O le ā le Uiga o le Faatuatua?

E FAAPEFEA ona e faamatalaina le faatuatua? Ua faatusa e nisi i le talitonu lea e aunoa ma le iloa o māfuaaga. Na faapea mai le tusitala Amerika o H. L. Mencken e faatatau i le faatuatua, o se “talitonuga e lē faavaea i mea e ono lē tutupu.”

Ae i le Tusi Paia, o loo faamatala ai le faatuatua e lē gata e iai le faavae ae talafeagai foʻi. Ua faapea mai le Afioga a le Atua: “O le faatuatua, o le faatalitali lea ma le mautinoa i mea ua faamoemoe i ai, o le faamaoniga manino lea o mea moni e ui ina e lē o vaaia.”—Eperu 11:1.

Pe a fua i taofi eseese e faatatau i le faatuatua, seʻi o tatou iloiloina tali i fesili o loo sosoo mai:

• E faapefea ona ese le faamatalaga a le Tusi Paia mai le manatu o tagata e uiga i le faatuatua?

• Aiseā e tāua ai ona tatou mauaina le ituaiga o faatuatua lea o loo taʻua i le Tusi Paia?

• E faapefea ona faamalosia lou faatuatua?

Se Pepa e Faamaonia ai ma Faamaoniga Maumaututū

A o tusia le tusi o Eperu, sa taatele le faaaogāina o le faaupuga Eleni lea e faaliliuina o le “faatalitali lea ma le mautinoa.” E masani ona aliaʻe i faamaumauga faapisinisi ma e faamaonia ai le mauaina o lenā mea i se taimi o i luma. O lea la, ua faapea mai se lomifefiloi e mafai ona faaliliuina faapea le Eperu 11:1: “O le faatuatua o se pepa e faamaonia ai mea ua faamoemoe i ai.”

E faapenā le faatuatua ua e faaalia, pe afai na e faatauina se oloa mai se kamupani e faamoemoeina ona e faatalitali loa lea e tiliva atu. O le lisiti na tuuina atu iā te oe, o le māfuaaga lea ua e talitonu ai i le kamupani na e faatauina mai ai le oloa. O lea la, ua avea lau lisiti ma pepa e faamaonia ai, po o le faamaoniga lea, o le a tilivaina atu oloa na e faatauina. Ae afai ua leiloa pe ua e tiaʻia le lisiti, o le a leai la se faamaoniga o oe e ana na oloa. I se tulaga talitutusa, o i latou e faatuatua o le a faataunuu e le Atua ana folafolaga, e mautinoa o le a maua le mea na latou faamoemoe i ai. I le isi itu, o i latou e leai se faatuatua, po o ē ua lē o toe faatuatua, ua latou lē agavaa e maua mea ua folafolaina mai e le Atua.—Iakopo 1:5-8.

O le vaega lona lua o le Eperu 11:1, lea o loo faaliliuina o “faamaoniga manino,” o loo iai le uiga faapea e ui e foliga mai o le tulaga lenā o loo tupu, ae e ese le tulaga moni e tusa ai ma faamaoniga manino. O se faataʻitaʻiga, e foliga mai o loo faataamilomilo le lā i le lalolagi, e oso mai sasaʻe ma goto i sisifo. Peitaʻi, o faamaoniga mai suʻesuʻega o le vateatea ma le faamatematika, ua faaalia ai e lē o le lalolagi le ogatotonu o le faataamilosaga o paneta i le lā. Pe a e masani ma talia le moni o lenā faamaoniga, ua e faatuatua la e taamilomilo le lalolagi i le lā, e ui e ese le mea o loo e vaaia. E iai le faavae o lou faatuatua, ona e lē faapea ua e talitonu i se mea e aunoa ma lou malamalama i ai, ae ua iā te oe le tomai e iloa ai le tulaga moni o mea.

O le ā le Tāua o le Iai o se Faatuatua Malosi?

O le ituaiga faatuatua lea o loo faalaeiau mai le Tusi Paia e tatau ona iai, o le faatuatua e faavae mai faamaoniga maumaututū, e tusa lava pe manaʻomia ona suia ai o tatou talitonuga. E tāua tele lenā ituaiga o faatuatua. Na tusi le aposetolo o Paulo: “A leai se faatuatua e lē mafai e se tagata ona faafiafia le Atua. O lē alu atu i le Atua e tatau ona ia talitonu e moni o ia ma o le a ia tauia ē e mananaʻo e saʻilia o ia.”—Eperu 11:6, New Century Version.

E tele luʻitau i le atiina aʻe o se faatuatua malosi. Ae a e faatatauina laasaga e fa o loo sosoo mai, o le a mafai ona e taulau.