E Mafai e le Tusi Paia Ona Suia Olaga

Na faapefea ona avea se fafine sa laʻu faananā taimane ma gaoi i lana galuega, ma tagata e galue faamaoni? Na faapefea ona maua se olaga aogā e se fafine na taumafai faalua e pule i lona ola? O le ā le auala na mafai ai ona tuu masaniga leaga a se tagata e ʻai ʻava ma ʻai fualaau faasāina? O a latou faamatalaga nei.

FAAMATALAGA O LONA OLAGA

IGOA: MARGARET DEBRUYN

TAUSAGA: 45

ATUNUU: BOTSWANA

TALAAGA: GAOI MA LAʻU FAANANĀ OLOA

O LOʻU OLAGA SA IAI: O loʻu tamā o le Siamani ae na avea ma tagatānuu o le vaega o Aferika ua taʻu nei o Namibia. O loʻu tinā e mai Botswana, o le ituaiga o Mangologa. O Gobabis i Namibia na ou fanau ai.

I tausaga i luma mai o le 1970, na pulea malosi Namibia e Aferika i Saute ma faamalosia ai le tulafono ia nonofo ese tagata papaʻe mai tagata lanu i taulaga ma nuu. Na faamalosia oʻu mātua e teteʻa ona e eseese o la lanu. Ona matou toe foʻi lea ma si o matou tinā ma oʻu uso ma tuagane e nonofo i Ghansi, i Botswana.

I le 1979, na ou alu ai e faauma laʻu aʻoga i Lobatse, Botswana ma sa ou nofo i oʻu mātua fai. Na maua mulimuli saʻu galuega ofisa i se fale fai taavale. Ae o le manatu na ou ola aʻe ma aʻu, e lē tausia e le Atua tagata ae ua tuu mai i le tagata, e pule o ia i le auala e maua ai mea e tausi ai lona aiga.

Ona o laʻu galuega e faamoemoeina, na faigofie ai ona ou ave faananā mea fai taavale mai le galuega. Ae a oo i pō e afea ai e nofoa afi lo matou taulaga, e matou te ō atu ma aʻu uō e vaai ni mea e gaoi mai ai. Sa ou galue foʻi e laʻu faananā taimane, auro ma apamemea. Na oo ina ou faaaogā fualaau faasāina, faamisa ma sauā, ma na tele aʻu uō tama na fai.

Na tuli aʻu mai laʻu galuega i le 1993 ina ua maua laʻu gaoi. E aunoa ma saʻu uō na fia sōsō mai i le fefe ina neʻi maua ai foʻi ma ia. Na tigā ai lava loʻu loto ma ou faapea ane, e lē taitai oʻu toe talitonu i se isi.

 LE AUALA NA SUIA AI E LE TUSI PAIA LOʻU OLAGA: I le 1994, na matou feiloaʻi ai ma misionare Molimau a Ieova o Tim ma Virginia. E matou te talanoa i mālōlōga o aoauli i laʻu galuega fou, ma la fesoasoani mai ia ou iloa le Tusi Paia. Ina ua matou masani lelei, na ou fai i ai e ō atu i loʻu fale e faaauau ai aʻu lesona.

Na vave lava ona ou malamalama e ao ona sui loʻu olaga pe a ou manaʻo e faafiafia le Atua. Na ou iloa mai le 1 Korinito 6:9, 10, “o ē e faitaaga, . . . o ē e gāoi, o ē e matapeʻapeʻa, o ē e onanā, o ē e fai upu masoā, ma ē e taufaavalea, e lē fai mo latou tofi le malo o le Atua.” Na faasolosolo ona tuu aʻu amioga leaga. Na tuu loʻu gaoi. Na matou lē toe feoaʻi ma laʻu kegi ulavavale. Ma o le faamalosi mai o Ieova na tuu ai foʻi ma aʻu uō tama.

