1, 2. (a) O ā faamanuiaga faaletino i le lalolagi fou o loo e tulimataʻia? (Tagaʻi i le ata i luga aʻe o le matua.) (e) O ā faamanuiaga faaleagaga o le a iai i le lalolagi fou?

“LE OLA MONI.” O lenā faaupuga e tatou te mafaufau ai i le faamoemoe o le ola e faavavau i le Parataiso i le lalolagi. Na faafesootaʻi atu e le aposetolo o Paulo le “ola e faavavau” i “le ola moni.” (Faitau le 1 Timoteo 6:12, 19.) E tatou te tulimataʻia se olaga e faavavau o le a maua ai le faamalieina ma le olioli. Atonu e faigatā ona faavasega i o tatou mafaufau le feala aʻe i taeao o aso taʻitasi ua lelei atoatoa le malosi o le tino, mafaufau ma faalogona. (Isa. 35:5, 6) Seʻi mafaufau i le manaia o le faatasitasi ma o tatou aiga ma uō pele, e aofia ai i latou e toetutū mai! (Ioa. 5:28, 29; Galu. 24:15) O le a maua foʻi le avanoa e faaleleia ai o tatou tomai i mea faasaienisi, musika, o le tusia o ata o fale ma isi matātā.

² E ui e tele mea lelei o loo tatou tulimataʻia, ae o faamanuiaga autū i le lalolagi fou o le itu faaleagaga. Maʻeu le matuā faamalieina i le iloa o le a faapaiaina le suafa o Ieova ma faamaonia le tonu o lana pule silisili ese! (Mata. 6:9, 10) O le a  faafiafiaina i tatou e vāai i le faataunuuina o le uluaʻi finagalo o Ieova mo tagata ma le lalolagi. Seʻi manatu i le faigofie ona tatou mafuta vavalalata atu iā Ieova, a o faasolo ina tatou lelei atoatoa!—Sala. 73:28; Iako. 4:8.

3. O le ā e tatau ona tatou sauniuni i ai i le taimi lenei?

³ E mafai ona tatou maua na faamanuiaga, auā ua faamautinoa mai e Iesu iā i tatou “e mafaia e le Atua mea uma lava.” (Mata. 19:25, 26) Pe afai tatou te mananaʻo e ola i le lalolagi fou ma pe a mavae foʻi le Pulega a Keriso i le Afe Tausaga, e tatau ona tatou gaoioi nei loa e “taofimau” i le ola e faavavau. E tatau ona tatou faatalitali i le iʻuga o lenei lalolagi amioleaga, ma ia uia laasaga e sauniuni ai mo le olaga i le lalolagi fou. E faapefea ona tatou faia lenā mea a o tatou ola pea i lenei faiga amioleaga o mea?

4. Aumai se faataʻitaʻiga o le auala e tatou te sauniuni ai mo le olaga i le lalolagi fou.

⁴ E faapefea ona tatou sauniuni i le taimi lenei e ola i le lalolagi fou a le Atua? Seʻi faapea ua tatou fuafua e siitia atu i se isi atunuu. E faapefea ona tatou sauniuni mo lenā suiga? Atonu e tatou te amata i le aʻoaʻoina o le gagana a le atunuu. E aogā foʻi le aʻoaʻoina o a latou aganuu. E tatou te ono faamasani i a latou meataumafa. O le faia faapea, e pei lava ua tatou nonofo ai i lenā atunuu, ma o le auala lenā e tatou te ola ai pe a taunuu i ai. I se tulaga talitutusa, o le auala e tatou te ola ai i le taimi lenei, e mafai ona tatou sauniuni ai mo le olaga i le lalolagi fou. Seʻi o tatou iloiloina nisi o faaaʻoaʻoga.

5, 6. E faapefea i le gauaʻi i faatulagaga a le Atua ona fesoasoani e toleni ai i tatou mo le olaga i le lalolagi fou?

⁵ I le lalolagi fou, o le a faamaonia atoatoa ai le tonu o le pule silisili ese a le Atua. E matuā ese lava ma le agaga fia tutoʻatasi o lenei lalolagi o loo pulea e Satani. Ua faatāuaina e nisi le agaga o le fia tutoʻatasi ma le tausisi o le tagata i ana ia lava aiā tatau. Ae o le ā ua iʻu i ai? O le lē taliaina o le taʻitaʻiga a le Atua, ua iʻu ai i puapuaga, mafatiaga, ma mala. (Iere. 10:23) E tatou te tulimataʻia le taimi o le a gauaʻi ai tagata uma i le pulega alofa a Ieova.

