O María Isabel o se talavou e maelega i le galuega talaʻi. E nofo i le aai o San Bernardo i Chile, i Amerika i Saute. O lona aiga o ni tagata o le ituaiga o Mapuche. E matuā lagolagoina e lona aiga taumafaiga ina ia faatū se faapotopotoga fou i le gagana Mapuche, lea e taʻua o le Mapudungun.

Sa manatunatu María i sana gaoioiga o le a fai, ina ua faasilasila o le a faia le Faamanatuga i le gagana Mapudungun, ma o le a tufatufaina ai valaaulia e 2,000. E na te manatuaina iʻuga lelei sa maua e isi talavou na molimau atu i tamaiti aʻoga ma faiaʻoga. O lea, na ia talatalanoa ai loa i ona mātua, ma mafaufau i se auala e tufatufaina ai nei valaaulia i le aʻoga.

Sa talosaga muamua María Isabel i le pule aʻoga mo le faatagaga, e faapipii ai se pepa valaaulia i le faitotoʻa e ulufale atu ai i le aʻoga. Na talia le talosaga, ma sa faafetaia o ia ona o lona mataalia i le faia o galuega lelei. Na faasilasila e le pule aʻoga le pepa valaaulia, ina ua fai le tauvalaauga a le aʻoga i se tasi taeao.

Sa talia lana talosaga e asiasi atu i vasega taʻitasi, ma na ia saʻilia foʻi ni tamaiti Mapuche. Na ia faapea mai: “Sa ou manatu, atonu e na o se toʻa 10 pe 15 tamaiti Mapuche i le aʻoga atoa. Ae na faatoʻā ou iloa mulimuli ane e toʻatele i latou, ma e 150 valaaulia sa ou tufatufaina.”

Sa faitauina e se tasi o fafine le valaaulia sa faapipii i le faitotoʻa o le aʻoga. O lea, sa ia saʻilia ai se tasi e na te faamatalaina le uiga o lenei sauniga faapitoa. E leʻi mafaufau le fafine o le a ia talanoa i se teineitiiti e 10 tausaga. Na faapea mai María Isabel, na faatalitalia e le fafine o le a ia talanoa i se tagata matua. E ui i lea, sa la talatalanoa puupuu e faatatau i le valaaulia. Na fesiligia foʻi e María le mea e nofo ai le fafine, ina ia mafai ona latou toe asia ma ona mātua o ia, ma talanoa atili ai e faatatau i le Malo o le Atua. Na matuā faafiafiaina tagata talaʻi e toʻa 20 e tautatala i le gagana Mapudungun, ina ua vaaia i le Faamanatuga, lea fafine faatasi ai ma isi tagata Mapuche e toʻa 26. O loo olaola pea lenei faapotopotoga!

Pe e pei i tatou o lenei talavou i le mataalia e faia galuega lelei? Pe mafai ona tatou valaaulia ē tatou te aʻoʻoga pe faigaluega faatasi i le Faamanatuga, lauga lautele, pe i se tauaofiaga foʻi? O le suʻesuʻe loloto i a tatou lomiga, o le a maua ai auala e faia ai faapea. Ia talosaga foʻi mo le agaga paia o Ieova, e maua ai le lototele e talanoa atu i isi e faatatau iā te ia. (Luka 11:13) O le a tauia au taumafaiga pe a e faia faapea, ma o le a faalaeiauina ai oe.