O Afea o le a Oo Mai ai le Malo o le Atua?

SA NAUNAU le ʻauaposetolo e fia iloa po o afea o le a faaoo mai ai e Iesu lona Malo. Na latou fesili: “Le Alii e, pe e te toe faavaeina le malo iā Isaraelu i le taimi nei?” (Galuega 1:6) Ua tusa ma le 2,000 tausaga talu lenā taimi, o loo naunau pea tagata i le fia iloa: O afea o le a oo mai ai le Malo o le Atua?

Atonu e te manatu sa talanoaina e Iesu le Malo, auā sa avea ma matua o lana talaʻiga. Ioe o le mea lenā sa ia faia. E tele taimi sa ia faamatala ai se vaitaimi faapitoa e taʻua o lona “faatasi mai.” (Mataio 24:37) E fesootaʻi lelei lenā faatasi mai ma le faavaeina o le Malo o le Mesia. O le ā le uiga o le faatasi mai o Iesu? E fā ni aʻoaʻoga moni o loo taʻua i le Tusi Paia e uiga i le faatasi mai o Keriso, o le a tatou iloiloina.

1. Na mavae se taimi umi talu ona maliu Keriso, faatoʻā amata lea o lona faatasi mai. Na taʻua e Iesu se faataʻitaʻiga e faatusa ai o ia i se tamāloa na “alu malaga i se nuu mamao, ina ia avea o ia ma tupu.” (Luka 19:12) Na faapefea ona faataunuu lea talafaatusa faavaloaga? Sa maliu Iesu ma toetū; ona alu lea i le “nuu mamao,” o lona uiga o le lagi. E pei ona valoia e Iesu i se isi talafaatusa, o lona toe foʻi mai ina ua avea ma tupu, na taunuu “ina ua mavae se taimi umi.”—Mataio 25:19.

Ina ua mavae ni nai tausaga talu ona afio Iesu i le lagi, na tusi le aposetolo o Paulo e faapea: “Ua ofoina atu e lenei tagata [Iesu] le  taulaga e tasi e faavavau mo agasala, ma nofo ai i le itu taumatau o le Atua, o loo faatalitali ai o ia seʻia faia ona fili ma mea e tū ai ona vae.” (Eperu 10:12, 13) O lona uiga sa umi se taimi na faatalitali ai Iesu ina ua taunuu i le lagi. Na faaiʻuina lea taimi ina ua faanofotupu e Ieova lona Alo e fai ma Tupu o le Malo o le Mesia, ua leva ona folafolaina mai. O le taimi lenā na amata ai le faatasi mai o Keriso. Pe faamata na mafai e tagata i le lalolagi, ona iloa atu le tutupu o nei mea ofoofogia ma mataʻutia i le lagi?

2. E lē vaaia e mata o tagata lona faatasi mai. Manatua foʻi, sa taʻua e Iesu ia le faailoga o lona faatasi mai. (Mataio 24:3) Pe faamata e manaʻomia se faailoga pe ana fai e iloa atu e mata o tagata lona faatasi mai? Ailoga. O se faataʻitaʻiga: Seʻi faapea o lea o le a e malaga atu e te fia matamata i le mea o iai le pupū. Atonu e te vaaia faailoga po o faailoilo i le auala, e faasino atu ai iā te oe le mea o iai, ae pe a e latalata loa i ai, e lē toe manaʻomia se faailoga, auā o lenā ua e iloa atu le pipisi aʻe o le pupū. Aiseā e manaʻomia ai fua se faailoilo ae o lea ua e iloaina atu?

Na faamatala e Iesu le faailoga o lona faatasi mai, e lē ina ia faasino atu i se mea o loo iloa atu e tagata i o latou mata, peitaʻi ina ia fesoasoani iā i latou e malamalama ai i se mea o le a tupu i le lagi. O lea na fetalai ai Iesu: “E lē oo mai le malo o le Atua i se auala mataʻina.” (Luka 17:20) E faapefea la ona iloa e tagata o le lalolagi mai le faailoga e faapea, ua amata le faatasi mai o Keriso?

