1, 2. (i) Aiseā e tatou te talisapaia ai ni uō e faamaoni ma lotofaamagalo? (ii) O ā fesili o le a tatou iloiloina?

E FAAPEFEA ona e faamatalaina se uō moni? Na faapea mai se tuafafine e igoa iā Ashley, o le uō moni o se tasi e nofosauni e fesoasoani ma faamagalo au mea sesē. E tatou te faatāuaina uō faapena. O uō moni e tatou te maua ai lagona malupuipuia ma le alofa.​—Faata. 17:17.

² O Ieova la tatou Uō e sili ona faamaoni ma lotofaamagalo. Na faapea mai le faisalamo: “Ieova e, o oe e lelei ma ua e nofosauni e faamagalo; e tele foʻi lou alofa faamaoni iā i latou uma o ē e valaau atu iā te oe.” (Sala. 86:5) O le ā e uiga i ai le faamaoni ma le lotofaamagalo? E faapefea ona faaalia e Ieova nei uiga? E faapefea ona tatou faaaʻoaʻo i lana faaaʻoaʻoga? O le iloaina o tali o na fesili, o le a faaloloto ai lo tatou alofa mo Ieova. E lē gata i lea, e saosaolaumea foʻi i le faaleleia atili o a tatou faauōga ma uso ma tuafāfine.​—1 Ioa. 4:7, 8.

3. O le ā e uiga i ai le faamaoni?

³ O se tagata faamaoni e tumau lona alofa i se tasi e vavalalata i ai. E faaalia lea alofa e ala i le faaauau pea ona tatou fesoasoani ma lagolagoina lenā tagata, e oo lava i tulaga faigatā. Ua faamatala e le Tusi Paia o Ieova o le “Atua faamaoni.” E leai se tasi e sili atu ona faamaoni nai lo o Ieova.​—Faaa. 16:5.

4, 5. (i) E faapefea ona faaalia e Ieova le faamaoni? (ii) E faapefea ona faalaeiauina i tatou i le faamaoni o Ieova?

⁴ Ua faapefea ona faaalia mai e Ieova le  faamaoni? E lagolagoina pea e Ieova ana auauna. O se tasi o i latou o le tupu o Tavita, o lē na ia viiviia le faamaoni o Ieova. (Faitau le 2 Samuelu 22:26.) A o fetaiaʻi Tavita ma luʻitau, na gaoioi ma le faamaoni Ieova e taʻitaʻia, puipuia, ma laveaʻia o ia. (2 Samu. 22:1) Na vaai ma tofo totino Tavita i le faamaoni o Ieova, e lē na o upu, ae e fesoasoani foʻi i ana auauna. Aiseā na faamaoni ai Ieova iā Tavita? Talu ai sa faamaoni Tavita iā Ieova. E alofa Ieova i ana auauna faamaoni, ma e faamaoni o ia i ē faamaoni atu iā te ia.​—Faata. 2:6-8.

⁵ E faalaeiauina i tatou pe a mafaufau i le faamaoni o Ieova i ana auauna. Na faamatala e se uso e igoa iā Reed, lona fiafia i le auala na fesoasoani ai Ieova iā Tavita i taimi faigatā. Na faalaeiauina o ia i le auala na fesoasoani ai pea Ieova iā Tavita i le taimi na fesolasolataʻi ai. Na ia faapea mai: “E faamanatu mai ai iā te aʻu, po o ā lava tulaga faigatā e tatou te fesagaʻia, e fesoasoani mai Ieova iā te aʻu pe a ou tumau faamaoni.” E mautinoa e faapena foʻi o tatou faalogona.​—Roma 8:38, 39.

6. (i) O ā auala ua faaalia ai e Ieova le faamaoni? (ii) O le ā le aogā iā i tatou o le faamaoni o Ieova?

