1-3. O ā aogā o le faitau ma le faatatauina o aʻoaʻoga mai le Tusi Paia?

E TALISAPAIA e se tasi tuafafine matua le fesoasoani a Ieova, ua mafai ai ona ia malamalama i le Tusi Paia. Ua silia ma le 40 taimi o ia faitauina le Tusi Paia atoa, ma o loo faaauau pea. Na taʻua e se tuafafine talavou, e aogā le faitauina o le Tusi Paia i le atiaʻeina o se faiā māfana ma Ieova, ma maua ai se olaga fiafia.

² Ua uunaʻia i tatou e Peteru ina ia naunau i le upu moni mai le Afioga a le Atua. (1 Pete. 2:2) E faamalieina lenā faanaunauga pe a suʻesuʻe ma faatatau aʻoaʻoga mai le Tusi Paia. E maua ai se lotofuatiaifo mamā, olaga e iai se fuafuaga, faapea ni faauōga tumau ma ē e alolofa ma auauna iā Ieova. O māfuaaga na e tatou te ʻnaunau ai i le tulafono a le Atua’ e pei ona taʻua i le Roma 7:22. Peitaʻi, e iai foʻi isi aogā.

³ E tuputupu aʻe lo tatou alofa iā Ieova ma lona Alo faapea isi tagata, pe a aʻoaʻoina pea e faatatau iā i laʻua. E tatou te iloa ai le auala e laveaʻia ai e Ieova tagata usiusitaʻi mai lenei lalolagi amioleaga. E iai se tala lelei e manaʻomia ona faalauiloa atu. O lea, e fesoasoani mai Ieova iā i tatou, a o tatou aʻoaʻoina isi i aʻoaʻoga moni mai le Tusi Paia.

4. O le ā le uiga o le ʻfaitauina lē leoa’ o le Tusi Paia?

⁴ E finagalo Ieova e tatou te manatunatu loloto ma malamalama i mea o loo faitauina i le Tusi Paia. Na ia fetalai iā Iosua e faapea: “Aua neʻi teʻa ese lenei tusi o le tulafono mai i lou gutu, ae ia e  faitau lē leoa i ai i le ao ma le pō.” (Iosua 1:8; Sala. 1:2) E lē o uiga atu lenei mau i le faitauina leotele o le Tusi Paia atoa. Nai lo lea, e tatau ona faitau lemū i se auala e mafai ai ona manatunatu loloto i mea o loo faitauina. E mafai ai ona pāʻia lou loto ma uaʻi atu ai i se manatu e aogā ma faalaeiauina ai oe. O le faia faapea, e uunaʻia malosi ai oe e faatatauina fautuaga mai le Tusi Paia.

5-7. O ā auala e fesoasoani ai le faitauina lē leoa o le Tusi Paia (i) i le ʻalofia o le solia o tapulaa tau amio a Ieova; (ii) feagai ma isi i se auala agalelei; (iii) maufaatuatuaina o Ieova i tulaga faigatā?

⁵ E aogā le faitau lē leoa o le Tusi Paia, pe a iai ni mau e faigatā ona malamalama i ai. O se faataʻitaʻiga, ua oo le faitauga Tusi Paia a se uso talavou i le Hosea mataupu e 4. Ina ua māeʻa ona faitauina le fuaiupu e 11 e oo i le 13, ona ia manatunatu loloto lea i ai. (Faitau le Hosea 4:11-13.) E fetaui lelei na fuaiupu ma le tofotofoga o loo ia fesagaʻia i le aʻoga, o le faia o amioga lē mamā. Ua iloa e le uso e leai se mea e lilo i le silafaga a Ieova, ma e lē manaʻo foʻi e faatigā lona finagalo. O le māfuaaga lea e filifili ai e lē solia tapulaa tau amio a Ieova.

⁶ O se isi faataʻitaʻiga, ua oo le faitauga Tusi Paia a se tuafafine i le Ioelu 2:13. (Faitau.) Ua ia manatunatu loloto i le auala e faaaʻoaʻo ai iā Ieova, o lē e “alofa fua ma alofa mutimutivale, e telegese lona toʻasā ma e tele lona alofa faamaoni.” O lea, ua ia taumafai ai e ʻalofia le faia o tala tutui ma faatigā i lana tane, faapea ma isi.

⁷ Lona tolu, o se tamā Kerisiano o loo saʻilia se galuega e tausi ai lona aiga. Peitaʻi, na faamāfanafanaina o ia ma lona aiga i le manatu o loo i le Nauma 1:7 e faapea, ʻe silafia e Ieova i latou e sulufaʻi atu iā te ia,’ ma o ia “o le lafitaga malosi i aso o le puapuaga.” Ona ia faitauina lē leoa lea o le fuaiupu e 15. (Faitau.) Na saʻilia pea se galuega a le uso. Peitaʻi na avea Ieova ma ona lafitaga e ui i faigatā, e ala i le faia pea o sona sao i le talaʻiga i le vaiaso.