LE AUALA NA AOGĀ AI IĀ TE AʻU: Na ou taumafai malosi lava ia mafai ona pulea loʻu ita, ma tuu le ee i laʻu fanau pe a iai se faalētonu. (Efeso 4:31) Ou te taumafai lava e talatalanoa filemu i ai. O le faia faapea ua maua ai iʻuga lelei ma ua māfana ai ma lo matou aiga.

bUa iai le faatuatuaga o i latou na matou uō faapea ma oʻu tuaoi iā te aʻu. Ua avea aʻu o se tagata e faigaluega faamaoni e tuu mai i ai le vaaiga o oloa ma tupe. Ma ua mafai ai ona ou tausia aʻu a o faaaogā le tele o loʻu taimi e aʻoaʻoina isi i le Tusi Paia. Ou te ioe atoatoa i upu o le Faataoto 10:22: “O le faamanuia a Ieova, o lea e faatamaoaiga aʻi; na te lē faaopoopo i ai se tigā.”

FAAMATALAGA O LONA OLAGA

IGOA: GLORIA ELIZARRARÁS DE CHOPERENA

TAUSAGA: 37

ATUNUU: MEKISIKŌ

TALAAGA: TAUMAFAI E PULE I LE OLA

O LOʻU OLAGA SA IAI: Na ou ola aʻe i le vaipanoa maumea o Naucalpan, i le Aai o Mekisikō. O oʻu uiga mai loʻu laʻitiiti ou te lē faalogo i se isi ae ou te fiafia i patī. O le 12 o oʻu tausaga na ou ulaula ai, o loʻu 14 na ou inu ʻava ai, ae o loʻu 16 na ou tofo ai i fualaau faasāina. E leʻi leva ae ou lē toe nofo i loʻu aiga. E toʻatele aʻu uō mai i aiga lē lelei o ē na faileagaina e ala i le fasi a lē o upu o tala. Na lē tāua le olaga iā te aʻu, ma e faalua ona ou taumafai e pule i loʻu ola.

O le 19 o oʻu tausaga na ou galue ai i le faaaliga o ofu, ma paga ma alii i faatasiga tāua. Na matou masani ai ma tagata aloaʻia o le malo ma tagata faafiafia. Na oo ina fai loʻu aiga ma laʻu fanau, ma ou te faia uma filifiliga a le matou aiga. Ae e leʻi uma ai loʻu ulaula ma le inu, faapea ma le patī solo. O laʻu gagana e tumu i upu leaga ma ou te fiafia foʻi e fai tala lē mamā e toē ai. E maua foʻi aʻu i le ita leaga.

O le olaga foʻi lea o tagata sa ou fiafia i ai. Ma atonu i le latou vaai mai, e leai ma se faalētonu i loʻu olaga. Ae ou te leʻi maua  se fiafia, ma na leai foʻi se uiga o loʻu olaga.

LE AUALA NA SUIA AI E LE TUSI PAIA LOʻU OLAGA: I le 1998, na amata ai ona matou talanoa ma Molimau a Ieova i le Tusi Paia. Na ou iloa ai mai le Tusi Paia, e iai le faamoemoe tāua. Ma o le finagalo o le Atua, ia avea le lalolagi ma Parataiso, ma o le a ia toe faatutūina mai ē ua oti, ma e mafai ona ou maua lea faamoemoe.

Na ou iloa ai foʻi, e iloa le alofa o le tagata i le Atua pe afai e usiusitaʻi. (1 Ioane 5:3) O se luʻi tele lea iā te aʻu i le amataga ona ou te lē fia talia se fautuaga mai se isi. Peitaʻi ane, na oo ina ou iloaina e lē o iā te aʻu le tomai e faatonu ai oʻu ala. (Ieremia 10:23) Na ou talosaga atu iā Ieova ina ia taʻitaʻi iā te aʻu. Ma ia fesoasoani mai ia ou ola e tusa o ana taʻiala ma aʻoaʻo laʻu fanau ia taumamao mai mea na ou faia.