⁶ O se fiafiaga le ola e tusa mai ai ma faatulagaga a Ieova i le lalolagi fou a o tatou galulue e faamatagofie le lalolagi, aʻoaʻoina ē toetutū mai ma faia le finagalo o Ieova. Ae faapefea pe afai e faatonuina i tatou e faia se galuega e tatou te lē fiafia tele i ai? Po o le a tatou gauaʻi i lenā taʻitaʻiga e ala i le faia o le mea sili e faatino ma olioli ai i lenā tofiga? O le tali a le toʻatele o i tatou o le ioe. O lea, po o tatou gauaʻi faapena i le taʻitaʻiga a le Atua i le taimi lenei? Pe afai o loo tatou faia faapea, ua tatou sauniuni la mo le ola e faavavau i le pulega a Ieova.

7, 8. (a) Aiseā e tatau ai ona tatou taumafai e galulue soosootauʻau? (e) O ā ni suiga ua oo i nisi Kerisiano? (i) O ā ni o tatou lagona mautinoa e faatatau i le olaga i le lalolagi fou?

⁷ E mafai ona tatou sauniuni mo le olaga i le lalolagi fou e ala i le gauaʻi i faatulagaga a Ieova i aso nei, ma taumafai e atiaʻe le lotomalie ma galulue soosootauʻau ma isi. Pe afai e tatou te lagolagosua i ē taʻimua i aso nei, e tatou te lotomalilie ma olioli i o tatou tofiga fou o le auaunaga, ma o le a faapena foʻi ona tatou faia i le lalolagi fou. (Faitau le Eperu 13:17.)  Na vaevaeina fanua o tagata Isaraelu e ala i le faia o se vili ina ua ulu atu i le Nuu Folafolaina. (Nu. 26:52-56; Iosua 14:1, 2) I aso nei, e tatou te lē iloa po o fea o le a tofia i tatou e nonofo ai i le lalolagi fou. Peitaʻi o le galulue soosootauʻau ma isi e maua ai le lotomalie ma le fiafia e faia le finagalo o Ieova, e tusa lava po o fea e tatou te nonofo ai i lenā taimi.

⁸ O le faaeaga e ola i lalo o le pulega o le Malo, e tatou te fiafia ai i le taimi lenei e galulue soosootauʻau ma le faalapotopotoga a Ieova ma taulimaina o tatou tofiga faatiokarate. E ono suia o tatou tulaga a o faagasolo taimi. O se faaaʻoaʻoga, ua toe tofia nisi sui o le aiga Peteli i le Iunaite Setete e galulue i le fanua, ma ua latou olioli i le taimi lenei i le tele o faamanuiaga i isi vala o le auaunaga faataimi atoa. Talu ai o le tulaga matua ma isi māfuaaga, ua tofia ai nisi sa iai i le galuega femalagaaʻi e avea ma paeonia faapito. Pe a tatou atiaʻe le lotomalie, tatalo i le Atua mo lana fesoasoani ma faia le mea sili i le auaunaga, o le a tatou olioli ma maua le tele o faamanuiaga i nei aso faigatā. (Faitau le Faataoto 10:22.) O le ā o le a tupu iā i tatou i le lumanaʻi? E tatou te ono mafaufau i se vaipanoa e tatou te fia nonofo ai i le lalolagi fou, ae atonu e faatonuina i tatou e nonofo i se isi vaipanoa. E mautinoa lo tatou lotofaafetai, lotomalie, ma olioli e tusa lava po o fea e tatou auauna ai ma a tatou galuega e fai.—Nee. 8:10.

9, 10. (a) Aiseā e manaʻomia ai le onosaʻi i le lalolagi fou? (e) E faapefea ona faaalia lo tatou onosaʻi i le taimi lenei?

