1, 2. O ai e mafai ona maua aogā mai i le iloiloina o le Pese a Solomona, ma aiseā? (Tagaʻi i le ata i luga aʻe o le matua.)

ʻMAʻEU le olioli o le alii ma le tamaʻitaʻi faaipoipo! Ua iloa uma atu e tagata le māfana o le alofa o le tasi i le isi.’ O mafaufauga na o le toeaina sa faia le faaipoipoga. A o sisiva fiafia le ulugalii fou i le taimi o le ʻaiga, ua ia taumānatu: ʻPo o le a tumau lenei faaipoipoga? A o faagasolo tausaga, po o le a tumau le alofa o le tasi i le isi?’ O se mea e matagofie pe a tumau le alofa o se ulugalii. Peitaʻi, ua tele faaipoipoga ua malepelepe. O lea, e te ono taumānatu ai, pe e mafai moni ona tumau le alofa.

² E oo lava i aso o le tupu o Solomona i Isaraelu anamua, e leʻi faigofie ona maua le alofa moni. Aiseā? Na tusi Solomona: “Ua ou maua le tane amiotonu e toʻatasi mai i tane e toʻaafe, ae ou te leʻi maua se fafine amiotonu mai i fafine e toʻaafe. Vaai! E na o le pau le mea ua ou iloaina, na faia e le Atua moni tagata ina ia amiotonu, ae o i latou lava ua latou faia le tele o fuafuaga eseese.” (Fai. 7:26-29) Sa paʻū maulalo le tulaga tau amio i aso o Solomona, ona o aafiaga  mai i fafine na tapuaʻi iā Paala. * E ui i lea, i se solo na tusia e Solomona i le pe ā ma le 20 tausaga na muamua atu, e atagia mai ai e mafai ona tumau le alofa i le va o le tane ma le avā. Na faamatala ai foʻi i se gagana faafatusolo le auala e faaalia ai lenā alofa. O lea, e tele lesona e mafai ona aʻoaʻoina e auauna tapuaʻi a Ieova ua faaipoipo ma nofofua, mai i le iloiloina lelei o lenei tusi o le Tusi Paia.

3. Aiseā e mafai ai ona tumau le alofa i le va o le tane ma le avā?

³ Faitau le Pese a Solomona 8:6. Ua faamatalaina le alofa “o le afi mū saesae a Ioa.” Aiseā? Talu ai o le uiga silisili o Ieova o le alofa, ma na ia foafoaina i tatou ma le tomai e mafai ona faaalia lenā alofa. (Kene. 1:26, 27) I le taimi na avatu ai e le Atua le uluaʻi fafine o Eva i le uluaʻi tamāloa o Atamu, sa matuā fiafia o ia i le auala na faamatala ai ona faalogona. E mautinoa sa matuā māfana atu Eva iā Atamu, auā ʻna faia mai ai o ia.’ (Kene. 2:21-23) Na tuu mai e Ieova i tagata le tomai e faaalia ai le alofa. O lea, e mafai ona tumau le alofa i le va o le tane ma le avā.

4, 5. Faamatala puupuu mai le tala i le Pese a Solomona.

⁴ Ua faamatala i le Pese a Solomona le alofa i le va o se alii ma se tamaʻitaʻi. O le pese e faatatau i le alofa i le va o se teine mai i le nuu o Sunema po o Sulami, ma se leoleo mamoe. O le tala lenei e faatatau iā i laʻua: Sa galue le teine i togāvine a ona tuagane, e latalata i le nofoaga sa tolauapi ai Solomona ma ana fitafita. Sa mātauina o ia e Solomona, ma ia faatonu ai ana auauna e aumai o ia i le togālauapi. Sa viiviia e Solomona lona lalelei, ma ofo atu iā te ia le tele o meaalofa. Peitaʻi, sa alofa tele le teine i le tama leoleo mamoe, ma na ia matuā fia mafuta lava i ai. (Pese 1:4-14) Sa maua atu o ia e le leoleo mamoe i le togālauapi, ma talanoa ai i lo laʻua alofa e ala i faaupuga matagofie.​—Pese 1:15–17.

