I LE 1991, na matuā olioli ai Molimau a Ieova i Rusia ina ua aveese faasāsāaga i la latou galuega ma ua latou maua se faatagaga faaletulafono. I lenā taimi e toʻaitiiti na manatu o le a faasefulu ona faateleina le faitau aofaʻi o Molimau, lea ua pe ā ma le 170,000 i aso nei. O nisi o nei tagata talaʻi galulue mamafa o le Malo, o Molimau mai isi atunuu o ē ua siitia atu i Rusia e fesoasoani i le seleselega faaleagaga. (Mata. 9:37, 38) Seʻi o tatou iloiloina nisi o a latou faamatalaga.

E 28 tausaga o Matthew mai i Peretania i le tausaga na aveese ai faasāsāaga o le galuega talaʻi i Rusia. I se tauaofiaga na faia i lenā tausaga, na faamatilatila ai i se lauga le manaʻomia o se fesoasoani i faapotopotoga i Europa i Sasaʻe. O se faaaʻoaʻoga, na taʻua e le failauga se faapotopotoga i St. Petersburg i Rusia, e na o le tasi le auauna o le faiva ae leai ni toeaina. Na faia e tagata talaʻi le faitau selau o suʻesuʻega faale-Tusi Paia! Ua faapea mai Matthew: “Ina ua māeʻa lenā lauga, na lē toe uma loʻu mafaufau i Rusia, o lea na ou tatalo ai iā Ieova e patino lava i loʻu faanaunauga e fia siitia atu i inā.” Na faaputu ana tupe, faatau atu le tele o ana meatotino, ma siitia atu loa i Rusia i le 1992. Na faapefea mai le tulaga o mea mo ia i inā?

Ua faapea mai Matthew: “O se luʻi le aʻoaʻoina o le gagana. E leʻi mafai ona maua ni aʻu talanoaga mananaia faaleagaga.” O se isi luʻi o le tau suʻe lea o se mea e nofo ai. “Na fesuisuiaʻi mea ou te nofo ai i le tele o taimi.” E ui lava i na faafitauli ae ua faapea mai Matthew: “O le siitia mai i Rusia o le filifiliga sili lea na ou faia.” Ua ia faapea mai: “O le auauna ai i inei ua ou aʻoaʻoina ai le faalagolago iā Ieova ma iloa ai lana taʻitaʻiga i le tele o auala.” Mulimuli ane na tofia Matthew o se toeaina ma o se paeonia faapito, ae i le taimi lenei o loo auauna o ia i le ofisa o le lālā e lata ane i St. Petersburg.

I le 1999, na faauu mai ai Hiroo mai i le Aʻoga mo Toleniga i le Faiva i Iapani a o 25 ona tausaga, ma na faalaeiauina o ia e se tasi o faiaʻoga ina ia auauna i oganuu ese. Na faalogo Hiroo i le telē o le manaʻoga  i Rusia ma amata ai loa ona ia aʻoaʻoina le gagana Rusia. Na ia faia foʻi se isi laasaga tāua. Ua ia faapea mai: “Na ou alu i Rusia mo le ono masina. Talu ai e malūlū tele le atunuu, na ou alu ai iā Novema ina ia vaai po ou te gafatia le malūlū.” Ina ua uma le tau malūlū na toe foʻi o ia i Iapani ma ola i se olaga faigofie, ina ia lava lana seleni e toe alu ai i Rusia ma nofo mau ai.

