E Silafia e Ieova le Auala e Laveaʻia ai Ona Tagata

“E silafia e Ieova le auala e laveaʻi ai tagata e faamaoni iā te ia mai i o latou puapuaga.”—2 PETE. 2:9.

AISEĀ E TATOU TE MAUTINOA AI E MAFAI E IEOVA ONA:

Faatulaga le taimi e tutupu ai mea auā le galueaʻiina ma le faataunuuina o lana fuafuaga?

Nofosauni e faaaogā lona mana e laveaʻi ai ona tagata?

Silafia lelei le auala o le a tutupu ai mea a o faagasolo le puapuaga tele?

1. O le a faapeʻī le tulaga o le a iai le lalolagi i le vaitaimi o “le puapuaga tele”?

EFAAFUASEʻI lava ona oo mai le sala faafaamasinoga a le Atua i le lalolagi a Satani. (1 Tesa. 5:2, 3) A o faagasolo “le aso tele o Ieova,” o le a matuā lē mautonu le lalolagi. (Sefa. 1:14-17) Ona o le a matuā tele mafatiaga ma puapuaga, o lea ua faamatalaina ai e le Tusi Paia lenā vaitaimi o “le puapuaga tele, e leai sona tusa talu le amataga o le lalolagi, e oo mai lava i aso nei.”—Faitau le Mataio 24:21, 22.

2, 3. (a) O le ā le tulaga o le a fesagaʻia e tagata o le Atua a o faagasolo “le puapuaga tele”? (e) O le ā le mea e mafai ona faamalosia ai lo tatou mautinoa i le tomai ua iā Ieova e laveaʻiina ai ona tagata?

² Pe a lata atu i le iʻuga o “le puapuaga tele,” o le a avea tagata o le Atua ma taulaʻiga autū o osofaʻiga a “Koku mai i Makoku.” I le taimi o lenā osofaʻiga, o le a faasagatau atu i tagata o le Atua “se ʻautau e toʻatele lava . . . e pei o ao e ufitia ai le laueleele.” (Eseki. 38:2, 14-16) E leai se faalapotopotoga faaletagata o le a laveaʻiina tagata o Ieova. E na o le Atua lava e faalagolago i ai lo latou faaolataga. O le a faapefea ona tali atu tagata o Ieova pe a agaʻi mai o latou fili e faaumatia i latou?

³ Pe afai o oe o se auauna a Ieova, pe e te faatuatuaina Ieova e mafai ona ia faasaoina ona tagata ma o le a ia faia faapea, a o faagasolo le puapuaga tele? Na tusi le aposetolo o Peteru: “E silafia e Ieova le auala e laveaʻi ai tagata e faamaoni iā te ia mai i o latou puapuaga, a ua taofia tagata amiolētonu mo le aso o le faamasinoga e faaumatia ai i latou.” (2 Pete. 2:9) O le a faamalosia lo tatou mautinoa i le mana ua iā Ieova e laveaʻiina ai ona tagata, pe afai e tatou te mafaufau loloto i faaaʻoaʻoga o auala na ia laveaʻiina ai Ona tagata i aso ua mavae. O lea la, seʻi o tatou iloiloina ni faaaʻoaʻoga se tolu.

 FAASAOINA MAI I LE LOLO

4. O ā mea sa manaʻomia ona faia a o leʻi oo mai le Lolo?

⁴ Muamua, seʻi o tatou iloiloina le mea na tupu i le Lolo i aso o Noa. Ina ia mafai ona faataunuuina le finagalo o Ieova, na iai mea sa manaʻomia ona faia a o leʻi oo mai le Lolo. Sa tatau ona fausia se vaa telē, ma sa manaʻomia ona ave meaola i totonu o le vaa. E lē o taʻua i le tusi o Kenese e faapea, sa faatalitali Ieova seʻia māeʻa ona fausia le vaa, ona faatoʻā filifili lea o le taimi e faaoo mai ai le Lolo. Na mafai lava e Ieova ona filifili se taimi e faaoo mai ai le Lolo, e aunoa ma le popole neʻi vave ona oo mai ae e leʻi māeʻa le fausiaina o le vaa. O le mea moni, ua leva ona faatulagaina e Ieova le taimi e faaoo mai ai le Lolo, ae e leʻi taitai ona ia faatonuina Noa e fausia le vaa. E faapefea ona tatou iloa lenā mea?