3. E iloa le faatasi mai o Iesu i se vaitaimi o faafitauli ogaoga i le lalolagi. Na fetalai Iesu o le a iloa lona faatasi mai o se Tupu i le lagi pe a iai taua, oge, mafuiʻe, faamaʻi ma le amioleaga i le lalolagi. (Mataio 24:7-12; Luka 21:10, 11) O ai ua māfua ai nei puapuaga? O loo taʻua e le Tusi Paia Satani o “le pule o lenei lalolagi,” ua matuā ita tele ona ua ia iloa ua puupuu lona taimi auā o lea ua amata le faatasi mai o Keriso le Tupu. (Ioane 12:31; Faaaliga 12:9, 12) Ua matuā anoanoaʻi faamaoniga i o tatou taimi e iloa ai le ita tele o Satani, ma le faatasi mai o Keriso. Ua mātaulia nei faailoga i se tulaga e leʻi tupu muamua lava i le lalolagi aoao, aemaise lava talu mai le 1914, o se tausaga ua iloga e tusa ai ma tagata suʻesuʻe o talafaasolopito.

O na mafatiaga e pei ona taʻua, e taʻu mai ai ua pule nei le Malo o le Mesia i le lagi. Ua toeitiiti lava ona faaoo mai lea o lana pule i le lalolagi. Ae o le a faapefea ona iloa e tagata lenā Malo, ina ia latou talia lana pulega ma avea ai ma ona tagatānuu?

4. Ua faailogaina le faatasi mai o Iesu i se galuega talaʻi ua faia i le lalolagi aoao. Na fetalai Iesu e faapea o le a pei lona faatasi mai o “aso o Noa.” * (Mataio 24:37-39) Sa leʻi  avea Noa e tau o sē e fausiaina le vaa, ae sa avea foʻi ma “lē e talaʻi le amiotonu.” Na lapataʻia e Noa tagata e faapea ua lata mai le faamasinoga a le Atua. Na taʻua e Iesu o le a faapea foʻi ona faia e ona soo a o faagasolo lona faatasi mai. Na ia valoia e faapea: “E talaʻiina atu lenei tala lelei o le malo i le lalolagi atoa e fai ma molimau i atunuu uma, ona oo mai ai lea o le iʻuga.”—Mataio 24:14.

I le mataupu muamua, ua tatou iloa ai o le a faaumatia e le Malo o le Atua malo uma o tagata. Ua faailoa e le galuega talaʻi le lata mai o le taimi o le a gaoioi ai lenā malo o le lagi, ma o le a maua ai e tagata uma le avanoa e sao ai mai le faaumatiaga ma avea ma tagatanuu o lenā Malo. O le fesili tāua la, O le ā o le a e faia e tusa o lea Malo?

Po o le a Avea le Malo o le Atua ma Tala Lelei mo Oe?

E lē faatusatusaina i se isi mea le faamoemoe ua aumaia e feʻau na talaʻia e Iesu. Ina ua uma le fouvalega na faia i Etena i le faitau afe tausaga ua mavae, na fuafua e Ieova le Atua se malo e toe faafoʻi ai tagata faamaoni i le tulaga na ia finagalo i ai i le amataga, ia ola e faavavau i se parataiso i le lalolagi. E leai se isi mea e sili atu ona faafiafiaina ai nai lo o le iloa ua pule nei i le lagi, le malo ua leva ona folafolaina mai. E lē o se manatu faatupu ae o se mea moni!

Ua pule nei le Tupu tofia a le Atua i ona fili. (Salamo 110:2) I lenei lalolagi vevesi ua vavaeese mai le Atua, o loo faataunuu e le Mesia le finagalo o lona Tamā, ia saʻilia i latou uma e fia iloa le Atua moni ma tapuaʻi atu iā te ia i le “agaga ma le upu moni.” (Ioane 4:24) E maua e tagata mai ituaiga uma, o ē matutua ma ē iti, ma mai talaaga eseese, le faamoemoe e ola e faavavau i le pulega o le Malo o le Atua. (Galuega 10:34, 35) Matou te faalaeiau oe e talia le avanoa matagofie ua ofo atu iā te oe. Ia aʻoaʻo nei loa e uiga i le Malo o le Atua, ma e olioli ai e soifua e faavavau i lea pulega amiotonu o le Malo!—1 Ioane 2:17.

[Faaopoopoga i lalo]

[Ata i le itulau 8, 9]

O tala o mafatiaga o tatou faalogoina i aso uma, e taʻu mai ai ua lata le taimi e oo mai ai mea lelei

[Ē Ana le Ata]

Fana: U.S. Army photo