Ua atoa nei le 12 tausaga talu ona nofo Hiroo i Rusia ma auauna i le tele o faapotopotoga. I nisi taimi, e na o ia le toeaina e vaaia le silia i le 100 tagata talaʻi. I se tasi o faapotopotoga i vaiaso uma sa faia ai e Hiroo le tele o vaega o le Sauniga o le Auaunaga, faapea le Aʻoga o le Faiva Faatiokarate, Suʻesuʻega o Le Olomatamata ma le lima Suʻesuʻega Tautusi a le Faapotopotoga. Na te faia foʻi le tele o asiasiga faaleoleo mamoe. Ua faapea mai Hiroo, pe a toe tepa i tua i na tausaga: “O se matuā oliolisaga le fesoasoani i uso ma tuafāfine ia malolosi faaleagaga.” Na faapefea i le auauna i vaipanoa o loo telē ai le manaʻoga ona aafia ai o ia? Ua ia faapea mai: “Ae ou te leʻi sau i Rusia, na ou auauna o se toeaina ma o se paeonia foʻi, ae o le taimi lenei ua atili malosi la maʻua faiā ma Ieova. Ua ou aʻoaʻoina ai le maufaatuatuaina o Ieova i vala uma o loʻu olaga.” I le 2005, na faaipoipo ai Hiroo iā Svetlana, ma ua faaauau nei ona la auauna o ni paeonia.

O Matthew e 34 ona tausaga a o lona uso o Michael e 28 tausaga mai Kanata. Na la asiasi i Rusia ma matuā maofa i le toʻatele o tagata fiafia na auai i sauniga ae tau leai ni uso e faia sauniga. Ua faapea mai Matthew: “O le faapotopotoga na ou asiasi i ai e toʻa 200 le aofia, ae toʻatasi le toeaina matua ma le auauna o le faiva talavou na faia le sauniga. O le vaaia o lea tulaga na ou manaʻo ai ou te siitia atu i inā e fesoasoani i na uso.” Na ia siitia atu i Rusia i le 2002.

E fā tausaga mulimuli ane, ae siitia atu Michael i Rusia ma na vave ona iloa o loo telē pea le manaʻoga mo ni uso. Ona o ia o se auauna o le faiva, na tofia ai e na te vaaia tupe, lomiga ma oganuu. Na talosagaina foʻi o ia e faia galuega e masani ona faia e le failautusi o le faapotopotoga, faia lauga lautele, ma fesoasoani e faatulaga fonotaga ma fausia Maota mo Sauniga. E oo mai lava i aso nei, o loo manaʻomia pea le fesoasoani i na faapotopotoga. E ui o se galuega faigatā le faia o le tele o faaeaga ae ua faapea mai Michael o loo auauna nei o se toeaina: “Ua ou maua le faamalieina ona o le fesoasoani atu i uso. O le auala sili lea e faaaogā ai loʻu olaga!”

Ua faaipoipo nei Matthew iā Marina, a o Michael ua faaipoipo iā Olga. O loo faaauau pea ona fesoasoani nei ulugalii e toʻalua faatasi ai ma isi tagata talaʻi maelega i le tuputupu aʻe o faapotopotoga.

I le 1994, ina ua 16 tausaga o Tatyana, na auauna ai paeonia faapito e toʻa ono mai i Czech Republic, Polani ma Slovakia i lana faapotopotoga i Ukraine. O loo ia manatuaina pea i latou ma ua ia faapea mai ma le fiafia: “O paeonia maelega nei o ē e faigofie ona talanoa i ai, e agalelei, ma e latou te masani lelei i le Tusi Paia.” Na ia iloa le auala na faamanuia ai Ieova i lo latou agaga faataulaga, ma na ia faapea mai, ʻOu te fia pei o i latou.’

O le faalaeiauina e ala i faaaʻoaʻoga a paeonia, na faaaogā ai e Tatyana tuuaga o aʻoga e malaga ai ma isi i oganuu maotua i Ukraine ma Belarus, o i inā e leʻi talaʻi muamua i ai ni Molimau. Na olioli o ia i na talaʻiga o lea na ia fuafua ai e faalautele atu lana faiva e ala i le siitia atu i Rusia. Muamua, na ia alu mo sina taimi e asiasi i se tuafafine na siitia atu foʻi i inā, ma saʻili sana galuega e lagolago ai lana paeonia. Mulimuli ane i le tausaga e 2000, na ia siitia atu loa i Rusia. Pe sa faigatā lenā suiga?

