Mea Iloga o lo Tatou Talafaasolopito

“A o Faagasolo Taimi, ua Faatuputeleina Loʻu Fiafia mo le Galuega Colporteur”

I LE 1886, e selau kopi o le tusi Millennial Dawn, Volume I, na aveesea mai le Bible House (Fale o le Tusi Paia) i Allegheny i Pennsylvania i le Iunaite Setete, ae auina atu i Chicago i Illinois. Sa iai le faamoemoe o Charles Taze Russel e avatu nei tusi fou e faatau atu e ala i faletusi. Na malie se tasi o kamupani telē i le Iunaite Setete sa tufatufaina atu lomiga faalelotu e ave nei uta tusi. Peitaʻi, ina ua mavae le lua vaiaso, na toe faafoʻi uma ane nei uta tusi i le Bible House.

Na lē fiafia se tasi o faifeʻau lauiloa ina ua ia vaaia kopi o le Millennial Dawn, faatasi ma ana tusi i le fale tusi. Na ia faapea mai pe afai o le a iai pea nei tusi i le fale tusi, o le a latou aveesea ma isi ana aumea faifeʻau a latou tusi, ma avatu i se isi faletusi. Na toe faafoʻi ifo e le kamupani tusi o le Dawn, e ui lava na lē mananaʻo e faia faapea. Sa iai foʻi i nusipepa faasalalauga e faatatau i nei tusi. Peitaʻi na faamautinoa e ē na tetee ane le faalēaogāina o na konekarate mo le faasalalauina o tusi. O le a faapefea la ona oo atu nei tusi fou iā i latou o loo fia maua le upu moni?

O colporteurs, e pei ona iloa ai i na taimi, na avea ma vala autū i le tufaina atu o nei tusi. * I le 1881, na faalauiloa atu e le Zion’s Watch Tower le manaʻomia o ni tagata talaʻi se toʻa 1,000, e mafai ona tufatufaina atu faataimi atoa lomiga faale-Tusi Paia. E ui e na o se faitau selau na auai i lenā auaunaga, ae na latou faasalalauina atu fatu o le upu moni i le tele na mafai ai, e ala i lomiga. E oo ane i le 1897, ua toetoe tasi miliona lomiga o le Dawn ua tufatufaina atu, aemaise lava ona o le fesoasoani a colporteurs. O le toʻatele o i latou na mafai ona ola i sina tupe itiiti, na latou maua mai Watch Tower na lafo atu e ala i le meli, po o tusi foʻi na tufatufaina atu.

O ai nei colporteur lototetele? O nisi na avea o ni colporteur a o talavou, a o isi na amata ina ua matutua. O le toʻatele o i latou o ni ē nofofua a o nisi ua faaipoipo ae leʻi faia ni fanau, ma sa iai foʻi ni mātua na iai i lenā auaunaga na ō ma ave a latou fanau. O colporteurs sauatoa na galulue mo se taimi umi i le aso, a o i latou na galulue faa-vaitaimi, na galulue i le tasi i le lua itula i le aso. O le toʻatele e leʻi mafai ona auai i le galuega colporteur, ona o tulaga tau soifua mālōlōina ma isi māfuaaga. Peitaʻi i se tauaofiaga i le 1906, na faailoa atu ai iā i latou na mafai ona auai i lea vala o le auaunaga, e leʻi manaʻomia ona avea i latou o ni ē e “lelei aʻoaʻoga, talenia, pe e popoto e tautatala.”

E toetoe konitineta uma, sa faia ai e tagata lē taualoa se galuega mataʻina. Na taʻua e se tasi uso, pe ā ma le 15,000 tusi na ia tufaina i totonu o le fitu tausaga. Ae na ia faapea mai, “Ou te leʻi auai i le galuega colporteur ina ia tau ina faatauina atu tusi, ae ia molimau atu e faatatau  iā Ieova ma lana upu moni.” Po o fea lava na iai colporteurs, na mafai lava ona latou totōina fatu o le upu moni, ma faateleina ai vaega o Tagata Aʻoga o le Tusi Paia.

