E na o le Atua e Mafai Ona Faasaoina le Lalolagi

“O SE MAA TĀUA FEILAFI E LANU MOANA MA PAʻEPAʻE.” O le faamatalaga lenā a Edgar Mitchell o se tagata faimalaga o le vateatea, ina ua ia vaavaai atu i le matilatila mai o le lalolagi i le vateatea.

Sa tele sauniuniga na faia e le Atua e saunia ai le lalolagi mo tagata. Na faagaeetia agelu e “alalaga fiafia” ona o mea na ia faia. (Iopu 38:7) I lo tatou suʻesuʻeina o mea mataʻina o lenei paneta, e tatau foʻi la ona tatou alalaga fiafia. E tele vala eseese ma lavelave o le siʻosiʻomaga lea ua mafai ai ona faatumauina le ola i le lalolagi. I se tasi o na vala ua sili ona masani ai tagata, e faaaogā e laau le malamalama mai le lā, le kasa kaponi mai le ʻea, ma le vai e maua ai ana meaʻai. O le auala lea e maua mai ai le okesene, lea e matuā tāua mo le faatumauina o le ola.

Ua faaalia mai le Tusi Paia ua tuuina mai e le Atua i tagata le vaavaaiga o le lalolagi. (Kenese 1:28; 2:15) Peitaʻi, ina ia paleni vala eseese o meaola ma lo latou siʻosiʻomaga, e tatau ona iai i tagata le uunaʻiga saʻo. O lea la, e tatau ona olioli o ia i lona nofoaga i le lalolagi. E tatau ona ia manaʻo e faatumauina lona matagofie. Ae sa tuuina i le tagata le saʻolotoga e filifili ai, ma sa iai la le avanoa e filifili ai le tagata e faaleaga ma faaaogā sesē ai le lalolagi. O le mea tonu lava lenā ua fai e tagata. Ua matuā mataʻutia aafiaga o le faatalalē ma le matapeʻapeʻa o tagata.

O nisi nei o faafitauli: (1) O le tāina o le vaomatua ua lē mafai ai ona mitia le kasa kaponi i le lalolagi, ma o le māfuaaga lea ua tele ai fesuiaʻiga o le tau. (2) O le faateleina o le faaaogāina o vailaau, ua faatamaʻia ai iniseti e aogā mo le faafeusuaʻia o laau totō. (3) O le soona fagotaina o ogāsami ma vaitafe ua faaitiitia ai iʻa o le sami. (4) O le soona faaaogāina o punaʻoa faalenatura ua tau leai ai ni mea o totoe mo tupulaga fai aʻe, ma ua saosaolaumea i le atili vevela o le lalolagi. Ua faasino atu nisi tagata suʻesuʻe o le siʻosiʻomaga i le tafetafea ese ma le liu suāvai o poloka aisa tetele i le Atika ma le Anetatika, o faamaoniga ia o le faasolosolo ina vevela atili le lalolagi.

I le faatupulaʻia o mala faalenatura, ua faapea mai ai nisi e peiseaʻī o loo tetee mai le lalolagi, lea ua tele ai puapuaga o tagata. Na tuuina mai e le Atua le lalolagi e nonofo ai tagata e aunoa ma se totogi. (Kenese 1:26-29) Peitaʻi, e foliga mai i mea o loo tutupu i le taimi nei, ua faaalia ai e tagata le leai o so latou faanaunauga e faatumauina le matagofie o le lalolagi. Nai lo lea, ua uaʻi atu tele tagata i o latou lava faanaunauga ma gaoioiga manatu faapito. Ua pei i latou o ni tagata nofo lisi e lē faamoemoeina, “o loo faaleagaina le [lalolagi]” e pei ona valoia mai le Faaaliga 11:18.

Ua faaalia mai valoaga o le Tusi Paia o Ieova le Atua, o Lē ou le malosi uma lava, ma o Lē na faia vala eseese uma o le siʻosiʻomaga o loo faatumauina ai le ola, ua ia poloaʻi mai ua oo mai le taimi e “aveesea” ai tagata leaga. (Sefanaia 1:14; Faaaliga 19:11-15) A o leʻi faaleagaina e tagata le lalolagi aoao, o le a gaoioi le Atua, ma ua matuā lata mai lava nai lo le mea o loo tatou faatalitalia. * (Mataio 24:44) O le mea moni, e na o le Atua lava e mafai ona faasaoina le lalolagi.

[Faaopoopoga i lalo]