Ua faapea mai Tatyana: “Talu ai ou te leʻi gafatia ona totogi soʻu lava fale, na tatau ai ona ou mautotogi i se potu i fale o isi. E lē faigofie lenā faatulagaga. Na  iai taimi na ou toe fia foʻi ai i loʻu aiga. Ae na fesoasoani mai Ieova iā te aʻu ina ia ou iloa le aogā o le faaauau o laʻu auaunaga i inei.” O loo auauna nei Tatyana o se misionare i Rusia. Ua ia faaiʻu mai e faapea: “O tausaga uma na ou alu ese ai mai i loʻu aiga, ua ou tofo i le tele o faamanuiaga ma tele ai aʻu uō. Ae sili atu i lenā, o nei tausaga na faamalosia ai loʻu faatuatua.”

O Masako mai i Iapani, ua 50 ma ona tupu ona tausaga, ua leva ona fia auauna o se misionare, ae o faafitauli tau le soifua mālōlōina na lē mafai ai ona ia faia faapea. Ae ina ua toe faaleleia lona soifua mālōlōina, na ia filifili ai e siitia atu i Rusia e fesoasoani i le galuega o le seleselega. E ui na faigatā ona maua ni fale lelei ma ni galuega i inā, ae sa mafai ona lagolagoina lana paeonia e ala i le aʻoaʻo atu o le gagana Iapani ma faia galuega faamamā. O le ā na fesoasoani iā te ia e faaauau ai lana faiva?

Pe a toe tepa i tua i le silia ma le 14 tausaga o auauna i Rusia, ua faapea mai Masako: “O le olioli ua ou maua i le faiva, ou te leʻi uaʻi tele ai i faafitauli na ou fesagaʻia. O le talaʻi i vaipanoa o loo telē ai le manaʻoga mo tagata talaʻi sa matuā fiafia ai loʻu olaga.” Ua ia toe faaopoopo mai: “O se vavega i aso nei loʻu iloaina o le auala na saunia ai e Ieova meaʻai, lavalava ma se fale mo aʻu i le tele o tausaga.” E ese mai i le auauna i le mea o loo telē ai le manaʻoga i Rusia, na faia foʻi se sao o Masako i le galuega o le seleselega i Kyrgyzstan. E lē gata i lea, na ia fesoasoani foʻi i vaega e tautatala i le faa-Peretania, gagana Saina ma le gagana Uighur. O loo auauna nei o ia o se paeonia i St. Petersburg.

Talu ai ona o le lē lelei o le tulaga tau tamaoaiga, e masani ona siitia atu ai aiga i isi atunuu ina ia faaleleia lo latou tulaga faaletino. Ae e pei o Aperaamo ma Sara i aso anamua, ua siitia atu isi aiga ina ia tuliloa sini faaleagaga. (Kene. 12:1-9) Seʻi o tatou manatu i le tulaga o Mikhail ma Inga, o se ulugalii faaipoipo mai i Ukraine ae na siitia atu i Rusia i le 2003. Na la maua ē na saʻilia upu moni o le Tusi Paia.

 Ua faapea mai Mikhail: “Na ma talaʻi i se vaipanoa e leʻi talaʻi muamua i ai ni Molimau. Na tatala mai e se tamāloa matua le faitotoʻa o lona fale ma faapea mai: ʻO oulua o ni tagata talaʻi?’ Ina ua ma faapea atu ioe, na ia faapea mai: ʻNa ou iloa e iai se aso e tou te ō mai ai. E mautinoa e taunuu fetalaiga a Iesu.’ Ona sii mai lea e le tamāloa o le Mataio 24:14.” Ua faapea atili mai Mikhail: “I lenā lava vaipanoa, na ma tau ai i se vaega o fafine pe tusa ma le toʻasefulu o le lotu Papatiso, o tagata lotofaamaoni ua galala mo upu moni. Na iai a latou tusi o le Ola e Faavavau ma e latou te faaaogāina i faaiʻuga uma lava o vaiaso e suʻesuʻe ai le Tusi Paia. E tele itula na ma taliina ai a latou fesili, ma matou pepese faatasi i pese o le Malo, ona faia lea o sa matou taumafataga o le afiafi ma i latou. O lenā asiasiga o se tasi lea o mea e lē galo iā te aʻu.” Na ioe Mikhail ma Inga o le auauna i vaipanoa o loo telē ai le manaʻoga mo tagata talaʻi o le Malo, ua la māfana atu ai iā Ieova, atili ai ona alolofa i tagata, ma ua faamanuiaina i laʻua i se olaga faamalieina. O loo auauna nei i laʻua o ni ovasia matagaluega.

