O LE 1923, na faatumulia ai le fale mo koneseti i le Drama and Music Conservatory i São Paulo. Sa faia ai i inā e George Young se lauga na faaliliuina i le gagana Potukali. Sa faalogologo lelei le toʻa 585 na auai ai, ma sa faaali i luga o se screen mau faale-Tusi Paia i le gagana Potukali. I le faaiʻuga o le polokalame, sa tufatufaina ai kopi e selau o le tamaʻi tusi ua taʻua Millions Now Living Will Never Die!, i gagana Potukali, Peretania, Siamani ma Italia. Na taulau manuia ma salalau atu tala e uiga i le lauga. Ina ua tuanaʻi pō e lua, sa toe faatumulia le fale mo se isi foʻi lauga. Aiseā na faia ai nei lauga?

I le 1867, na siitia atu ai Sarah Bellona Ferguson ma lona aiga mai i le Iunaite Setete, ae ō atu i Pasili. I le 1899, na iloa ai e Sarah ua ia maua le upu moni, ina ua faitau i lomiga faale-Tusi Paia na aumai e lona tuagane laʻitiiti, mai i le Iunaite Setete. O lona fiafia e faitau lomiga, na tusi atu ai ina ia lafo mai ni ana kopi faa-Peretania o le Olomatamata. O lona maofa tele i le feʻau o le Tusi Paia, na tusi atu ai i le uso o C. T. Russell e faapea: “E tusa lava po o le ā le mamao e matou te iai, e mafai lava ona oo mai le upu moni iā i matou.”

Sa faia e Sarah le mea sili e na te mafaia ina ia faailoa atu ai i isi le feʻau o le Tusi Paia. Ae sa masani ona ia taumānatu po o ai o le a fesoasoani atili mai iā te ia ma lona aiga, faapea isi tagata fiafia i Pasili. I le 1912, na faailoa atu ai e le Peteli i Brooklyn e faapea, e iai se tasi o loo alu atu i São Paulo ma le faitau afe o sāvali e taʻua Where Are the Dead? i le gagana Potukali. I le 1915, sa faapea mai Sarah e maofa o ia i taimi uma, ona o le toʻatele o Tagata Aʻoga o le Tusi Paia sa faatalitalia e lē o toe umi ona aveina aʻe lea o i latou i le lagi. Na tusi Sarah e faapea: ʻAe faapefea tagata i Pasili ma Amerika i Saute? Pe a mafaufau  i le telē o le oganuu i Amerika i Saute, e iloa mai ai e tele pea galuega o le seleselega e fai.’ Ioe, e tele pea galuega o le seleselega e tatau ona fai.

Pe tusa o le 1920, na auai ai ni tauleleʻa folau se toʻavalu mai i Pasili, i ni sauniga a se faapotopotoga i le Aai o Niu Ioka, a o tau faaleleia la latou vaatau. Ina ua toe foʻi i Rio de Janeiro, sa latou faailoa atu i isi lo latou faamoemoe fou na aʻoaʻoina mai le Tusi Paia. Mulimuli ane, iā Mati 1923, na taunuu ai i Rio de Janeiro George Young, o se ovasia femalagaaʻi, ma feiloaʻi ai i tagata fiafia. Na ia faia se fuafuaga e faaliliu nisi o lomiga i le gagana Potukali. E leʻi umi ae malaga atu le uso o George i São Paulo, lea e tusa ma le 600,000 tagata sa nonofo ai. O i inā sa ia faia ai le lauga ma tufa atu kopi o le tamaʻi tusi Millions, lea na taʻua i le amataga. Na ia faapea mai: ʻTalu ai e na o aʻu le Tagata Aʻoga o le Tusi Paia i lenā vaipanoa, o lea sa ou faaaogā ai nusipepa e faalauiloa atu ai aʻu lauga. O nei lauga, o uluaʻi lauga ia na faasalalau i le lautele i Pasili, e faaaogā ai le igoa I.B.S.A.’ *

I le Watch Tower o Tesema 15, 1923, na taʻua ai e faatatau i le atunuu o Pasili: “Pe a mafaufau ina ua amata le galuega i inā iā Iuni 1, ma e leʻi iai ni lomiga i lenā taimi, e mataʻina le auala na faamanuia ai e le Alii le galuega.” Na taʻua atili i le lipoti, e 21 lauga i le lautele na faia i Pasili mai iā Iuni 1 seʻia oo iā Setema 30, ma e 3,600 i latou na auai ai. O lauga e lua o na lauga na faia e le uso o George i São Paulo. Sa faasolosolo ona salalau atu le feʻau o le Malo i Rio de Janeiro, ma i na o ni nai masina, e silia i le 7,000 lomiga i le gagana Potukali na tufatufaina atu. E lē gata i lea, na amata le uluaʻi lomiga o Le Olomatamata i le gagana Potukali, i le lomiga o Novema-Tesema 1923.

Na asia e George Young ia Sarah Ferguson, ma na taʻua i le Watch Tower: “Sa sau le tuafafine i le potu pito i luma, ma tū mo sina taimi e aunoa ma se tala. Na tago atu uu mai le lima o George, pulatoʻa atu i ona foliga ma faapea atu: ʻO oe moni lava o se uso femalagaaʻi?’” E leʻi umi ae papatiso Sarah ma nisi o lana fanau. O le mea moni, e 25 tausaga sa ia nofo faatalitali ai ina ia papatiso. Na taʻua i le Watch Tower o Aokuso 1, 1924, e toʻa 50 ē na papatiso i Pasili, ma o le toʻatele lava e mai i Rio de Janeiro.

Ua silia nei ma le 90 tausaga, ma e lē manaʻomia ona toe fesili e faapea: “Ae faapefea tagata i Pasili ma Amerika i Saute?” E silia i le 760,000 Molimau a Ieova o loo talaʻia le tala lelei i Pasili. Ua talaʻia i aso nei le feʻau o le Malo i Amerika i Saute i le gagana Potukali, Sepania, ma isi gagana eseese. I le 1915, sa moni le tala a Sarah Ferguson, ʻSa tele galuega o le seleselega e fai.’​—Mea iloga o lo tatou talafaasolopito i Pasili.