⁶ O se tasi o auala ua faaalia ai e Ieova le faamaoni, o lona tausisi lea i ana tapulaa. (Isa. 46:4) E faavae ana faaiʻuga i ana tapulaa lē masuia. (Mala. 3:6) E faaalia foʻi e Ieova le faamaoni e ala i le faataunuuina o ana folafolaga. (Isa. 55:11) O le ā le aogā iā i tatou o le faamaoni o Ieova? Pe a tatou usiusitaʻi iā Ieova, e tatou te mautinoa o le a ia faataunuuina lana folafolaga e faamanuia iā i tatou.​—Isa. 48:17, 18.

7. O le ā se tasi o auala e tatou te faataʻitaʻi ai i le faamaoni o Ieova?

 ⁷ E faapefea ona tatou faataʻitaʻi i le faamaoni o Ieova? O se tasi o auala, o le agalelei lea i isi pe a feagai ma tulaga faigatā. (Faata. 3:27) O se faataʻitaʻiga, pe e te iloa se uso ua faavaivai ona o maʻi o le tino, teteega mai aiga po o ona lava vaivaiga? Ia faalaeiau i latou i “upu lelei ma upu faamāfanafanaloto.” (Saka. 1:13) * O le faia faapea, e faamaonia ai o i tatou o ni uō moni ʻe sili atu ona alofa faamaoni nai lo o le uso.’​—Faata. 18:24.

8. E faapefea ona tatou faataʻitaʻi i le faamaoni o Ieova, o se faaaʻoaʻoga i le liʻo o le faaipoipoga?

⁸ E tele isi auala e tatou te faaalia ai le faamaoni i tagata e tatou te alolofa i ai. O se faataʻitaʻiga, e tatau i tagata faaipoipo ona faamaoni i a latou paaga faaipoipo. (Faata. 5:15-18) E lē tatau foʻi ona latou uia se laasaga e taʻitaʻia ai i le faia o le mulilua. (Mata. 5:28) E tatou te faaalia foʻi le faamaoni i o tatou uso, e ala i le lē faia o tala taufaaleaga e faatatau iā i latou. E lē tatau foʻi ona tatou faalogo i na ituaiga o faamatalaga.—Faata 12:18.

9, 10. (i) O ai e tatau ona tatou faamaoni i ai? (ii) Aiseā e faigatā ai ona usitaʻi iā Ieova? Aumai se faaaʻoaʻoga.

⁹ E faapefea ona tumau lo tatou faamaoni iā Ieova? E ala i le ʻinoʻino i mea e inosia e Ieova ae naunau i mea e fiafia  i ai lona finagalo. E lē gata i lea, ia tatou ola i se auala e faafiafiaina ai Ieova. (Faitau le Salamo 97:10.) E faigofie ona tatou usiusitaʻi iā Ieova, pe a tatou malamalama lelei i lana silafaga i tulaga o mea.​—Sala. 119:104.

¹⁰ E lē faigofie ona tatou usiusitaʻi iā Ieova. Peitaʻi e tatau ona fai a tatou taumafaiga ina ia faamaoni ai pea iā te ia. O se faataʻitaʻiga, e fia faaipoipo se tuafafine nofofua, ae e lē mafai ona ia maua se uso talafeagai. (1 Kori. 7:39) Atonu e taumafai nisi i le galuega e lē o ni Molimau a Ieova, e saʻili sana paaga. E ono iā te ia ni faalogona tuua toʻatasi, ae tumau pea lana filifiliga e faamaoni iā Ieova e ala i le lē tuutala, pe faaipoipo atu i sē tasi e lē o se Molimau a Ieova. Pe e tatou te talisapaia le faaaʻoaʻoga lelei a lenā tuafafine? E faamanuia e Ieova i latou e faamaoni pea iā te ia i tulaga faigatā.​—Epe. 11:6.

11. O le ā e uiga i ai le lotofaamagalo?

¹¹ O le ā e uiga i ai le lotofaamagalo? O le tagata lotofaamagalo e lē tumau lona ita i se tasi ona o gaoioiga leaga na faia iā te ia. E lē uiga atu i le ioe i le mea sesē na fai, pe faafoliga foʻi e leai se mea na tupu. Nai lo o lea, o le a ia filifili e faagalo le mea na tupu. O se tasi o uiga matagofie o Ieova, o le lotofaamagalo. Ua faapea mai le Tusi Paia e ʻnofosauni Ieova e faamagalo’ i latou e faaalia le salamō moni.​—Sala. 86:5.