⁹ I le lalolagi fou, e iai taimi e manaʻomia ai ona tatou onosaʻi. O se faaaʻoaʻoga, atonu ua tatou faalogo ua fiafia nisi ona ua toe faatutūina mai o latou aiga ma uō. Peitaʻi, atonu o loo tatou faatalitali mo le toetutū mai o o tatou aiga ma uō pele. Pe afai o le tulaga lenā, po o le a tatou olioli pea ma isi ma onosaʻi? (Roma 12:15) O le taumafai e faatalitali ma le onosaʻi i le faataunuuina o folafolaga a Ieova i le taimi lenei, o le a fesoasoani iā i tatou e onosaʻi ai i le lumanaʻi.—Fai. 7:8.

¹⁰ E mafai foʻi ona tatou sauniuni mo le olaga i le lalolagi fou, e ala i le onosaʻi a o faailoa mai upu moni. Po o tatou onosaʻi ma naunau e suʻesuʻe a o faasolosolo ona faamanino mai upu moni o le Tusi Paia i aso nei? Pe afai o le tulaga lenā, o le a faigofie la ona tatou onosaʻi i le lalolagi fou, a o faailoa mai e Ieova lona finagalo mo tagata.—Faata. 4:18; Ioa. 16:12.

11. O le ā ua aʻoaʻoina ai i tatou e Ieova i le taimi lenei e faatatau i faiā faaletagata, ma o le a faapefea ona aogā i le lalolagi fou?

¹¹ O se isi auala e sauniuni ai mo le olaga i le lalolagi fou, o le taumafai ia maua le lotofaamagalo. A o faagasolo le Pulega a Keriso i le Afe Tausaga, e manaʻomia e tagata amiotonu ma amiolētonu se taimi e aveese ai uiga lē lelei atoatoa. (Galu. 24:15) Po o le a mafai ona tatou feutagaʻi ma le alofa ma isi i lenā taimi? Pe afai e tatou te taumafai e faamagalo ma le lotoatoa ma ʻalofia feeseeseaʻiga ma isi i le taimi lenei, o le a faigofie foʻi ona tatou faia faapea i le lumanaʻi.—Faitau le Kolose 3:12-14.

12. Aiseā e tatau ai ona tatou sauniuni i le taimi lenei mo le lalolagi fou?

¹² O le olaga i le lalolagi fou e lē faapea o le a tatou maua i taimi uma mea e tatou te mananaʻo ai. E tatau ona tatou talisapaia ma lotomalilie i so o se tulaga, ma maua aogā mai i le gauaʻi i le pulega alofa a Ieova. O lona uiga, ia faaalia uiga o loo aʻoaʻoina i tatou e Ieova e atiaʻe i le taimi  lenei. O le taumafai e faaalia nei uiga i le taimi lenei, ua tatou sauniuni ai mo le ola e faavavau. Ua faamalosia lo tatou faatuatua i le oo mai o “le lalolagi ua ʻainā.” (Epe. 2:5, fpl; 11:1) Ua faaalia ai lo tatou matuā naunau mo tulaga amiotonu o le a iai le lalolagi. O le faia faapea, ua tatou sauniuni ai mo le olaga i le lalolagi fou a le Atua.

13. O le ā o le a tatou faamuamua i le lalolagi fou?

¹³ Seʻi iloilo se isi auala e tatou te sauniuni ai mo le ola moni. E ui lava ua folafola mai le fau ma soloi o meataumafa ma isi mea i le lalolagi fou, ae o le fiafiaga sili o le faamalieina o o tatou manaʻoga faaleagaga. (Mata. 5:3) O le a tatou faamuamua mea faaleagaga, ma o le a faaalia ai lo tatou matuā fiafia iā Ieova. (Sala. 37:4) O le faamuamua o mea faaleagaga i le taimi lenei, ua tatou sauniuni ai mo le ola moni i le lumanaʻi.—Faitau le Mataio 6:19-21.

14. O ā sini faaleagaga e mafai ona faatutū e talavou?

¹⁴ E faapefea ona faateleina lo tatou olioli i le auaunaga i le Atua? O se tasi o auala, o le faatutū lea o sini faaleagaga. Afai o oe o se talavou o loo manatu mamafa i le auaunaga iā Ieova, aiseā e lē faia ai ni au saʻiliʻiliga i a tatou lomiga e faatatau i vala eseese o le auaunaga faataimi atoa, ma taumafai e avea ma ou sini? * E mafai ona e talanoa atu i se tasi ua loa o auauna faataimi atoa. O le avea o le faiva ma au galuega, ua e sauniuni ai e faaauau lau auaunaga i le lalolagi fou a le Atua, lea o le a aogā ai ou tomai ma au toleniga faaleagaga.