⁵ Sa toe foʻi Solomona i Ierusalema ma ave le tamaʻitaʻi talavou, ae na mulimuli atu lava le leoleo mamoe iā te ia. (Pese 4:1-5, 8, 9) E leʻi taulau taumafaiga a Solomona e suia le alofa o le teine. (Pese 6:4-7; 7:1-10) O le iʻuga, na faataga o ia e Solomona e toe foʻi i lona aiga. Na faaiʻu le pese i moomooga o le teine Sulami i lana uō e momoʻe atu “e pei o se sevi,” e faafeiloaʻi o ia.​—Pese 8:14.

6. Aiseā e ono faigatā ai ona iloa le tagata o loo tautala i le Pese a Solomona?

⁶ E matagofie le Pese a Solomona, ma ua taʻua ai o le “pese silisili.” (Pese 1:1) Peitaʻi, e leʻi taʻua e Solomona ni igoa o tagata o loo talanoa. Sa ia manaʻo e faamatilatila le matagofie o lana solo ma lana pese, nai lo o le tuuina i ai o ni faamatalaga se tele. E ui e leai ni igoa o tagata i lenei pese, peitaʻi e mafai lava ona tatou iloa le tagata o loo tautala e ala i ana faamatalaga. *

7, 8. Na faapefea ona faamatala e le leoleo mamoe ma lana uō le alofa o le tasi i le isi? Aumai ni faaaʻoaʻoga.

⁷ Ua tumu le Pese a Solomona i ʻfaailoaga o le alofa’ i le va o le teine Sulami  ma le leoleo mamoe. O nei faaupuga o le alofa na tusia i le pe ā ma le 3,000 tausaga ua mavae, ma e ono fou i la tatou faalogo. Peitaʻi, o uiga ma faalogona o loo iai e lē fou iā i tatou, e ui i le eseese o aganuu. O se faaaʻoaʻoga, na viiviia e le leoleo mamoe le mananaia o mata o le tamaʻitaʻi, ma faatusa i “mata o se lupe.” (Pese 1:15) Ae na faatusa foʻi e le teine le mananaia o mata o le leoleo mamoe, i le aulelei o se lupe. (Faitau le Pese a Solomona 5:12.) Sa ia faatusa le mea uliuli o loo faataamilo ai le mea paʻepaʻe o mata o le leoleo mamoe, i se lupe o loo taʻele i le suāsusu.

⁸ E lē o faaupuga uma i lenei pese e faatatau atu i le aulelei faaletino. Seʻi mātau le faamatalaga a le leoleo mamoe e faatatau i le tautala a le tamaʻitaʻi. (Faitau le Pese a Solomona 4:7, 11.) Na ia faapea mai o ona laugutu e ʻsisina ai le meli, ma ua i lalo o lona laulaufaiva le meli ma le suāsusu.’ O lona uiga, o ana faamatalaga e manaia e pei o le suāsusu ma suamalie e pei o le meli. O lea, ina ua faapea atu le leoleo mamoe i lana uō, “e matuā lalelei lava oe, ma e leai lava se pona iā te oe,” e lē o na o le lalelei faaletino sa uiga i ai ana faamatalaga, ae aofia ai ma ona uiga lelei.

9. (a) O le ā e aofia i le alofa i totonu o se faaipoipoga? (e) Aiseā e tāua ai le faailoa atu o faalogona alofa o paaga faaipoipo?

⁹ O le faatulagaga o le faaipoipoga, e lē na o se maliega aloaʻia e faia e aunoa ma le alofa ma le māfana. E matilatila faaipoipoga a Kerisiano i le alofa. O le ā lenā alofa? Pe e faasino atu i le alofa lea e faavae i mataupu silisili o le Tusi Paia? (1 Ioa. 4:8) Pe e aofia ai faalogona alofa lea e masani ona iai i tagata o se aiga? Pe e aofia ai le māfana ma le faapelepele lea e faaalia e uō moni? (Ioa. 11:3) Pe e faasino atu i le alofa fetosinaaʻi? (Faata. 5:15-20) O vala uma na e aofia i le alofa i totonu o se faaipoipoga. E iloa le alofa pe a faatino. Maʻeu le tāua o le lē faatagaina o le pisi i mea masani o le olaga, e taofia ai le faailoa atu o faalogona alofa o le tasi i le isi! O le faailoa atu o le alofa e faamalosia ma fiafia ai se faaipoipoga. E iai aganuu e filifilia e mātua paaga faaipoipo mo fanau, lea e faigatā ona iloa ai e le tasi le isi a o leʻi faaipoipo. O lea, e tāua ona faailoa atu le alofa o le tasi i le isi, ma e fesoasoani lea e faamalosia ai le alofa ma taulau ai le faaipoipoga.