12. (i) E faapefea ona faaalia e Ieova le lotofaamagalo? (ii) O le ā e uiga i ai le “soloiesea” o agasala a se tasi?

¹² E faapefea ona faaalia e Ieova le lotofaamagalo? Ua faapea mai le Tusi Paia e “matuā faamagaloina” i tatou e Ieova. O lona uiga e faamagalo atoatoa ma faagalo e Ieova a tatou agasala. (Isa. 55:7) E faapefea ona iloa e faamagalo  atoatoa i tatou e Ieova? Seʻi o tatou iloiloina le folafolaga o loo i le Galuega 3:19. (Faitau.) E faapefea ona faamagalo e Ieova se tagata faimea sesē? Na faapea mai Peteru e tatau i le tagata faimea sesē ona “salamō” ma “liliu” mai lona ala leaga. O le tagata e salamō moni, e maumauaʻi e lē toe faia lana mea sesē. (2 Kori. 7:10, 11) E liliuese mai lona ala sesē ma faia taumafaiga uma na te mafaia e faafiafia Ieova, ona “soloiesea” lea o ana agasala. O le “soloiesea” e uiga atu i le aveesea po o le titina ese o se mea. Pe a faamagalo e Ieova se tasi, e na te soloiesea ana agasala ma faamagalo atoatoa o ia.​—Epe. 10:22; 1 Ioa. 1:7.

13. O le ā tatou te aʻoaʻoina mai le “lē toe manatuaina” e Ieova o a tatou agasala?

¹³ E faapefea ona tatou mautinoa e faagalo e Ieova a tatou agasala? E tatou te iloa le lotofaamagalo o Ieova i le valoaga na avatu iā Ieremia e faatatau i le ʻaufaauuina. (Faitau le Ieremia 31:34.) Na fetalai Ieova: “Ou te faamagaloina a latou mea sesē, ma ou te lē toe manatuaina a latou agasala.” E lē toe faasalaina e Ieova i tatou ona o a tatou agasala, pe a ia faamagaloina i tatou. E faagalo e Ieova a tatou agasala.​—Roma 4:7, 8.

14. E faapefea ona faalaeiauina i tatou pe a mafaufau loloto i le lotofaamagalo o Ieova? Aumai se faaaʻoaʻoga.

¹⁴ E faalaeiauina i tatou pe a mafaufau loloto i le lotofaamagalo o Ieova. Seʻi o tatou iloiloina le faaaʻoaʻoga a se tuafafine sa faateʻaina mo le tele o tausaga. Na toe faaaʻe o ia i nai tausaga mulimuli ane, peitaʻi e na te leʻi mautinoa po ua faamagaloina o ia e Ieova. Na ia manatu e sili atu le alofa o Ieova i isi nai lo o ia. Ae na faamāfanafanaina o ia ina ua manatunatu i le auala o loo faamatala ai i le Tusi Paia, le lotofaamagalo o Ieova. O se faataʻitaʻiga, na ia iloa pe a faamagalo e Ieova se tasi, e na te soloiesea ana agasala. O lea, e lē tatau ona tatou nofosala ai mo le olaga atoa. * Na ia faapea mai: “Ua ou iloa e lē tatau ona ou manatu e lē mafai ona faamagaloina aʻu e Ieova. Po o le mafaufau foʻi e tauave lenei avega i loʻu olaga atoa. Ua ou iloa e alu ai se taimi umi e faaleleia ai, peitaʻi ua amata nei ona ou vavalalata atu iā Ieova, ma e pei ua matuu ese atu se avega mamafa.” O Ieova o se Atua alofa ma lotofaamagalo.​—Sala. 103:9.

