O se Vaipuna e Puna Mai ai le Ola e Faavavau

“A o lē e inu i le vai ou te foaʻiina atu, e lē toe fia inu lava o ia, ae o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.” —IOANE 4:14.

 “NA FAAFUASEʻI lava, i tua atu o le tāliʻoliʻo o le masina, . . . na aliali aʻe ai se maatāua e feʻilafi lanumoana ma paʻepaʻe, o se malamalama, i le lagi lanumoana o loo teuteuina i ni ʻie ufimata papaʻe e taviʻoviʻo, ma o loo faasolosolo mālie ona iloa atu e pei o se tamaʻi penina i totonu o se sami uliuli mafiafia e lē mafai ona iloa atu e se tasi.”—O le faamatalaina lenā o le lalolagi i lona vaaiga mai i le vateatea e Edgar Mitchell, o se tagata faimalaga i le vateatea.

Na faapefea ona maua le lanu matagofie o lo tatou paneta, lea ua uunaʻia ai lenei tagata faimalaga i le vateatea e faaali mai ona lagona i se gagana faafatusolo? Ioe o le vai, lea toeitiiti lofia atoa ai le tolu kuata o le fogāeleele o le lalolagi. O le mea moni, e lē gata e mafai e le vai ona faamatagofieina lo tatou paneta; ae e aogā foʻi mo le ola o meaola o loo i le lalolagi. Auā e pe ā ma le 65 pasene o le tino o le tagata e faia aʻe i le vai. O lea, na taʻua ai e le Encyclopædia Britannica e faatatau i le vai e faapea: “E tāua tele le vai i le ola, e fesoasoani le vai i le tele o faagasologa lea o loo tutupu i laau ma manu.”

E tatou te lotofaafetai ona o le lelei o le faataamilosaga o le vai, lea e lē tau manaʻomia ai ona faamamāina le suāvai o loo maua i le lalolagi. O loo taʻua i le tusi The World Book Encyclopedia, “E toetoe o vai uma o loo tatou faaaogāina, e toe foʻi uma atu i le sami. O i inā e mitiia ai e le lā. Ona toe paʻū ifo lea i le eleele o se timu. E faaaogā ma toe faaaogā pea le vai i taimi uma. E lē taitai uma lona faaaogāina.” Na faamatalaina e le Tusi Paia lenei faagasologa ofoofogia pe tusa ma le 3,000 tausaga ua mavae, e faapea: “O loo tafe ifo vaitafe uma i le sami; a e lē tumu ai le sami; o le mea e tafe mai ai vaitafe, e toe foʻi atu ia i ai.” Maʻeu le ofoofogia o le auala na faia ai lenei faataamilosaga o le vai i le lalolagi!—Failauga 1:7.

Ona o le tāua la o le vai i le ola o le tagata ma le auala ofoofogia na saunia ai, e lē faateʻia la i tatou ona taʻua o le vai i le Tusi Paia i le sili atu i le 700 taimi. E masani ona faaaogā e le Tusi Paia vala matilatila o le vai—aemaise lava lona malosi e faamamā ai ma faatumau ai le ola—e faaata mai ai mea tāua faaleagaga.—Isaia 58:11; Ioane 4:14.

Le Mana o le Tusi Paia e Faamamā Ai

Sa mataʻina le tulaga mamā o tagata Isaraelu i le itu faaletino ona o le toʻaaga e taeele ma faamamā i latou i le vai. Sa fai ma tū masani le fufulu mamā o vae o se tasi a o leʻi ulu atu i le fale mo le taumafataga. (Luka 7:44) E faaopoopo atu i le faamamāina pea o o latou tino ma meatotino i le itu faaletino, sa faaaogā foʻi e tagata Isaraelu le vai ina ia tumau ai pea ona faamamāina faaletapuaʻiga i latou. Sa tatau i ositaulaga o loo galulue i le malumalu, ona faamamāina i latou ma tatā o latou ofu i taimi uma. (Esoto 30:18-21) Sa faia foʻi e Solomona se faataanoa “vai ʻapa memea “ i le malumalu i Ierusalema, lea e masani ona sili atu i le 11,500 kalone (44,000 lita) le vai e faatumu ai, ma sa lava lenā mo mea sa manaʻomia ona faamamā e tusa ai ma le Tulafono a le Atua. (2 Nofoaiga a Tupu 4:2, 6) O le ā le uiga o lenei faaaogāina o le vai mo Kerisiano i aso nei?