8. Faamatala puupuu se ʻoa tautele faaleagaga na e maua i lau faitauga Tusi Paia.

⁸ E tele manatu faalaeiau e maua mai i tusi a Hosea, Ioelu, ma Nauma, pe a faitau lē leoa ma manatunatu loloto i ai. E ono manatu nisi e faigatā ona malamalama i ai. Peitaʻi, ua faatusaina le Afioga a le Atua i se laufanua e tele ai taimane. Ina ia maua le taʻitaʻiga ma faalaeiauga, e tatau ona galueaʻiina lenā laufanua, pe faitauina le Tusi Paia atoa.

9. E faapefea ona faalautele lo tatou iloa e faatatau i le Tusi Paia?

⁹ E tāua le faitauina i aso taʻitasi o le Tusi Paia, faapea foʻi le mauaina o le malamalama ma le tofā mamao. O lea, ia faaaogā lelei lomiga e suʻesuʻe atili ai e faatatau i tagata, nofoaga, ma mea na tutupu. Ia saʻilia foʻi le fesoasoani a se toeaina po o se Kerisiano taʻumatuaina, ina ia iloa le auala e faatatau ai se aʻoaʻoga a le Tusi Paia. O lea, seʻi o tatou iloilo le faaaʻoaʻoga a Apolo, o sē na filigā e faalautele lona malamalamaga.

10, 11. (i) Na faapefea ona faaleleia atili le aʻoaʻo atu a Apolo? (ii) O le ā e tatou te aʻoaʻoina mai iā Apolo? (Tagaʻi i le pusa “Po ua E Mauaina le Malamalamaga Saʻo?”)

 ¹⁰ I le Galuega 18:24-26, o loo faamatalaina ai Apolo o se Kerisiano Iutaia e ʻmauupu ma poto i Tusitusiga Paia, ma ua tumu i le agaga. Ua ia tautala ma aʻoaʻo atu ma le saʻo mea e uiga iā Iesu, ae e na o le papatisoga a Ioane na ia iloa.’ Sa ia aʻoaʻoina le malamalamaga tuai e faatatau i le papatisoga e aunoa ma lona iloaina. A o iai Pisila ma Akula i Efeso, sa la faalogologo ai o aʻoaʻo atu Apolo. O lea, na laʻua faamalamalama atu ma ʻle saʻo iā te ia ala o le Atua.’ Na faapefea ona fesoasoani na faamatalaga iā Apolo?

¹¹ Na tuua e Apolo Efeso ae agaʻi atu i Akaia, lea na ia ʻfesoasoani ai iā i latou ua talitonu, ona o le agalelei faifua o le Atua. Ua ia matuā faamaonia le sesē o tagata Iutaia i luma o le nuu, a o ia faaalia mai i Tusitusiga Paia, o Iesu o le Keriso lea.’ (Galu. 18:27, 28) O le malamalamaga fou na maua e Apolo, sa mafai ai ona ia faamatala ma le saʻo le uiga o le papatisoga faa-Kerisiano. Na ia “fesoasoani” i ē fou e agaʻigaʻi pea i luma i le tapuaʻiga moni. Ia tatou taumafai e faalautele lo tatou malamalamaga i mea o loo faitau i ai i le Tusi Paia. Peitaʻi, e tatau foʻi ona tatou naunau e faaleleia la tatou auaunaga. O lea, pe a maua fautuaga i le auala e faaleleia ai la tatou aʻoaʻo atu, e tatau ona tatou lotofaafetai ma taliaina ma le lotomaulalo.

12, 13. E faapefea ona fesoasoani le faaaogāina ma le faautauta o le Tusi Paia i le itu faaleagaga o se tagata suʻesuʻe?

¹² E te lagona le olioli pe a fesoasoani au upu faalaeiau i se tasi e malosi ai pea faaleagaga. Pe afai o oe o se toeaina, e te lagona le fiafia pe a faafetai atu se tasi i faalaeiauga na fesoasoani iā te ia i taimi faigatā. I le pei o Pisila, Akula ma Apolo, e tatou te faaaogā le Tusi Paia e fesoasoani ai i isi e faaleleia o latou olaga. O le faia faapea, e tatou te maua ai le faamalieina faapea le olioli. * E faapefea ona faaaogā le Tusi Paia e fesoasoani ai i isi?

¹³ Sa avatu e Elia se fautuaga i le toʻatele o tagata Isaraelu sa lē mautonu, po o ai e tatau ona tapuaʻi i ai. E aogā foʻi lenā fautuaga i se tagata suʻesuʻe e lē o mautonu, ma taofia ai lona agaʻigaʻi i luma faaleagaga. (Faitau le 1 Tupu 18:21.) E mafai ona e faalaeiauina se tagata suʻesuʻe e faamaoni pea iā Ieova e ui i teteega, e ala i le talanoaina o le Isaia 51:12, 13.​—Faitau.

