I le uluaʻi senituri, na faapea atu le aposetolo o Paulo i toeaina o le faapotopotoga i Efeso: “O lea, ia outou uaʻi iā te outou lava, ma le lafu mamoe uma, o ē ua tofia i ai outou e le agaga paia e fai ma ovasia, ina ia leoleo le faapotopotoga a le Atua, lea ua ia faatauina mai i le toto o lona lava Alo.” (Galu. 20:28) O le ā le matafaioi a le agaga paia i le tofiaina o toeaina ma auauna o le faiva i aso nei?

Muamua, o le agaga paia na uunaʻia ai tusitala o le Tusi Paia e tusia agavaa mo toeaina ma auauna o le faiva. E 16 agavaa e manaʻomia mo toeaina, o loo lisi mai i le 1 Timoteo 3:1-7. O loo taʻua mai isi agavaa i mau e pei o le Tito 1:5-9 ma le Iakopo 3:17, 18. O loo lisi mai i le 1 Timoteo 3:8-10, 12, 13 agavaa mo auauna o le faiva. Lua, o ē e faatūina mai ma tofia uso mo na faaeaga, e latou te tatalo mo le taʻitaʻiga a le agaga o Ieova a o faia le iloiloga, pe faamata ua ausia e se uso agavaa faale-Tusi Paia i se tulaga talafeagai. Tolu, e ao i lē ua faatūina lona suafa mo nei faaeaga, ona faaalia le fua o le agaga paia o le Atua i lona olaga. (Kala. 5:22, 23) O lea, o vala uma lava o le faagasologa o le tofiga, e aofia ai le agaga o le Atua.

Peitaʻi, o ai tonu lava e tofiaina na uso? I taimi ua mavae, o suafa ma agavaa o i latou ua faatūina mai e avea ma toeaina ma auauna o le faiva, sa auina atu i le ofisa o le lālā a le atunuu. Sa tofia e le Vaega Pule uso i inā e iloiloina nei fautuaga ma faia tofiga talafeagai. Pe a uma, ona faailoa atu lea e le ofisa o le lālā i le ʻautoeaina, ona talanoa atu lea o toeaina i uso fou ua tofia, ma fesiligia i latou po ua lotomalilie ma agavaa moni lava e talia le tofiga. Mulimuli ane, ona faasilasila atu loa lea i le faapotopotoga.

O nisi taimi i le uluaʻi senituri sa faia ai e le ʻauaposetolo ni tofiga patino, e pei o le tofiaina o tane e toʻafitu e tufa atu meaʻai i fafine ua oti a latou tane. (Galu. 6:1-6) Peitaʻi, e lē o faailoa mai ai i lenei faaaʻoaʻoga sa tofia foʻi e le ʻauaposetolo toeaina ma auauna o le faiva. Atonu na muamua ona avea na tane ma toeaina a o leʻi tuuina atu i ai lenei tofiga faaopoopo. O lea, sa faapefea ona tofia toeaina ma auauna o le faiva i le uluaʻi senituri?

E ui lava e lē o auʻiliʻili uma mai i le Tusi Paia le auala na faia ai tofiga uma i tuā i na aso, ae ua tatou iloaina nisi o faamatalaga i le auala na faia ai nei tofiga. Ina ua toe foʻi Paulo ma Panapa mai  i le la malaga faamisionare muamua, ua taʻua e faapea: “Ua la tofia toeaina mo i latou i faapotopotoga taʻitasi, ua tatalo ma anapopogi, ma ua la tuuina atu i latou iā Ieova, o lē ua latou talitonu i ai.” (Galu. 14:23) I tausaga mulimuli ane, na tusi atu Paulo iā Tito, o lē na la faimalaga faatasi e faapea: ʻNa ou tuua oe i Kereta, ina ia e faasaʻoina mea sa faalētonu, ma ia e tofia ni toeaina i lea aai ma lea aai e pei ona ou faatonu atu ai iā te oe. (Tito 1:5) E foliga mai sa tuuina atu foʻi iā Timoteo, o lē sa tele ina faimalaga faatasi ma Paulo, lenā lava pule. (1 Timo. 5:22) O lea, e manino mai sa faia e ovasia femalagaaʻi nei tofiga, ae e lē o aposetolo ma toeaiina i Ierusalema.

O lenei faatulagaga faale-Tusi Paia, ua fetuunaʻi ai e le Vaega Pule a Molimau a Ieova le auala e tofia ai toeaina ma auauna o le faiva. E amata atu iā Setema 1, 2014, o le auala lenei o le a faia ai: E iloilo ma le faaeteete e le ovasia matagaluega uso ua faatutū mai i lana matagaluega. A o faagasolo lana asiasiga i faapotopotoga, o le a ia taumafai e iloa lelei i latou ua faatutūina mai, ma galulue faatasi ma i latou i le talaʻiga pe afai e mafai. Pe a uma ona talanoa faatasi le ovasia matagaluega ma le ʻautoeaina e faatatau i uso na faatutū, o lana tiute tauave le tofia o toeaina ma auauna o le faiva i faapotopotoga i lana matagaluega. O lenei auala e sili atu ona talafeagai ma le faatulagaga na faia i le uluaʻi senituri.