Na taʻua e Paulo, sa faamamāina e Iesu le faapotopotoga Kerisiano “i le faataele i le vai e ala i le upu.” E pei lava ona mafai e le vai ona faamamāina i le itu faaletino, e mafai foʻi e upu moni o le Afioga a le Atua ona faamamāina i tulaga tau amio ma le faaleagaga. O lenei faamamāina e mafai ona fesoasoani i soo o Iesu ina ia “paia ma ia lē mataʻuleagaina.” (Efeso 5:25-27) O le māfuaaga lenā e tatau ai mo i latou uma e mananaʻo e faafiafia le finagalo o le Atua, ona galulue pea e faatumau lo latou tulaga tau amio ma le faaleagaga ina ia ‘leai so latou ila, ma lē ponā.’ (2 Peteru 3:11, 14) E faapefea ona fesoasoani le Afioga a le Atua ina ia faia lenei tulaga?

O ē uma e mananaʻo e faafiafia Ieova le Atua, e latou te aʻoaʻoina le poto lea e faaata mai e le vai, e ala i le suʻesuʻe e lē aunoa i le Tusi Paia. Pe afai e pāʻia o latou mafaufau ma loto e le poto ua latou maua, o le a latou maua ai se faanaunauga malosi e faia le mea lea na faatonuina mai e le Tusi Paia: “Ia liua e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma le lelei atoatoa.”—Roma 12:2.

E fesoasoani le poto saʻo o le Atua iā i latou ina ia iloa ni pisia po o ni ila i a latou amio ma  mafaufauga. A o faaauau ona latou faatatauina mataupu silisili a le Tusi Paia i o latou olaga mo se vaitaimi, o le a fesoasoani le Afioga a le Atua lea e pei o le vai, ina ia “faamamāina” i latou e oo lava i agasala matuiā.—1 Korinito 6:9-11.

E faapenei le auala na suia ai le olaga o se tama talavou i Sepania. Na faamatala e Alfonso, “Ina ua 18 oʻu tausaga, sa ou lagona le lē fiafia i loʻu olaga.” Sa avea o ia ma se tasi e pulea e fualaau faasāina, ma o se tagata solitulafono lotomaaa. “Na matuā leagafaia lava loʻu olaga ona o le auala sa ou faaleaga ai loʻu lava tino ma le auala na ou faia ai isi.

“I le aʻoga, sa ou mātauina se teine talavou ma te tupulaga faatasi i ona foliga vaaia ma lona tulaga mamā tau amio, lea e ese mai ai lava ia mai isi tamaiti. O lana faaaʻoaʻoga na uunaʻia ai aʻu ou te ola i se olaga mamā pei foʻi o ia. Ona o lana talanoa mai, na ou auai ai i le sauniga a Molimau a Ieova. E leʻi umi ae amata loa ona ou suʻesuʻe le Tusi Paia ma atiaʻe se faiā ma le Atua. I totonu o le tausaga e tasi, na ou faamamā ai loʻu olaga ma avea o se Molimau papatisoina. Ona o lenā suiga mataʻina, na ō mai ai nisi mātua i lo matou nuu ma talosaga mai, pe mafai ona ou fesoasoani i a latou fanau talavou o ē pulea e fualaau faasāina.”

Le Vai e Maua ai le Ola e Faavavau

I se tasi taimi, na fetalai atu ai Iesu i le fafine Samaria lea sa asu vai i le vaieli o Iakopo e faatatau i le “vai o le ola.” Na ia faapea atu: “A o lē e inu i le vai ou te foaʻiina atu, e lē toe fia inu lava o ia, ae o le vai lea ou te avatua mo ia, e avea o se vaipuna i totonu iā te ia e puna mai ai le ola e faavavau.” (Ioane 4:10, 14) E faaalia mai i na fetalaiga a Iesu, o loo faaataina le “vai o le ola” i sauniuniga mai le Atua mo le ola, e pei ona taʻua i lana Afioga le Tusi Paia. E mafai e na sauniuniga ona fesoasoani i tagata ina ia maua le ola e faavavau. O le vala pito sili ona tāua o le vai faafaatusa lenei, o le taulaga togiola a Keriso Iesu. Na fetalai Iesu, “Ona o le alofa tele o le Atua i le lalolagi, na ia foaʻi mai ai lona Atalii e toʻatasi, ina ia lē fano tagata uma e faatuatua iā te ia, a ia maua le ola e faavavau.”—Ioane 3:16.