Na manatu faatauvaa taʻitaʻi lotu i colporteurs, ma faifai iā i latou ua na o ni ē faatau tusi. Na taʻua i se lomiga o le Watch Tower i le 1892 e faapea: “E toʻaitiiti taʻitaʻi lotu na latou iloa o le ʻau colporteurs o ni sui moni o le Alii, pe iloa le faamamaluina o nei colporteurs i le silafaga a le Alii ona o lo latou lotomaulalo ma le agaga faataulaga.” O le mea moni, o le olaga o le ʻau colporteur, “e lē o se olaga faigofie.” Sa manaʻomia seevae lelei e savavali ai, ma faaaogā uila vilivae e feoaʻi ai i le tele o taimi. I nisi taimi, ona o le itiiti o tupe sa maua e tagata, na fesuiaʻi tusi ina ia maua mai ai meaʻai. Pe a māeʻa se aso umi i le talaʻiga, e ui ina lē lavavā nei tagata talaʻi, ae lagona lava le fiafia a o toe foʻi atu i o latou faleʻie ma fale o loo mautotogi ai. Mulimuli ane na amata ona fausia Colporteur Wagons, o se taavale solofanua e pei o se kalaveni, na fausiaina ma le fuafuaga ina ia nonofo ai i totonu tagata, o se faiga na mafai ona faasaoina ai le taimi ma lē tele ai se tupe faaalu. *

Talu mai le tauaofiaga sa faia i le 1893 i Chicago, na amata ona faaaofia ai se vaega faapitoa o le polokalame mo colporteurs. Na aofia ai i na polokalame le faamatalaina o mea tutupu, fefaasoaaʻi auala ma fautuaga aogā mo le galuega. Na uunaʻia e le uso o Russell tagata talaʻi galulue mamafa ina ia iai se taumafataga lelei mo le malū taeao, ma sina ipu susu a o faagasolo le taeao, ma se aisakulimi i se aso vevela.

E faapipii e colporteurs ni lipine samasama i o latou ofu, pe a latou fia manaʻomia se paga i taimi o le tauaofiaga. E galulue foʻi colporteur fou ma i latou ua iai le poto masani. Na manaʻomia tele lenā ituaiga o toleniga, mo se faataʻitaʻiga, o le popole tele o se colporteur fou na ia ofoina atu ai ni tusi, ma faapea atu i lē e ona le fale: “E te lē manaʻo i tusi nei, a ea?” O le mea e fiafia ai, na talia e lē ona le fale tusi, ma avea mulimuli ane o ia ma se tuafafine.

Na taʻua e se tasi uso, ʻPe tatau ona ou tumau i laʻu galuega totogi lelei o loo iai ma foaʻi atu le $1,000 (tupe Amerika) i tausaga taʻitasi mo le galuega talaʻi, po o le avea o aʻu ma se colporteur?’ Ae na fai atu se tasi iā te ia, atonu e talisapaia e le Alii na mea uma e lua, peitaʻi o le ofoina atu o lona taimi mo le Alii o le a ia mauaina ai ni faamanuiaga silisili. Na vaai Mary Hinds i le galuega colporteur o le “auala sili e faia ai mea lelei mo le toʻatele o tagata.” Na taʻua e Alberta Crosby o sē matamuli e faapea, “A o faagasolo taimi, ua faatuputeleina loʻu fiafia mo le galuega colporteur.”

O le toʻatele o nei colporteur ua fai fanau, faatasi ma isi na mafai ona latou fesoasoani ai e mauaina le upu moni, ua pei o ni a latou fanau faaleagaga, ma o loo faatāua pea e le toʻatele o i latou lo latou tofi faaleagaga na maua mai nei colporteur maelega. Pe afai e leai se tasi mai lou ʻauaiga na auai i le auaunaga colporteur po o le auaunaga faapaeonia, aiseā e lē avea ai loa oe ma tagata muamua o lou aiga e avea ma paeonia? A o faagasolo taimi, o le a amata ona e lagona le fiafia i le galuega talaʻi faataimi atoa.

[Faaopoopoga i lalo]

[Faamatalaga faaopoopo i le itulau 32]

E leʻi manaʻomia ona avea i latou o ni ē e “lelei aʻoaʻoga, talenia, pe e popoto e tautatala”

[Ata i le itulau 31]

Colporteur A. W. Osei i Ghana, pe tusa o le 1930

[Ata i le itulau 32]

Luga: O colporteurs o Edith Keen ma Gertrude Morris i Egelani, pe tusa o le 1918; lalo: Stanley Cossaboom ma Henry Nonkes i le Iunaite Setete, ma atigi pusa sa iai tusi ua māeʻa ona tufaina atu