Po o E Faaatagia Atu le Mamalu o Ieova?
Po o E Faaatagia Atu le Mamalu o Ieova?
ʻE tatou te faaatagia atu le mamalu o Ieova e pei o ni faata.’—2 KORI. 3:18.
O LE Ā LAU TALI?
E ui lava i lo tatou tulaga agasala, e faapefea ona tatou faamamaluina Ieova?
E faapefea i a tatou tatalo ma le auai i sauniga faa-Kerisiano, ona fesoasoani iā i tatou e faaatagia atu le mamalu o le Atua?
O le ā e fesoasoani iā i tatou ina ia faaauau pea ona faamamaluina Ieova?
1, 2. Aiseā e mafai ai ona tatou faaatagia atu uiga o Ieova?
E TELE vala e mafai ai ona pei i tatou o o tatou mātua. O lea la, e lē faateʻia i tatou pe a faapea atu se tasi i se tamaitiiti, ʻE te soo uma lava i lou tamā.’ Pe fai atu foʻi i se teineitiiti, ʻE te soo uma lava i lou tinā.’ E masani foʻi ona faataʻitaʻia e fanau mea e latou te mātauina o loo faia e o latou mātua. Ae e faapefea i tatou? Pe e mafai ona tatou faataʻitaʻi i lo tatou Tamā faalelagi, o Ieova? E ui e tatou te lē vaaia o ia, ae e mafai ona tatou malamalama i ona uiga tautele e ala i le suʻesuʻeina o lana Afioga, mātauina o lana foafoaga, ma manatunatu loloto i le Tusi Paia, aemaise lava fetalaiga ma gaoioiga na faia e le Alo o le Atua, o Iesu Keriso. (Ioa. 1:18; Roma 1:20) E mafai foʻi ona tatou faaatagia atu le mamalu o Ieova.
2 A o leʻi foafoaina Atamu ma Eva, sa silafia e le Atua e mafai e tagata ona faataunuuina lona finagalo mo i latou, faaatagia mai ona uiga, ma faamamaluina ai o ia. (Faitau le Kenese 1:26, 27.) I le faataunuuina o lo tatou tuutoina atu i le Atua, e tatau ona tatou faaalia atu uiga o Lē na foafoaina i tatou. O lo tatou faia faapea, ua iā i tatou se faaeaga e faaatagia atu le mamalu o le Atua e tusa lava po o ā a tatou aganuu, tulaga tau aʻoaʻoga, po o o tatou tupuaga. Aiseā? Ona “e lē faailogaina tagata e le Atua, ae o lē e mataʻu iā te ia i nuu uma lava, ma fai le amiotonu, e talia e ia.”—Galu. 10:34, 35.
3. O ā o tatou faalogona a o tatou auauna atu iā Ieova?
3 O loo faaatagia mai e le vaega faauuina le mamalu o Ieova. Na tusi le aposetolo o Paulo o se tasi o lenā vaega e faapea: “O i tatou uma, a o atagia atu i o tatou foliga e lē ufiufia le mamalu o Ieova e pei o ni faata, ua liua i tatou i foliga lava na mai i le mamalu e oo ina atili mamalu ai.” (2 Kori. 3:18) Ina ua alu ifo Mose mai le mauga o Sinai ma papamaa sa iai Tulafono e Sefulu, na susulu mai le malamalama i ona foliga, auā na la talanoa ma Ieova. (Eso. 34:29, 30) E ui lava e leʻi tupu se mea faapena i Kerisiano, pe pupula atu o latou foliga e pei o Mose, ae e mafai ona atagia atu i o latou foliga le fiafia pe a faailoa atu i isi mea e faatatau iā Ieova, o ona uiga, ma lana fuafuaga matagofie mo le fanau a tagata. E pei o le iila mai o se faata pe a sulugia e le malamalama, ua faapena foʻi ona faaatagia atu e le vaega faauuina ma a latou aumea e faamoemoe e ola i le lalolagi, le mamalu o Ieova i o latou olaga ma la latou faiva. (2 Kori. 4:1) Po o e faaatagia atu le mamalu o Ieova i le faamalieina o ia i le auala o loo e ola ai, ma faia sou sao e lē aunoa i le galuega talaʻi?
E TATOU TE NAUNAU E FAAATAGIA ATU LE MAMALU O IEOVA
4, 5. (a) I le pei o Paulo, o le ā le tauiviga o loo tatou fesagaʻia? (e) O le ā le aafiaga o le agasala iā i tatou?