Ua amata nei ona matuā faatāuaina e Alfonso lea na taʻua muamua, le “vai o le ola” mai le Atua. Na ia faapea mai e uiga iā i latou sa tumau pea i o latou olaga solitulafono ma le pulea e fualaau faasāina: “Ua maliu si oʻu uso matua faapea foʻi ma isi aʻu uō sa iai. O le poto o le Afioga a le Atua lea na laveaʻiina aʻu mai le oti. O lea, ou te faafetai ai i sauniuniga faaleagaga mai iā Ieova, lea ua ou maua ai le ola.” E lē gata i lea, ona o mea na ia aʻoaʻoina mai le Afioga a le Atua, ua taulaʻi atu nei Alfonso i le maua o le ola e faavavau i le lalolagi fou lea na folafola mai e le Atua.—2 Peteru 3:13.

O se Valaaulia mo Tagata Uma

I le tusi mulimuli lava o le Tusi Paia, e tatou te iloa ai le faamatalaina o “se vaitafe o le vai o le ola, e manino e pei o se tioata, o loo tafe mai i le nofoālii o le Atua ma le Tamaʻi Mamoe.” (Faaaliga 22:1) O loo faaata mai e le vaitafe sauniuniga faaleagaga a le Atua, lea e fesoasoani e toe faafoʻisia ai tagata i le tino lelei atoatoa lea sa iā Atamu ma Eva i le amataga.

Ina ua uma ona faamatala mai lenā vaitafe, na  faaauau mai le tala i le aumaia o le valaaulia lenei: “So o se tasi e manaʻo i ai, ia ave fua le vai o le ola.” (Faaaliga 22:17) I aso nei, ua mafai ona oo atu lenei valaaulia i le lalolagi atoa. I tausaga taʻitasi, ua faaaluina e Molimau a Ieova mai i atunuu e sili atu i le 235, le piliona itula e fesoasoani ai i tagata ina ia latou iloa le poto mai le Tusi Paia lea e maua ai le ola.

Po o e galala i le fia taumafa i le vai o le ola? E ala i le taumafaina o le vai manino, o se isi faaupuga, e ala i le aʻoaʻoina ma le faaaogāina lelei o sauniuniga mai i Lē na faia i tatou, e mafai ai foʻi e oe ona iai faatasi ma i latou o ē ua “teua oloa mo i latou lava o le faavae lelei mo le lumanaʻi, ina ia latou taofimau i le ola moni.”—1 Timoteo 6:19.

[Faamatalaga faaopoopo i le itulau 14]

E pei lava ona mafai e le vai ona faamamāina i le itu faaletino, e mafai foʻi e upu moni o le Tusi Paia ona faamamāina i tulaga tau amio ma le faaleagaga

[Pusa/Ata i le itulau 15]

LE AUALA NA MAUA AI LE VAI I VAITAIMI O LE TUSI PAIA

I vaitaimi o le Tusi Paia, sa faia e tagata ni taumafaiga filigā ina ia maua le vai latou te manaʻomia. Sa ʻeli e Aperaamo ma Isaako vaieli e latalata i Peresepa, ina ia faamautinoa ua lava le vai mo o latou aiga ma lafumanu.—Kenese 21:30, 31; 26:18.

E masani ona lē sua vaieli papaʻu pe a faagasolo se vaitaimi umi o mugālā. Ina ia sua pea se vai, e manaʻomia ona loloto le vaieli. (Faataoto 20:5) O se tasi o vaieli i Lakisa, e 144 futu (44 mita) le loloto. O le isi vaieli o loo i Kipeona, e sili atu i le 80 futu (25 mita) le loloto ae 35 futu (11 mita) le lautele. Ina ia ʻeli lenā vaieli, e manaʻomia ona aveese le pe ā ma le 3,000 tone o papa. Sa taʻu atu e le fafine Samaria lea na alu ifo e asu vai i le vaieli a Iakopo, iā Iesu e faapea: “E loloto le vaieli.” O le loloto o vaieli i inā, pe tusa e 75 futu (23 mita) le maualalō.—Ioane 4:11.

O le isi mea sa maua ai le suāvai i Sasaʻe Tutotonu anamua, o faataanoa vai e vane i le papa. E teu i faataanoa vai nei le vai i taimi o timuga mai le masina o Oketopa e oo iā Aperila. E ʻeli alāvai i auvae mauga ina ia faatafe mai ai le vai i totonu o le faataanoa. E vaneina e tagata Isaraelu papa ia maua ai se faataanoa vai telē e teu ai vai.—2 Nofoaiga a Tupu 26:10.

O le asuina o vai mai i vaieli ma faataanoa vai e vane i papa, o se galuega faigatā tele, ma o loo faigatā pea. Sa faia e ni fafine e pei o Repeka ma afafine o Ietero se galuega tāua tele, o le asuina mai lea o vai mo o latou aiga ma lafumanu i aso uma.—Kenese 24:15-20; Esoto 2:16.

[Ata i le itulau 15]

O Alfonso i aso nei, o loo ia faasoa atu le Afioga a le Atua