia pule i isi.

19. O le ā e tatau i toeaina ona manatua pe a avatu aʻoaʻiga mo le puipuia o le lafu?

¹⁹ Peitaʻi, e iai taimi e manaʻomia ai ona maumauaʻi toeaina i le avatuina o aʻoaʻiga, ina ia puipuia ai le lafu mai i “luko feʻai.” (Galu. 20:28-30) Na fai atu Paulo iā Tito ia “aʻoaʻi atu ma ia faatonu atu ma le pule uma.” (Tito 2:15) Ae e tusa foʻi pe faia faapea, e taumafai lava toeaina e faaaloalo i ē o loo aofia ai. E latou te iloa, nai lo le faitio ma lafo atu ni upu mamafa, e masani ona sili atu ona pāʻia le loto o se tasi e faia le mea saʻo, pe a faalaeiau ma le agalelei e toeaina.

20. E faapefea ona faataʻitaʻi toeaina iā Iesu i le faia o se faaaʻoaʻoga lelei?

²⁰ O le faaaʻoaʻoga lelei a Keriso, ua uunaʻia ai toeaina e alolofa i le lafu. (Ioa. 13:12-15) E faamāfanafanaina o tatou loto pe a faitau i le  auala na ia aʻoaʻo ai ona soo i le talaʻiga ma le faia o soo. Sa pāʻia loto o ona soo i lana faaaʻoaʻoga o le lotomaulalo, ma uunaʻia ai i latou e ʻlotomaulalo ma manatu ua sili isi iā i latou.’ (Fili. 2:3) Ua uunaʻia foʻi toeaina i aso nei e mulimuli i le faaaʻoaʻoga a Iesu, ma ua latou mananaʻo ai e avea ma “faaaʻoaʻoga lelei i le lafu mamoe.”

21. O le ā le taui e mafai ona taulaʻi i ai toeaina?

²¹ Ua faaiʻu e Peteru ana apoapoaʻiga i toeaina e ala i le taʻua o se folafolaga mo le lumanaʻi. (Faitau le 1 Peteru 5:4.) O le a maua e ovasia faauuina le “pale mamalu e lē mamae” faatasi ma Keriso i le lagi. Ae e maua foʻi e leoleo mamoe lagolago mai i “isi mamoe,” le faaeaga o le leoleoina o le lafu a le Atua i le lalolagi, i lalo o le pulega a “le leoleo mamoe sili.” (Ioa. 10:16) O le a talanoaina i le mataupu o sosoo mai, auala e mafai ai e le faapotopotoga ona lagolagosua i ē ua tofia e taʻimua.

O se Autaluga

• Aiseā ua talafeagai ai le apoapoaʻiga a Peteru i toeaina, ia leoleo le lafu mamoe a le Atua o loo latou tausia?

• E faapefea ona leoleo e toeaina ē ua mamaʻi faaleagaga?

• O le ā e uunaʻia ai toeaina e leoleo le lafu a le Atua o loo latou tausia?

[Fesili mo le Suʻesuʻega]

[Ata i le itulau 21]

E pei o leoleo mamoe i aso anamua, e tatau i toeaina i aso nei ona puipuia “mamoe” o loo latou tausia