4 I le avea ai o i tatou ma auauna a Ieova, e tatou te naunau e faapaia ma faamamaluina Lē na foafoaina i tatou i mea uma e tatou te faia. Peitaʻi, i le tele o taimi, o mea e tatou te faanaunau e fai, e lē o mea ia e tatou te faia. Na fesagaʻia foʻi e Paulo lenā faafitauli. (Faitau le Roma 7:21-25.) Na faamatala manino mai e Paulo le māfuaaga ua māfua ai ona tatou tauivi ma o tatou faanaunauga agasala: “Ua agasala tagata uma lava, ma ua lē ausia le mamalu o le Atua.” (Roma 3:23) Ona o le agasala a Atamu, ua avea ai tagata uma ma pologa i le agasala, ma ua pule ai le agasala e pei o se tupu leaga.—Roma 5:12; 6:12.
5 O le ā le agasala? O so o se mea e feteenaʻi ma uiga o Ieova, o ona ala, tapulaa, ma lona finagalo. Ua faaleagaina e le agasala le faiā lelei a se tagata ma Ieova. Ona o le agasala, ua faafaigatā ai iā i tatou ona faaatagia atu le mamalu o Ieova, e tai pei o se mea ua faafaigatā ai i se tagata fanafana ū ona fana saʻo atu lana ū i le mea e tatau ona fana i ai. E iai taimi e tatou te faia ai se agasala ma le loto iai, ae o nisi taimi e tatou te faia ai se agasala e leʻi mafaufauina. (Nu. 15:27-31) Ua iai se aafiaga malosi o le agasala i tagata, ma ua vavaeeseina ai i latou mai Lē na foafoaina mea. (Sala. 51:5; Isa. 59:2; Kolo. 1:21) Ona o lenā tulaga, ua lē ola ai le toʻatele o tagata e tusa ma le finagalo o Ieova, ma lafoaʻia ai le avanoa e faaatagia atu ai le mamalu o le Atua. E lē fesiligia le mea moni, ua telē se aafiaga leaga o le agasala i le fanau a tagata.
6. E ui lava i lo tatou tulaga agasala, ae e faapefea ona tatou faaatagia atu le mamalu o le Atua?
6 E ui lava i lo tatou tulaga agasala, ae ua faamaonia e Ieova o ia o “le Atua e aumaia ai le faamoemoe.” (Roma 15:13) Ua ia saunia le auala e aveesea ai le agasala, e ala i le taulaga togiola a Iesu. E ala i le faatuatua i lenā togiola, ua lē toe “faapologaina ai i tatou i le agasala,” peitaʻi ua mafai ai ona tatou faaatagia atu le mamalu o Ieova. (Roma 5:19; 6:6; Ioa. 3:16) O le faatumauina o lenā faiā lelei ma le Atua, o le a tatou mautinoa ai i faamanuiaga a Ieova i le taimi lenei, ma le mauaina o le tulaga lelei atoatoa ma le ola e faavavau i le lumanaʻi. E ui o loo avea pea i tatou ma tagata agasala, ae o se faaeaga le mātauliaina o i tatou taʻitoʻatasi e le Atua o ni ē e mafai ona faaatagiaina atu lona mamalu.
FAAATAGIA ATU LE MAMALU O LE ATUA
7. O le ā le mea e tatau ona tatou iloa e faatatau iā i tatou lava, ina ia mafai ai ona tatou faaatagia atu le mamalu o le Atua?
7 Ina ia tatou iai i se tulaga e mafai ona faaatagia atu ai le mamalu o le Atua, e tatau ona tatou iloa lelei lo tatou tulaga agasala. (2 No. 6:36) E manaʻomia ona tatou amanaʻia o tatou vaivaiga ma taumafai e pulea, ina ia mafai ai ona tatou matuā faaatagia atu le mamalu o le Atua. O se faataʻitaʻiga, pe a tatou lolo atu i le agasala o le matamata i ata ma faiga matagā tau feusuaʻiga, e tatau ona tatou amanaʻia le mea moni o loo tatou manaʻomia se fesoasoani faaleagaga—ma fai taumafaiga ina ia maua lenā fesoasoani. (Iako. 5:14, 15) O le gaoioiga muamua lenei e tatau ona tatou faia, pe afai e tatou te mananaʻo e faamamaluina le Atua i o tatou olaga. I le avea ai ma tagata tapuaʻi o Ieova, e tatau ona tatou faia pea se iloiloga o i tatou lava, ina ia faamautinoa o loo tatou ola e tusa ma ana tapulaa. (Faata. 28:18; 1 Kori. 10:12) Po o ā lava o tatou vaivaiga, e tatau ona tatou tauivi e puleaina, ina ia mafai ai ona tatou faaatagia atu le mamalu o le Atua.