E leʻi faigofie ona suia oʻu uiga, ae na ou taumafai lava e faaaogā le fautuaga mai le Efeso 4:22-24: “Ia outou tuu ese le tagata tuai e tusa ai ma a outou amioga sa faia muamua . . . ma ia oofu i le tagata fou na faia e tusa ma le finagalo o le Atua, i le amiotonu moni ma le faamaoni.” O le uiga o le ofu i le tagata fou iā te aʻu, ia ou tuu masaniga leaga e iai le ulaula, ma aua le toe palauvale. Pe tusa o le tolu tausaga o fai aʻu taumafaiga ina ia mafai ona ou papatiso ma avea ai ma Molimau a Ieova.

Na ou taumafai foʻi e fai lelei oʻu tiute o se avā ma o se tinā. Na ou faatatauina le fautuaga mai le 1 Peteru 3:1, 2: “[O] outou avā, ia gauaʻi atu i a outou lava tane, ma afai e lē usiusitai nisi i le upu o le afioga a le Atua, e mafai ona maua i latou i le amiolelei a a latou avā e aunoa ma se upu, auā ua latou vāaitino i a outou amioga mamā ma le matuā faaaloalo.”

LE AUALA NA AOGĀ AI IĀ TE AʻU: Ou te matuā faafetai lava iā Ieova ona o lea ua ou maua le faamoemoe i le lumanaʻi. Ua iai iā te aʻu uiga lelei ua aogā i le tausia lelei o laʻu fanau. E iai taimi e faasala ai aʻu e loʻu loto ona o mea na ou faia, ae o loo silafia lelei e Ieova loʻu loto. (1 Ioane 3:19, 20) O le mea ua ou mautinoa, ua puipuia aʻu e ala i le mulimuli i tapulaa a le Tusi Paia ma ua ou maua ai le filemu.

FAAMATALAGA O LONA OLAGA

IGOA: JAILSON CORREA DE OLIVEIRA

TAUSAGA: 33

ATUNUU: PASILI

TALAAGA: ʻAI ʻAVA MA ʻAI FUALAAU FAASĀINA

O LOʻU OLAGA SA IAI: Na ou fanau i Baģe, o se aai i Pasili e lata i le tuaoi ma Uruguay, e tusa ma le 100,000 tagata e nonofo ai. O auala autū e maua ai galuega, o faatoʻaga ma lafu povi, ma o olaga masani na o lea vaipanoa. * E matitiva le vaipanoa na ou ola aʻe ai ma na tele ai le pisa ma le vevesi ona o kegi, ma o se mea masani i talavou le ʻai ʻava ma le tagofia o fualaau faasāina.

Na amata ona ou inu, ula mariuana, ma fiafia i musika e taʻu o le heavy-metal ina ua ou lē toe aʻoga. Ou te leʻi talitonu i se Atua auā iā te  aʻu, pe a fua atu i mafatiaga o le lalolagi ma le vevesi, ailoga la e iai se Atua.

Sa ou fiafia e tā kitara ma fatu pese ma o le tusi o Faaaliga e tele ina maua mai ai faaupuga o aʻu pese. Na oo ina ou tago i fualaau faasāina e sili ona malolosi ona e leʻi taulau laʻu faaili e tusa ma loʻu faanaunauga. E lē taitai oʻu popole ina neʻi ova aʻu fualaau ma ou oti ai. Ona o le auala foʻi lenā na feoti ai le tele o tagata pepese sa ou fiafia i ai.

Ou te aitalafu tupe i le tinā o loʻu tinā ma ave e faatau ai aʻu fualaau. Ae a fesili mai i mea e faaalu i ai tupe, ou te pepelo i ai. Ua atili ona faalētonu loʻu olaga ona na ou fiafia foʻi i faiga faataulāitu. Sa ou faapea o le a mananaia ai aʻu pese e fatu.