10. O le ā le aogā o le faailoa atu o le alofa o le tasi i le isi?

¹⁰ E aogā le faailoa atu e ulugalii faaipoipo o le alofa o le tasi i le isi. Na manaʻo le tupu o Solomona e na te faia ni ʻpale auro, ma ni teuga siliva’ mo le teine Sulami. Na ia viiviia foʻi o ia e ala i le faapea atu, “e lalelei e pei o le masina ua atoa, e mamā e pei o le pupula o le lā.” (Pese 1:9-11; 6:10) Sa tumau pea le alofa faamaoni o le teine Sulami i si ana leoleo mamoe peleina. O le ā na faamalosia ma faamāfanafanaina ai o ia a o valavala ma lana uō? (Faitau le Pese a Solomona 1:2, 3.) Sa ia manatua ʻfaailoaga o le alofa’ o le leoleo mamoe. O lenā faailoaga o le alofa “ua sili ia nai lo o le uaina,” lea e faafiafia ai le loto. O lona igoa foʻi ua pei o se “uu ua liligiina” i lona ulu. (Sala. 23:5; 104:15) E faamalosia  le alofa pe a manatuaina le auala na faailoa atu ai le alofa o le tasi i le isi. O lea, maʻeu le tāua i paaga faaipoipo o le faailoa atu e lē aunoa o le alofa o le tasi i le isi.

11. O le ā e aʻoaʻoina e Kerisiano e leʻi faaipoipo mai i le teine Sulami, e faatatau i le faagaee o faalogona alofa i se tagata?

¹¹ E aʻoaʻoina foʻi e Kerisiano e leʻi faaipoipo ni lesona mai i le Pese a Solomona, aemaise i latou o loo saʻilia ni paaga faaipoipo. E leʻi tosina atu le teine Sulami iā Solomona. Na faapea atu ma le maumauaʻi le teine Sulami i fanau teine a Ierusalema: “Ia aua neʻi outou taumafai e fafagu pe faagaee le alofa i totonu iā te aʻu, seʻia faitalia lava ia.” (Pese 2:7; 3:5) Aiseā? Talu ai e lē talafeagai ona atiaʻe le alofa fetosinaaʻi i so o se tagata. E atamai mo se Kerisiano e faanaunau e faaipoipo, ona faatalitali ma le onosaʻi i se tasi e alofa moni i ai.

12. Aiseā na alofa ai le teine Sulami i le leoleo mamoe?

¹² Aiseā na alofa ai le teine Sulami i le leoleo mamoe? E moni e aulelei o ia e pei o le “sevi.” E malolosi ona lima e pei o le “auro,” ma mananaia ma malolosi ona vae e pei o “o poutū o maamora.” Peitaʻi, e iai se mea e sili atu nai lo o lona malosi ma lona aulelei. Na faapea mai le tamaʻitaʻi: “E pei o le apu i totonu o laau o le vaomatua, o loo faapea laʻu pele i tauleleʻa.” E faailoa mai i faalogona o lenei teine e faamaoni iā Ieova, o lana uō o se tagata e malosi faaleagaga.​—Pese 2:3, 9; 5:14, 15.

13. Aiseā na alofa ai le leoleo mamoe i le teine Sulami?

¹³ Ae faapefea le teine Sulami? E mautinoa o lona lalelei na tosina ai se tupu e “toʻaono sefulu masiofo, e toʻavalu sefulu palake, ma le lē mafaitaulia o tamaʻitaʻi.” Peitaʻi, sa ia manatu faamaulalo iā te ia “ua na o se fua o le laau i Sarona,” o se fugālaau taatele, e iloa ai lona lotomaulalo. E lētioa a faapitoa o ia i le leoleo mamoe, e pei o se “lili i vao tuitui.”​—Pese 2:1, 2; 6:8.