8. O le ā e tatau ona tatou faia, e ui lava e tatou te lē lelei atoatoa?
8 E na o Iesu le tagata na soifua mai, na taulau i le faamalieina o le finagalo o le Atua, ma faaatagia atu Lona mamalu i taimi uma o lona soifuaga, seʻia oo lava i lona maliu. E ui e tatou te lē lelei atoatoa, ae e tatau ona tatou taumafai malosi e mulimuli i le faaaʻoaʻoga a Iesu. (1 Pete. 2:21) E silafia e Ieova a tatou taumafaiga ma faaleleiga o loo tatou faia, ma e na te faamanuiaina lo tatou faanaunauga e faamamaluina o ia.
9. O le ā le fesoasoani a le Tusi Paia i le olaga o se Kerisiano, o loo faanaunau e ola e tusa ma le finagalo o le Atua?
9 E fesoasoani le Afioga a le Atua e faamalamalamaina ai o tatou ala, ina ia mafai ai ona tatou faia ni faaleleiga. E tāua lo tatou suʻesuʻe ma manatunatu loloto i le Tusi Paia. (Sala. 1:1-3) O le faitauina o le Tusi Paia i aso taʻitasi, e fesoasoani iā i tatou e faia ai ni faaleleiga i o tatou olaga. (Faitau le Iakopo 1:22-25.) O le poto mai le Tusi Paia, o le faavae lea o lo tatou faatuatua, ma o se auala e faamalosia ai lo tatou maumauaʻi e ʻalofia le faia o se agasala matuiā, ma faafiafiaina ai Ieova.—Sala. 119:11, 47, 48.
10. E faapefea i le tatalo ona faaleleia ai la tatou auaunaga iā Ieova?
10 Ina ia faaatagia atu le mamalu o Ieova, e manaʻomia foʻi ona tatou “finafinau i le tatalo.” (Roma 12:12) E tatau ma e mafai ona tatou tatalo atu iā Ieova e fesoasoani mai iā i tatou, ina ia mafai ai ona tatou auauna atu iā te ia i le auala e na te taliaina. I le faia faapea, e tatou te talosaga atu mo le agaga paia, ia faatuputeleina lo tatou faatuatua, ma faamalosia i tatou e teena faaosoosoga, ma le tomai e ʻtaulimaina ai ma le saʻo le upu moni.’ (2 Timo. 2:15; Mata. 6:13; Luka 11:13; 17:5) E pei ona faalagolago se tamaitiiti i lona tamā, e tatau foʻi ona tatou faalagolago atu i lo tatou Tamā faalelagi, o Ieova. Afai e tatou te talosaga atu iā te ia e fesoasoani mai iā i tatou ina ia faaleleia la tatou auaunaga iā te ia, e tatou te mautinoa o le a ia faia faapea. Aua lava neʻi o tatou manatu o loo tatou faalavelave atu iā te ia. Nai lo o lea, pe a tatou tatalo, ia tatou viia o ia, faafetai atu iā te ia, ma saʻilia lana fesoasoani aemaise lava pe a tatou fesagaʻia tofotofoga, ma talosaga atu iā te ia e fesoasoani mai iā i tatou e auauna iā te ia i auala e faamamaluina ai lona suafa paia.—Sala. 86:12; Iako. 1:5-7.
11. E faapefea ona fesoasoani sauniga iā i tatou ina ia faaatagia atu le mamalu o le Atua?
11 Ua maufaatuatuaina e le Atua “le pologa faamaoni ma le faautauta,” e tausia ana mamoe peleina. (Mata. 24:45-47; Sala. 100:3) O loo matuā naunau le vasega o le pologa e fesoasoani i o latou uso talitonu, ina ia faaatagia atu le mamalu o Ieova. Ua fesoasoani sauniga iā i tatou o ni Kerisiano i le auala e tatou te faia ai ni fetuutuunaʻiga i o tatou olaga, e pei ona teuteuina e se tagata suʻisuʻi o se laʻei ina ia tatou onomea atili ai. (Epe. 10:24, 25) O le māfuaaga lea e tāua tele ai ona tatou vave taunuu a o leʻi amataina sauniga. Afai e fai ma a tatou masaniga le tuai i sauniga, o le a tatou lē maua foʻi aogā atoatoa mai na sauniuniga.
