INA ua pōpō atu lona tauʻau, ona amata loa lea o le faitauga Tusi Paia a Kingsley, o lona tofiga muamua lea i le Aʻoga o le Faiva Faatiokarate. Sa ia faaleo ma le manino upu taʻitasi e aunoa ma se fasi upu e misi, ae o le mea e ofo ai, e lē o vaai i lana Tusi Paia.

E nofo Kingsley i Sri Lanka ma e tauaso. E faalētonu lana faalogo ma e manaʻomia se nofoa faataavalevale e fealuaʻi ai. Na faapefea ona aʻoaʻoina lenei tamāloa e uiga iā Ieova, ma agavaa ai e auai i le Aʻoga o le Faiva Faatiokarate? Seʻi oʻu faamatala atu.

Ina ua ou faatoʻā feiloaʻi iā Kingsley, na ou maofa i lona galala faaleagaga mo upu moni o le Tusi Paia. Na latou suʻesuʻeina le Tusi Paia ma nisi o Molimau, ma ua foliga tuai lana tusi mo tagata tauaso o Le Poto e Taʻitaʻia ai i le Ola e Faavavau. * Na ia talia laʻu valaaulia e toe fai lana suʻesuʻega, peitaʻi e lua ni luʻi na ma fesagaʻia.

Muamua, e nonofo faatasi Kingsley ma isi i se nofoaga mo tagata matutua ma lē atoatoa le malosi o le tino. Talu ai o le pisa tele o le nofoaga ma le lē lelei o le faalogo a Kingsley, sa tatau ai ona ou leotele. O le iʻuga, na lagona uma mai e tagata o le nofoaga la maʻua suʻesuʻega!

 Lona lua, e lē tele ni faamatalaga fou e mafai ona faitau ma puʻeina e Kingsley a o faagasolo le suʻesuʻega. Ina ia sologa lelei la ma suʻesuʻega, sa tinoū ai Kingsley e sauniuni lelei. A o leʻi faia a ma suʻesuʻega, e na te faitau ma toe faitau le mataupu o le suʻesuʻega, suʻe mau i le Tusi Paia mo tagata tauaso, ona faavasega lea i lona mafaufau tali o fesili. Na matuā aogā lenei auala. E saofaʻi o ia i le kapeta a o faia la maʻua suʻesuʻega, ma e na te pōpōina ma le fiafia le kapeta a o faamatala leotele mea na ia aʻoaʻoina. E leʻi leva ae faalua ona fai la ma suʻesuʻega i le vaiaso e taʻi lua itula le uumi o suʻesuʻega taʻitasi.

Na naunau Kingsley e auai i sauniga i le Maota mo Sauniga, peitaʻi e lē o se mea faigofie. E na te manaʻomia se fesoasoani e sii ai o ia i lona nofoa faataavalevale ma toe sii ese, e faapena foʻi i totonu o le taavale ma le Maota mo Sauniga. E auauaʻi le toʻatele o le faapotopotoga e fesoasoani iā te ia, ma e latou te manatu i ai o se faaeaga le faia faapea. A o faagasolo sauniga, e tuutuu e Kingsley lona taliga i le sipika e faalogologo lelei ai, ma faia ona sao.

Ina ua mavae sina taimi o faia lana suʻesuʻega, na filifili ai loa Kingsley e auai i le Aʻoga o le Faiva Faatiokarate. A o toe lua vaiaso fai lana faitauga Tusi Paia muamua, na ou fesili iā te ia po ua sauni lana lauga. Na ia faapea mai ma le mautinoa: “Ua faatolu sefulu taimi o aʻo laʻu lauga.” Na ou faamālō atu iā te ia ma fai atu ou te fia faalogo a o ia faitauina le Tusi Paia. Na ia tatala lana Tusi Paia mo tagata tauaso, tuu i ai ona tamatamaʻi lima ma faitau loa. Ae na ou mātauina e lē o faasolo ona lima i le itulau e pei ona masani ai. Na ia taulotoina le faitauga Tusi Paia atoa.

Na maligi oʻu loimata ma vaai atu ma le lē talitonu. Na ou fesili iā Kingsley pe faapefea ona ia manatuaina lelei ae e na o le faatolu sefulu taimi na faataʻitaʻi ai. Na ia tali mai: “E leai, e faatolu sefulu ona faataʻitaʻi i le aso.” I le silia i le masina, e saofaʻi ai Kingsley i le kapeta, faitau ma toe faitau mau seʻia oo ina taulotoina.

Ua oo mai le aso o lana lauga i le Maota mo Sauniga. Ina ua māeʻa lana lauga, na patipati ma le fiafia le faapotopotoga ma e toʻatele isi na fetagisi ona o le naunau o lenei failauga fou. Sa iai se tasi tagata talaʻi ua lē toe faia ni lauga i le aʻoga ona o le popole, ae ua toe manaʻo nei e auai i le aʻoga. Aiseā? Na ia faapea mai: “Afai e mafaia e Kingsley, ou te mafaia foʻi!”

Iā Setema 6, 2008, ina ua uma ona ia suʻesuʻeina le Tusi Paia mo le tolu tausaga, na faailoga ai e Kingsley lona tuuina atu iā Ieova, e ala i le papatisoga. O ia o se molimau faamaoni seʻia oo i lona maliu iā Me 13, 2014. Na mautinoa e Kingsley o le a faaauau lana auaunaga faamaoni i le lalolagi parataiso, i le malosi ma le soifua mālōlōina atoatoa. (Isa. 35:5, 6)—Faamatalaina e Paul McManus.