15. O ā isi sini faaleagaga e mafai ona faatutū e tagata talaʻi o le Malo?

¹⁵ I le avea o ni tagata talaʻi o le Malo, o ā sini faaleagaga e mafai ona tatou faatutū? E mafai ona fai ma o tatou sini le faaleleia o o tatou tomai i se vala patino o le faiva. Pe atonu e tatou te taumafai e faaleleia lo tatou malamalamaga i mataupu silisili o le Tusi Paia ma le faatatauga i o tatou olaga. Ae faapefea le faaleleia atili o le faitau ma le tautala i le lautele po o le faia o ni sao i sauniga? E mafai ona e mafaufau i nisi sini. O le manatu tāua lenei: O le faatutū o sini faaleagaga o le a faateleina ai lou maelega i le auaunaga i le  Atua, ma o le a fesoasoani iā te oe e sauniuni ai mo le olaga i le lalolagi fou.

16. Aiseā ua avea ai le auaunaga iā Ieova o se olaga e sili ona lelei?

¹⁶ Po o le faaalu o o tatou taimi e sauniuni ai mo le lalolagi fou a le Atua, o le a tatou misia ai se olaga e sili ona lelei i aso nei? E leai! O le auauna iā Ieova o le olaga lea e sili ona lelei. E lē faamalosia i tatou e faia faapea ina ia faasaoina ai i le puapuaga tele. Na foafoaina i tatou e Ieova e auauna iā te ia ma o le auala sili lenā e ola ai. O le mauaina o le alofa ma le taʻitaʻiga a Ieova e sili atu nai lo o se isi lava mea. (Faitau le Salamo 63:1-3.) E lē manaʻomia ona tatou faatalitali i le lalolagi fou ina ia olioli ai i faamanuiaga faaleagaga lea e maua mai i le auauna ma le lotoatoa iā Ieova, auā ua tatou aeae i na faamanuiaga i le taimi lenei! Ua maua e nisi o i tatou na faamanuiaga mo le tele o tausaga, ma ua tatou mautinoa ai e leai lava se isi olaga e sili atu ona lelei.—Sala. 1:1-3; Isa. 58:13, 14.

17. O le ā le tulaga o faafiafiaga ma mālōlōga o le a iai i le Parataiso?

¹⁷ I le lalolagi fou a le Atua, o le a tatou olioli ai e faaalu le taimi i mea e tatou te fiafia ai. Aiseā na foafoaina ai i tatou e Ieova ma le faanaunauga e fai mea e tatou te fiafia ai pe afai e leʻi finagalo o ia e faamalie na faanaunauga? (Fai. 2:24) O le a faamalieina pea e Ieova “le manaʻo o mea ola uma lava.” (Sala. 145:16) E tatou te manaʻomia faafiafiaga ma mālōlōga, ae e sili atu le fiafia e maua mai ai pe a faamuamua la tatou faiā ma Ieova. O le tulaga foʻi lenā o le iai i le Parataiso. E atamai le taumafai e saʻili muamua le Malo ma uaʻi atu i faamanuiaga faaleagaga ua maua e tagata o Ieova i le taimi lenei, nai lo o le uaʻi atu i mea e tatou te fiafia ai.—Mata. 6:33.

18. E faapefea ona faaalia ua tatou sauniuni mo le ola e faavavau i le Parataiso?

¹⁸ I le Parataiso o loo faaloloʻi mai, o le a sili atu ona tatou fiafia nai lo o se isi lava taimi. Seʻi o tatou faaalia le mātua naunau i le ola moni e ala i le sauniuni i le taimi lenei. Ia tatou atiaʻe uiga o le Atua ma maelega i le galuega talaʻi o le Malo lea na tuu mai e tatou te faia. Ia avea lo tatou saʻilia muamua o mea faaleagaga o se mea e tatou te matuā fiafia i ai. O lea seʻi o tatou sauniuni nei loa mo le olaga i le lalolagi fou, a o tatou faatuatua atoatoa i folafolaga a Ieova!