I le 2007, na asiasi atu ai i le ofisa o le lālā i Rusia ia Yury ma Oksana, o se ulugalii faaipoipo mai i Ukraine, ua silia ma le taʻi 30 o la tausaga ma la laʻua tama tama o Aleksey ua 13 nei ona tausaga. O i inā na latou vāai ai i se faafanua o Rusia ma le telē o le vaipanoa e leʻi galueaʻiina. Ua faapea mai Oksana, “Ina ua uma ona matou vāai i ia faafanua, na matou iloa ai o loo telē se manaʻoga mo tagata talaʻi o le Malo. Na fesoasoani iā i matou e faia se filifiliga e siitia atu i Rusia.” O le ā se isi mea na fesoasoani iā i latou? Ua faapea mai Yury: “Na aogā le faitauina o mataupu i a tatou lomiga e pei o le ʻPe Mafai Ona E Auauna i se isi Atunuu?’ * Na matou asiasi i le vaipanoa i Rusia lea na faailoa mai e le lālā e matou te siitia atu i ai, ma vaai ai sa matou fale ma ni galuega.” I le 2008, na latou siitia atu ai i Rusia.

Muamua, sa faigatā le saʻilia o se galuega, ma o le tele o taimi e fesuisuiaʻi ai mea na latou nonofo ai. Ua faapea mai Yury: “E masani lava ona matou tatalo ina ia aua neʻi o matou lotovaivai, ona toe faaauau lea o le talaʻiga, ma maufaatuatuaina le lagolagosua a Ieova. Na matou tofo i le auala na tausia ai e Ieova i matou pe a faamuamua manaʻoga o le Malo. O lenei auaunaga na faamalosia ai lo matou aiga.” (Mata. 6:22, 33) Na faapefea i le auauna i le mea o loo telē ai le manaʻoga ona aafia ai Aleksey? Ua faapea mai Oksana: “Na matuā lelei se aafiaga iā te ia. Na ia tuuina atu o ia iā Ieova ma papatiso i le iva o ona tausaga. O le iloaina o le telē o le manaʻoga mo tagata talaʻi o le Malo, na uunaʻia ai o ia e auauna o se paeonia lagolago i tuuaga o aʻoga. Na ma olioli i le vaai atu i lona naunau ma le maelega i le faiva.” O loo auauna nei Yury ma Oksana o ni paeonia faapito.

E pei ona faaalia manino mai i faamatalaga a nei ʻaugalulue o le seleselega, o le siitia atu i isi vaipanoa e faalautele atu le faiva e manaʻomia ai lou matuā maufaatuatuaina o Ieova. E fesagaʻi i latou o loo auauna i le mea o loo telē ai le manaʻoga ma luʻi i a latou oganuu fou, ae ua latou iloa foʻi le olioli e maua mai i le folafola atu o le tala lelei i tagata o loo tali lelei mai i le feʻau o le Malo. Pe e mafai ona e fesoasoani i le galuega o le seleselega i se vaipanoa o loo telē ai le manaʻoga mo ni tagata talaʻi? Pe a e filifili e faia faapea, atonu e tutusa o oulua lagona ma Yury, o lē na faapea mai e faatatau i lana filifiliga e auauna i le mea o loo telē ai le manaʻoga: “E pau le mea na ou salamō ai, ou te leʻi vave siitia mai.”