IA TATOU FAAAʻOAʻO I LE ATUA
12. E faapefea ona tatou faaaʻoaʻo i le Atua?
12 Ina ia mafai ona tatou faaatagia atu le mamalu o Ieova, e tatau ona avea i tatou o ni ē e “faaaʻoaʻo i le Atua.” (Efe. 5:1) O se tasi o auala e tatou te faaaʻoaʻo ai iā Ieova, o lo tatou taumafai lea e vaai i mea e pei ona silasila i ai Ieova. Pe a tatou taumafai e fai mea i la tatou lava auala ae lē tusa ma le finagalo o Ieova, ua tatou lē faamamaluina la o ia, ma aafia ai i faafitauli. Ona ua matuā aafia le lalolagi o loo siʻomia ai i tatou i aafiaga a lē o loo leaga, o Satani le Tiapolo, ua tatau ai ona tatou taumafai malosi e ʻinoʻino i mea e inosia e Ieova, ae fiafia i mea e fiafia i ai o ia. (Sala. 97:10; 1 Ioa. 5:19) E tatau ona tatou talitonu maumauaʻi, e pau le auala talafeagai e tatou te auauna ai iā Ieova, o le faia o mea uma e faamamaluina ai o ia.—Faitau le 1 Korinito 10:31.
13. Aiseā e tatau ai ona tatou ʻinoʻino i le agasala, ma o le ā ua uunaʻia i tatou e fai?
13 E tatau ona tatou ʻinoʻino i le agasala, ona e ʻinoʻino Ieova i le agasala. Afai e tatou te ʻinoʻino i le agasala, o le a tatou taumafai ai e ʻalofia so o se mea e tatou te ono faia ai se agasala. O se faataʻitaʻiga, e lē tatau ona tatou lolo atu i manatu o ē ua liliuese mai le upu moni, o se agasala e lē faamamaluina ai le Atua. (Teu. 13:6-9) O lea, seʻi o tatou ʻalofia so o se sootaga ma i latou ua liliuese mai le upu moni, po o se tasi foʻi ua faapea mai o se uso, ae e na te lē o faamamaluina le Atua. E tatau foʻi ona tatou ʻalofia i latou, e tusa lava po o ni o tatou tauʻaiga. (1 Kori. 5:11) E tatou te lē mauaina ni aogā pe a tatou taumafai e tali atu i ni tuuaʻiga sesē a i latou ua liliuese mai i le upu moni, po o ni faamatalaga taufaaleaga a nisi tagata e faatatau i le faalapotopotoga a Ieova. O le mea moni, o se mea lē atamai ma lamatia ai lo tatou itu faaleagaga pe a tatou taumafai e iloa a latou faamatalaga, i so o se auala lava, e ala mai i a latou tusitusiga po o luga foʻi o le Initaneti.—Faitau le Isaia 5:20; Mataio 7:6.
14. Pe a tatou taumafai e faaatagia atu le mamalu o le Atua, o le ā le uiga e ao ona mātaulia ai i tatou, ma aiseā?
14 O se tasi o auala tāua e faaaʻoaʻo ai i lo tatou Tamā faalelagi, o le faaalia atu lea o le alofa. Ioe, ina ia pei o ia e tatau ona iā i tatou uiga agaalofa. (1 Ioa. 4:16-19) O le mea moni, o le alofa o loo tatou faaalia i le tasi i le isi ua mātaulia ai i tatou o ni soo o Iesu, ma o ni auauna a Ieova. (Ioa. 13:34, 35) O nisi taimi e faigatā ona tatou faaalia atu le alofa ona o lo tatou tulaga lē lelei atoatoa. Peitaʻi, e tatau ona tatou taumafai pea e faaalia atu le alofa i taimi uma. O a tatou taumafaiga e faaalia atu le alofa faatasi ai ma isi uiga faa-Kerisiano, o le a fesoasoani iā i tatou e ʻalofia ai le faia o le agasala ma isi gaoioiga lē alofa.—2 Pete. 1:5-7.
15. E faapefea i le alofa ona aafia ai a tatou faiā ma isi?
15 O le alofa e uunaʻia ai i tatou e faia mea lelei mo isi. (Roma 13:8-10) O se faaaʻoaʻoga, o le alofa mo a tatou paaga faaipoipo, o le a faaalia ai pea le faamaoni o le tasi i le isi. O lo tatou alolofa mo toeaina ma le talisapaia o a latou galuega, o le a fesoasoani iā i tatou e usiusitaʻi ma gauaʻi ai i la latou taʻitaʻiga. O fanau e alolofa i o latou mātua, e usiusitaʻi ma faaaloalo iā i latou, ma e latou te lē faia i isi ni tala taufaaleaga e faatatau i o latou mātua. Afai e tatou te alolofa i isi tagata, o le a tatou lē vaai maualalo ai iā i latou, pe tautatala atu iā i latou i se auala lē faaaloalo. (Iako. 3:9) O toeaina e alolofa i mamoe a Ieova, o le a latou tausia i latou i se auala faapelepele.—Galu. 20:28, 29.