14. O le ā e aʻoaʻoina e Kerisiano o loo fia faaipoipo, mai i le leoleo mamoe ma le teine Sulami?

¹⁴ I le Tusi Paia, ua fautuaina malosi  ai Kerisiano e faaipoipo “tau lava o lē ua i le Alii.” (1 Kori. 7:39) O se tagata ua fia faaipoipo, e tatau ona ʻalofia se faiā fetosinaaʻi ma se tasi e lē papatiso, ma saʻili se paaga faaipoipo i tagata faamaoni o Ieova. O le ā le aogā o lenei vala i le faaipoipoga? E feagai le tane ma le avā ma omiga i aso taʻitasi. Peitaʻi, pe a vavalalata la laʻua faiā ma Ieova, o le a fiafia ma filemu le faaipoipoga. O lea pe a e fia faaipoipo, ia mulimuli i le faaaʻoaʻoga a le leoleo mamoe ma le teine Sulami. Ia saʻili i se tasi e lelei ona uiga ma alofa moni iā Ieova.

15. E faapefea ona avea le teine Sulami ma faaaʻoaʻoga lelei i Kerisiano e leʻi faaipoipo?

¹⁵ Faitau le Pese a Solomona 4:12. Aiseā ua faamatala ai e le leoleo mamoe lana pele e pei o se “togālaau ua siʻomia e le pā”? O se togālaau e fai le pā, e lē mafai ona alu i ai so o se tasi. Ae e na o le faitotoʻa o le pā e mafai ona ui atu i ai. Ua pei le teine Sulami o lenā togālaau, ona e na o le tama leoleo mamoe na alofa ma manaʻo e faaipoipo i ai. E leʻi faaalia lava sona fiafia i le tupu, ma na pei ai o ia o se “pā,” ae e lē o se “faitotoʻa” e tatala i so o se tasi. (Pese 8:8-10) I se tulaga talitutusa, e tatau i Kerisiano ua fuafua e faaipoipo ona faamaoni le tasi i le isi, nai lo o le tosina atu i se isi tagata.

16. O le ā ua tatou aʻoaʻoina mai i le Pese a Solomona e faatatau i faigāuō?

¹⁶ I se tasi aso, na talosaga atu ai le leoleo mamoe i le teine Sulami e la te savalivali, ae e leʻi faatagaina e tuagane o le teine. Nai lo o lea, sa faatonuina lo latou tuafafine e galue i togāvine. Aiseā? Pe e latou te leʻi faatuatuaina o ia? Pe na latou manatu e iai ni ona faanaunauga lē mamā? E leai. Sa mananaʻo ona tuagane e puipuia o ia mai i tulaga e faaosoosoina ai o ia e faia se mea sesē. (Pese 1:6; 2:10-15) O le lesona lenei mo Kerisiano nofofua: A o faia se faigāuō, ia taumafai malosi e puipuia le tulaga mamā o le faigāuō. Aua neʻi iai na o oulua i se nofoaga tuufua, ma ia faailoa atu le alofa o le tasi i le isi i se auala mamā.

17, 18. O ā aogā ua e maua mai i le iloiloina o le Pese a Solomona?

¹⁷ E finagalo Ieova e tumau faaipoipoga, ma ia faaalia e le ulugalii le alofa o le tasi i le isi. O lea, o se mea e masani ai le faaalia o le alofa i le taimi o le faaipoipoga. Ae ina ia tumau le faaipoipoga, e tatau ona faamalosia le alofa e pei o se afi e lē matineia.​—Mare. 10:6-9.

¹⁸ Pe a saʻilia se paaga faaipoipo, e mautinoa e te manaʻo i se tasi e te alofa moni i ai, ma ia faamalosia lenā alofa ma lē mafai ona tineia, e pei ona taʻua i le Pese a Solomona. Pe afai o loo saʻili sau paaga faaipoipo, po ua uma foʻi ona e faaipoipo, tau ina ia e maua le alofa moni, o le “afi mū saesae a Ioa.”​—Pese 8:6.