5. E pei ona faamauina i le Kenese 6:3, o le ā na faalauiloa atu e Ieova, ma o anafea sa ia avatu ai lenā faalauiloaga?

⁵ Ua faapea mai le Tusi Paia, sa faia e Ieova se filifiliga ma na ia faalauiloaina i le lagi. E tusa ai o le Kenese 6:3, na fetalai o Ia: “E lē faavavau ona faapalepale loʻu agaga i tagata, auā ua na o ni tagata i latou. O lea, o o latou aso e selau ma le lua sefulu tausaga ia.” E leʻi uiga atu lea fetalaiga i le umi e soifua ai le tagata. Peitaʻi, o loo faasino atu i le taimi o le a faaumatia ai e Ieova le lalolagi amioleaga. * Talu ai sa faaoo mai le Lolo i le 2370 T.L.M., o lea la e mafai ona tatou faapea atu, sa avatu e le Atua lenā faalauiloaga i le 2490 T.L.M. O le taimi lenā ua 480 tausaga o Noa. (Kene. 7:6) Pe ā ma le 20 tausaga talu ona avatu e le Atua lenā faalauiloaga, ona amata ai lea ona fanaua o atalii o Noa i le 2470 T.L.M. (Kene. 5:32) Pe tusa ma le selau tausaga na totoe a o leʻi faaoo mai le Lolo, ae e leʻi taʻuina lava e Ieova iā Noa lona tofiga faapitoa o le a faia, auā le faasaoina o le fanau a tagata. O le ā le umi sa faatalitali ai le Atua a o leʻi taʻuina atu iā Noa lenā mea?

6. O anafea na avatu ai e Ieova le faatonuga iā Noa e fausia le vaa?

⁶ E foliga mai sa faatalitali Ieova mo le tele o tausaga seʻia oo ina fananau mai atalii o Noa, ona faatoʻā taʻu atu lea iā Noa e faatatau i le Lolo. E faapefea ona faamaonia lenā manatu? Ua faapea mai le Tusi Paia, ina ua avatu e le Atua le faatonuga iā Noa e fausia le vaa, ua leva ona avea o ni tagata matutua atalii o Noa ma ua faaipoipo foʻi. Na fetalai atu Ieova iā Noa: “Ou te faavaeina laʻu feagaiga ma oe; e ao ona e ulu atu i totonu o le vaa, o oe ma ou atalii ma lau avā, ma avā a ou atalii.” (Kene. 6:9-18) O lea la, e mafai ona faapea atu pe ā ma le 40 i le 50 tausaga sa totoe a o leʻi oo mai le Lolo, ae maua loa e Noa le faatonuga e fausia le vaa.

7. (a) O le ā le auala na faaalia ai e Noa ma lona aiga le faatuatua? (e) O anafea na faatoʻā faailoa mai ai e le Atua iā Noa le taimi tonu e oo mai ai le Lolo?

⁷ A o faagasolo le galuega o le fausiaina o le vaa, atonu sa taumānatu Noa ma lona aiga i le auala o le a faataunuu ai e le Atua lona finagalo, ma le taimi o le a Ia faaoo mai ai le Lolo. Peitaʻi, e ui lava e latou te leʻi malamalama atoatoa i na mea, ae e leʻi taofia ai i latou mai i le fausiaina o le vaa. Ua taʻua i le Tusi Paia: “Ua faia e Noa mea uma lava e pei ona poloaʻi mai ai le Atua iā te ia. Ua faapea lava ona ia faia.” (Kene. 6:22) Mulimuli ane, ona faatoʻā faailoa mai lea e Ieova iā Noa ua toe fitu aso oo mai le Lolo. Na lava ma totoe lea taimi e ave ai e Noa ma lona aiga meaola i totonu o le vaa. O lea la, ina ua tatala pupuni o vai o le lagi i “le tausaga e ono selau o le olaga o Noa, o le masina lona lua, o le aso sefulu fitu o le masina,” ua leva ona nofosauni Noa ma lona aiga.—Kene. 7:1-5, 11.

8. E faapefea i le tala e faatatau i le Lolo ona fesoasoani iā i tatou e mautinoa ai, e silafia e Ieova le taimi e laveaʻiina ai ona tagata pe a oo mai le iʻuga o lenei faiga o mea?

