O LE talaʻia o le tala lelei o se galuega e sili ona tāua ua faatautaia i le lalolagi i aso nei. E mautinoa o le avea ma se auauna a Ieova, e te manatu ai o se faaeaga le faia o se sao i le galuega o le faia ma soo. E lē masalomia e te ioe ua feagai paeonia ma tagata talaʻi ma luʻi ina ia faatumauina ai lo latou maelega i le faiva.

Ua faigatā ona maua e nisi tagata talaʻi se tagata e talanoa i ai i le galuega talaʻi. Auā o le toʻatele o tagata e lē maua atu i o latou aiga. Ae afai e maua se tagata i le fale, e masani ona lē fiafia pe tetee mai i le feʻau o le Malo. Ua matuā popole nisi tagata talaʻi i le lē mafai ona latou faamāeʻaina o le galuega ona o le telē ma le fua mai o le oganuu. Ae ua loa tausaga o talaʻi nisi, ma ua faavaivai ona o le tuai mai o le iʻuga.

Pe e tatau ona faateʻia i tatou ona ua fesagaʻi tagata uma o Ieova ma luʻi e ono faavaivaia ai lo latou maelega i le galuega talaʻi? E leai. O lea, pe e tatou te faatalitalia o le a faigofie ona folafola atu le feʻau faasaoola a le Atua, i se lalolagi ua pulea e “lē o loo leaga” o Satani le Tiapolo?​—1 Ioa. 5:19.

Po o ā lava luʻi o loo e fesagaʻia i le folafolaina atu o le tala lelei, ae ia e mautinoa e fesoasoani Ieova iā te oe. O lea la, e faapefea ona e faamalosia lou maelega mo le faiva faa-Kerisiano? Seʻi o tatou iloiloina nisi o fesoasoani.

E faitau afe ua papatisoina e avea ma Molimau a Ieova i tausaga taʻitasi. Pe afai ua faatoʻā uma ona e tuuina atu i le Atua e ala i le papatisoga, e lē fesiligia lou talisapaia o aogā ua e maua mai iā i latou ua autausagā o talaʻi. Afai ua loa tausaga o avea oe ma tagata talaʻi o le Malo, pe e lē o se mea talafeagai ea ma tauia lou fesoasoani i ē fou?

Na silafia e Iesu e manaʻomia e ona soo se taʻitaʻiga ina ia avea ma faievagelia tomai, ma na ia faataʻitaʻia foʻi le auala e faafoe ai le galuega. (Luka 8:1) E faapena foʻi i aso nei, o loo iai  se manaʻoga e toleni isi ia avea ma faifeʻau agavaa.

E lē tatau ona tatou manatu e na o le auai i le faiva o le a maua ai e tagata talaʻi fou le tomai e aʻoaʻo atu ai. E na te manaʻomia se taʻitaʻiga mai i se faiaʻoga alofa ma agalelei. E aofia ai i lenā toleniga le faailoa atu i le tagata talaʻi e leai se poto masani le auala e (1) sauniuni ma faataʻitaʻi ai se taulimaga, (2) faia o se talanoaga ma se tagata o le aiga, po o se tasi o loo savali i le auala, (3) ofo atu lomiga, (4) toe asia o tagata fiafia, ma le (5) amata se suʻesuʻega faale-Tusi Paia. O le a maua iʻuga lelei pe afai e mātauina ma faaaʻoaʻo le tagata talaʻi fou i auala o loo faaaogā e lona faiaʻoga i le faiva. (Luka 6:40) E lē masalomia le talisapaia e le tagata talaʻi fou o le iai o se tasi e faalogo ma fesoasoani iā te ia pe a manaʻomia. O le a aogā foʻi i ē e leai se poto masani le avatu o le faamālō ma manatu aogā.​—Fai. 4:9, 10.

E ui i au taumafaiga ia maua se talanoaga ma tagata o aiga, ae o nisi aso e pau lava le tagata e te talanoa ai i le talaʻiga o lau paga. Manatua na aauina e Iesu ona soo ia “taʻitoʻalua” i le galuega talaʻi. (Luka 10:1) A o latou galulue faatasi, e latou te faamalosiau ma uunaʻia e le tasi le isi. O le taimi lea e te lua maua ma lau paga i le talaʻiga, o se avanoa lelei lea e “fefaalaeiauaʻi” ai.​—Roma 1:12.

O ā ni mataupu e mafai ona oulua talanoa i ai? Pe na iai se mea na tupu i le faiva na faalaeiauina ai se tasi o oulua? Pe na e maua se manatu manaia mai i au lava suʻesuʻega po o le suʻesuʻega foʻi a le aiga? Pe sa faalaeiauina oe i se mea na e faalogo ai i le sauniga? I nisi taimi, o le tagata o loo oulua galulue atonu e seāseā lua galulue faatasi i le talaʻiga. Po o e iloa le auala na ia maua ai le upu moni? O le ā na faatalitonuina ai o ia o le faalapotopotoga lenei a Ieova? O ā ni faaeaga po o ni mea na tutupu i lona olaga? Atonu e mafai ona e faasoa atu i mea na tutupu iā te oe i le auaunaga iā Ieova. Po o le ā lava le tali mai a tagata i le fanua, ae o le galulue ma se tasi i le faiva o se avanoa sili lea e faaauau ai ona ʻatiaʻe e le tasi le isi.’​—1 Tesa. 5:11.