15. E faapefea ona tatou faataʻitaʻi i le lotofaamagalo o Ieova?

¹⁵ E tatou te faataʻitaʻi iā Ieova e ala i le filifili e faamagalo atu i isi. (Faitau le Luka 17:3, 4.) Ia manatua, e lē toe manatua e Ieova a tatou agasala pe a ia faamagaloina i tatou. O le faamagalo atu, e aofia ai le faagalo o mea sesē na faia mai iā i tatou, ma ia lē toe lāgā i le lumanaʻi.

16. (i) Faamatala le uiga o le faamagalo atu. (ii) O le ā e tatau ona tatou faia ina ia faamagaloina ai i tatou e Ieova?

 ¹⁶ O le faamagalo atu i isi, e lē faapea ai ua tatou ioe i le gaoioiga sesē na faia, faapea le auala na agaleagaina ai i tatou. Nai lo o lea, e tatou te filifili e faagalo le mea na tupu. E tāua ona manatua, pe a tatou mananaʻo e faamagaloina i tatou e Ieova, e tatau ona tatou faamagalo atu i isi. (Mata. 6:14, 15) E silafia e Ieova “o  le efuefu lava i tatou,” ma e tatou te lē lelei atoatoa. (Sala. 103:14) Pe a agaleaga mai nisi iā i tatou, ia manatua o i tatou uma o tagata lē lelei atoatoa. E tatau foʻi ona tatou faamagalo atu ma le lotoatoa.​—Efe. 4:32; Kolo. 3:13.

17. O le ā e fesoasoani iā i tatou e faamagalo ai i sē na faatigā mai?

 ¹⁷ E lē faigofie ona tatou faamagalo atu i taimi uma. Sa manaʻomia foʻi e Kerisiano faauuina i le taimi o Paulo, le fesoasoani i le foʻiaina o a latou feeseeseaʻiga. (Fili. 4:2) O le ā e fesoasoani iā i tatou e faamagalo atu i se uso na faatigā mai? Ia mafaufau i le mea na tupu iā Iopu. Sa tatau i ana uō ona faamāfanafanaina o ia. Peitaʻi na latou faatigā ma tuuaʻia sesē o ia. (Iopu 10:1; 19:2) Na aʻoaʻia e Ieova nei tane, ma faatonu i latou e ō atu iā Iopu, ma ia latou faia se taulaga mo a latou agasala. (Iopu 42:7-9) Peitaʻi sa faatonuina foʻi e Ieova Iopu ina ia tatalo mo i latou. Na faia faapea e Iopu, ma sa faamanuia e Ieova o ia ona o lona lotofaamagalo. (Faitau le Iopu 42:10, 12, 16, 17.) O le ā e tatou te aʻoaʻoina mai ai? O le tatalo mo sē na faatigā mai, e fesoasoani iā i tatou e faagalo ai mea leaga na fai mai.

18, 19. O le ā e tatau ona tatou faia pea?

¹⁸ Maʻeu le faalaeiauina o i tatou i le aʻoaʻoina atili o uiga o Ieova. Ua tatou aʻoaʻoina e faigofie ona faalatalata iā te ia, e lē faailogatagata, e aao mafola, magafagafa, faamaoni ma lotofaamagalo. Peitaʻi e tele pea mea e mafai ona tatou aʻoaʻoina e faatatau iā Ieova seʻia oo i le faavavau. (Fai. 3:11) O le aʻoaʻoina o uiga e ono o Ieova sa iloiloina i lenei mataupu, e tatou ioe ai i le manatu o Paulo, e “maʻeu le tele o le tamaoaiga, ma le atamai atoa ma le silafaga a le Atua.”​—Roma 11:33.

¹⁹ O lea seʻi o tatou aʻoaʻoina pea e faatatau i uiga o Ieova. Ia manatunatu i ai ma faatatau i o tatou olaga. (Efe. 5:1) O le faia faapea e faamalosia ai lo tatou alofa mo Ieova, ma tatou vavalalata atili atu ai iā te ia. Ona tatou ioe lea i le moni o upu a le faisalamo: “O aʻu nei, ou te faalatalata atu i le Atua ou te lelei ai.”​—Sala. 73:28.