Ia Aʻoaʻo Lau Fanau

Sa Faia Pea e Samuelu le Mea Saʻo

PO UA e vaai i ni tagata o faia ni mea leaga?— * Na vaai Samuelu i tagata faapena. Sa nofo o ia i se nofoaga e te ono manatu e lē mafai ona faia ai e nisi ni mea leaga. O le fale fetafaʻi o le Atua, po o le nofoaga mo le tapuaʻiga, i le aai o Sailo. I le silia ma le 3,000 tausaga ua mavae, seʻi o tatou vaai pe na faapefea ona avea le fale fetafaʻi ma aiga o Samuelu.

A o leʻi fanau mai Samuelu, sa manaʻo tele lona tinā o Hana i se pepe. A o asiasi atu Hana i le malumalu, sa ōle atu i le Atua e tusa ai o lona manaʻo. Sa ia tatalo faatauanau lea na tete ai ona laugutu. O lea sa manatu ai Eli le faitaulaga sili i le fafine faapea ua onā. Peitaʻi ina ua ia iloa e lē o onā, ae ona o lona matuā faanoanoa, ona faamanuia atu lea o Eli e ala i le faapea atu, “Ia foaʻi mai foʻi e le Atua o Isaraelu le mea na e faatoga atu ai.”— 1 Samuelu 1:17.

Mulimuli ane, ina ua fanau mai Samuelu sa matuā fiafia tele Hana, ma o lea na ia faapea atu ai i lana tane o Elekana, ‘O le taimi lava e teʻa ai Samuelu ma le susu, o le a ou avatu iā te ia i le fale fetafaʻi, e auauna ai i le Atua.’ Ma o le mea lenā na ia faia! I le taimi lenā, pe ā ma le fā i le lima tausaga le matua o Samuelu.

Ua matuā toeaina Eli, ma o ona atalii, o Hofeni ma Fineaso, ua lē tapuaʻi iā Ieova i le auala saʻo. Ua la faia amioga le māmā ma fafine o ē na asiasi ane i le fale fetafaʻi! O le a sou manatu, o le ā sa tatau ona faia e lo la tamā?—Ioe, sa tatau ona ia matuā aʻoaʻi atu iā te i laʻua ma aua nei faatagaina i laʻua e faia na mea leaga.

Ua tuputupu aʻe Samuelu i le fale fetafaʻi, ma atonu ua amata ona ia iloa mea leaga o loo faia e le fanau a Eli. Pe na faataʻitaʻi i ai Samuelu i a la faaaʻoaʻoga?— E leai, sa faaauau pea ona ia faia le mea saʻo, e pei lava ona aʻoaʻoina ai o ia e ona mātua. E lētioa la, ona matuā toʻasā tele Ieova iā Eli. O lea na ia auina atu  ai lana perofeta e taʻu atu iā Eli, o le a ia faasalaina lona aiga aemaise lava ona atalii leaga.—1 Samuelu 2:22-36.

Sa faaauau pea ona auauna Samuelu faatasi ma Eli i le malumalu. O lea la i se tasi pō a o moe Samuelu, na ia lagona ai se leo o valaau i lona igoa, o lea na ia tamoʻe atu ai iā Eli, ae na faapea atu Eli, ou te leʻi valaau iā te oe. Na toe tupu le mea lava lenā e tasi. O lea la, i le taimi lona tolu na toe faalogoina ai e Samuelu le valaau, ona fai atu lea o Eli iā Samuelu ia faapea ona e tali atu, “Fetalai mai ia Ieova e, auā o loo faalogologo atu lau auauna.” Ina ua tali atu faapena Samuelu, ona fetalai atu loa lea o Ieova iā te ia. Pe e te iloa o le ā na fetalai atu ai Ieova iā Samuelu?—

Ua taʻu atu e Ieova iā Samuelu lana fuafuaga i le faasalaina o le aiga o Eli. Ma i le taeao na sosoo ai sa matuā fefe lava Samuelu e faailoa atu iā Eli le mea na fetalai mai ai Ieova iā te ia. Ae na ʻaiʻoi atu Eli iā Samuelu, “Aua lava neʻi e nanā iā te aʻu.” O lea na taʻu atu ai e Samuelu iā Eli mea uma na fetalai mai ai Ieova o le ia fai—e pei foʻi ona faailoa atu e Lana perofeta iā Eli i le taimi muamua. Ma na tali atu Eli: “Ia faia e ia [Ieova] le mea e finagalo i ai o ia.” Mulimuli ane na fasiotia Hofeni ma Fineaso, ma na oti ai foʻi ma Eli.—1 Samuelu 3:1-18

I le taimi lenā, “ua tupu Samuelu, sa iā te ia Ieova.” Atonu i le taimi lenā ua oo i le tulaga talavou Samuelu, ma o le taimi sili lenā ona tāua o le olaga o se talavou. Pe e te manatu e faigofie mo Samuelu ona faaauau i le faia o le mea saʻo e ui lava e lē o faapena isi?—E ui ina lē faigofie, ae sa auauna ma le faamaoni Samuelu iā Ieova i lona olaga atoa.—1 Samuelu 3:19-21.

Ae ā oe? Po o e fia manaʻo e pei o Samuelu a o e tuputupu aʻe? Po o le a e tausisi i le faia o le mea saʻo? Po o le a faaauau ea ona e mulimuli ma usitaia aʻoaʻoga a le Tusi Paia, ma mea o loo aʻoaʻoina ai oe e ou mātua. O le faia faapea, o le a e faafiafiaina ai Ieova ma ou mātua.

[Faaopoopoga i lalo]

Fesili:

• Na faapefea ona auauna Samuelu iā Ieova i le fale fetafaʻi?

• O ā ni luʻi na fesagaʻi ma Samuelu i inā?

• O ā ni faaaʻoaʻoga ua faataatia e Samuelu mo talavou?