14. E faapefea ona e manatuaina mau o le Tusi Paia?

¹⁴ O loo iai i le Tusi Paia faalaeiauga ma aʻoaʻiga. Peitaʻi, e faapefea ona tatou manatuaina mau o le Tusi Paia? E tatau ona faitau i aso taʻitasi le Tusi Paia ma manatunatu loloto i ai. O le faia faapea, o le a fesoasoani mai ai le agaga paia o Ieova e manatua ai le tele o mau.​—Mare. 13:11; faitau le Ioane 14:26. *

15. E faapefea ona e maua le poto saʻo i le Afioga a le Atua?

¹⁵ Na talosaga le tupu o Solomona iā Ieova mo le atamai, ina ia faataunuu ai ona tiute tauave faaleagaga. (2 No. 1:7-10) “Sa matuā saʻiliʻili ma suʻesuʻe ma le filigā” perofeta anamua i le Afioga a le Atua, mo le poto saʻo e faatatau iā Ieova ma lona finagalo. (1 Pete. 1:10-12) Sa faalaeiauina e Paulo Timoteo, ina ia suʻesuʻe i “upu o le faatuatua ma le aʻoaʻoga lelei.” (1 Timo. 4:6) O le faia o na vala, e tatou te fesoasoani ai i isi i le itu faaleagaga, ma faamalosia ai lo tatou faatuatua.

16. (i) O le ā le iʻuga o le iloiloina e lē aunoa e tagata Perea o Tusitusiga Paia? (ii) Aiseā e tāua ai le faitauina i aso taʻitasi o le Tusi Paia?

¹⁶ O le masaniga a tagata Iutaia i Perea, o le ʻmatuā iloiloina lea o Tusitusiga Paia i aso taʻitasi.’ E latou te faatusatusa le talaʻiga a Paulo ma Tusitusiga Paia. Na latou iloa ai o le upu moni lea, ma ʻna talitonu ai le toʻatele o i latou.’ (Galu. 17:10-12) Ina ia faamalosia foʻi lo tatou faatuatua iā Ieova, e tatau ona faitau i aso taʻitasi le Tusi Paia. E tāua lenā faatuatua i lo tatou sao atu i le lalolagi fou.​—Epe. 11:1.

17, 18. (i) E faapefea i le alofa ma le faatuatua ona puipuia ai o tatou loto? (ii) O ā aogā o le iai o se faamoemoe malosi?

 ¹⁷ I le 1 Tesalonia 5:8, na faapea mai ai Paulo: “A o i tatou o tagata o le ao, ia faaauau ona tatou mafaufau lelei ma ia tatou oofu i le ufifatafata o le faatuatua ma le alofa, atoa ma le puloutau o le faamoemoe i le faaolataga.” E pei ona puipuia e se fitafita lona fatu, e manaʻomia foʻi ona puipuia e se Kerisiano lona loto mai faanaunauga agasala. E tatou te oofu i le ufifatafata faaleagaga, pe a tatou faatuatua i folafolaga a Ieova, ma alolofa iā te ia faapea isi tagata. O le faia faapea, atonu o le a tatou lē faia ai se gaoioiga e tigā ai le finagalo o Ieova.

¹⁸ Na taʻua foʻi e Paulo le puloutau po “o le faamoemoe i le faaolataga.” E mafai ona faasaoina le ola o se fitafita pe a lelei le puloutau. E faamalosia foʻi lo tatou faamoemoe i le faaolataga, pe a suʻesuʻe le Afioga a le Atua. E tatou te teena ai i latou ua liliuese mai i le upu moni, faapea aafiaga o a latou “lauga lē aogā.” (2 Timo. 2:16-19) E tatou te teena ai foʻi i latou e uunaʻia i tatou e faia amioga e taʻusalaina e Ieova.

19, 20. (i) Aiseā e tatou te faatāuaina ai le Tusi Paia? (ii) E faapefea ona faaalia lo tatou talisapaia o le Afioga a le Atua? (Tagaʻi i le pusa ʻTausia e Ieova Oʻu Manaʻoga.’)

¹⁹ E tatou te tumau i le ala i le ola, pe a faatāua le taʻitaʻiga o loo i le Afioga a le Atua, aemaise i lenei taimi o le iʻuga. E tatou te maua ai faasaʻoga, faapea le malosi e pulea ai o tatou faanaunauga agasala. Ua faalaeiauina ma faamāfanafanaina ai foʻi i tatou, ina ia tutumau e ui i tofotofoga a Satani ma lana lalolagi.

²⁰ E finagalo Ieova ia “faaolaina ituaiga uma o tagata.” E aofia ai ana auauna, faapea i latou e lotomalilie e talia le feʻau. Peitaʻi ina ia maua le faaolataga, e tatau ona iai le “poto saʻo i le upu moni.” (1 Timo. 2:4) O lea, a o tatou ola i nei aso e gata ai, e tāua ona faitau i aso taʻitasi ma faatatau manatu o loo i le Tusi Paia. E faamaonia i lenā vala lo tatou matuā faatāuaina o le Afioga a le Atua.​—Ioa. 17:17.