⁸ O le tala e faatatau i le Lolo, ua faamaonia  ai le tomai o Ieova o sē e Tausi Taimi, ma lona mana o Sē e Laveaʻi. A o tatou tulata atu i le iʻuga o lenei faiga o mea a le lalolagi, e mafai ona tatou mautinoa o le a faataunuuina fuafuaga uma a Ieova, i le ʻaso ma le itula’ tonu ua ia filifilia.—Mata. 24:36; faitau le Sapakuka 2:3.

NA LAVEAʻIINA I LATOU I LE SAMI ULAULA

9, 10. Sa faaaogā faapefea e Ieova ona tagata e maileia ai le ʻautau a Aikupito?

⁹ Ua tatou aʻoaʻoina mai i le tala e faatatau i le Lolo, e faatulagaina e Ieova taimi e tutupu ai mea auā le galueaʻiina ma le faataunuuina o lana fuafuaga. O le faaaʻoaʻoga lona lua o le a tatou iloiloina, ua faaalia ai e mafai ona tatou faatuatuaina Ieova, e na te faaaogāina lona mana silisili e laveaʻiina ai ona tagata, ma faamautinoa e faataunuuina lona finagalo. O le mea mautinoa, e mafai lava e Ieova ona laveaʻiina ona tagata i taimi uma. Peitaʻi, i nisi taimi e na te faatagaina ai i latou e oo i se tulaga lamatia, ina ia mafai ai ona maileia ona fili. O le tulaga lenā sa iai, ina ua Ia faasaʻolotoina le fanauga a Isaraelu mai i le nofo pologa i Aikupito.

¹⁰ Pe tusa ma le tolu miliona tagata Isaraelu na ō ese mai i Aikupito. Sa faaaogāina e Ieova Mose ina ia taʻitaʻia i latou i se auala na manatu ai Farao, ua latou feoaʻi solo ma le lē mautonu. (Faitau le Esoto 14:1-4.) O lea na tuliloaina ai i latou e Farao ma ana ʻautau, seʻia oo i le Sami Ulaula. Na foliga mai ua leai se mea e sosola i ai le fanauga a Isaraelu. (Eso. 14:5-10) Ae o le mea moni, e leʻi oo le fanauga a Isaraelu i se tulaga lamatia. Aiseā? Sa nofosauni Ieova e laveaʻiina i latou.

11, 12. (a) O le ā le auala na fesoasoani ai Ieova i le fanauga a Isaraelu? (e) O le ā le iʻuga ona o le fesoasoani a Ieova, ma o le ā se lesona ua tatou aʻoaʻoina mai ai e faatatau iā Ieova?

¹¹ Sa mou ese “le ao” lea sa taʻitaʻia le fanauga a Isaraelu mai i o latou luma ae tū i o latou tua, ma faafaigatā ai i le ʻautau a Aikupito ona oo atu iā i latou. O lea na pogisa ai le itu lea sa iai le ʻautau a Aikupito, ae malamalama le itu na iai tagata Isaraelu e ui lava ina ua pō. (Faitau le Esoto 14:19, 20.) Ona vaeluaina lea e Ieova o le sami e ala i se matagi malosi mai i sasaʻe. Na “liua le alititai i le eleele mātūtū,” ma atonu sa  tele se taimi sa alu i lenā gaoioiga, auā ua faapea mai le tala na agi le matagi i le ʻpō atoa, ona savavali ai lea o le fanauga a Isaraelu i le ogatotonu o le sami i le eleele mātūtū.’ Sa savavali lemū le fanauga a Isaraelu, pe a fua atu i le televavave o kariota a ʻautau a Farao. Peitaʻi, sa lē mafai lava e ʻautau a Aikupito ona maua atu tagata Isaraelu, talu ai sa tau Ieova mo ona tagata. “Ua ia faapogaia le [fenuminumiaʻi] o tagata Aikupito. Ua ia aveesea uili o a latou kariota ona tosogatā ai lea.”—Eso. 14:21-25.

¹² Ina ua taunuu ma le saogalemu le fanauga a Isaraelu i le isi itu, ona avatu lea e Ieova o le faatonuga iā Mose: “Ia faaloaloa lou lima i luga o le sami, ina ia toe foʻi mai ai le sami i luga o tagata Aikupito, o a latou kariota o le taua ma a latou ʻautau tiʻetiʻe solofanua.” A o taumafai ʻautau a Aikupito e sosola ese, ʻae ua lafo i latou e Ieova i totonu o le sami.’ Sa lē mafai ona latou sosola ese mai. “Ua leai lava ma se tasi ua totoe.” (Eso. 14:26-28) O i inei ua faaalia ai, e iai iā Ieova le mana e laveaʻiina ai ona tagata mai i so o se tulaga.