16. E faapefea i le faaalia atu o le alofa ona fesoasoani iā i tatou i la tatou faiva?
16 E tatau ona matilatila atu le uiga o le alofa i la tatou faiva. Ona o lo tatou alofa loloto mo Ieova, o le a tatou lē faavaivai ai, pe a lē ano ma lē fiafia mai nisi tagata i le oganuu. Nai lo o lea, o le a faaauau ona tatou talaʻia atu pea le tala lelei o le malo. O le alofa o le a uunaʻia ai i tatou e sauniuni lelei ma taumafai ia uigā la tatou faiva. Afai e tatou te alolofa moni i le Atua ma o tatou tuaoi, o le a tatou lē vaai ai i le galuega talaʻi o le Malo o se galuega e tau ina fai. Nai lo o lea, ia tatou manatu iai o se faaeaga tautele e manaʻomia ona tatou faataunuuina ma le olioli.—Mata. 10:7.
IA FAAAUAU PEA ONA FAAMAMALUINA IEOVA
17. O le ā le aogā o lo tatou iloaina, e lē mafai ona tatou faaatagia atoatoa le mamalu o le Atua?
17 E lē malamalama tagata o le lalolagi i aafiaga leaga o le agasala, peitaʻi e ese mai ai i tatou. E fesoasoani lenā ia i tatou e tauivi ai ma o tatou faanaunauga agasala. O lo tatou iloaina o le manaʻoga ia toleniina o tatou lotofuatiaifo, o le a fesoasoani ai iā i tatou e faia le mea saʻo, pe a amata ona faaosoosoina i tatou e faia se mea sesē. (Roma 7:22, 23) E moni e tatou te vaivai ona o lo tatou tulaga faaletagata, peitaʻi e mafai e le Atua ona faamalosia i tatou e faia le mea saʻo i so o se tulaga.—2 Kori. 12:10.
18, 19. (a) O le ā e fesoasoani iā i tatou ina ia taulau manuia, e tetee atu faasaga iā Satani ma ana temoni? (e) O le ā e tatau ona tatou maumauaʻi e fai?
18 Ona o lo tatou faanaunauga e faamamaluina Ieova, e tatau la ona tatou tau faasaga atu iā Satani ma ana temoni. O lo tatou ofutau faaleagaga mai le Atua e fesoasoani iā i tatou ina ia taulau manuia ai. (Efe. 6:11-13) O loo taumafai pea Satani e faoa le mamalu e na o Ieova e onomea ma tatau i ai. Ae i le taimi e tasi, o loo faia pea taumafaiga a Satani e faaleagaina la tatou faiā ma le Atua. Maʻeu se toʻilalopopo mo Satani, pe a tatou tutumau i le faamaoni faatasi ma le faitau miliona o isi tagata lē lelei atoatoa, ma faamamaluina ai le Atua! O lea la, seʻi o tatou faaauau pea ona viia Ieova, e pei o foafoaga agaga i le lagi o loo alalaga atu: “Ieova e, lo matou Atua, ua tatau lava oe ona e mauaina le viiga, ma le mamalu, ma le mana, auā na e foafoaina mea uma lava, ma o lou finagalo foʻi ua iai nei mea ma na foafoaina ai.”—Faaa. 4:11.
19 O lea, seʻi faaauau pea ona iai so tatou faanaunauga malosi e faamamaluina Ieova. E mautinoa le fiafia o lona finagalo, a o ia mātauina mai le toʻatele o ana auauna taʻitoʻatasi, o loo fai le mea sili e gata mai ai lo latou mafai e faaaʻoaʻo atu iā te ia, ma faaatagia atu lona mamalu. (Faata. 27:11) Tau ina iā i tatou le lagona sa iā Tavita, o lē na pese: “Ieova e, loʻu Atua, ou te faaneenee atu iā te oe ma loʻu lotoatoa, ou te faamamaluina foʻi lou suafa i aso uma lava.” (Sala. 86:12) E tatou te moomoo mo le taimi o le a atoatoa ai ona tatou faaatagia atu le mamalu o Ieova, ma viia o ia e faavavau. O se vaitaimi lenā e sili ona fiafia mo le fanau a tagata usiusitaʻi e soifua ai. Po o e faaatagia atu le mamalu o Ieova le Atua i le taimi lenei, ma le faamoemoe e faia faapea seʻia oo i le faavavau?
[Fesili mo le Suʻesuʻega]
[Ata i le itulau 27]
Po o e faaatagia atu le mamalu o Ieova i auala nei?