O le vala tāua e mafai ona tumau ai le maelega mo le faiva, o le iai lea o se masaniga lelei o le faia o suʻesuʻega. Ua lomia e le “pologa  faamaoni ma le faautauta” le tele o mataupu eseese ina ia fafagaina ai faaleagaga i tatou. (Mata. 24:45) O se fesili lelei lenei mo le faia o au lava suʻesuʻega: Aiseā e tāua ai le galuega talaʻi o le Malo? Ua taʻua nisi o māfuaaga i le pusa “Aiseā e Tāua ai Ona Faatumau Lou Maelega i le Faiva?”

Ia iloilo manatu o loo taʻua i le pusa e mafai ona faamalosia ai lou maelega i le talaʻiga. Aiseā e te lē suʻesuʻeina ai nisi manatu faaopoopo e ese mai i manatu o loo lisi mai i le pusa? Ia manatunatu loloto i māfuaaga ma mau o loo lagolagoina ai. O le faia faapea o le a faamalosia ai lou maelega i le faiva.

Ua lē aunoa ona ofo mai e le faalapotopotoga a Ieova fautuaga e faaleleia ai la tatou faiva. E lē gata o le galuega i le fale le fale, ae o le tusia o tusi, molimau i le telefoni, talaʻi i auala tetele po o isi nofoaga faitele, ma oganuu pisinisi faapea le molimau lē fuafuaina. E ono faatulaga foʻi a tatou fuafuaga ina ia molimau atu ai i oganuu e seāseā ona talaʻia.

Pe na e taumafai e faatatau na fautuaga? Na olioli le toʻatele na faatatauina nei fautuaga i ni iʻuga lelei. Seʻi o tatou iloiloina ni faaaʻoaʻoga se tolu.

O le faaaʻoaʻoga muamua, o se manatu na taʻua i le Faiva o le Malo i le auala e amata ai suʻesuʻega faale-Tusi Paia. Na uunaʻia ai se tuafafine e igoa iā April e ofo atu se suʻesuʻega i ni tagata se toʻatolu e latou te faigaluega faatasi. Na faateʻia o ia ina ua taliaina uma e i latou ni suʻesuʻega ma amata ona auai i sauniga a le faapotopotoga.

 O le faaaʻoaʻoga lona lua o le ofoina lea o mekasini. Ua faalaeiauina i tatou ina ia saʻili tagata e fiafia i ni mataupu patino i a tatou lomiga. Na taʻua e se ovasia matagaluega i le Iunaite Setete e faapea, na ia ofoina se Ala Mai o loo iai se mataupu e faatatau i paʻu o taavale i pule o fale paʻu uma i lenā vaipanoa. Na la ofoina atu foʻi ma lana avā lomiga o loo iai le mataupu “Ia Malamalama i Lau Fomaʻi” i le silia ma le 100 ofisa o fomaʻi. Ua ia faapea mai: “E ese ma le aogā o na asiasiga e faailoa atu ai i tatou ma lomiga. Ina ua māeʻa ni talanoaga faaleuō ma i latou, ona ma asiasi lea i ai e lē aunoa.”

O le faaaʻoaʻoga lona tolu o le molimau i luga o le telefoni. Na tusi se tuafafine e igoa iā Judy i le ofisa ulu e faailoa atu ai lona talisapaia o le faalaeiauga ia molimau i luga o telefoni. Na ia taʻua, o lona tinā ua 86 tausaga e lē lelei lona soifua mālōlōina, ae sa fiafia pea o ia e talaʻi e ala i le telefoni. O le iʻuga, na la suʻesuʻe ma se tinā e 92 tausaga i luga o le telefoni.

Ua aogā fautuaga sa aumaia i a tatou lomiga e faatatau i le molimau atu. Ia faaaogā na fautuaga! E mafai ona fesoasoani iā te oe e faatumauina ai lou olioli ma lou maelega mo le faiva.

E lē fuaina le taulau manuia o la tatou galuega talaʻi i le tele o lomiga e ofoina atu, le tele o suʻesuʻega faale-Tusi Paia, po o le toʻatele foʻi o tagata ua tatou fesoasoani i ai e avea ma auauna a Ieova. Pe na toʻatele ni tagata na mafai ona fesoasoani i ai Noa e avea ma tagata tapuaʻi o Ieova? E leai, peitaʻi o ia o se tagata talaʻi na taulau manuia. O le mea e sili ona tāua o lo tatou auauna ma le faamaoni iā Ieova.​—1 Kori. 4:2.

Ua iloa e nisi tagata talaʻi o le Malo, e manaʻomia ona latou faatutū ni sini talafeagai, ina ia faaosofia ai lo latou naunau mo le galuega talaʻi. O ā nisi o na sini? O loo taʻua nisi o na manatu i le pusa “Faatutū ni Sini Talafeagai.”

E ala i le fesoasoani a Ieova, ia saʻili ni auala e tauia ma fua mai ai lau faiva. O le a e olioli ona o le faataunuuina o na sini ma faamalieina oe i le iloa o loo e faia le mea sili e talaʻia ai le tala lelei.

O le talaʻia o le tala lelei e mafai ona avea ma luʻi. Ae e iai mea e mafai ona e faia ina ia avea ai ma tagata talaʻi maelega o le Malo. Ia olioli i le fefaasoaaʻi o faalaeiauga ma lau paga i le talaʻiga, atiaʻe ma tausisi i masaniga lelei o le faia o au suʻesuʻega, ia faatatau fautuaga mai le pologa faamaoni ma ia faatutū ni sini talafeagai. Ia manatua na tuuina atu e le Atua iā te oe se faaeaga o le avea ma ana Molimau, e folafola atu le tala lelei. (Isa. 43:10) Maʻeu le olioli o le a e maua a o faaauau ona tumau lou maelega mo le faiva!