NA SOSOLA ESE NISI MAI I LE FAAUMATIAGA O IERUSALEMA

13. O ā faatonuga sa avatu e Iesu, ma o le ā atonu sa taumānatu i ai ona soo?

¹³ O le faaaʻoaʻoga lona tolu lea o le a tatou iloiloina, o le taimi sa osofaʻia ai Ierusalema e ʻautau a Roma i le uluaʻi senituri. O i inei ua faamatilatila mai ai le manatu, e silafia lelei e Ieova le auala o le a tutupu ai mea ina ia mafai ona faataunuuina lana fuafuaga. Na faaaogāina e Ieova Iesu, ina ia avatu faatonuga i Kerisiano sa nonofo i Ierusalema ma Iutaia, a o leʻi faaumatia Ierusalema i le 70 T.A. Na fetalai Iesu: “Pe a outou vaaia le mea e inosia e faatafuna aʻi, e pei ona faamatalaina e le perofeta o Tanielu, ua tū i le mea paia, . . . o ē o i Iutaia, inā sosola atu ia i mauga.” (Mata. 24:15, 16) Atonu sa taumānatu soo o Iesu i le taimi e faataunuuina ai lea valoaga.

14. O ā mea na tutupu lea sa mafai ona manino mai ai le uiga o faatonuga a Iesu?

¹⁴ Na faatoʻā manino mai le uiga o upu a Iesu, ina ua mavae le tele o tausaga talu ona ia fetalai i na upu. I le 66 T.A., na ō atu ai ʻautau a Roma i lalo o le taʻitaʻiga a Sesetia Kalusi, e taofia se fouvalega a tagata Iutaia i totonu o Ierusalema. Ina ua sosola atu nei tagata fouvale lea sa taʻua o le ʻau Selote i totonu o le malumalu mo se sulufaʻiga, ona amata lea ona faaleaga e ʻautau a Roma pā o le malumalu. Na iloa lelei e Kerisiano sa mataala le uiga o faatonuga a Iesu i mea ua amata ona tutupu. Na latou malamalama o loo faasino atu “le mea e inosia” ua tū “i le mea paia,” i ʻautau faapaupau a Roma sa tauaveina fuʻa, lea ua amata ona latou faaleagaina pa o le malumalu i Ierusalema. Ua oo nei i le taimi e tatau ai i soo o Iesu ona ʻsosola atu i mauga.’ Ae o le a faapefea ona latou ō ese mai i se aai o loo siʻomia e fili? Na iai se mea e leʻi faatalitalia o le a tupu.

15, 16. (a) O le ā le faatonuga manino na avatu e Iesu, ma aiseā sa tāua tele ai ona usitaʻia e ona soo? (e) O le ā e faalagolago i ai lo tatou laveaʻiina?

¹⁵ O le mea e faateʻia ai, na faafuaseʻi lava  ona tuumuli ese Sesetia Kalusi ma ana ʻautau mai i Ierusalema. Na tuliloaina i latou e le ʻau Selote. Ona o lea ua ō ese mai i le aai ʻautau a Roma ma tagata Iutaia fouvale, o lea la ua maua ai e soo o Iesu le avanoa e sosola ai loa. Na manino lava le faatonuga a Iesu iā i latou, ina ia tuua a latou meafaitino ma ō ese loa mai i le aai. (Faitau le Mataio 24:17, 18.) Sa tāua tele iā i latou ona usiusitaʻi i le faatonuga a Iesu ma ō ese loa. Aiseā? E leʻi umi lava ae toe foʻi ane le ʻau Selote ma amata ona faamalosia tagata sa nonofo i Ierusalema ma Iutaia, ina ia aufaatasi ma i latou i la latou fouvalega. Na fetauaʻi le tele o vaega o tagata Iutaia mo le pule, ma sa vave lava ona faateteleina le leaga o le tulaga sa iai le aai. Ua atili ai ona faigatā mo so o se tasi ona alu ese mai i Ierusalema. Ina ua toe foʻi ane ʻautau a Roma i le 70 T.A., ua leai lava se avanoa e mafai ai ona toe alu ese se isi mai i Ierusalema. (Luka 19:43) O i latou uma sa faataligatuli ma nonofo pea, sa pei ua puʻea i latou faamanu i ofaga! Ae sa faasaoina Kerisiano ia sa usiusitaʻi i faatonuga a Iesu, ma sosola i mauga. Na latou vaaitino lava i le moni o le manatu lenei, e silafia e Ieova le auala e laveaʻia ai ona tagata. O le ā se lesona e tatou te aʻoaʻoina mai i lenei tala?