O ai e taulimaina vaega eseese i lenei faatulagaga? E masani lava o le “pologa faamaoni ma le faautauta,” e iai le tiute tauave autū o le fafagaina o le ʻaufaigaluega. (Mata. 24:45-47) O lenei tiute e aofia ai saʻiliʻiliga i le Tusi Paia ma le fesoasoani a le agaga paia, ina ia tuuina atu taʻiala i le auala e faatatau ai mataupu silisili o le Tusi Paia, ia e fesootaʻi atu i le auala ua faamaopoopoina ai faapotopotoga i le lalolagi aoao. E tofia foʻi e le pologa faamaoni ovasia matagaluega uma ma sui o Komiti o le Lālā. E fesoasoani ofisa o lālā i le faataunuuina o taʻiala ua tuuina mai. O le tiute tauave a le ʻautoeaina o le faapotopotoga, o le iloilo totoʻa lea o agavaa faale-Tusi Paia o uso ua faatutū mo tofiga i le faapotopotoga. O le tiute tauave tāua o ovasia matagaluega taʻitasi, o le iloilo lelei lea faatasi ma le tatalo o i latou ua faatutū mai e toeaina, ona tofia lea o tane ua agavaa.

Pe a tatou malamalama i le auala e faia ai tofiga, o le a atili ai foʻi ona tatou malamalama i le matafaioi a le agaga paia i lenei faatulagaga. O le iʻuga, o le a tatou matuā talitonuina ma faaaloalo i ē ua tofia i faaeaga i le faapotopotoga Kerisiano.​—Epe. 13:7, 17.

O loo taʻua i le Faaaliga 11:3 molimau e toʻalua na faia valoaga mo aso e 1,260. O loo taʻua atili i le Faaaliga o le a ʻfaatoʻilaloina ma fasiotia i laʻua’ e le manufeʻai. Ae pe a mavae “aso e tolu ma le ʻafa,” o le a toetutū mai nei molimau e toʻalua, ma o se mea e matuā maofa ai ē e vaavaai ane.​—Faaa. 11:7, 11.

O ai nei molimau e toʻalua? E maua le tali i faamatalaga o le mataupu atoa. Muamua, o loo “faaatagia e nei molimau laau olive e lua, ma tuugāmolī e lua.” (Faaa. 11:4) E toe faamanatu mai ai le tuugāmolī ma laau olive e lua o loo taʻua i le valoaga a Sakaria. O na laau olive na faaāta mai ai ʻtagata e toʻalua ua faauuina,’ ia e faasino atu i le Kovana o Serupapelu ma le Ositaulaga Sili o Iosua, “o loo tutū i autafa o le Alii o le lalolagi uma.” (Saka. 4:1-3, 14) Lona lua, ua taʻua e faapea o loo faia e nei molimau e toʻalua faailoga e talitutusa ma faailoga na faia e Mose ma Elia.​—Faatusatusa le Faaaliga 11:5, 6 i le Numera 16:1-7, 28-35, ma le 1 Tupu 17:1; 18:41-45.

O ā mea e tutusa ai nei tala e lua? O loo faasino uma atu nei tala i le ʻaufaauuina a le Atua, o ē na taʻimua i le tapuaʻiga moni a o faagasolo taimi o tofotofoga. O le faataunuuga o le Faaaliga mataupu e 11, e faasino atu i uso faauuina na taʻimua i le taimi na faavae ai le Malo o le Atua i le lagi i le 1914, sa talaʻi mo le tolu ma le ʻafa tausaga a o oofu “i ʻie talatala.”

I le iʻuga o la latou talaʻiga a o oofu i ʻie talatala, na fasiotia faafaatusa nei ʻaufaauuina ina ua tuuina i latou i le falepuipui mo se taimi puupuu, e tolu ma le ʻafa aso faafaatusa. Sa manatu fili o tagata o le Atua, ua taofia le galuega a le ʻaufaauuina, ma na matuā olioli ai na tagata tetee.​—Faaa. 11:8-10.

Peitaʻi, na taunuu moni upu o le valoaga auā na toetutū mai molimau e toʻalua ina ua mavae le tolu ma le ʻafa aso. E lē gata na toe faasaʻoloto le ʻaufaauuina mai i le falepuipui, ae na maua foʻi e i latou na tumau faamaoni se tofiga faapitoa mai i le Atua, e ala i lo latou Alii o Iesu Keriso. I le 1919, na aofia ai i latou i ē na tofia e auauna o se “pologa faamaoni ma le faautauta,” e tausia manaʻoga faaleagaga o tagata o le Atua i aso e gata ai.​—Mata. 24:45-47; Faaa. 11:11, 12.

O le mea e mataʻina ai, ua faafesootaʻi e le Faaaliga 11:1, 2 nei mea na tutupu, i le taimi na fua ai le malumalu faaleagaga. Ua taʻua i le Malaki mataupu e 3 le asiasia o le malumalu faaleagaga, ona sosoo ai lea ma le taimi na faamamāina ai. (Mala. 3:1-4) O le ā le umi na faia ai lenei asiasiga ma le faamamāina? Na amata mai i le 1914 seʻia oo i le amataga o le 1919. O lenei taimi e aofia ai aso e 1,260 (42 masina), po o le tolu ma le ʻafa aso faafaatusa lea o loo taʻua i le Faaaliga mataupu e 11.

Maʻeu lo tatou olioli ona na faatulaga e Ieova lenei galuega o le faamamāina faaleagaga, ina ia faamamāina ni tagata faapitoa mo galuega lelei! (Tito 2:14) E tatou te talisapaia foʻi le faaaʻoaʻoga na faataatia e lenā ʻaufaauuina faamaoni, o ē na taʻimua a o faagasolo taimi o tofotofoga, ma auauna o ni molimau faafaatusa e toʻalua. *