LE AUALA NA SUIA AI E LE TUSI PAIA LOʻU OLAGA: Na faasolosolo ona sui oʻu manatu ma uiga ina ua matou suʻesuʻe ma Molimau a Ieova i le Tusi Paia, ma ou auai i a latou sauniga. Na tuputupu mālie aʻe ai iā te aʻu le naunau e fia ola ma ia fiafia. O lea na ou manaʻo loa e ʻoti loʻu lauulu uumi. Na ala ona faatutupu ona sa iā te aʻu le lē fiafia ma le uiga tetee. Ae o lea ua ou manaʻo lava ia fiafia mai le Atua iā te aʻu, ma na tatau loa ona tuu le ʻai ʻava ma ʻai fualaau faasāina ma le ulaula. Na tatau foʻi ona sui ma pese ou te fiafia i ai.

O le taimi muamua na ou alu ai i sauniga a Molimau a Ieova, na ou mātauina ai le mau na tusia i le puipui o le fale. E mai le Faataoto 3:5, 6, ma e faapea: “Ia e faatuatua iā Ieova ma lou loto atoa; a e aua le faalagolago i lou lava atamai. Ia e manatua o ia i ou ala uma, ona faatonuina ai lea e ia lava ou ala.” O loʻu mafaufau i lea mau na ou mautinoa ai, o le a fesoasoani mai Ieova iā te aʻu e faaleleia loʻu olaga, pe afai ou te manaʻo ai.

O le mea moni sa leʻi faigofie ona tuu loʻu olaga tuai ma aʻu masaniga leaga, na pei o loo tipi mutu loʻu lima. (Mataio 18:8, 9) Na ou iloa e lē aogā iā te aʻu ona tipitipi mālie ese ia mea, ae ia matuāʻi momotu lava ona mafai lea ona tuu. Ma o le mea lenā na fai, na tuu uma lava aʻu masaniga leaga i le taimi e tasi. Ou te leʻi toe alu foʻi i mea, pe faatasi ma tagata e oo mai ai faaosoosoga e toe foʻi ai i le leaga.

Na ou maua le fiafia i mea lelei na mafai ona ou faia, ae tuu le mafaufau i taimi ou te lē taulau ai. Na ou manatu o se mitamitaga tele le taliaina o aʻu e Ieova, pe afai ou te mamā i le tino, amio ma le faaleagaga. Na ou talosaga atu iā Ieova ma na ia fesoasoani mai ina ia ou lē toe mafaufau i mea ua tuanaʻi ae agaʻi i luma. Na iai taimi na ou lē taulau ai. Ae na ou manaʻo pea e fai laʻu suʻesuʻega, e ui o nisi taimi e leʻi teʻa loʻu onā.

E ese le manaia o le iloaina o le upu moni e uiga i le Atua mai le Tusi Paia. Ona o loo manatu mai o ia iā i tatou uma, ma o le a ia faaumatia lotu sesē, ma o loo ia lagolagoina foʻi le galuega talaʻi i le lalolagi aoao. (Mataio 7:21-23; 24:14; 1 Peteru 5:6, 7) E saʻo uma ia upu moni iā te aʻu. O lea, na ou manaʻo ai e taʻu atu i le Atua loʻu talisapaia o mea ua ia faia mo aʻu e ala i le tuuina atu o loʻu ola mo ia.

LE AUALA NA AOGĀ AI IĀ TE AʻU: Ua iā te aʻu se olaga e iai le faamoemoe. (Failauga 12:13) Ma ua ou lē toe aitalafu i loʻu aiga, ae o lea ua ou faasoa i ai mea ua ou iloa. Na ou talanoa i si tinā o loʻu tinā i le manaia o le upu moni ma ua avea foʻi o ia ma tagata tuuina atu iā Ieova. E faapena foʻi le mea ua faia e nisi o loʻu aiga faapea ma se alii sa ma tātā faatasi i le faaili.

O lea ua fai loʻu toʻalua ma ua faaaogā le tele o le ma taimi e fesoasoani ai i isi ia maua le upu moni o loo i le Tusi Paia. Ou te lagona lava le faamanuiaina tele o aʻu ona ua ou ‘faatuatua iā Ieova ma loʻu loto atoa.’

[Faaopoopoga i lalo]

[Faamatalaga faaopoopo i le itulau 29]

“Na tuputupu mālie aʻe ai iā te aʻu le naunau e fia ola ma ia fiafia”