¹⁶ E manaʻomia i Kerisiano ona utagia faatonuga mai le Afioga a le Atua ma Lana faalapotopotoga, pe a faagasolo le puapuaga tele. O se faataʻitaʻiga, sa faatonuina e Iesu ona soo ina ia ʻsosola atu i mauga.’ I se uiga talitutusa, o le a tatou maua foʻi faatonuga ina ia “sosola” a o faagasolo le puapuaga tele. O le a faapefea ona tatou sosola? E tatou te lē o iloa tonu le auala i le taimi lenei. * Peitaʻi, e mafai ona tatou mautinoa, e iai lava le taimi o le a faamanino mai ai e Ieova iā i tatou le uiga o na faatonuga. Talu ai e faalagolago le laveaʻiina o i tatou i lo tatou usiusitaʻi, o lea la e tatou te fesili ifo ai: ʻO le ā le auala o loo oʻu tali atu ai i faatonuga ua saunia e Ieova mo ona tagata i aso nei? Pe e vave ona ou gauaʻi i le faatonuga i le taimi lava lenā, pe faatalatū e usitaʻia?’—Iako. 3:17.

UA FAAMALOSIA I TATOU MO LE LUMANAʻI

17. O le ā se mea ua tatou aʻoaʻoina mai i le valoaga a Sapakuka e faatatau i le osofaʻiga a Koku i tagata o le Atua?

¹⁷ Seʻi o tatou toe talanoa nei i le osofaʻiga a Koku lea sa taʻua i le amataga o le mataupu. E pei ona valoia e Esekielu, na taʻua foʻi e le perofeta o Sapakuka lenā taimi e faapea: “Na ou faalogo, ona tete ai lea o loʻu moa; o le leo na gatete ai oʻu laugutu; ua oo mai ai le pala i oʻu ivi; ma na ou atuatuvale ai lava, ae e ui i lea e ao ona ou nofo filemu ma faatalitali mo le aso o le puapuaga, e alu aʻe ai o ia [le Atua] i le nuu [ʻautau faamataʻu] ina ia osofaʻia i latou.” (Sapa. 3:16) Ina ua faalogo Sapakuka o loo agaʻi atu fili e osofaʻi tagata o le Atua, na tete lona moa, tete ona laugutu, ma mou atu lona malosi. Ae e ui i lea, sa lotomalie o ia e “nofo filemu ma faatalitali” mo le aso tele o Ieova. Atonu e tatou te lagona foʻi le fefefe, pe a agaʻi mai Koku ma ana ʻau e osofaʻia i tatou. Peitaʻi, e mafai pea ona tatou maua le mautinoa e pei o Sapakuka, ma faatuatua iā Ieova o le a ia laveaʻiina ona tagata.—Sapa. 3:18, 19.

18. (a) Aiseā e lē tatau ai ona tatou fefefe pe a agaʻi mai o tatou fili e osofaʻia i tatou? (e) O le ā le fesili o le a tatou talanoaina i le mataupu o sosoo mai?

¹⁸ O faaaʻoaʻoga e tolu sa tatou iloiloina, ua faamaonia ai e aunoa ma le fesiligia, e silafia e Ieova le auala e laveaʻia ai ona tagata. E taunuu lava lana fuafuaga, ma o le a ia faatoʻilaloina ona fili. Peitaʻi, ina ia mafai ona tatou olioli faatasi i lenā manumalo faamamaluina, e tatau ona tatou tutumau pea ma le faamaoni seʻia oo i le iʻuga. E faapefea ona fesoasoani mai Ieova ina ia tatou tumau pea i le faamaoni i le taimi lenei? O le a talanoaina lenā fesili i le mataupu o sosoo mai.

[Faaopoopoga i lalo]

[Fesili mo le Suʻesuʻega]

[Ata i le itulau 24]

Pe sa iai moni lava le fanauga a Isaraelu i se tulaga lamatia mai i le ʻautau a Farao?